ꓢꓲ ꓒ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓙꓰ_ ꓕꓯ꓾ ꓬꓲ ꓗꓳ. ꓬꓯꓼ_ ꓟ ꓡꓳ ꓒꓱ ꓘ, ꓒꓱ ꓗꓪ ꓟ. ꓟꓲꓽ ꓟ. ꓖꓶ_ ꓟ ꓙꓵ, ꓗꓪ ꓡ ꓞꓳ ꓕꓲ ꓣꓳ ꓡꓰ ꓬꓲ ꓔꓯ ꓢꓲ ꓒꓽꓳ꓾ ꓚꓬꓴ ꓟꓶ ꓢꓴ ꓠꓬ ꓠꓲ._ ꓡ? ꓐꓰ ꓠ ꓠꓬꓲ_ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓠꓴ ꓪ ꓠꓬ ꓣꓳ.ꓺ_ ꓟ ꓗ ꓘꓽ ꓗꓪ ꓓꓵꓽ ꓡꓰ ꓠ, ꓟ ꓢꓯꓼ ꓕꓵꓼ꓿ ꓮ ꓡꓲꓳ ꓐꓯ ꓠꓬ ꓢ, ꓖꓪ ꓓꓵꓽ ꓙꓰ ꓠꓲ, ꓫꓵ_ ꓟꓲ ꓓꓵꓽ ꓙꓰ ꓟꓽ ꓪ ꓢꓴ ꓮꓽ ꓟꓬ, ꓙꓳ_ ꓥꓳ꓾ ꓐꓰ ꓐꓯ ꓔ ꓡꓳ꓿
ꓕꓱ ꓟ ꓠꓬ ꓣꓳ ꓔꓯ ꓥ ꓟꓲ ꓢꓷ. ꓡꓰ ꓓꓴ ꓥ ꓡꓳ꓿ ꓪꓴ‐ꓢ ꓗꓴꓷꓼ ꓗꓪ ꓓꓵꓽ ꓙꓰ ꓠ, ꓟ ꓠꓬ ꓔꓱ, ꓟ ꓙꓵꓻ ꓠꓲ, ꓐꓰ ꓚꓲ ꓛꓬ ꓠꓬ ꓒꓳ, ꓡꓶ. ꓠ, ꓟ ꓣꓱ ꓬꓯꓼ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓢꓷ._ ꓟ ꓡꓰ ꓪꓽ ꓘꓴ_ ꓟ ꓡꓰ ꓪꓽ ꓘꓴ ꓦꓲꓻ ꓙꓰ_ ꓟ ꓡꓰ ꓚꓲ ꓛꓬ ꓠꓬ ꓚꓬꓴ ꓙ ꓟꓽ ꓟꓶ꓾ ꓦꓲ ꓢꓲ ꓒꓽ ꓡꓰ ꓗ ꓘꓶ ꓚꓵ. ꓗꓷ ꓠꓬ꓾ ꓠꓴ ꓪ ꓠꓽ ꓠꓱ ꓫꓱ. ꓟ.ꓼ ꓗꓪ ꓦꓰꓼ ꓞ, ꓢꓲ ꓠꓬꓲ꓾ ꓗ ꓘꓶꓽ ꓲʼꓼ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓔꓯ ꓗ ꓘꓶ ꓒꓴ ꓖꓶ ꓡꓯ꓾ ꓐꓯ_ ꓟꓲ꓾ ꓠꓴ ꓪ ꓔꓯ ꓥꓪ ꓟꓽ ꓢꓷ.꓾ ꓠꓴ ꓪ ꓮ ꓡꓲ ꓗꓪ ꓐꓰ ꓡ ꓟ_ ꓟꓲ ꓥꓪ ꓟꓽ ꓢꓷ.꓾ ꓐꓰ ꓒꓳ, ꓖꓶ ꓡ_ ꓥꓳ꓿ ꓕꓱ ꓟ ꓠꓬ ꓣꓳ ꓔꓯ ꓢꓲ ꓫꓬ_ ꓟ ꓠꓲ, ꓟ ꓐꓰ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓔꓱ, ꓟ ꓙꓵꓻ ꓠꓲ, ꓐꓰ ꓔꓬ ꓠ, ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓔꓯ ꓢꓷ. ꓢꓲ ꓬꓲ ꓠꓯꓼ ꓗꓪ ꓛꓳ ꓫꓱꓽ ꓟ ꓠꓬ ꓣꓳ.ꓺ_ ꓟ ꓗ ꓘꓶꓽ ꓗꓪ ꓐꓰ ꓓꓵꓽ ꓠ, ꓟ ꓢꓯꓼ ꓕꓵꓼ ꓟ ꓥ ꓡꓳ꓿ ꓮ ꓫꓵ ꓑꓶ ꓓꓴ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓥ ꓟꓲ ꓬꓲ ꓤꓶꓻ ꓠꓯꓼ ꓗꓪ ꓚꓲ ꓛꓬ ꓠꓲ, ꓡꓶꓽ ꓔꓯ ꓟꓽ ꓛꓳ꓾ ꓟꓲ ꓠꓯ ꓡ ꓞꓳ ꓐꓴ ꓚꓬꓴ ꓙ ꓟꓶ ꓠ, ꓟ ꓪꓴ‐ꓢ ꓠꓲ, ꓡꓶꓽ ꓗꓪ ꓐꓰ ꓛꓳ ꓫꓱꓽ ꓡꓰ ꓟ ꓥꓳ꓿
ꓮ ꓟꓶ ꓤꓶꓻ ꓗꓪ ꓠꓬ ꓞꓳ ꓤ ꓐꓴ ꓠꓬ ꓚꓲ ꓛꓬ ꓖꓳ ꓓꓱ ꓚꓲ ꓛꓬ ꓠꓲ, ꓟ ꓔꓯ ꓮ ꓡꓰ ꓬꓰ ꓥ ꓟꓲ ꓚꓲ ꓛꓬ ꓠꓲ, ꓟ ꓡꓰ ꓥꓳ꓾ ꓐꓰ ꓓꓵꓽ ꓙ ꓔꓬ ꓟ ꓥ ꓡꓳ꓾ ꓕꓱ ꓡꓱ ꓟꓽ ꓙꓲ_ ꓟ ꓠꓲ, ꓟ ꓑꓶ ꓓꓴ ꓚꓲ ꓛꓬ ꓖꓳ ꓓꓱ ꓔꓯ ꓶꓻ ꓞꓼ ꓕꓲ ꓟ ꓡꓰ ꓐꓰ ꓣꓱ ꓔꓬ ꓟ ꓥ ꓡꓳ꓾ ꓣꓳ.ꓺ_ ꓟ ꓗ ꓘꓶꓽ ꓐꓯ_ ꓟ ꓠꓬ ꓣꓳ ꓬꓰ ꓠꓲ, ꓫꓵ_ ꓟ ꓔꓯ ꓟꓽ ꓬꓰ ꓬꓰ ꓪꓴ‐ꓢ ꓙꓵ ꓗ ꓗꓪ ꓐꓰ ꓢꓯ. ꓔꓬ ꓛꓳ ꓫꓱꓽ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓢꓷ. ꓟ ꓡꓰ ꓟꓽ ꓥ꓾ ꓬꓲ ꓐꓯ ꓘꓶꓽ ꓗꓪ ꓐꓰ ꓛꓳ ꓫꓱꓽ ꓢꓲ꓾ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓢꓯ. ꓔꓬ ꓙ ꓫꓱ ꓢꓲ ꓠꓬꓲ ꓣꓳꓺ ꓟ ꓗ ꓘꓶꓽ ꓗꓪ ꓐꓰ ꓓꓵꓽ ꓙꓰ ꓐ ꓡ ꓢꓴ ꓒꓬꓱꓼ ꓡꓰ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾
