ꓢꓲꓽ ꓫꓬ ꓦꓲꓻ ꓔꓯ ꓫꓬ ꓡꓰ ꓝꓲˍ ꓟ (Sunday reflection )
ꓧꓪ. ꓧꓪ ꓠꓬ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (32) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 2ꓽ13‐22 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓢꓲꓽ ꓫꓬ ꓦꓲꓻ ꓔꓯ ꓫꓬ ꓡꓰ ꓝꓲˍ ꓟ ꓚꓱ, ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓬꓴ‐ꓔ ꓡ ꓞꓳ ꓐꓴ ꓦꓲꓻ ꓘꓳꓼ ꓑꓮꓲꓽ ꓠꓶꓽ ꓡ ꓠꓬꓲ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓓꓯ ꓙꓰ ꓡꓳ꓿
ꓢꓲꓽ ꓫꓬ ꓦꓲꓻ ꓗꓪ ꓮ ꓠꓬꓲꓽ꓾ ꓮ ꓣꓳ ꓐꓰ ꓓꓱꓽ ꓑꓶ ꓪꓴꓽ ꓢꓴ ꓐꓴ ꓐꓰ ꓒꓴ ꓑ ꓢꓴ ꓐꓴ ꓠꓬꓲ. ꓠ. ꓔꓬ ꓟ ꓔꓯ ꓟꓳ ˍ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓦꓲ ꓦ ꓡꓰ ꓒꓰ, ꓓꓴ ꓕꓲ ꓟ ꓫꓬ, ꓢꓲ ꓢꓲꓽ ꓫꓬ ꓦꓲꓻ ꓗꓪ ꓪꓴꓽ ꓜꓽ ꓟ ꓮ ꓙꓵꓽ ꓔꓯ ꓗꓼ ꓓꓳ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓠꓬ ꓬꓴ‐ꓔ ꓡ ꓞꓳ ꓠꓬ ꓬꓲ ꓔꓯ ꓠꓴ ꓕꓱ ꓟꓬ ꓙꓰꓽ ꓬꓰ ꓠ, ꓟ ꓙꓵꓽ ꓪ ꓙꓳˍ ꓟ ꓥꓪꓽ ꓠꓴ ꓢꓷ. ꓡꓰ ꓠ, ꓟ ꓮ ꓫꓵꓽ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓬꓰ ꓟꓳ. ꓖꓶˍ ꓐꓯˍ ꓐꓰ ꓠꓻ ꓠꓬꓲˍ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓢꓲꓽ ꓫꓬ ꓦꓲꓻ ꓕꓱ ꓟ ꓒꓯ, ꓗꓷ ꓢꓲ ꓠꓬꓲ ꓢꓽ ꓠꓬꓲ ꓠꓯ.ꓼ ꓗꓪ ꓥꓪ ꓫꓬ, ꓔꓳ, ꓗꓷ ꓥꓳ ꓐꓰ ꓐꓯ ꓖꓶ ꓡꓳ꓿ ꓖꓳ ꓕꓯ ꓬꓴ ꓔ ꓡ ꓞꓳ ꓡꓰ ꓢꓲꓽ ꓫꓬ ꓦꓲꓻ ꓕꓱ ꓟ ꓡꓲ ꓞꓲ ꓛꓳꓼ ꓘꓳꓼ ꓫꓬ, ꓗꓷ ꓗꓷ ꓕꓯ ꓢꓲ ꓓꓳ ꓡꓰ ꓟ ꓥꓳ꓿
ꓠꓴ ꓠꓽ ꓮ ꓡꓲ ꓐꓰ ꓢꓽ ꓠꓬꓲ ꓟ ꓠꓯꓼ ꓗꓪ ꓫꓬ, ꓓꓳ ꓗꓷ ꓐꓯ ꓡ? ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓐꓯ ꓟ ꓢꓲꓽ ꓫꓬ ꓦꓲꓻ ꓠꓬ ꓬꓲ ꓖꓳ ꓓꓱ ꓔꓯ ꓐꓯˍ ꓟ ꓥ ꓡꓳ꓿ ꓪꓴ‐ꓢ ꓔꓬ ꓔꓶ. ꓥ ꓟ ꓢꓲꓽ ꓫꓬ ꓦꓲꓻ ꓪꓽ ꓘꓴ ꓦꓲꓻ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓮ ꓫꓵꓽ ꓑꓶ. ꓓꓴ ꓠꓲ, ꓢꓲ ꓡ? ꓠꓲ, ꓟ ꓩꓴ ꓶ ꓐꓯ ꓐꓰ ꓐꓯ ꓠꓬ ꓬꓲ ꓟꓲ ꓠꓯ ꓡ ꓞꓳ ꓠꓲ, ꓟ ꓗꓪ ꓐꓰ ꓠꓲ. ꓢꓲ ꓠꓲ, ꓟ ꓩꓴ ꓟ ꓟꓽ ꓥ꓿ ꓢꓲꓽ ꓫꓬ ꓦꓲꓻ ꓪꓽ ꓘꓴ ꓦꓲꓻ ꓗꓪ ꓪꓴ‐ꓢ ꓔꓬ ꓟ ꓪꓴ. ꓠꓬꓲ ꓢꓲꓽ ꓢꓲꓽ ꓫꓬ ꓫꓬ ꓙꓳ ꓝꓲ ꓠ, ꓟ ꓣꓳ ꓚꓵ, ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓕꓱ ꓙꓵ, ꓗꓪ ꓢꓲꓽ ꓫꓬ ꓦꓲꓻ ꓪꓽ ꓘꓴ ꓦꓲꓻ ꓗꓪ ꓶꓻ ꓡꓯꓼ ꓬꓰ ꓔꓶ. ꓒꓴ ꓑ ꓔꓶ. ꓟꓲ ꓠꓯ ꓕꓲ ꓒꓳ, ꓐꓱ ꓶ ꓡꓰ ꓬꓰ ꓔꓬ ꓟ ꓥ ꓡꓳ꓿ ꓪꓽ ꓘꓴ ꓦꓲꓻ ꓢꓲꓽ ꓫꓬ ꓦꓲꓻ ꓗꓪ ꓠꓬ ꓮ ꓘꓶ. ꓛꓲ ꓢꓲꓽ ꓫꓬ ꓠ, ꓟ ꓣꓳ ꓚꓵ, ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓪꓽ ꓘꓴ ꓦꓲꓻ ꓗꓪ ꓥ ꓟꓲ ꓪꓽ ꓘꓴ ꓠ, ꓟ ꓪꓽ ꓘꓴ ꓦꓲꓻ ꓗꓪ ꓶꓻ ꓡꓯꓼ ꓬꓰ ꓔꓬ ꓡ? ꓝꓮꓲ ꓟꓲ ꓠꓯ ꓒꓴ ꓫꓵˍ ꓔꓯ ꓡꓰ ꓧꓪ ꓔꓬ ꓡ ꓚꓲ. ꓛꓬ ꓓꓴ ꓙ ꓠ, ꓟ ꓢꓲꓽ ꓫꓬ ꓬꓰ‐ꓢꓴ ꓡꓰ ꓐꓯ ꓖꓶ ꓔ ꓟ ꓥ ꓡꓳ꓿ ꓝꓮꓲ ꓟꓲ ꓠꓯ ꓠꓲ, ꓫ. ꓟꓬ ꓫ. ꓓꓴ ꓔꓯ ꓣꓳ ꓠꓲ, ꓟ ꓘꓴꓽ ꓗꓪ ꓓꓵ ꓡꓰ ꓠ, ꓟ ꓣꓳ ꓬꓰ ꓔꓬ ꓡ? ꓓꓴ ꓙ ꓠꓬꓲ ꓓꓴ ꓬꓰ ꓡꓯ꓿ ꓪꓽ ꓘꓴ ꓦꓲꓻ ꓐꓯ ꓟ ꓠꓬ ꓪꓴ‐ꓢ ꓔꓬ ꓟ ꓢꓲꓽ ꓫꓬ ꓟ ꓔꓶ. ꓥ ꓡꓳ꓿
ꓪꓽ ꓘꓴ ꓠ, ꓟ ꓬꓲ ꓔꓶ. ꓥ ꓡꓳ ꓐꓰ ꓣꓳ ꓓꓴ ꓙ ꓠ, ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓪꓽ ꓘꓴ ꓦꓲꓻ ꓗꓪ ꓙꓰ ꓟ ꓙꓵ, ꓕꓯ ꓣꓳ ꓖꓪꓽ ꓫꓵꓽ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓖꓪ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓪꓽ ꓘꓴ ꓦꓲꓻ ꓗꓪ ꓣꓳ ꓛꓲ ꓡꓰ ꓙꓵ, ꓕꓯ ꓪꓴ‐ꓢ ꓐꓰ ꓜꓲꓼ ꓪ ꓟ ꓪꓴ‐ꓢ ꓐꓰ ꓙ ꓡꓯꓽ ꓘꓳ, ꓟ ꓥ ꓡꓳ꓿ ꓪꓴ‐ꓢ ꓶꓻ ꓓꓳꓽ ꓫꓱ, ꓓꓳꓽ ꓔꓯ ꓐ ꓙ ꓪ ꓟ ꓪꓴ. ꓠꓬꓲ ꓦꓻ ꓢꓯꓼ ꓪ ꓣꓳ ꓘꓳ, ꓣꓴ ꓟꓶ ꓟ ꓥ ꓡꓳ꓿ ꓣꓳ ꓠꓲ, ꓟ ꓠꓬ ꓢꓲ ꓡꓲ ꓐꓰ ꓢꓲꓽ ꓫꓬ ꓡꓰ ꓟ ꓔꓯ ꓣꓳ ꓘꓳ, ꓣꓴ ꓟꓶ ꓡꓰ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓬꓲ ꓠꓬ ꓢꓲꓽ ꓫꓬ ꓦꓲꓻ ꓪꓽ ꓘꓴ ꓦꓲꓻ ꓥ ꓟ ꓥ ꓡꓳ꓿ ꓬꓲ ꓠꓬ ꓢꓽ ꓦꓬꓼ ꓠꓬ ꓗꓪ ꓫꓵꓻ ꓟ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓐꓰ ꓝꓲ ꓓꓴ ꓐꓴ ꓔꓯ ꓐꓯ ꓟ. ꓖꓶ ꓟ ꓡꓰ ꓐꓰ ꓚꓵ, ꓚꓵ, ꓢꓯ. ꓬꓲꓼ ꓡ ꓟ ꓪꓴ‐ꓢ ꓥ ꓡꓳ꓿ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓗꓪ ꓔꓬ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓥ ꓟ ꓢꓲꓽ ꓫꓬ ꓖꓳꓽ ꓓꓱ ꓔꓯ ꓘꓳ, ꓣꓴ ꓟ ꓟꓲ‐ꓢ ꓔꓶ. ꓓꓴ ꓠꓬ ꓮ ꓘꓶ. ꓛꓲ ꓐꓲ ꓜꓲꓼ ꓟ ꓥ ꓡꓳ꓿ ꓖꓳ ꓢꓲꓽ ꓫꓬ ꓖꓳ ꓓꓱ ꓗꓪ ꓢꓲꓺ ꓒ ꓬꓰ‐ꓢꓴ ꓬꓲ ꓢꓲ ꓬꓲ ꓧꓪꓽ ꓚꓵ, ꓚꓵ, ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓚꓵ, ꓚꓵ, ꓔꓬ ꓟ ꓥ ꓡꓳ꓿ ꓟꓲ‐ꓢ ꓔꓶ ꓟ ꓬꓲ ꓔꓶ. ꓠꓬ ꓪꓽ ꓘꓴ ꓦꓲꓻ ꓗꓪ ꓥ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓧꓪꓽ ꓖꓳ ꓓꓱ ꓥ ꓟꓲ ꓢꓲꓽ ꓫꓬ ꓦꓲꓻ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓬ ꓟ ꓦꓲꓻ ꓥ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓟ. ꓶ ꓡ ꓟ ꓥ ꓡꓳ꓿ ꓖꓳ ꓡꓱ ꓥꓟ ꓪꓴ. ꓠꓬꓲ ꓣꓳ ꓢꓲꓺ ꓒ ꓬꓰ‐ꓢꓴ ꓔꓬ ꓟ ꓣꓳ ꓚꓲ. ꓛꓬ ꓧꓪꓽ ꓖꓳ ꓓꓱ ꓔꓯ ꓟꓽ ꓢꓲ ꓟꓽ ꓫꓬ, ꓟꓽ ꓗꓷ ꓡꓰ ꓠ, ꓟ ꓠꓬ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿ ꓠꓴ ꓥꓪ ꓔꓯ ꓮ ꓠꓱ ꓬꓴ‐ꓔ ꓡ ꓞꓳ ꓐꓴ ꓡꓰ ꓐꓰ ꓢꓲꓽ ꓫꓬ ꓦꓲꓻ ꓗꓪ ꓮ‐ꓠꓬꓲ ꓮ ꓣꓳ ꓪꓴꓽ ꓜꓽ ꓢꓴ ꓒꓬꓱꓼ ꓔꓬ ꓡ ? ꓢꓲꓽ ꓫꓬ ꓦꓲꓻ ꓥ ꓟ ꓣꓳ ꓖꓳꓽ ꓓꓱ ꓔꓯ ꓮ ꓫꓵꓽ ꓠꓬ ꓟꓽ ꓢꓲ ꓫꓬ, ꓡꓰ? ꓢꓲꓺ ꓒ ꓬꓰ‐ꓢꓴ ꓔꓬ ꓔꓶ. ꓣꓳ ꓧꓪꓽ ꓖꓳ ꓓꓱ ꓔꓯ ꓣꓳ ꓠꓬ ꓮ ꓡꓰ ꓐꓰ ꓙꓳ ꓝꓲ ꓡ ꓓꓴ ꓙ ꓓꓴ ꓬꓰ ꓡꓯ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓪꓴ‐ꓢ ꓔꓯ ꓙꓵꓻ ꓟ ꓠꓬ ꓡ ꓞꓳ ꓡꓳ. ꓟꓳ ꓗꓪ ꓕꓲ ꓒꓳ, ꓗꓪ ꓡꓰ ꓟꓽ ꓥ꓿ ꓣꓳ ꓠꓲ, ꓟ ꓗꓪ ꓐꓰ ꓪꓴ‐ꓢ ꓔꓯ ꓚꓵ, ꓚꓵ, ꓙꓵꓻ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓢꓲꓽ ꓫꓬ ꓦꓲꓻ ꓗꓪ ꓠꓬ ꓢꓲ ꓡꓲ ꓪꓽ ꓘꓴ ꓦꓲꓻ ꓥ ꓟ ꓐꓰ ꓪꓽ ꓘꓴ ꓠ, ꓟ ꓬꓲ ꓔꓶ. ꓥ ꓟꓲ ꓙꓵꓽ ꓔꓶ ꓡꓰ ꓐꓰ ꓶꓻ ꓡꓯꓼ ꓪꓴꓽ ꓜ ꓔꓬ ꓡ? ꓤ ꓟꓳ ꓓꓴ ꓬꓰ ꓡꓯ꓿ ꓪꓽ ꓘꓴ ꓦꓲꓻ ꓔꓯ ꓢꓲꓽ ꓫꓬ ꓙꓳ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓚꓲ. ꓛꓬ ꓧꓪꓽ ꓖꓳ ꓓꓱ ꓥ ꓟꓲ ꓪꓴ‐ꓢ ꓔꓬ ꓔꓶ. ꓥ ꓟ ꓪꓴ. ꓠꓬꓲ ꓣꓳ ꓧꓪꓽ ꓖꓳ ꓓꓱ ꓔꓯ ꓥ ꓟꓲ ꓢꓲꓽ ꓫꓬ ꓡꓰ ꓝꓲ ꓠ, ꓟ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓠꓯ, ꓗꓪ ꓶ ꓓꓰꓽ ꓓꓴ ꓬꓰ ꓡꓯ꓿ 1 ꓘꓳ‐ꓡꓲ‐ꓕꓵ ꓕꓳ ꓶ 3ꓽ 17 ꓝꓲ. ꓗꓪ ꓪꓴ‐ꓢ ꓦꓲꓻ ꓠꓽ ꓢꓲꓽ ꓫꓬ ꓟ ꓥ ꓠꓬꓲ꓾ ꓮꓽ ꓟ ꓡꓰ ꓬꓲ ꓔꓯ ꓐꓬ ꓡꓰ ꓝꓲ ꓠꓬ ꓪꓴ‐ꓢ ꓡꓰ ꓬꓲ ꓔꓯ ꓐꓬ ꓡꓰ ꓝꓲˍ ꓥꓳ꓿ ꓦꓲꓻ ꓕꓱ ꓟ ꓠꓬ ꓠꓴ ꓪ ꓥ ꓡꓳ꓿
