ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓔ ꓟꓼ ꓩꓴ. ꓓꓲꓻ ꓢꓴ ꓞꓲ ꓣꓳ ꓔꓯ ꓫꓬ, ꓓ ꓡꓰ ꓟ ꓚꓱ, ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓪ ꓗꓪ ꓟ ꓕꓲ ꓣꓳ ꓡꓰ ꓚꓱ, ꓬꓲꓼ ꓡ ꓢꓲ꓾ ꓪꓴ‐ꓢ ꓔꓯ ꓟꓬꓱ ꓓꓳꓽ ꓖꓶ ꓢꓲ ꓠꓬꓲ ꓬꓰ‐ꓢꓴ ꓔꓯ ꓫ. ꓟꓳ ꓐꓰ ꓐꓯ ꓔ ꓟ ꓥꓳ꓾ ꓕꓱ ꓟ ꓠꓬ ꓢ‐ꓟ‐ꓡꓲ ꓡ ꓞꓳ ꓥ ꓟ ꓔꓯ ꓡꓳ. ꓟꓳ ꓪ ꓡꓳ꓿
ꓫ ꓟꓳ ꓟ ꓠꓬ ꓙꓵꓻ ꓠꓲ, ꓬꓲ ꓙꓱꓼ ꓥ ꓡꓳ꓾ ꓡ ꓞꓳ ꓞꓲ ꓣꓳ ꓠꓻ ꓫꓬ, ꓓꓻ ꓡꓰ ꓥ ꓟꓲ ꓕꓲ ꓣꓳ ꓡꓰ ꓪꓴ‐ꓢ ꓔꓯ ꓫ ꓟꓳ ꓟ ꓥ ꓡꓳ꓿ ꓕꓱ ꓟ ꓡꓰ ꓐꓰ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯ. ꓔꓬ ꓟ ꓦꓬꓼ ꓠꓬꓲ ꓗꓪ ꓥ ꓟꓲ ꓣꓳ ꓘꓳ, ꓣꓴ ꓟꓶ_ ꓟ꓾ ꓪꓴ‐ꓢ ꓣꓱ ꓛꓰ ꓠꓬ ꓐꓯ ꓖꓴ ꓟꓽ ꓓ꓾ ꓖꓳ ꓟ ꓡꓰ ꓐꓰ ꓢꓯ. ꓔꓬ ꓟꓶ_ ꓟ꓾ ꓙꓻ ꓫꓱꓽ ꓐ ꓡ ꓟ꓾ ꓕꓲ ꓦꓲꓻ ꓢꓴ ꓐꓰ ꓗ, ꓛꓲ ꓛꓲ ꓔꓬ ꓟꓶ_ ꓟ꓾ ꓣꓳ ꓧꓪ ꓖꓳ ꓓꓱ ꓕꓲ ꓒꓳ, ꓐꓱ ꓶ ꓘꓳ, ꓣꓴ ꓟꓶ_ ꓟ ꓣꓱ ꓛꓰ ꓔꓯ ꓟꓽ ꓟꓲ ꓡꓰ ꓡꓰ ꓟꓬꓱ ꓓꓳꓽ ꓖꓶ ꓠ, ꓟ꓾ ꓫ. ꓟꓳ ꓠ, ꓟ ꓥ ꓡꓳ꓿ ꓖꓳ ꓟ ꓡꓰ ꓐꓰ ꓣꓳ ꓚꓳ ꓡꓳ ꓗꓪ ꓠꓶꓽ ꓛꓳ ꓕꓲ ꓛꓳ ꓐꓴ ꓥ ꓡ꓾ ꓣꓳ ꓕꓲ ꓦꓲꓻ ꓡ ꓞꓳ ꓐꓴ ꓥ ꓡ꓾ ꓕꓲ ꓪ ꓟꓬꓱꓽ ꓬꓰ ꓢꓴ ꓥ ꓡ꓾ ꓣꓳ ꓠꓶꓽ ꓞ, ꓟ ꓮ ꓙꓵ ꓠꓯꓼ ꓗꓪ ꓐꓰ ꓮ ꓕꓯ ꓟꓲ ꓙꓻ ꓡꓯ ꓘꓳ_ ꓟ ꓗꓪ ꓫ ꓟꓳ ꓗꓴ. ꓠ, ꓟ ꓥ ꓟꓲ ꓣꓳ. ꓚꓵ_ ꓡꓳ꓾ ꓕꓱ ꓡꓱ ꓫ. ꓟꓳ ꓐꓰ ꓐꓯ ꓘꓶꓽ ꓗꓪ ꓐꓰ ꓖꓶ ꓢꓴ ꓥ ꓟꓲ ꓫ. ꓟꓳ ꓢꓴ ꓥ ꓟꓲ ꓠꓲ, ꓡꓱ ꓗ, ꓛꓲ ꓓꓴ ꓙꓳ_ ꓡꓳ꓿
ꓬꓰ‐ꓢꓴ ꓡꓰ ꓢ‐ꓟ‐ꓡꓲ ꓖꓳ ꓕꓲ ꓣꓳ ꓔꓯ “ꓠꓴ ꓙꓵꓻ ꓠꓲ, ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓾” ꓐꓰ ꓐꓯ ꓔ ꓟ ꓥ ꓡꓳ꓿ ꓙꓵꓻ ꓠꓲ, ꓐꓰ ꓫ ꓟꓳ ꓗꓴ._ ꓟ ꓠꓬ ꓪꓴ‐ꓢ ꓐꓰ ꓠꓶꓽ ꓞ, ꓠ, ꓟ ꓚꓬꓴ ꓙ ꓟꓶ ꓠ, ꓟ ꓛꓲ ꓡꓰ ꓝꓲ_ ꓟ ꓚꓱ, ꓥ ꓡꓳ꓿
