ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓠꓬ ꓔꓲꓺ ꓒ ꓣꓱ ꓢꓴ ꓠꓬ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓣꓱ ꓢꓴ ꓥ ꓡꓳ꓾ ꓔꓲꓺ ꓒ ꓐꓯ_ ꓟ ꓚꓱꓹ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓮꓽ ꓠꓱ ꓘꓶꓼ ꓫꓵꓼ ꓡꓵ ꓗꓪ ꓙꓳ ꓗꓳꓸ ꓡ ꓟ ꓔꓯ ꓣꓳ ꓡꓳꓸ ꓟꓳ ꓡꓳ=ꓬꓲ ꓚꓰ ꓬꓲ ꓪꓴꓸ ꓗꓪ ꓔꓲꓺ ꓒ ꓓꓽ ꓕꓲ ꓣꓳ ꓔꓯ ꓡꓳꓸ ꓟꓳ ꓡꓳ꓾ ꓮ-ꓐ-ꓡ-ꓦ ꓠꓬ ꓬꓲ ꓔꓯ ꓞꓲ ꓐꓱ ꓕꓲ ꓐꓱ ꓖꓶ ꓢꓲ ꓠꓬꓲ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓡꓯꓼ ꓙꓱ ꓖꓶ_ ꓟ ꓔꓯ ꓣꓳ ꓡꓳꓸ ꓟꓳ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓔꓲꓺ ꓒ ꓮ ꓙꓵ ꓡꓱꓼ ꓟ ꓘꓴꓽ ꓗꓪ ꓔꓲꓺ ꓒ ꓬꓲꓸ ꓪꓴ ꓓꓵ ꓥ ꓡꓳ꓾ ꓘꓶꓼ ꓫꓵꓼ ꓫꓵꓼ ꓟ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓠꓬ ꓕꓲ ꓣꓳ ꓗꓷ ꓡꓲꓳ꓾ꓮ ꓫꓵ ꓑꓶ ꓓꓴ ꓥ ꓐꓯ ꓠꓬ꓾ ꓬꓲ ꓠꓬ ꓞꓳ ꓤ ꓮ ꓙꓵ ꓐꓱ ꓶ ꓔꓲꓺ ꓖꓶ ꓗꓷꓳ꓾ ꓬꓲ ꓡꓰ ꓔꓲꓺ ꓒ ꓬꓲ ꓡꓰ ꓛꓴ ꓔꓲꓺ ꓓꓴ ꓥ ꓡꓳ꓾ ꓮꓽ ꓠꓱ ꓘꓶꓼ ꓫꓵꓼ ꓡꓵ ꓗꓪ ꓠꓬ ꓔꓲꓺ ꓒ ꓐꓴ ꓠꓬ ꓮꓸ ꓣꓳ ꓔꓯ ꓣꓴ ꓢꓲ ꓠꓬꓲ ꓛꓴ ꓔꓲꓺ ꓡꓳ꓾ ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓚꓲ ꓛꓬ ꓡꓰ ꓮꓸ ꓣꓳ ꓬꓰ ꓢꓲ ꓠꓬꓲ ꓪꓴ-ꓢ ꓟꓲ ꓙꓬ ꓗꓪ ꓛꓴ ꓔꓲꓺ ꓟ ꓚꓱꓹ ꓬꓰ ꓗꓷꓳ꓾ ꓖꓳ ꓡꓱ ꓠꓬꓲ ꓞꓳ ꓤ ꓮ ꓙꓵ ꓠꓬ ꓢꓲ ꓫꓬꓹ ꓟ ꓟꓶ ꓡꓰꓳ꓾ꓬꓲ ꓔꓯ ꓙꓵꓻ ꓢꓲ ꓮ ꓙꓵ ꓠꓬ ꓢꓲ ꓫꓬ ꓟ ꓟꓶ ꓡꓲꓳ꓾
ꓖꓳ ꓡꓱ ꓠꓬꓲ ꓮ ꓟꓶ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓔꓲꓺ ꓒ ꓐꓴ ꓠꓬ ꓮ ꓡꓰ ꓫꓵ ꓬꓰ ꓢꓴ ꓥ ꓐꓰ ꓠ ꓠꓬꓲ ꓓꓴ ꓙꓳ_ ꓡꓳ= ꓥ ꓡꓳ꓾ ꓔꓲꓺ ꓒ ꓐꓰ ꓐꓯ ꓕꓯ ꓢꓲ ꓒ ꓬꓰ-ꓢꓴ ꓕꓲ ꓣꓳ ꓡꓰ ꓔꓲꓺ ꓒ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓔꓲꓺ ꓒ ꓬꓲ ꓟꓬꓱꓽ ꓬꓰ ꓢꓴ ꓢꓲ ꓒ ꓬꓰ-ꓢꓴ ꓬꓲ ꓔꓲꓺ ꓒ ꓟꓬꓱ ꓠꓯꓼ ꓘꓴ ꓗꓪ ꓐꓰ ꓠꓱꓸ ꓐꓯꓼ ꓢꓴ ꓔꓯ ꓶꓼ ꓤ ꓫꓱꓹ ꓤ ꓖꓶ ꓢꓴ ꓬꓰ ꓙ ꓢꓴ ꓔꓲꓺ ꓒ ꓐꓯ ꓫꓵ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴ ꓗꓪ ꓙꓳ ꓟ ꓥ ꓡꓳ= ꓔꓲꓺ ꓒ ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓪꓽ ꓚꓵ ꓕꓯ ꓢꓲ ꓗꓪ ꓫꓵꓻ ꓢꓲ ꓠꓬꓲ ꓫꓵ ꓘꓳꓸ ꓓꓳ ꓗꓷ ꓟ ꓣꓱ ꓛꓰ ꓕꓱ ꓟ ꓔꓯ ꓞꓳ ꓤ ꓐꓴ ꓟꓶ ꓡꓰ ꓠꓹ ꓟ ꓐꓱ ꓶ ꓬꓲ ꓗꓪ ꓐꓰ ꓕꓲ ꓝꓸ ꓕꓱ ꓡꓱ ꓐꓰ ꓬꓰ ꓔꓬ ꓡꓳ꓾ ꓟꓲ-ꓢ ꓛꓴ ꓔꓲꓺ ꓖꓶ_ ꓟ꓾ ꓢꓮꓚꓣꓮꓟꓰꓠꓔꓴ 7 ꓟ ꓕꓱ ꓡꓱ ꓙꓳ ꓡꓳ꓾ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓢꓮꓚꓣꓮꓟꓰꓠꓔꓴ 7 ꓟ ꓗꓪ ꓐꓰ ꓪꓴ-ꓢ ꓠꓯꓼ ꓘꓴ ꓗꓪ ꓐꓰ ꓓꓳ ꓡ ꓟ ꓶ ꓤ ꓫꓱꓹ ꓤ ꓔꓯ ꓞꓳ ꓤ ꓔꓯ ꓑꓶ ꓖꓶ_ ꓟ ꓚꓱꓹ ꓬꓰ ꓔꓬ ꓡꓳ꓾ꓖꓳ ꓡꓱ ꓠꓬꓲ ꓔꓲꓺ ꓒ ꓐꓴ ꓠꓬ ꓬꓲ ꓪ ꓟꓬꓱꓽ ꓢ ꓫꓵ ꓬꓰ ꓡꓳ꓾ ꓔꓲꓺ ꓒ ꓐꓴ ꓠꓬ ꓟꓷꓼ ꓠꓷꓹ ꓝꓸ ꓢꓴ ꓡꓰ ꓐꓰ ꓑ ꓫꓬ ꓐꓴ ꓔꓯ ꓟꓳꓸ ꓖꓶ ꓢꓴ ꓥ ꓡꓳ꓾ ꓬꓲ ꓪ ꓔꓯ ꓪꓴ-ꓢ ꓙ ꓖꓴ ꓟꓳꓸ ꓖꓶ ꓟꓸ ꓖꓶ ꓐꓱ ꓖꓶ ꓛꓬ ꓡꓰ ꓥꓳꓽ ꓡꓰ ꓕꓯ ꓐꓱ ꓖꓶ ꓢꓴ ꓥ ꓡꓳ=ꓝꓮꓲ ꓢꓮꓚꓣꓮꓟꓰꓠꓔꓴ ꓗꓪ ꓐꓰ ꓬꓲ ꓪ ꓔꓯ ꓢꓲ ꓫꓬ ꓡꓰ ꓝꓲ_ ꓡꓳ꓾ ꓑ ꓫꓬ ꓡ ꓞꓳ ꓔꓯ ꓢꓮꓚꓣꓮꓟꓰꓠꓔꓴ ꓗꓪ ꓐꓰ ꓢꓲ ꓫꓬ ꓡꓰ ꓝꓲ_ ꓟ꓾ꓠꓲꓹ ꓟ ꓢꓲ ꓫꓬ ꓡꓰ ꓝꓲ_ ꓟ꓾ ꓦꓻ ꓢꓲ ꓫꓬ ꓡꓰ ꓝꓲ_ ꓟ꓾ ꓕꓱ ꓡꓱ ꓫꓵ ꓟꓬꓱꓽ ꓬꓰ ꓡꓳ= ꓝꓮꓲ ꓬꓲ ꓪ ꓔꓯ ꓙꓵꓽ_ ꓡꓳ꓾ ꓬꓲ ꓪ ꓔꓯ ꓙꓲ ꓟ ꓕꓲ ꓒꓳꓹ ꓬꓰ ꓗꓴꓸ ꓠꓹ ꓟ ꓙꓵꓽ ꓪ ꓗꓪ ꓐꓰ ꓔꓲꓺ ꓒ ꓠꓬ ꓑ ꓫꓬ ꓐꓴ ꓔꓯ ꓠꓬꓲ ꓙ ꓡꓳꓸ ꓙ ꓔꓬ ꓟ ꓥ ꓡꓳ=ꓖꓳ ꓡꓱ ꓠꓬꓲ ꓔꓲꓺ ꓒ ꓟꓬꓱꓽ ꓠꓬ ꓢ ꓫꓵ ꓙꓳ_ ꓡꓳ= ꓖꓳ ꓡꓱ ꓠꓬꓲ ꓔꓲꓺ ꓒ ꓐꓴ ꓠꓬ ꓬꓲ ꓪ ꓕꓲ ꓞꓲꓼ ꓕꓲ ꓟ ꓡꓱꓼ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ ꓔ ꓟ ꓑꓶ ꓓꓴ ꓦꓵꓻ ꓔꓴ ꓗꓪ ꓔꓲ ꓟ ꓟꓽ ꓬꓰ ꓕꓲ ꓤꓶꓻ ꓡꓱꓼ ꓪꓴ-ꓢ ꓐꓰ ꓕꓲ ꓛꓳ ꓛꓳ ꓢꓲ ꓠꓬꓲ ꓪꓽ ꓘꓴ ꓟ ꓐꓰ ꓬꓲ ꓙ ꓙꓰ_ ꓡꓳ꓾ ꓕꓲ ꓞꓲꓼ ꓡꓱꓼ ꓕꓲ ꓠꓲꓹ ꓟ ꓡꓱꓼ ꓪꓴ-ꓢ ꓔꓯ ꓖꓶ ꓔ ꓟ ꓑꓶ ꓓꓴ ꓬꓲ ꓠꓬ ꓮ ꓙꓵ ꓡꓱꓼ ꓢꓲ ꓒ ꓠꓯꓼ ꓘꓴ ꓗꓪ ꓡꓰ ꓞꓳ ꓙꓳ ꓡꓳ ꓐꓰ ꓚꓚꓚ ꓪꓴ-ꓢ ꓟꓸ ꓟꓲꓽ ꓗꓪ ꓐꓳ ꓔ ꓟ ꓥ ꓡꓳ=
