ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓘꓴꓽ ꓠꓯꓼ ꓗꓪ ꓠꓬ ꓢꓮꓚꓣꓮꓟꓰꓠꓔ 7 ꓟ ꓙꓳ_ ꓡꓳ꓾ ꓕꓱ ꓟ ꓘꓴꓽ ꓗꓪ ꓐꓰ ꓠꓻ ꓢꓴ ꓑꓬ ꓢꓴ ꓔꓯ ꓟꓰ ꓞꓶꓻ ꓟꓰ ꓖꓶ_ ꓟ꓾ ꓥ ꓡꓳ꓿ ꓬ‐ꓗꓴ ꓕꓳ ꓶ ꓗꓪ ꓥ ꓟꓲ ꓐꓳ ꓔ ꓡꓳ꓾ ꓠꓴ ꓪ ꓘꓴꓽ ꓠꓯꓼ ꓗꓪ ꓮꓽ ꓟ ꓠꓻ ꓔꓬ ꓠꓬ ꓠꓴ ꓪ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓪꓴ. ꓓꓵ ꓣꓱ ꓢꓴ ꓔꓯ ꓙꓰ ꓢꓲ ꓪꓽ ꓘꓴ ꓢꓲ ꓠꓬꓲ ꓟꓰ ꓞꓶꓻ ꓟꓰ ꓖꓶ ꓝꓲ꓾ ꓐꓰ ꓐꓯ ꓔ ꓡꓳ꓿
ꓖꓳ ꓡꓱ ꓠꓬꓲ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓕꓱ ꓟ ꓔꓯ ꓬꓰ ꓔꓬ ꓡꓳ꓾ ꓮꓽ ꓠꓱ ꓗꓳ. ꓡ ꓟ ꓦꓬꓼ ꓠꓬꓲ ꓗꓪ ꓐꓰ ꓮ ꓟꓶ ꓗꓪ ꓛꓲ ꓟꓰ ꓞꓶꓻ ꓖꓳ ꓟ ꓔꓯ ꓠꓻ ꓢꓴ ꓑꓬ ꓢꓴ ꓔꓯ ꓟꓰ ꓖꓶ_ ꓡꓳ꓿ ꓠꓻ ꓢꓴ ꓔꓯ ꓟꓰ ꓞꓶꓻ ꓟꓰ ꓖꓶ ꓐꓰ ꓐꓯ_ ꓕꓯ ꓢꓯꓼ ꓟꓬ ꓞꓷ ꓗꓷ ꓔꓬ ꓗꓪ ꓛꓲ ꓠꓻ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴ꓾ꓐꓱ ꓶ ꓡꓰ ꓟꓽ ꓞꓲ ꓞꓳ ꓟꓳ ꓐꓴ ꓮ ꓘꓶ. ꓔꓬ ꓟꓽ ꓢꓴ ꓐꓴ ꓔꓯ ꓥ ꓟꓲ ꓟꓰ ꓖꓶ ꓡꓳ꓿ ꓕꓱ ꓟ ꓔꓯ ꓣꓳ ꓟꓰ ꓖꓶ_ ꓕꓯ ꓕꓲ ꓧꓪ, ꓟꓰ ꓖꓶ ꓢꓲ ꓝꓮꓲ ꓔꓬ ꓢ ꓡꓰ ꓢꓲ ꓝꓮꓲ ꓕꓲ ꓧꓪ, ꓖꓳ ꓟ ꓔꓯ ꓟꓰ ꓖꓶ ꓛꓲ_ ꓡꓳ꓿ ꓦꓲ ꓖꓶ ꓛꓲ_ ꓡꓳ꓾ ꓐꓰ ꓣꓳ ꓢꓷ. ꓠ ꓗ, ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓟꓰ ꓞꓶꓻ ꓖꓳ ꓟ ꓔꓯ ꓘꓳ, ꓣꓴ ꓟ ꓗꓪ ꓐꓰ ꓮ ꓫꓵ ꓣꓱ ꓛꓰ ꓟꓶ_ ꓡ꓾ ꓐꓰ ꓐꓯ ꓕꓯ ꓬꓲ ꓪꓴ. ꓕꓲꓽ ꓟ ꓟ ꓠꓬ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓟꓶ_ ꓡꓳ꓿ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓖꓳ ꓟ ꓠꓬ ꓠꓻ ꓓꓴ ꓕꓱ ꓟ ꓑꓶ ꓓꓴ ꓠꓲ, ꓟ ꓙꓬ, ꓟ꓾ ꓠꓲꓽ ꓢ‐ꓓꓯ ꓤ, ꓠꓬꓲ ꓫꓵ ꓠꓬꓲ_ ꓟ ꓗꓪ ꓐꓰ ꓓ ꓡꓰ ꓝꓲ_ ꓡꓳ꓿ ꓮ ꓫꓵ ꓑꓶ ꓓꓴ ꓥ ꓡ꓾ ꓟꓰ ꓞꓶꓻ ꓖꓳ ꓟ ꓗꓪ ꓐꓰ ꓢꓲ‐ꓫꓬ‐ꓟ‐ꓦ ꓣꓳ ꓠꓯꓼ ꓘꓴꓽ ꓗꓪ ꓓꓵ ꓡꓰ ꓢꓲ ꓠꓬꓲ ꓣꓳ ꓠꓬ ꓠꓲꓽ ꓢ‐ꓓꓯ ꓔꓯ ꓧꓪ. ꓡꓰ ꓘꓴ_ ꓟ꓾ ꓠꓻ ꓟ ꓑꓬ ꓟ ꓔꓯ ꓜꓲ ꓘꓴꓽ_ ꓟ꓾ ꓝꓮꓲ ꓠꓲ, ꓟ ꓫꓵꓺ ꓘꓴꓽ_ ꓟ꓾ ꓕꓱ ꓡꓱ ꓫꓵ ꓣꓱ ꓛꓰ ꓣꓳ ꓟꓶ_ ꓡꓳ꓿ ꓝꓮꓲ ꓠꓬꓲꓽ ꓫꓵ ꓕꓲ ꓫꓵ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓚꓲ ꓛꓬ ꓠꓬ ꓣꓳ ꓐꓱ ꓶ ꓪꓽ ꓚꓲ ꓗꓪ ꓢꓯꓼ ꓟꓬ ꓖꓶ ꓗꓷꓳ꓾ ꓖꓳ ꓡꓱ ꓠꓬꓲ ꓬꓲ ꓠꓬ ꓠꓻ ꓜꓲ ꓢꓲ ꓠꓬꓲ ꓫ. ꓙꓵ ꓟꓷꓼ ꓙꓵ ꓓꓴ ꓔꓯ ꓘꓳ ꓗꓳ. ꓬꓰꓳ꓿ ꓖꓳ ꓡꓱ ꓠꓬꓲ ꓣꓳ ꓠꓻ ꓔꓬ ꓑꓬ ꓔꓬ ꓟ ꓥ ꓟꓲ ꓮꓽ ꓔꓳ ꓬꓲ ꓘꓳꓽ ꓟꓽ ꓥ꓾ ꓣꓳ ꓠꓻ ꓔꓬ ꓑꓬ ꓔꓬ ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓡꓲ, ꓐꓰ ꓬꓲ ꓠꓻ ꓟ ꓗꓪ ꓬꓲ ꓫ ꓙꓵ ꓟ ꓗꓪ ꓣꓳ ꓥ ꓟꓲ ꓔ, ꓒꓯꓼ ꓓ_ ꓡꓳ꓾ ꓐꓯ_ ꓟ ꓣꓳ ꓔꓯ ꓢꓷ. ꓡꓰ ꓝꓲ_ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓻ ꓓꓴ ꓑꓬ ꓓꓴ ꓕꓱ ꓟ ꓠꓬ ꓟꓰ ꓞꓶꓻ ꓖꓳ ꓟ ꓟꓰ ꓗꓷ_ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓬꓲ ꓠꓻ ꓓꓴ ꓑꓬ ꓓꓴ ꓠꓯꓼ ꓘꓴꓽ ꓗꓪ ꓓꓵ ꓡꓰ ꓢꓲ ꓠꓬꓲ ꓣꓳ ꓔꓯ ꓣꓱ ꓛꓰ ꓝꓮꓲ ꓕꓲ ꓧꓪ, ꓖꓶ_ ꓡꓳ꓿
ꓝꓮꓲ ꓣꓳ ꓘꓴ ꓜꓲꓼ ꓞꓳ ꓘꓴꓽ ꓠꓯꓼ ꓗꓪ ꓐꓰ ꓥ ꓟꓲ ꓣꓱ ꓛꓰ ꓖꓶ_ ꓡꓳ꓿ ꓣꓳ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓦ ꓡꓱ ꓚꓱ, ꓗꓪ ꓠꓬ ꓘꓴ ꓜꓲꓼ ꓞꓳ ꓢ ꓟ ꓙꓳ_ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓟ ꓘꓬ ꓜꓲꓼ ꓞꓳ ꓐꓰ ꓝꓮꓲ ꓮ. ꓔꓳ ꓡ ꓕ ꓛꓬ ꓟꓵꓽ ꓞ ꓞ ꓗꓪ ꓔꓬ ꓟ ꓦ ꓜꓴ ꓐꓴ ꓐꓰ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟ ꓦ ꓜꓴ ꓐꓴ ꓕꓲ ꓣꓳ ꓛꓳ ꓕꓲ ꓣꓳ ꓪꓽ ꓘꓴ ꓙ ꓡꓯ ꓘꓳ ꓟ꓾ ꓚꓱ, ꓔꓯ ꓣꓳ ꓙꓵꓻ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓕꓱ ꓡꓱ ꓐꓰ ꓠꓻ ꓢꓴ ꓑꓬ ꓢꓴ ꓔꓯ ꓣꓳ ꓙꓰ ꓕꓯ ꓙꓲ ꓫꓬ ꓢꓴ ꓬꓲ ꓟꓬꓱꓽ ꓔꓯ ꓘꓴ ꓢꓲ ꓠꓬꓲ ꓬꓲ ꓪ ꓐꓱ ꓶ ꓪꓽ ꓘꓴ ꓙ ꓖꓶ ꓠ, ꓟ ꓟꓲ ꓓꓰꓽ_ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓠꓻ ꓔꓬ ꓑꓬ ꓔꓬ ꓢꓴ ꓬꓲ ꓪ ꓐꓴ ꓠꓬ ꓟꓴ ꓗꓪ ꓗꓪ ꓟ ꓢꓯꓼ ꓪ ꓥ ꓟꓲ ꓟꓶ_ ꓟ ꓡꓰ ꓟꓽ ꓞꓲ ꓣꓳ ꓘꓴ ꓜꓲꓼ ꓞꓳ ꓠꓯꓼ ꓘꓴ ꓗꓪ ꓐꓰ ꓶꓼ ꓓꓰꓽ ꓙ ꓟ ꓟꓲ ꓣꓱ ꓛꓰ ꓟꓶ_ ꓡꓳ꓿ ꓝꓮꓲ ꓕꓲ ꓫꓵ ꓟ ꓠꓬ ꓣꓳ ꓢꓯꓼ ꓟꓬ ꓞꓷ ꓗꓷ_ ꓟ ꓗꓪ ꓣꓱ ꓬꓯꓼ_ ꓟ꓾ ꓕꓲ ꓚꓱ, ꓐꓯ ꓠꓬ ꓣꓳ ꓦ ꓢꓯꓼ ꓪ ꓟꓶ ꓡꓰ ꓟ ꓡꓰ ꓟꓽ ꓞꓲ ꓣꓳ ꓠꓲ, ꓟ ꓠꓯꓼ ꓘꓴ ꓗꓪ ꓫꓵꓻ ꓓꓵ ꓕꓱ ꓟ ꓔꓯ ꓟꓽ ꓙꓳꓺ ꓟ ꓝꓴꓲ ꓔꓯ ꓥ ꓦ ꓗꓷ_ ꓟ꓾ꓟꓶ ꓡꓰ ꓢꓲ ꓠꓬꓲ ꓣꓳ ꓫꓵꓻ ꓓꓵ ꓕꓱ ꓟ ꓔꓯ ꓟꓽ ꓙꓳꓺ ꓗꓷ ꓡꓰ ꓡꓳ꓿ ꓮ ꓡꓲꓳ ꓐꓯ ꓠꓬ ꓫꓵꓻ ꓟ ꓠꓬ ꓣꓳ ꓐꓱ ꓶ ꓬꓲ ꓟꓶꓽ ꓟꓽ ꓥ꓾ ꓖꓴ ꓡꓰ_ ꓟ ꓟꓽ ꓥ꓾ ꓟꓲ ꓠꓯ ꓕꓱ ꓟ ꓗꓪ ꓢꓯꓼ ꓟꓬ ꓞꓷ, ꓗꓷ ꓟ ꓗꓪ ꓐꓰ ꓣꓳ ꓖꓳ ꓡꓱ ꓫꓵꓻ ꓫꓵ ꓟꓽ ꓥ ꓥ꓾ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓣꓳ ꓙꓰ_ ꓡꓳ꓿ ꓖꓳ ꓡꓱ ꓠꓬꓲ ꓦ ꓢꓯꓼ ꓪ ꓣꓳ ꓔꓯ ꓖꓶ_ ꓡꓳ꓿ ꓦ ꓟꓰ ꓞꓶꓻ ꓟꓰ ꓟ ꓗꓪ ꓐꓰ ꓡꓳ, ꓬꓰ_ ꓟ ꓦꓬꓼ ꓠꓬꓲ ꓗ ꓘꓶꓽ ꓕꓱ ꓟ ꓔꓯ ꓓꓳ ꓐ ꓡ ꓠ, ꓟ ꓠꓲ, ꓪꓴ ꓪꓴ ꓡꓰ ꓗ. ꓠꓯ. ꓢꓲ ꓗꓪ ꓗꓷ ꓔꓲ. ꓐ ꓡ ꓠ, ꓟ ꓚꓲ ꓛꓬ ꓠꓲ, ꓠꓵ ꓟ ꓬꓲꓼ ꓤ ꓠꓬꓲ ꓤ ꓐꓴ ꓮꓼ ꓐ ꓮ ꓟ ꓐꓴ ꓤ ꓠꓱ ꓐꓴ ꓞꓳ ꓡꓱ ꓐꓴ ꓕꓱ ꓡꓱ ꓫꓵ ꓮ ꓙꓵ ꓔꓯ ꓠꓲ, ꓪꓴ ꓪꓴ ꓡꓰ ꓪꓴ‐ꓢ ꓠꓯꓼ ꓘꓴꓽ ꓗꓪ ꓡꓯꓼ ꓙꓱ ꓔꓲ. ꓢꓲ ꓠꓬꓲ ꓣꓳ ꓠꓬ ꓗ, ꓛꓲ ꓛꓲ ꓠꓲ, ꓪꓴ ꓪꓴ ꓡꓰ ꓪꓴ‐ꓢ ꓔꓬ ꓗꓪ ꓙꓰ ꓐ ꓡ ꓠ, ꓟ ꓣꓱ ꓛꓰ ꓥ ꓟꓲ ꓣꓳ ꓔꓯ ꓖꓶ_ ꓡꓳ꓿
