ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓘꓶꓽ ꓫꓵꓼ ꓫꓵ ꓟ ꓙꓳ ꓡꓳ꓾ꓢꓮꓚꓣꓮꓟꓰꓠꓔꓴ ꓘꓶꓽ ꓫꓵ ꓫꓵ ꓟ ꓙꓳ ꓟ ꓠꓯꓼ ꓘꓴꓽ ꓗꓪ ꓐꓰ ꓕꓲꓽ ꓟ ꓥ ꓟ ꓡꓯꓽ ꓒꓯꓹ ꓝꓸ ꓟ ꓚꓱꓹ ꓔꓯ ꓠ ꓠꓹ ꓓꓴ ꓬꓰ ꓡꓯ= ꓮ ꓟꓶ ꓤꓶꓻ ꓦꓬꓼ ꓠꓬꓲ ꓗꓪ ꓞꓳ ꓡꓱ ꓤ ꓐꓴ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵꓻ ꓡꓯ ꓘꓳ ꓕꓯ ꓬꓲ ꓪ ꓠꓬ ꓪꓴ-ꓢ ꓟꓲ ꓕꓯ ꓞꓳ ꓤ ꓟꓲ ꓕꓯ ꓗꓪ ꓡꓯꓽ ꓒꓯꓹ ꓟꓽ ꓝꓸ ꓝꓸ ꓘꓶꓽ ꓫꓵꓼ ꓟꓽ ꓣꓴ ꓣꓴ ꓐꓰ ꓕꓲꓽ ꓡꓲꓹ ꓔꓬ ꓟ ꓮ ꓘꓶꓸ ꓙꓳ_ ꓡꓳ꓾ ꓖꓳ ꓟ ꓡꓰ ꓟꓽ ꓝꓲ ꓡꓯꓽ ꓒꓯꓹ ꓝꓸ ꓟ ꓕꓱ ꓟ ꓔꓯ ꓠꓬ ꓬꓲ ꓖꓳꓽ ꓥ ꓮꓽ ꓔꓳ ꓥ ꓐꓯ ꓢꓴ ꓟꓲ ꓙꓳ_ ꓡꓳ= ꓡꓯꓽ ꓒꓯꓹ ꓝꓸ ꓟ ꓠꓬ ꓕꓳꓽ ꓑꓬ ꓕꓯ ꓢꓲ ꓗꓪ ꓡꓯꓼ ꓟꓯꓼ ꓕꓳꓹ ꓟ ꓢꓷꓸ ꓙ ꓟꓳ ꓙ ꓓꓴ ꓕꓲꓽ ꓟ ꓡꓰ ꓥ ꓡꓳ꓾ ꓐꓰ ꓐꓯ ꓔꓬ ꓢꓴ ꓙꓳ_ ꓡꓳ= ꓟꓽ ꓥ꓾ ꓣꓳ ꓘꓴ ꓜꓲꓼ ꓞꓳ ꓘꓴ ꓠꓯꓼ ꓗꓪ ꓠꓬ ꓡꓯꓽ ꓒꓯꓹ ꓝꓸ ꓟ ꓠꓬ ꓮ ꓘꓶꓸ ꓒꓵꓽ ꓓꓰ ꓡꓰ_ ꓟ ꓥ ꓡꓳ꓾ ꓣꓳ ꓠꓬ ꓕꓱ ꓟ ꓔꓯ ꓘꓶꓽ ꓫꓵꓼ ꓣꓴ_ ꓐꓰ ꓐꓯ- ꓡꓳ=
ꓘꓶꓽ ꓫꓵꓼ ꓣꓴ ꓐꓯ ꓟ ꓠꓬ ꓫꓵꓽ ꓗꓪ ꓐꓰ ꓑꓯ ꓡꓯ ꓘꓳ ꓢꓲ ꓠꓬꓲ ꓕꓲꓽ ꓠꓲꓹ ꓕꓲ ꓪ ꓕꓲꓽ ꓫꓵ ꓡꓰ ꓒꓬꓱꓼ ꓡꓰ_ ꓟ ꓥ ꓡꓳ꓾ ꓘꓶꓽ ꓫꓵꓼ ꓣꓴ ꓟ ꓕꓱ ꓟ ꓣꓴ ꓕꓯ ꓠꓬ ꓮ ꓡꓰ ꓗꓷ ꓡꓰ_ ꓡ꓾ ꓐꓯ ꓠꓬ ꓣꓳ ꓠꓬ ꓕꓲ ꓫꓵ ꓡꓰ ꓒꓬꓱꓼ ꓡꓰ_ ꓡꓳ꓾ ꓣꓳ ꓐꓰ ꓦꓲꓻ ꓢꓲ ꓒꓽ ꓦꓲꓻ ꓢꓲ ꓟ ꓠꓬ ꓕꓲ ꓫꓵ ꓕꓲ ꓧꓪꓽ ꓠꓴ ꓔꓯ ꓙꓳ ꓟ ꓠꓬ ꓥꓪ ꓔꓯ ꓙꓳ_ ꓟ꓾ ꓥꓪ ꓔꓯ ꓙꓳ ꓟ ꓠꓬ ꓠꓴ ꓔꓯ ꓙꓳ_ ꓟ꓾ ꓒꓬꓱꓼ ꓡꓰ_ ꓟ ꓡꓰ ꓟꓽ ꓝꓲ ꓦ ꓥ ꓟꓲ ꓕꓲ ꓧꓪ ꓕꓲ ꓫꓵ ꓒꓬꓱꓼ ꓙꓲꓰ_ ꓡꓳ꓾ ꓬꓲ ꓪ ꓠꓬ ꓮ ꓕꓯ ꓥ ꓟꓲ ꓧꓹ ꓟꓽ ꓓ꓾ ꓚꓲ ꓛꓬ ꓧꓪꓽ ꓖꓳ ꓓꓱꓽ ꓠꓯꓼ ꓗꓪ ꓬꓲ ꓫꓵꓽ ꓠꓬ ꓖꓳ ꓓꓱ ꓐꓱ ꓶ ꓫꓸ ꓝꓲꓸ ꓟ ꓡꓰ ꓐꓰ ꓣꓳ ꓘꓶꓽ ꓫꓵꓼ ꓣꓴ ꓟ ꓗꓪ ꓐꓰ ꓣꓳ ꓦꓲꓻ ꓠꓬ ꓢꓲ ꓫꓬ ꓡꓰ_ ꓡꓳ꓾ ꓪꓴ-ꓢ ꓟꓲ ꓕꓯ ꓗꓪ ꓛꓲ ꓬꓰ_ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓠꓬ ꓡꓯꓽ ꓒꓯꓹ ꓝꓸ ꓟ ꓔꓯ ꓮ ꓔꓳ ꓔꓳ ꓟꓽ ꓬꓰ ꓠꓹ ꓟ ꓙꓳ ꓙꓳ ꓓꓵꓽ ꓙ ꓢꓲ ꓠꓬꓲ ꓡꓳꓹ ꓬꓰ ꓗꓪ ꓛꓲ ꓓꓵꓽ ꓙ ꓠꓬꓲ ꓠꓹ ꓟ ꓐꓱ ꓶ ꓮ ꓕꓯ ꓥ ꓟꓲ ꓢꓯꓼ ꓖꓶ ꓔꓬ ꓟ ꓥ ꓡꓳ=
ꓖꓳ ꓡꓱ ꓠꓬꓲ ꓡꓯꓽ ꓒꓯꓹ ꓝꓸ ꓟ ꓐꓯ_ ꓟ ꓠꓬ ꓘꓶꓽ ꓫꓵꓼ ꓣꓴ ꓥ ꓐꓯ_ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓢꓪꓼ ꓠꓬꓲ ꓚꓬꓹ ꓠꓬꓲ ꓕꓱ ꓔꓲ ꓣꓳ ꓠꓬ ꓥꓪ ꓐꓹꓱ ꓶ ꓙꓲ_ ꓡ꓾ ꓙꓲ ꓖꓴ ꓙꓳ_ ꓡ ꓐꓯ_ ꓟ ꓔꓯ ꓚꓬꓹ ꓠꓬꓲ ꓠ ꓗꓹ ꓡꓳ꓾ ꓡꓳꓸ ꓠꓬꓲ ꓠ ꓗꓹ ꓡꓳ꓾ ꓮ ꓡꓲꓳ ꓐꓯ ꓠꓬ ꓣꓳ ꓠꓬ ꓪꓴ-ꓢ ꓟꓲ ꓕꓯ ꓗꓪ ꓕꓲꓽ ꓧꓪꓹ ꓡꓰ ꓡꓯꓽ ꓒꓯꓹ ꓝꓸ ꓙꓲ_ ꓟ ꓑꓶ ꓓꓴ ꓥ ꓡꓳ꓾ ꓖꓳ ꓡꓱ ꓠꓬꓲ ꓣꓳ ꓡꓯꓽ ꓒꓯꓹ ꓝꓸ ꓟ ꓠꓬ ꓪꓴ-ꓢ ꓟꓲ ꓕꓯ ꓗꓪ ꓘꓶꓽ ꓫꓵꓼ ꓣꓴ ꓟ ꓠꓬ ꓮ ꓘꓶꓸ ꓣꓳꓸ ꓚꓵ_ ꓟ ꓰ ꓟꓽ ꓝꓲ ꓪꓴ-ꓢ ꓠꓲꓹ ꓡꓶꓽ ꓙꓳ ꓟ ꓑꓶ ꓓꓴ ꓙꓲ ꓢꓴ ꓢꓲ ꓤ ꓘꓴ ꓫꓲꓼ ꓞꓳ ꓠꓯꓼ ꓘꓴꓽ ꓗꓪ ꓦꓲꓻ ꓕꓴ ꓗꓪ ꓔꓲ ꓢꓴ ꓠꓬ ꓕꓱ ꓟ ꓔꓯ ꓓꓵꓽ ꓙ ꓠ ꓗꓹ ꓡꓳ꓾ ꓘꓶꓽ ꓫꓵꓼ ꓣꓴ ꓐꓰ ꓐꓯ ꓟ ꓠꓬ ꓫꓵꓽ ꓑꓯ ꓡꓯ ꓘꓳ ꓢꓲ ꓠꓬꓲ ꓪꓴ-ꓢ ꓐꓰ ꓞꓳ ꓤ ꓑꓯ ꓡꓯꓽ ꓘꓳ_ ꓟ ꓡꓰ ꓐꓰ ꓞꓳ ꓤ ꓕꓲ ꓣꓳ ꓛꓳ ꓕꓲ ꓣꓳ ꓑꓯ ꓡꓯꓽ ꓘꓳ ꓢꓲ ꓠꓬꓲ ꓪꓴ-ꓢ ꓟꓲ ꓕꓯ ꓞꓳ ꓤ ꓟꓲ ꓕꓯ ꓗꓪ ꓶꓽ ꓤ ꓫꓱꓹ ꓤ ꓙꓳ ꓟ ꓦꓲꓻ ꓘꓴꓽ ꓗꓪ ꓞꓳ ꓙꓳ ꓔꓬ ꓟ ꓥ ꓡꓳ=
