ꓠꓬꓲꓸ ꓠꓬꓲ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓥ ꓟ (ꓡꓴ-ꓘ=14ꓽ15-24) ꓗꓪ꓾ ꓢꓲ ꓒ ꓬꓰ-ꓢꓴ ꓡꓰ ꓪꓴ-ꓢ ꓗꓴꓷꓼ ꓜ ꓫꓳ ꓑꓮꓲꓽ ꓗꓪ ꓮꓽ ꓟ ꓠꓬ ꓜꓽ ꓪ ꓓꓻˍ ꓡ꓾ ꓐꓯˍ ꓟ ꓔꓯ ꓐꓯ ꓟ ꓟꓸ ꓖꓶ ꓔ ꓡꓳ= ꓢꓲ ꓒ ꓠꓬ ꓬꓲ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓑꓮꓲ ꓓꓽ ꓟ ꓔꓯꓺ ꓥꓳꓽ ꓣꓱꓽ ꓢꓲ ꓚꓺ ꓟꓸ ꓖꓶˍ ꓡꓳ=
ꓑꓮꓲ ꓗꓪ ꓘꓴ ꓔ ꓟꓶ ꓢꓴ ꓐꓴ ꓠꓬ ꓚꓲꓸ ꓛꓬ ꓟꓬꓱꓽ ꓗꓪ ꓡꓰꓽ ꓠꓲꓹ ꓟ ꓥꓳ ꓔꓬ ꓡꓳ= ꓬꓲ ꓪ ꓦ ꓟꓲ꓾ ꓮꓸ ꓠꓬꓲꓽ꓾ ꓙꓱꓽ ꓤ ꓐꓴ ꓐꓰ ꓬꓲ ꓪ ꓕꓲ ꓦꓲ ꓢꓴ ꓠꓬ ꓪ ꓜꓲ ꓬꓳꓸ ꓚꓰꓽˍ ꓡꓳ ꓐꓰ ꓓꓵꓽ ꓙ ꓟꓶ ꓔꓬ ꓖꓴˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓑꓮꓲꓽ ꓗꓪ ꓔꓹ ꓡ ꓠꓹ ꓟ ꓟꓽ ꓬꓰ=
ꓔꓯꓺ ꓥꓳꓽ ꓕꓱ ꓟ ꓗꓪ ꓬꓰ-ꓢꓴ ꓠꓬ꓾ ꓪꓴ-ꓢ ꓘꓴˍ ꓟ ꓔꓯ ꓘꓳ ꓣꓴ ꓠꓹ ꓟ ꓓꓵꓽ ꓙꓽ ꓥꓳꓽ ꓔꓬ ꓢꓴ ꓐꓴ ꓔꓯ ꓐꓯ ꓟꓸ ꓖꓶˍ ꓟ ꓥ ꓡꓳ= ꓠꓬꓲꓸ ꓠꓬꓲ ꓗꓪ ꓞꓳ ꓤ ꓮ ꓟꓬꓹ ꓠꓬ ꓚꓲꓸ ꓛꓬ ꓔꓯ ꓙꓳˍ ꓟ ꓐꓳ ꓶ꓾ ꓚꓲꓸ ꓛꓬ ꓶꓻ ꓡꓯꓼ꓾ ꓚꓲꓸ ꓛꓬ ꓟꓬꓱꓽ ꓐꓰ꓾ ꓠꓱꓸ ꓐꓯ ꓢꓴ ꓐꓰ ꓙꓻ ꓡꓯ ꓘꓳˍ ꓟ ꓗꓪ ꓟꓬꓽ ꓠꓬꓲ ꓢꓯꓼ ꓕꓵꓼ ꓔꓬ ꓖꓴˍ ꓡꓳ= ꓪꓴ-ꓢ ꓐꓰ ꓙꓻ ꓡꓯ ꓘꓳ ꓠꓹ ꓟ ꓢꓶꓸ ꓟꓽ ꓞꓲꓺ ꓟꓲ ꓠꓯ ꓞꓳ ꓐꓰ ꓙ ꓡꓯ ꓘꓳ ꓟꓶ ꓠꓹ ꓟ ꓔꓯ ꓪ ꓜꓲ ꓒꓵꓽ ꓗ ꓬꓰ ꓔꓬ ꓖꓴˍ ꓡꓳ= ꓪꓴ-ꓢ ꓐꓰ ꓙ ꓡꓯ ꓘꓳˍ ꓟ ꓔꓯ ꓠꓬ ꓢꓸ ꓖꓶ ꓕꓯˍ ꓟꓲ ꓬꓰ ꓓꓻˍ ꓡꓳ꓾ ꓐꓰ ꓓꓵꓽ ꓙꓽ ꓟꓶ ꓔꓬ ꓡꓳ=
ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓠꓬ꓾ ꓢꓲ ꓒ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓘꓴꓻ ꓢꓯꓼ ꓔꓯ ꓓꓽ ꓔꓳꓹ ꓢꓴ ꓘꓳ ꓣꓴ ꓢꓴ ꓐꓴ ꓔꓯ ꓓꓳ ꓟꓴꓹˍ ꓡꓳ= ꓫꓱꓸ ꓖꓶˍ ꓡꓳ= ꓬꓲ ꓪ ꓐꓴ ꓠꓬ ꓡꓳꓹ ꓬꓰˍ ꓕꓯ ꓘꓴꓻ ꓔ ꓟꓶ ꓢꓲ ꓑꓮꓲꓽ ꓗꓪ ꓛꓲ ꓡ ꓢꓴ ꓐꓴ ꓥ ꓡꓳ= ꓪꓴ-ꓢ ꓡꓰ ꓘꓴˍ ꓕꓯ ꓣꓳ ꓠꓬ ꓘꓳ ꓣꓴ ꓟꓽ ꓐ ꓡ ꓟ ꓚꓱꓹ ꓮ ꓟꓬꓹ ꓣꓱꓽ ꓢꓲ ꓠꓬꓲ ꓬꓲ ꓘꓴˍ ꓟ ꓔꓯ ꓟꓽ ꓠ ꓡꓳꓸ ꓬꓰ ꓟꓽ ꓓꓻ= ꓪꓴ-ꓢ ꓘꓴˍ ꓟ ꓠꓬ ꓐꓲ ꓜꓲꓼˍ ꓟ ꓣꓱꓽ ꓛꓰꓽ ꓥ ꓡꓳ= ꓢꓲ ꓒ ꓘꓴˍ ꓟ ꓔꓯ ꓣꓳ ꓠꓬ ꓠꓲꓹ ꓡꓱꓻ ꓡꓱꓻ ꓡꓰꓽ꓾ ꓠꓲꓹ ꓡꓳꓻ ꓡꓳꓻ ꓡꓰꓽ ꓙꓽ ꓖꓶ ꓔ ꓢꓲ ꓬꓲ ꓘꓴˍ ꓕꓯ ꓛꓳꓻ ꓙꓰ ꓠꓹ ꓟ ꓥ ꓡꓳ=
ꓪꓴ-ꓢ ꓘꓴˍ ꓟ ꓔꓯ ꓣꓳ ꓟꓽ ꓠ ꓡꓳꓸ ꓕꓯ ꓣꓳ ꓠꓬ ꓪꓴ-ꓢ ꓗꓴꓷꓼ ꓗꓪ ꓬꓲ ꓐꓰ ꓕꓲ ꓪꓽ ꓜ ꓜꓽ ꓠꓹ ꓟ ꓙꓵꓽ ꓪ ꓔꓯ ꓫꓴ ꓗꓷˍ ꓟ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓔꓯ ꓟꓽ ꓠ ꓡꓳꓸ ꓟ ꓐꓰ ꓬꓲ ꓘꓴ ꓜꓲꓼ ꓞꓳ ꓗꓪ ꓐ ꓠꓹ ꓟꓽ ꓫꓵ꓾ ꓚꓬꓼ ꓠꓲꓹ ꓟꓽ ꓫꓵ ꓟ ꓥ ꓡꓳ= ꓕꓱ ꓟ ꓠꓬ ꓮ ꓘꓶꓸ ꓠꓲꓹ ꓟ ꓫꓸ ꓓꓴ ꓥꓳ= ꓢꓲ ꓒ ꓐꓰ ꓕꓲ ꓪꓽ ꓜꓽ ꓓꓳꓻ ꓠꓹ ꓟ ꓙꓵꓽ ꓪ ꓟꓽ ꓟꓶ ꓟ ꓠꓬ꓾ ꓪꓴ-ꓢ ꓗꓴꓷꓼ ꓠꓱ ꓫꓳꓸ ꓟꓸ ꓗꓪ ꓡꓰꓽ ꓔꓬ ꓟ ꓐꓰ ꓕꓲ ꓡꓰꓹ ꓥ ꓡꓳ=
ꓪꓴ-ꓢ ꓐꓰ ꓕꓲ ꓪ ꓙꓳ ꓔꓬ ꓠꓹ ꓟ ꓠꓬ ꓣꓳ ꓙꓲ-ꓢꓴ ꓢꓲ ꓤ ꓐꓴ ꓔꓶ ꓙꓱꓼ ꓥ ꓡꓳ= ꓕꓱ ꓡꓱ ꓮ ꓘꓶꓸ ꓬꓳꓸ ꓚꓰꓽˍ ꓟ ꓚꓱꓹ ꓔꓯ ꓣꓳ ꓜꓳꓽ ꓜꓳꓽ ꓓꓵꓽ ꓙꓽ ꓠꓬꓲ ꓠ ꓔˍ ꓡꓳ= ꓣꓳ ꓗꓹ ꓛꓲꓽ ꓓꓴ ꓠꓬ ꓪꓴ-ꓢ ꓔꓬ ꓗꓪ ꓡꓰꓽ ꓙꓳˍ ꓡꓳ= ꓪꓴ-ꓢ ꓣꓳ ꓔꓯ ꓘꓴꓻ ꓔꓬ ꓟ ꓠꓬ ꓕꓲ ꓞꓲꓼ ꓕꓲ ꓑ ꓗꓹ ꓛꓲꓽ ꓪ ꓠꓹ ꓟ ꓐꓱ ꓶ ꓥ ꓡꓳ=
ꓖꓳ ꓡꓱ ꓠꓬꓲ ꓢꓲ ꓒ ꓘꓴ ꓢꓯꓼ ꓔꓯ ꓣꓳ ꓘꓳ ꓣꓴ ꓡꓯ= ꓣꓳ ꓠꓬ ꓪꓴ-ꓢ ꓡꓰ ꓘꓴꓻ ꓔ ꓟ ꓟꓴꓽ ꓗꓪ ꓗꓴꓷꓼ ꓜ ꓫꓳ ꓑꓮꓲ ꓗꓪ ꓓꓵꓽ ꓪ ꓠꓹ ꓟ ꓐꓱ ꓶ ꓟꓲ ꓠꓯ ꓗꓪ ꓞꓳ ꓙꓳ ꓔꓬ ꓕꓯ ꓟꓲ ꓠꓯ ꓐꓳ ꓶ꓾ ꓙꓵꓽ ꓪ꓾ ꓚꓲꓸ ꓛꓬ ꓠꓲꓹ ꓡꓶ꓾ ꓢꓶꓸ ꓟꓽ ꓞꓲ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓛꓳ ꓫꓱꓽ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓡ ꓔꓬ ꓡꓳ=
