ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ ꓮ ꓠꓱ 324 ꓘꓳꓼ ꓗꓪ Constantine ꓪ ꓔꓲ. ꓡꓰ ꓫꓬꓹ ꓔˍ ꓟ Lateran ꓪ ꓚꓲ ꓕꓯ: ꓢꓲ ꓗꓪ ꓓꓹ ꓟ ꓪ: ꓘꓴ ꓦꓲꓻ ꓓ: ꓟ ꓔꓯ ꓡꓯꓼ ꓙꓱ ꓖꓶˍ ꓟ ꓑꓮꓲ: ꓔꓯ ꓬꓰ ꓔꓬ ꓡꓳ= ꓣꓳ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓐꓰ ꓑꓮꓲ: ꓕꓱ ꓟ ꓔꓯ ꓬꓰ ꓠꓹ ꓟ ꓐꓱ ꓶ ꓙ: ꓖꓶ ꓔˍ ꓟ ꓥ ꓡꓳ= ꓪ: ꓘꓴ ꓦꓲ ꓓ: ꓟ ꓕꓱ ꓟ ꓠꓬ ꓮ ꓠꓱ ꓕꓯ Constantine ꓪ ꓔꓲ. ꓡꓰ ꓫꓬꓹ ꓔꓶ ꓔ. ꓟ ꓥ ꓡꓳ=
ꓖꓳ ꓡꓱ ꓠꓬꓲ 1200 ꓘꓳꓼ ꓖꓼ ꓡꓯ ꓖꓼ ꓙꓲ ꓗꓪ ꓚꓳ. ꓘꓴ ꓜꓲꓼ ꓞꓳ ꓘꓴ: ꓠꓯꓸꓼ ꓗꓪ ꓐꓰ ꓕꓱ ꓕꓲ: ꓠꓬꓲ ꓟ ꓔꓯ ꓮ: ꓟ ꓥˍ ꓟꓲ ꓑꓮꓲ: ꓬꓰ ꓠꓹ ꓟ Lateran ꓪ: ꓘꓴ ꓦꓲꓻ ꓔꓯ ꓡꓯꓼ ꓙꓱ ꓑꓮꓲ: ꓬꓰ ꓠꓹ ꓟ ꓙ: ꓖꓶ ꓔˍ ꓟ ꓥ ꓡꓳ= ꓮ ꓫꓵ: ꓑꓶ. ꓓꓴ ꓕꓱ ꓡꓱ ꓬꓰ ꓔˍ ꓡ ꓐꓰ ꓐꓯˍ ꓠꓬ꓾ ꓪ: ꓘꓴ ꓦꓲ ꓥ ꓕ ꓑꓳꓸꓼ ꓗꓪ ꓬꓲ. ꓟꓺ ꓬꓲ. ꓚꓰꓺ ꓥ ꓡꓳ= ꓝꓮꓲ ”ꓟꓴ ꓗꓪ ꓗꓪ ꓔꓬ ꓟ ꓪ: ꓘꓴ ꓦꓲ” ꓐꓰ ꓮ ꓡꓲ ꓗꓪ ꓔꓬ ꓟ ꓗ-ꓔꓳ-ꓡꓲꓗ ꓥˍ ꓟꓲ ꓕꓲ ꓠꓲꓹ ꓕꓲ ꓪ꓾ ꓕꓲ ꓙ: ꓠꓲꓹ ꓡꓱꓸꓼ꓾ ꓕꓲ ꓪˍ ꓔꓬ ꓡꓳ ꓐꓯˍ ꓟ ꓟꓳ. ꓖꓶ ꓓꓴ ꓥꓳ꓾ ꓐꓰ ꓢꓷ. ꓪˍ ꓟ ꓥ ꓡꓳ=
ꓮ ꓡꓲꓳ ꓐꓯ ꓠꓬ ꓙꓲꓻ ꓫꓬ ꓢꓴ ꓲ-ꓠꓬ-ꓢꓲꓳ ꓡꓰ ꓐꓯ ꓔˍ ꓟ ꓡꓰ ꓐꓰ ꓣꓳ ꓔꓯ ꓠꓬ ꓣꓳ-ꓟ ꓗꓪ ꓔꓬ ꓟ ꓔꓲ ꓒ ꓪ ꓔꓲ. ꓡꓰ ꓧꓳ: ꓣꓱ: ꓔꓬ ꓟ ꓥ ꓡꓳ꓾ ꓐꓰ ꓬꓲ ꓢꓷ. ꓡꓰ ꓓꓴ ꓥꓳ=
ꓖꓳ ꓡꓱ ꓠꓬꓲ ꓢ. ꓠꓯ ꓑꓮꓲ: ꓓ: ꓟ ꓕꓱ ꓟ ꓔꓯ ꓣꓳ ꓬꓰ ꓔꓬ ꓡꓳ= ꓣꓳ ꓠ ꓠꓹ ꓠ ꓔˍ ꓟ ꓢꓲ: ꓫꓬ ꓕꓳ: ꓶ ꓗꓪ ꓥ ꓟ (ꓬꓳ-ꓦ=2:13-22) ꓗꓪ꓾ ꓢꓲ ꓒ ꓬꓰ-ꓢꓴ ꓠꓬ ꓪ: ꓘꓴ ꓦꓲ ꓗꓪ ꓙꓰ ꓢꓲ ꓠꓬꓲ ꓪꓴ: ꓜ: ꓪꓴ: ꓓꓳꓻ ꓔꓬ ꓟ꓾ ꓒꓴ ꓑꓺ ꓔꓬ ꓟ ꓮ ꓙꓵ: ꓔꓯ ꓡꓱ. ꓦꓯ ꓗꓷˍ ꓟ ꓟ. ꓟꓲ: ꓔꓯ ꓣꓳ ꓑ ꓙ:ˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓦꓲꓻ ꓔꓯ ꓕꓲꓺˍ ꓕꓯ꓾ ꓬꓲ ꓦꓲꓻ ꓔꓯ ꓞꓳ ꓘꓴ: ꓗꓷ ꓡꓰ ꓝꓲˍ ꓕꓯ꓾ ꓬꓲ ꓦꓲꓻ ꓔꓯ ꓒꓬꓹ ꓜ: ꓢꓴ ꓡꓰ ꓕꓱ ꓡꓱ ꓬꓰ ꓗꓷˍ ꓕꓯ ꓬꓲ ꓠꓲꓹ ꓟ ꓔꓯ ꓖꓳ ꓓꓵ: ꓙꓰˍ ꓡꓳ= ꓬꓲ ꓠꓲꓹ ꓟ ꓔꓯ ꓦꓶ ꓡꓰ ꓝꓲˍ ꓡꓳ ꓐꓯˍ ꓟ ꓚꓱꓹ ꓔꓯ ꓣꓳ ꓠ ꓠꓹ ꓓꓴ ꓥ ꓡꓳ=
ꓖꓳ ꓡꓱ ꓠꓬꓲ ꓢ. ꓠꓯ ꓠ: ꓦꓬꓼ ꓠꓬꓲ ꓗꓪ ꓠꓬ ꓣꓳ ꓔꓯ 2 ꓫꓵ: ꓟꓳ. ꓖꓶ ꓡˍ ꓡꓳ= ꓬꓲ ꓪꓴ. ꓕꓲ ꓫꓵ: ꓟ ꓠꓬ Lateran Basilica ꓪ: ꓘꓴ ꓦꓲ ꓻ ꓓ: ꓟ ꓔꓯ ꓪꓴ-ꓢ ꓔꓯ ꓡꓯꓼ ꓙꓱ ꓖꓶˍ ꓟ ꓐꓰ꓾ ꓠꓬꓲ: ꓫꓵ: ꓕꓲ: ꓫꓵ: ꓟ ꓠꓬ ꓣꓳ ꓪ: ꓘꓴ ꓦꓲꓻ ꓠꓯꓸꓼ ꓘꓴ: ꓗꓪ ꓪꓴ-ꓢ ꓠꓬ ꓮ ꓡꓲ ꓐꓰ ꓔꓬ ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ= ꓣꓳ ꓪ: ꓘꓴ ꓦꓲꓻ ꓔꓯ ꓠꓬ ꓧꓳꓡꓬ꓾ ꓢꓲ: ꓫꓬˍ ꓟ ꓪ: ꓘꓴ ꓦꓲꓻ ꓐꓰ ꓐꓯˍ ꓡꓳ=
