ꓤ ꓟꓶ ꓡꓯ. ꓞꓲ ꓣꓳ ꓔꓯ ꓥꓳꓽ (Sunday reflection )
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓫꓵꓻ ꓢꓴ ꓐꓴ ꓦꓻ ꓐꓱ ꓶ ꓪꓽ ꓘꓴ ꓙ ꓑꓮꓲꓽ ꓓꓽ ꓟ ꓦꓬꓼ ꓠꓬꓲ ꓟꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓔꓲ ꓕꓳ ꓶ 25ꓽ1‐13 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓤ ꓟꓶ ꓡꓯ. ꓞꓲ ꓣꓳ ꓔꓯꓽ ꓥꓳꓽ ꓟ. ꓟꓲ ꓥ ꓡꓳ꓿
ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓠꓬ ꓘꓴ ꓜꓲꓼ ꓞꓳ ꓓ(3)ꓽ ꓟ ꓙꓳ ꓟ ꓥ ꓡꓳ꓿ ꓓꓽ ꓪꓴ. ꓕꓲ ꓟ ꓘꓴ ꓜꓲꓼ ꓞꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓙꓲꓻ ꓫꓬ ꓢꓴ ꓐꓴ ꓘꓴ ꓜꓲꓼ ꓞꓳ ꓥ ꓢꓲ ꓠꓬꓲ ꓠꓬꓲꓽ ꓟ ꓕꓲ ꓟ ꓘꓴ ꓜꓲꓼ ꓞꓳ ꓠꓬ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓘꓴ ꓜꓲꓼ ꓞꓳ꓾ ꓢꓽ ꓟ ꓕꓲ ꓟ ꓘꓴ ꓜꓲꓼ ꓞꓳ ꓠꓬ ꓛꓬꓽ ꓟꓴ ꓤ ꓗꓪ ꓛꓬꓽ ꓡꓰ ꓟ ꓝꓴꓲ. ꓔꓯ ꓢꓲꓽ ꓫꓬ ꓔꓬ ꓟ ꓘꓴ ꓜꓲꓼ ꓞꓳ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓘꓴꓽ ꓗꓪ ꓤ ꓟꓶ ꓡꓯ. ꓞꓲꓽ ꓣꓳ ꓔꓯ ꓥꓳꓽ ꓔꓯ ꓣꓳ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓗꓪ ꓬꓯꓼ ꓡ ꓟ ꓙꓵ, ꓕꓯ ꓘꓳ, ꓣꓴ ꓔꓬ ꓡꓳ ꓠꓬꓲ ꓔꓬ ꓟ ꓟꓬ ꓡꓴꓻ ꓮ. ꓔꓳ ꓠꓬꓲꓽ ꓓꓴ ꓠꓬ ꓙꓵꓻ ꓠꓲ, ꓐꓰ ꓪꓴ‐ꓢ ꓣꓱ ꓛꓰ ꓡꓯ ꓫꓴ ꓔꓯ ꓟꓳ ꓔꓯꓺ ꓥꓳꓽ ꓥ ꓡꓳ꓿ ꓦꓻ ꓕꓲ ꓒꓳ, ꓗꓪ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓡꓳ ꓬꓰ ꓙꓵ, ꓕꓯ ꓬꓲ ꓟꓶ ꓟ ꓦꓬꓼ ꓠꓬꓲ ꓕꓯ ꓠꓱ. ꓐꓯ ꓢꓴ ꓐꓴ ꓗꓪ ꓐꓰ ꓥꓪ. ꓟꓽ ꓓꓽ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓠꓬ ꓪꓽ ꓘꓴ ꓟ ꓠꓵꓻ ꓠꓲ, ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓙꓵ, ꓗꓪ ꓢꓯꓼ ꓕꓵꓼ ꓢꓲ ꓠꓬꓲ ꓞꓳ ꓙꓳ ꓠ, ꓟ ꓣꓳ ꓚꓵ, ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓟꓯ ꓡꓯ. ꓟ ꓡ ꓟ ꓬꓲ ꓙꓵ, ꓞꓰ ꓡ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓗꓪ ꓡ ꓟ ꓙꓵ, ꓔꓯ ꓟꓳ. ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬꓲꓽ ꓧꓪ ꓕꓲ ꓧꓪ ꓟꓲ ꓠꓯ ꓗꓪ ꓡ ꓟ ꓔꓯ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓮ ꓘꓶ. ꓛꓲ ꓶꓻ ꓡꓳ ꓟꓽ ꓡ ꓢꓲ ꓐꓰ ꓓꓴ ꓙ ꓢꓴ ꓙꓳ ꓥ ꓟꓲ ꓦꓻ ꓕꓲ ꓒꓳ, ꓗꓪ ꓮ ꓕꓯ ꓥ ꓟ ꓲ ꓙ ꓖꓶ ꓔ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓚꓲ. ꓛꓬ ꓟꓬ ꓡꓴꓻ ꓮ. ꓔꓳ ꓡꓯꓽ ꓓꓴ ꓠꓬ ꓮ ꓫꓵꓽ ꓥ ꓡꓳ꓿ ꓟꓬ ꓡꓴꓻ ꓠꓬ ꓣꓳ ꓚꓲ. ꓛꓬ ꓟꓲ ꓠꓯ ꓗꓪ ꓮ ꓡꓰ ꓐꓰ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓟ ꓐꓰ ꓙꓲ ꓟ ꓟꓬꓱꓽ ꓗꓪ ꓮ ꓡꓰ ꓐꓰ ꓢꓯꓼ ꓖꓶ ꓗꓷ ꓟ ꓐ ꓟ ꓔꓯ ꓟꓳ. ꓟ. ꓖꓶ ꓔ ꓟ ꓥ ꓡꓳ꓿ ꓝꓮꓲ ꓧꓪꓽ ꓞꓶꓽ ꓠꓬ ꓪꓴ‐ꓢ ꓡꓰ ꓖꓶ ꓡ ꓟ ꓣꓱ ꓛꓰ ꓡꓯ ꓥ ꓡꓳ꓿ ꓪꓴ‐ꓢ ꓡꓰ ꓖꓶ ꓡ ꓟ ꓣꓱ ꓛꓰ ꓟꓽ ꓐ ꓠꓬ ꓮ ꓣꓳ ꓮ ꓫꓵꓽ ꓬꓰ ꓥ ꓟꓲ ꓧꓪ. ꓡꓰ ꓟ ꓔꓯ ꓘꓳ, ꓣꓴ ꓟꓽ ꓓ꓿ ꓣꓳ ꓡꓰ ꓥ ꓟ ꓪꓴ. ꓠꓬꓲ ꓣꓳ ꓟꓬ ꓡꓴꓻ ꓮ ꓔꓳ ꓓꓳꓻ ꓠ, ꓟ ꓐꓱ ꓶ ꓢꓲꓺ ꓒ ꓬꓰ‐ꓢꓴ ꓔꓯ ꓪꓽ ꓘꓴ ꓢꓲ ꓠꓬꓲ ꓢꓲꓺ ꓒ ꓠꓲ, ꓒꓴ ꓟ ꓚꓱ, ꓗꓪ ꓞꓳ ꓫꓱ, ꓓꓴ ꓬꓰ ꓡꓯ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓡꓰ ꓕꓲ ꓙꓵ, ꓗꓪ ꓟꓲ ꓠꓯ ꓗꓪ ꓡ ꓟ ꓔꓯ ꓟꓽ ꓢꓷ. ꓣꓳ ꓟꓲ ꓠꓯ ꓡ ꓞꓳ ꓧꓪꓽ ꓖꓳ ꓓꓱ ꓠꓬ ꓮ ꓡꓰ ꓕꓲ ꓙꓵ, ꓗꓪ ꓟꓲ ꓠꓯ ꓐꓰ ꓧ, ꓙꓰ ꓡ ꓟ ꓔꓯ ꓟꓽ ꓢꓷ. ꓟ ꓪꓴ. ꓠꓬꓲ ꓣꓳ ꓚꓲ. ꓛꓬ ꓔꓯ ꓢꓲꓺ ꓒ ꓠꓲ, ꓒꓴ ꓚꓱ, ꓗꓪ ꓞꓳ ꓙꓳ ꓢꓯ. ꓔꓬ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓘꓴ ꓔꓬ ꓟ ꓥ ꓡꓳ꓿
ꓣꓳ ꓠꓬ ꓚꓲ. ꓛꓬ ꓓꓴ ꓙ ꓪ ꓡꓰ ꓝꓮꓲ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓗꓪ ꓟꓽ ꓞꓳ ꓙꓳ ꓠꓬ ꓣꓳ ꓔꓯ ꓬꓲ. ꓟꓶ ꓐꓯ ꓟꓴ ꓘꓶꓽ ꓡ ꓟ ꓦꓬꓼ ꓠꓬꓲ ꓕꓯ ꓣꓳ ꓠꓬ ꓛꓬꓽ ꓟꓴ ꓗꓪ ꓙꓰ ꓡ ꓓꓴ ꓥꓳ꓿ ꓟꓬ ꓡꓴꓻ ꓔꓯꓺ ꓔ ꓟ ꓤ ꓟꓶ ꓥꓪꓽ ꓣꓳ ꓔꓯ ꓗꓽ ꓘꓶꓽ ꓑꓲ ꓗꓷ ꓡꓰ ꓐꓰ ꓣꓳ ꓔꓯ ꓥ ꓟꓲ ꓢꓲꓺ ꓒ ꓡꓰ ꓟꓽ ꓢꓷ. ꓐꓰ ꓐꓯ ꓡ ꓓꓴ ꓥꓳ꓿ ꓝꓴꓲ ꓔꓯ ꓓꓴ ꓙ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿
ꓢꓲꓽ ꓫꓬ ꓟ ꓤꓶꓻ ꓠꓯ, ꓗꓪ ꓢꓯ. ꓔꓬ ꓟꓶ ꓠ, ꓟ ꓢꓯꓼ ꓕꓵꓼ ꓡꓯ꓿ ꓠꓵꓻ ꓠꓲ, ꓙꓳ ꓟ ꓝꓮꓲ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓔꓯ ꓙꓲ ꓟ ꓟꓬꓱꓽ ꓗꓪ ꓬꓰ ꓐ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓢꓲꓺ ꓒ ꓬꓯꓼ ꓡ ꓟ ꓐꓰ ꓣꓳ ꓧꓪꓽ ꓖꓳ ꓓꓱ ꓟꓲ ꓠꓯ ꓗꓪ ꓐꓰ ꓧ, ꓡꓰ ꓟ ꓙꓵ, ꓔꓯ ꓮ ꓕꓯ ꓥ ꓟꓲ ꓙ ꓖꓶ ꓔ ꓓꓴ ꓬꓰ ꓡꓯ꓿
ꓗ‐ꓔꓳꓡꓲꓗ ꓘꓴ ꓜꓲꓼ ꓞꓳ ꓠꓬ ꓫꓵꓻ ꓢꓴ ꓐꓴ ꓦꓻ ꓔꓯ ꓪꓽ ꓘꓴ ꓖꓶ ꓟ ꓑꓮꓲꓽ ꓓꓽ ꓔꓯ ꓮꓓ (1400) ꓘꓳꓼ ꓗꓪ ꓛꓳ ꓬꓰ ꓓꓴꓽ ꓡ ꓟ ꓥ ꓡꓳ꓿ ꓫꓵꓻ ꓢꓴ ꓐꓴ ꓦꓻ ꓝꓴꓲ. ꓗꓪ ꓐꓰ ꓡꓶ. ꓙꓰ ꓟꓶ ꓠ, ꓟ ꓪꓽ ꓘꓴ ꓙ ꓖꓶ ꓟ ꓠꓬ ꓮ ꓘꓶ. ꓙꓲ ꓟ ꓟꓬꓱꓽ ꓥ ꓡꓳ ꓐꓰ ꓢꓲꓽ ꓫꓬ ꓕꓳ ꓶ ꓥ ꓟ ꓟ‐ꓖ‐ꓐꓲ ꓕꓳ ꓶ (2 ꓟ‐ꓖ‐ꓐꓲ 12ꓽ46) ꓝꓲ. ꓗꓪ ꓡꓳ. ꓟꓳ ꓓꓽ ꓟ ꓥ ꓡꓳ꓿
ꓚꓳꓴꓠꓚꓲꓡ ꓳꓝ ꓔꓣꓰꓠꓔ ꓐꓯ ꓟ ꓔꓣꓰꓠꓔ ꓡꓳ ꓒꓱ ꓗꓪ ꓝꓲ ꓓꓴ ꓐꓴ ꓖꓪꓽ ꓙꓱ ꓜꓲꓼ ꓓꓴ ꓓꓽ ꓗꓪ ꓐꓰ ꓥ ꓟꓲ ꓫꓵꓻ ꓢꓴ ꓦꓻ ꓐꓱ ꓶ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠ,ꓟ ꓪꓽ ꓘꓴ ꓙ ꓠ, ꓟ ꓟꓲ‐ꓢ ꓔꓶ. ꓖꓶ ꓟ ꓐꓰ ꓪꓽ ꓘꓴ ꓑꓮꓲꓽ ꓬꓰ ꓖꓶ ꓟ ꓠꓬ ꓮ ꓘꓶ. ꓛꓲ ꓙꓲ ꓟ ꓥ ꓡꓳ ꓟ. ꓖꓶ ꓔ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓮ ꓘꓶ. ꓠꓲ, ꓠꓵ ꓢꓴ ꓐꓴ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ. ꓬꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷ ꓡ ? ꓬꓲ ꓪ ꓕꓲ ꓞꓲ ꓕꓲ ꓒ ꓟꓽ ꓟꓶ ꓬꓰ ꓟ ꓗꓴꓷꓼ ꓗꓪ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠ, ꓟ ꓪꓽ ꓘꓴ ꓙ ꓖꓶ ꓓꓴ ꓬꓰ ꓡꓯ꓿ ꓙꓲ ꓟ ꓟꓬꓱꓽ ꓬꓰ ꓖꓶ ꓡꓯ꓿ ꓫ. ꓟꓳ ꓪ꓿
