ꓣꓳ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓢꓲꓺ ꓔˍ ꓟ ꓟꓶ ꓢꓴ ꓐꓯˍ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ=6ꓽ12-19 ꓗꓪ ꓐꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ= ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓣꓳ ꓔꓯ ꓙꓲ-ꓢꓴ ꓢꓲ ꓤ ꓤꓶꓻ ꓗꓪ ꓘꓴ ꓔ ꓟꓶˍ ꓟ ꓔꓯ ꓝꓮꓲ ꓓꓵꓽ ꓙꓽ ꓕꓺ ꓠꓬꓲ ꓠꓹ ꓟ ꓥ ꓡꓳ=
ꓣꓳ ꓠꓬ ꓣꓳ ꓚꓲꓸ ꓛꓬ ꓡꓰ ꓙꓵꓻ ꓢꓲ ꓖꓳ ꓓꓱꓽ ꓔꓲꓹ ꓟꓶ ꓔ ꓡꓳ ꓐꓯˍ ꓥˍ ꓟꓲ ꓙꓵꓻ ꓠꓲꓹ ꓖꓳ ꓟ ꓬꓲ ꓫꓵꓸ ꓠꓬ ꓪꓴ-ꓢ ꓗꓪ ꓐꓰ ꓡˍ ꓟ ꓥ ꓡꓳ= ꓪꓴ-ꓢ ꓠꓲꓹ ꓡꓶꓽ ꓟꓽ ꓙꓳ ꓕꓯ ꓠꓽ ꓮ ꓡꓲ ꓕꓲ ꓣꓳˍ ꓟꓲ ꓙꓵꓻ ꓠꓲꓹ ꓬꓲ ꓫꓵꓸ ꓖꓳ ꓟ ꓔꓯ ꓟꓽ ꓟꓶ= ꓕꓱ ꓟ ꓑꓶꓸ ꓓꓴ ꓣꓳ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓢꓲꓺ ꓚꓰꓸ ꓔ ꓟ ꓟꓶˍ ꓡꓳ ꓐꓯˍ ꓟ ꓠꓬ ꓡꓳꓸ ꓟꓳꓻ ꓟꓳꓻˍ ꓡꓰꓽ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓠꓬ ꓣꓳ ꓘꓳ ꓣꓴ ꓶ ꓔˍ ꓟ ꓙꓲ-ꓢꓴ ꓢꓲ ꓤ ꓙꓵꓻ ꓠꓲꓹ ꓬꓲ ꓫꓵꓸ ꓔꓯ ꓟꓬꓽ ꓡ ꓠꓹ ꓟ ꓢꓯꓼ ꓕꓵꓼ ꓠ ꓗˍ ꓡꓳ=
ꓪꓴ-ꓢ ꓤ꓾ ꓮꓸ ꓟꓲꓽ ꓒꓬꓱꓼ ꓡˍ ꓟ ꓙꓵꓽ ꓪ ꓟꓶ ꓗꓷ ꓟ ꓡꓰ ꓐꓰ ꓪꓴ-ꓢ ꓬꓲ ꓤ ꓚꓵ꓾ ꓮꓸ ꓟꓲꓽ ꓚꓵ ꓒꓬꓱꓼ ꓡ ꓠꓹ ꓟ ꓐꓱ ꓶ ꓞꓳ ꓙꓳ ꓢꓯꓸ ꓔꓬ ꓠ ꓗꓹ ꓡꓳ= ꓪꓴ-ꓢ ꓤ ꓮꓸ ꓟꓲꓽ ꓣꓱꓽˍ ꓟ ꓗꓪ ꓐꓰ ꓗꓶꓹ ꓶꓽ ꓡꓰ ꓝꓲˍ ꓟ ꓫꓸ ꓕꓱ ꓘꓶꓽ꓾ ꓣꓱꓽ ꓬꓰ ꓚꓱꓹ꓾ ꓞꓳ ꓙꓳ ꓚꓱꓹ꓾ ꓝꓴꓲꓸ ꓥ ꓕ ꓑꓳꓸꓼ ꓔꓯ ꓢꓯꓼ ꓕꓵꓼ ꓢꓲ ꓤ ꓟꓳ ꓠ ꓗꓸ ꓡꓳ=
ꓪꓴ-ꓢ ꓡꓰ ꓣꓳ ꓔꓯ ꓢꓲꓺ ꓣꓴˍ ꓕꓯ ꓣꓳ ꓟꓬꓱ ꓔꓯ ꓘꓴꓻ ꓢꓲ ꓢꓲꓺ ꓣꓴˍ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓖꓳ ꓓꓱꓽ ꓔꓲꓹˍ ꓟ ꓢ-ꓗ-ꓣ-ꓟꓯꓹ-ꓔꓴꓹ ꓘꓳ ꓣꓴˍ ꓕꓯ ꓣꓳ ꓢꓲꓽ ꓫꓬ ꓟꓬꓱ ꓕꓲ ꓙꓰꓽ ꓙꓰꓽ ꓔꓯ ꓟꓬꓱ ꓖꓶˍ ꓟ ꓗꓪ ꓐꓰ ꓪꓴ-ꓢ ꓤ꓾ ꓮꓸ ꓟꓲꓽ ꓒꓬꓱꓼ ꓡˍ ꓟ ꓔꓯ ꓙꓵꓻ ꓢꓲ ꓣꓷꓠꓸ ꓠ ꓗꓹ ꓡꓳ=
ꓠꓬꓲꓸ ꓠꓬꓲ ꓗꓪ ꓥˍ ꓟꓲ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓬꓲ ꓪ ꓟꓬꓱ ꓐꓰ ꓕꓲ ꓪꓽ ꓢꓲꓺ ꓗꓷ ꓟ ꓥ ꓡꓳ= ꓬꓲ ꓟꓬꓱ ꓘꓴꓻ ꓢꓲ ꓢꓲꓺˍ ꓟ ꓗꓪ ꓐꓰ ꓬꓲ ꓟꓬꓱ ꓘꓴ ꓟꓶˍ ꓟ ꓖꓳ ꓕꓲ ꓣꓳ ꓔꓯ ꓮ ꓟꓬꓹ ꓟꓲꓽ ꓙꓬ ꓗꓪ ꓢꓷꓸ ꓙ ꓟꓳ ꓙ ꓗꓷ ꓟ ꓥ ꓡꓳ= ꓕꓱ ꓟ ꓑꓶꓸ ꓓꓴ ꓠꓬꓲ ꓠꓬꓲꓸ ꓠꓬꓲ ꓣꓳ ꓐꓴ ꓥˍ ꓟꓲ ꓣꓳ ꓔꓯ ꓪꓴ-ꓢ ꓠꓬ ꓬꓲ ꓤ꓾ ꓬꓲ ꓮꓸ ꓟꓲꓽ ꓕꓲ ꓣꓳˍ ꓡꓰ ꓐꓰ ꓣꓳ ꓖꓳ ꓓꓱꓽ ꓔꓲꓹ ꓟꓶˍ ꓕꓯ ꓡꓰ ꓢꓷꓸ ꓙ ꓟꓳ ꓙ ꓗꓷ ꓟ ꓔꓯ ꓓꓵꓽ ꓙ ꓛꓲ ꓠ ꓗꓹ ꓡꓳ=
ꓪꓴ-ꓢ ꓣꓱꓽ ꓛꓰꓽ ꓗꓪ ꓐꓰ ꓣꓳ ꓘꓳ ꓣꓴ ꓟꓶ ꓗꓷ ꓟ ꓙꓲ-ꓢꓴ ꓢꓲ ꓤ ꓤꓶꓻ ꓔꓯ ꓒꓵꓽ ꓗ ꓬꓰ ꓠ ꓗꓹ ꓡꓳ= ꓙꓲ-ꓢꓴ ꓢꓲ ꓤ ꓕꓲ ꓣꓳ ꓛꓳ ꓫꓱꓽ ꓠ ꓔˍ ꓟ ꓚꓱꓹ ꓐꓴ ꓔꓯ ꓛꓳ ꓫꓱꓽ ꓠ ꓗꓹ ꓡꓳ= ꓙꓲ-ꓢꓴ ꓢꓲ ꓤ ꓐꓴ ꓐꓱ ꓶ ꓕꓲ ꓟˍ ꓟ ꓥꓳ ꓡꓳꓸ ꓓꓴ ꓥ ꓟ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓔꓯ ꓟꓽ ꓟꓲ ꓡꓰꓹ ꓡꓰꓹ ꓐꓰ ꓮ ꓕꓯ ꓟꓲ ꓓꓵꓽ ꓙ ꓟꓶ ꓠ ꓗꓹ ꓡꓳ=
ꓡꓳꓹ ꓬꓰˍ ꓕꓯ ꓟꓴꓽ ꓗꓪ ꓗꓴꓷꓼ ꓗꓪ ꓕꓲ ꓞꓲꓼ ꓢꓯꓼ ꓟꓬ ꓔꓯ ꓑꓯꓹ ꓟꓶ ꓡꓰˍ ꓥꓳ= ꓕꓱ ꓟ ꓮ ꓙꓵꓽ ꓐꓲ ꓜꓲꓼ ꓡꓰ ꓠꓹ ꓟ ꓣꓳ ꓠꓬ ꓪꓴ-ꓢ ꓬꓲ ꓚꓲꓸ ꓛꓬ ꓡꓰ ꓢꓲꓺ ꓔ ꓟ ꓤ ꓮꓸ ꓟꓲꓽ ꓥ ꓟ ꓔꓯ ꓙꓵꓻ ꓢꓲ ꓠꓬꓲ꓾ ꓚꓲꓸ ꓛꓬ ꓘꓳ ꓣꓴ ꓔˍ ꓟ ꓙꓲ-ꓢꓴ ꓢꓲ ꓤ ꓤꓶꓻ ꓔꓯ ꓙꓲꓻ ꓓꓰ ꓡꓰˍ ꓟ꓾ ꓧꓺ ꓓꓰ ꓡꓰˍ ꓟ ꓚꓱꓹ ꓗꓪ ꓞꓳ ꓙꓳ ꓢꓯꓸ ꓔꓬ ꓓꓴ ꓬꓰ ꓡꓯ=
