ꓢꓲꓺ ꓒ ꓬꓰ˗ꓢꓴ ꓡꓰ ꓙꓴꓽ ꓝꓲꓸ ꓗꓴꓺ ꓢꓴ ꓔꓯ ꓫꓬꓹ ꓓꓻ ꓡꓰ ꓟ (Monday reflection)
ꓠꓬꓲ. ꓠꓬꓲ ꓠꓽ ꓕꓲ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 13ꓽ10‐17 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓠꓽ ꓫꓵꓽ ꓠꓬꓲ ꓗꓪ ꓜꓲꓼ ꓦꓲꓻ ꓗꓪ ꓠꓽ ꓡꓰ ꓞꓲ ꓦꓰꓼ ꓘꓳꓼ ꓘꓶꓽ ꓡꓰ ꓢꓲ ꓠꓬꓲ ꓙꓴꓽ ꓝꓲ. ꓗꓴꓺ ꓔꓬ ꓢꓴ ꓔꓯ ꓠꓽ ꓠꓬ ꓖꓶ ꓗꓷ ꓟ ꓥ ꓡꓳ꓿
ꓖꓳ ꓟ ꓔꓯ ꓜꓲꓼ ꓦꓲꓻ ꓙꓵꓽ ꓢꓴ ꓠꓬ ꓠꓽ ꓦꓬꓼ ꓠꓬꓲ ꓗꓪ ꓢꓲꓺ ꓒ ꓬꓰ‐ꓢꓴ ꓠꓻ ꓫꓬ, ꓖꓶ ꓟ ꓔꓯ ꓠꓲ, ꓟ ꓩꓴ ꓟ ꓥ ꓡꓳ꓿ ꓖꓳ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓢꓷ. ꓟ ꓪꓴ. ꓠꓬꓲ ꓠꓲ, ꓟ ꓠꓬꓲ ꓔꓱ, ꓣꓴ ꓢꓴ ꓐꓴ ꓠꓴ ꓪ ꓮꓽ ꓟ ꓥ ꓟꓲ꓾ ꓠꓽ ꓦꓬꓼ ꓠꓬꓲ ꓗꓪ ꓙꓱꓽ ꓤ ꓗꓪ ꓐꓰ ꓮ ꓠꓬꓲꓽ ꓕꓳꓽ ꓡ ꓟꓴꓽ ꓔꓯ ꓤꓶꓻ ꓢꓲ꓾ ꓬꓲꓻ ꓙꓬ ꓓꓳꓻ ꓖꓴ ꓗꓪ ꓢꓲ ꓙꓰ ꓡꓳ ꓟꓽ ꓥ ꓡ? ꓐꓯ ꓖꓶ ꓗꓷ ꓟ ꓥ ꓡꓳ꓿
ꓢꓲꓺ ꓒ ꓦꓬꓼ ꓠꓬꓲ ꓠꓬ ꓪꓴ‐ꓢ ꓔꓯ ꓫ. ꓟꓳ ꓠ, ꓟ ꓦꓬꓼ ꓠꓬꓲ ꓐꓰ ꓪꓽ ꓘꓴ ꓠ, ꓟ ꓦꓬꓼ ꓠꓬꓲ ꓥ ꓟ ꓔꓯ ꓣꓳ ꓮ ꓙꓵꓽ ꓢꓷ. ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓛꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓙꓲ ꓟ ꓟꓬꓱꓽ ꓔꓯ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓐꓱ ꓶ ꓬꓰ ꓖꓶ ꓠ, ꓟ ꓐꓰ ꓠꓵꓻ ꓠꓲ, ꓟ. ꓖꓶ ꓠ, ꓟ ꓦꓬꓼ ꓠꓬꓲ ꓕꓲ ꓟꓲ ꓥ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓪꓴ‐ꓢ ꓔꓯ ꓓꓳ ꓟꓴ ꓫꓱ, ꓖꓶ ꓠ, ꓟ ꓐꓰ ꓪꓽ ꓘꓴ ꓠ, ꓟ ꓔꓯ ꓢꓷ. ꓥ ꓟꓲ ꓠꓴ ꓥꓪ ꓠꓬ ꓙꓲ ꓟ ꓟꓬꓱꓽ ꓐꓰ ꓠꓵꓻ ꓠꓲ, ꓙꓳ ꓠ, ꓟ ꓔꓯ ꓟꓽ ꓬꓰ ꓠꓬ ꓠꓵꓻ ꓠꓲ, ꓟꓽ ꓙꓳ ꓢꓴ ꓙꓲ‐ꓢꓴ ꓢꓲꓺ ꓤ ꓝꓮꓲ ꓙꓵꓽ ꓗꓽ ꓔꓯ ꓡꓰ ꓛꓳ ꓢꓴ ꓐꓴ ꓙꓲ‐ꓢꓴ ꓢꓲꓺ ꓤ ꓐꓴ ꓒꓬꓱꓼ ꓡ ꓟ ꓥ ꓡꓳ꓿ ꓔꓱ, ꓔꓱ, ꓣꓳ ꓣꓳ ꓙꓵꓻ ꓠꓲ, ꓚꓱ, ꓗꓪ ꓮ ꓘꓶ. ꓛꓲ ꓣꓳ ꓚꓵ, ꓟ ꓠꓬ ꓠꓵꓻ ꓠꓲ, ꓡꓰ ꓟꓬꓱꓽ ꓬꓰ ꓠ, ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓟ. ꓟꓲ ꓚꓺ ꓟ ꓙꓵ, ꓕꓯ ꓬꓲ ꓙꓵ, ꓟꓶ ꓫꓵˍ ꓫꓵˍ ꓠꓲꓽ ꓡꓰ ꓤ ꓠꓬꓲ ꓟ ꓤ ꓟꓶ ꓤ ꓔꓯ ꓢꓲꓺ ꓒ ꓬꓰ‐ꓢꓴ ꓠꓲ, ꓠꓵ ꓗꓪ ꓐꓰ ꓠꓻ ꓫꓬ, ꓖꓶ ꓓꓽ ꓥ ꓟꓲ ꓜꓲꓼ ꓦꓲꓻ ꓪꓽ ꓘꓴ ꓦꓲꓻ ꓔꓯ ꓙꓵꓻ ꓢꓴ ꓠꓬ ꓟꓽ ꓠꓲ, ꓫꓵˍ ꓟ ꓥ ꓡꓳ꓿ ꓜꓲꓼ ꓦꓲꓻ ꓙꓵꓽ ꓢꓴ ꓠꓬ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓬꓲ ꓙꓱ ꓤ ꓔꓯ ꓠꓬ ꓬꓲꓻ ꓙꓬ ꓖꓶ ꓓꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓦꓻ ꓡꓱ ꓢꓴ ꓐꓴ ꓔꓯ ꓠꓬ ꓠꓵꓻ ꓠꓲ, ꓟꓽ ꓙꓳ ꓟ ꓥ ꓡꓳ꓿ ꓖꓳ ꓟ ꓔꓯ ꓤ ꓟꓳ ꓠ, ꓟ ꓢꓲꓺ ꓒ ꓬꓰ‐ꓢꓴ ꓠꓬ ꓔꓯꓺ ꓥꓳꓽ ꓗꓪ ꓐꓰ ꓟ. ꓖꓶ ꓐꓯ ꓟ. ꓖꓶ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓪꓴ‐ꓢ ꓔꓯ ꓠꓬ ꓮ ꓘꓶ. ꓠꓲ, ꓠꓵ ꓢꓲ ꓠꓬꓲ ꓣꓳ ꓕꓲ ꓦꓲꓻ ꓣꓳ ꓛꓳꓽ ꓒꓯ, ꓐꓴ ꓔꓯ ꓠꓬ ꓠꓲ, ꓟ ꓩꓴ ꓢꓴ ꓐꓴ ꓒꓬꓱꓼ ꓔꓬ ꓡ ? ꓝꓮꓲ ꓙꓵꓻ ꓠꓲ, ꓮ ꓘꓶ. ꓙꓳ ꓡꓳ ꓐꓯ ꓢꓲ ꓠꓬꓲ ꓢꓴ ꓔꓯ ꓠꓬ ꓟꓽ ꓙꓲ ꓟ ꓔꓯ ꓡꓰ ꓬꓰ ꓖꓶ ꓢꓴ ꓒꓬꓱꓽ ꓔꓬ ꓡ ? ꓜꓲꓼ ꓦꓲꓻ ꓙꓵꓽ ꓒ ꓡꓰ ꓐꓰ ꓒꓬꓱꓼ ꓔꓬ ꓡ ꓚꓲ. ꓛꓬ ꓚꓱ, ꓔꓯ ꓓꓴ ꓙ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓠ ꓠꓬꓲˍ ꓔꓬ ꓟ ꓥ ꓡꓳ꓿ ꓠꓲ, ꓠꓵ ꓟ ꓙꓲ‐ꓢꓴ ꓢꓲꓺ ꓤ ꓙꓲ ꓟ ꓟꓬꓱꓽ ꓔꓯ ꓠꓵꓻ ꓠꓲ, ꓡꓰ ꓬꓰ ꓐ ꓡ ꓢꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
