ꓒ‐ꓡꓲ‐ꓢꓷ. ꓐꓰ ꓝꓲ. ꓫ ꓢꓴ ꓔꓯ ꓥꓳꓽ (Sunday reflection)
ꓧꓪ. ꓧꓪ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (30) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 18ꓽ9‐14 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓚꓲ ꓛꓬ ꓙꓲ ꓟ ꓔꓯ ꓦꓻ ꓡꓱ ꓢꓲ ꓢꓴ ꓔꓯ ꓟꓳꓻ ꓟꓽ ꓟꓵ ꓢꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓒ‐ꓡꓲ‐ꓢꓷ ꓐꓰ ꓝꓲ. ꓫ ꓢꓴ ꓔꓯ ꓥꓳꓽ ꓔꓯ ꓐꓯ ꓟ. ꓖꓶ ꓟ ꓚꓱ, ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐ, ꓐ ꓪꓴ‐ꓢ ꓠꓬ ꓚꓲ. ꓛꓬ ꓔꓯ ꓙ ꓣꓳ ꓢꓴ ꓐꓴ ꓪꓽ ꓘꓴ ꓘꓶꓽ ꓔꓯ ꓠ ꓠ, ꓡꓳ ꓐꓰ ꓐꓯ ꓟ. ꓖꓶ ꓔ ꓟ ꓢꓲꓽ ꓫꓬ ꓕꓳ ꓶ ꓥ ꓡꓳ꓿ ꓡ ꓞꓳ ꓠꓬꓲ ꓣꓳ ꓪꓽ ꓘꓴ ꓦꓲꓻ ꓗꓪ ꓪꓽ ꓘꓴ ꓔꓬ ꓕꓯ ꓒ‐ꓡꓲ‐ꓢꓷ ꓠ ꓦꓰꓼ ꓞ, ꓢꓲ ꓚꓲ. ꓛꓬ ꓔꓯ ꓟꓲ ꓓꓳ ꓖꓶ ꓢꓲ ꓠꓬꓲ ꓬꓲ ꓠꓬ ꓠꓱ. ꓐꓯꓼ ꓢꓴ ꓡꓣ ꓘꓶ. ꓜꓽ ꓓꓴ ꓟꓽ ꓥ꓾ ꓬꓲ ꓠꓬ ꓬꓲ ꓠꓽ ꓘꓴ ꓗꓪ ꓜꓽ ꓓꓴ ꓠꓬꓲꓽ ꓧꓪ ꓚꓲ. ꓟ ꓝꓮꓲ ꓬꓲ ꓠꓬ ꓬꓲ ꓪ ꓟ ꓕꓲ ꓐꓱ ꓪꓴ‐ꓢ ꓔꓯ ꓖꓶ ꓟ ꓚꓱ, ꓔꓯ ꓐꓯ ꓡꓳ꓿
ꓝꓲ. ꓫ ꓢꓴ ꓠꓬ ꓶꓽ ꓤ ꓗꓪ ꓦꓰꓼ ꓞ, ꓢꓲ ꓟꓴ ꓗꓪ ꓔꓯ ꓟꓳ. ꓟꓽ ꓡꓳ. ꓡꓳ. ꓬꓲ ꓳʼ ꓟꓶꓽ ꓓꓶꓽ ꓢꓲ ꓪꓴ‐ꓢ ꓔꓯ ꓝꓴꓲ ꓙꓳ ꓢꓴ ꓥꓪ ꓔꓯ ꓫꓱ. ꓤ ꓡꓯ ꓐꓰ ꓓꓰꓽ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓝꓲ. ꓫ ꓢꓴ ꓠꓬ ꓬꓲ ꓝꓴꓲ ꓔꓯ ꓖ ꓖꓶ ꓟꓶ ꓡꓰ ꓢꓲ ꓠꓬꓲ ꓦꓲꓻ ꓗꓪ ꓡ ꓙꓰ ꓟ ꓔꓯ ꓣꓳ ꓡꓳ. ꓟꓳ ꓪ ꓟ ꓥ ꓡꓳ꓿
ꓪꓴ‐ꓢ ꓟꓶ ꓙꓱ ꓗꓪ ꓙ ꓣꓳ ꓟ ꓠꓲ, ꓗꓪ ꓐꓰ ꓪꓽ ꓘꓴ ꓠꓯ, ꓟ ꓠꓬꓲ. ꓠꓬꓲ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓪꓽ ꓘꓴ ꓢꓴ ꓐꓴ ꓪꓽ ꓘꓴ ꓘꓶꓽ ꓔꓯ ꓪꓴ‐ꓢ ꓠ ꓡꓳ ꓖꓶ ꓡꓳ꓿ ꓔꓱ ꓙꓲ ꓟ ꓙꓲ‐ꓢꓴ ꓢꓲꓺꓤ ꓐꓴ ꓠꓲ, ꓟ ꓠꓯ, ꓗꓪ ꓙ ꓣꓳ ꓟ ꓠꓲ, ꓙꓳ ꓠ, ꓟ ꓓꓽ ꓪꓴ. ꓣꓳ ꓚꓵ, ꓟ ꓥ ꓡꓳ꓿ ꓣꓳ ꓢꓯ. ꓔꓬ ꓟ ꓤꓶꓻ ꓠꓯ, ꓗꓪ ꓪꓴ‐ꓢ ꓣꓱ ꓛꓰ ꓣꓱ ꓬꓯꓼ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓝꓴꓲ. ꓔꓯ ꓭ. ꓠ, ꓟ ꓣꓳ ꓚꓵ, ꓟ ꓥ ꓡꓳ꓿
ꓚꓲ. ꓛꓬ ꓔꓯ ꓟꓳ ꓓꓳ ꓟꓴ ꓢꓴ ꓐꓴ ꓠꓬ ꓦꓻ ꓕꓲ ꓒꓳ, ꓗꓪ ꓮ ꓘꓶ. ꓛꓲ ꓙꓳꓺ ꓓꓴ ꓓꓽ ꓟ ꓥ ꓡꓳ꓿ ꓒ‐ꓡꓲ‐ꓢꓷ ꓪꓽ ꓘꓴ ꓘꓶꓽ ꓠꓬ ꓬꓲ ꓮ ꓟꓬ, ꓛꓲ ꓓꓽ ꓟ ꓚꓱ, ꓠꓱ. ꓐꓯꓼ ꓢꓴ ꓔꓯꓺ ꓢꓲ ꓓꓽ ꓟ ꓚꓱ, ꓡꓰ ꓐꓲ ꓜꓲꓼ ꓟ ꓥ ꓡꓳ꓿ ꓒ‐ꓡꓲ‐ꓢꓷ ꓠꓬ ꓬꓲ ꓚꓲ. ꓛꓬ ꓔꓯ ꓮ ꓘꓶ. ꓛꓲ ꓙ ꓣꓳ ꓟ ꓠꓲ, ꓟ ꓙꓳ ꓡꓳ ꓐꓰ ꓐꓯ ꓔꓬ ꓥ ꓟꓲ ꓚꓵ, ꓚꓵ, ꓠꓲ, ꓟ ꓘꓴꓽ ꓗꓪ ꓮꓽ ꓔꓳꓽ ꓐꓯ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓒ‐ꓡꓲ‐ꓢꓷ ꓡꓰ ꓐꓰ ꓡ ꓞꓳ ꓟꓲ ꓙꓱ ꓗꓪ ꓮ ꓘꓶ. ꓓꓽ ꓟ ꓚꓱ, ꓙꓵꓻ ꓠꓲ, ꓮ ꓟꓬ, ꓙꓳ ꓡꓳ ꓐꓰ ꓚꓲ. ꓛꓬ ꓚꓱ, ꓔꓯ ꓘꓶꓽ ꓘ, ꓟ ꓔꓯ ꓤ ꓟꓳ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔꓬ ꓟ ꓥ ꓡꓳ꓿
ꓐ, ꓐ ꓪꓴ‐ꓢ ꓠꓬ ꓣꓳ ꓠꓲ, ꓟ ꓘꓴꓽ ꓗꓪ ꓮ ꓡꓰ ꓫꓵꓽ ꓙꓳ ꓟ ꓮ ꓙꓵꓽ ꓔꓯ ꓡꓳ. ꓟꓳ ꓘꓴ ꓟ ꓪꓴ‐ꓢ ꓥ ꓟ ꓪꓴ. ꓠꓬꓲ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓛꓬ ꓡꓰ ꓥꓳꓽ ꓡꓰ ꓟ ꓝꓴꓲ. ꓔꓯ ꓭ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓬꓰ ꓛꓬ ꓗꓷ ꓟ ꓝꓴꓲ. ꓕꓯ ꓢꓲ ꓐ, ꓐ ꓪꓴ‐ꓢ ꓡꓰ ꓣꓳ ꓔꓯ ꓠꓲ, ꓟ ꓟ ꓠꓵꓻ ꓠꓲ, ꓠꓬ ꓮ ꓘꓶ. ꓛꓲ ꓪꓴꓽ ꓟ ꓥ ꓡꓳ꓿ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓠꓬ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓐꓱ ꓶ ꓐ, ꓐ ꓪꓴ‐ꓢ ꓠꓵꓻ ꓠꓲ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓴ ꓥꓪ ꓠꓬ ꓣꓳ ꓬꓰ ꓛꓬ ꓗꓷ ꓟ ꓝꓴꓲ ꓔꓯ ꓓꓴ ꓙ ꓒꓳ ꓡꓶꓽ ꓢꓲ ꓠꓬꓲ ꓪꓴ‐ꓢ ꓠꓯ, ꓗꓪ ꓡ ꓡ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿ ꓝꓴꓲ ꓔꓯ ꓓꓴ ꓙ ꓒꓳ, ꓡꓶꓽ ꓡ ꓢꓴ ꓐꓴ ꓔꓯ ꓐ, ꓐ ꓪꓴ‐ꓢ ꓠꓬ ꓣꓳ ꓝꓴꓲ ꓔꓯ ꓖꓼ ꓖꓶ ꓟꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓣꓳ ꓚꓲ. ꓛꓬ ꓪꓽ ꓘꓴ ꓟ ꓙꓵ, ꓕꓯ ꓒ‐ꓡꓲ‐ꓢꓷ ꓕꓲ ꓣꓳ ꓡꓰ ꓐꓰ ꓪꓽ ꓘꓴ ꓔꓬ ꓡ ꓝꓮꓲ ꓝꓲ. ꓫ ꓢꓴ ꓕꓲ ꓣꓳ ꓡꓰ ꓪꓽ ꓘꓴ ꓔꓬ ꓡ ꓣꓳ ꓚꓲ. ꓛꓬ ꓓꓴ ꓙ ꓓꓴ ꓬꓰ ꓡꓯ꓿ ꓔꓱ ꓟ ꓪꓽ ꓘꓴ ꓟ ꓚꓱ, ꓠꓬ ꓚꓲ ꓛꓬ ꓮ ꓟꓬ, ꓓꓽ ꓮ ꓡꓰ ꓗꓪ ꓛꓲ ꓬꓰ ꓐ ꓡ ꓟ ꓔꓯ ꓡ ꓞꓳ ꓐꓴ ꓢꓷ. ꓠ, ꓟ ꓪꓽ ꓘꓴ ꓟ ꓟꓽ ꓥ꓿ ꓪꓴ‐ꓢ ꓣꓱ ꓛꓰ ꓓꓰꓽ ꓢꓲ ꓠꓬꓲ ꓝꓴꓲ ꓠꓯ, ꓗꓪ ꓐꓰ ꓙꓲ ꓟ ꓡ ꓞꓳ ꓒꓬꓱꓼ ꓡ ꓠ, ꓟ ꓓꓰꓽ ꓓꓴ ꓬꓰ ꓡꓯ꓿
ꓠꓬꓲ. ꓠꓬꓲ ꓗꓪ ꓐꓰ ꓠꓴ ꓥꓪ ꓠꓬ ꓙ ꓣꓳ ꓟ ꓠꓲ, ꓟ ꓙꓳ ꓠ, ꓟ ꓪꓽ ꓘꓴ ꓓꓴ ꓬꓰ ꓡꓯ꓿ ꓔꓱ ꓚꓵ, ꓟ ꓪꓴ‐ꓢ ꓠꓵꓻ ꓠꓲ, ꓔꓯ ꓘꓳ, ꓣꓴ ꓟꓶ ꓠ, ꓟ ꓶ ꓓꓰꓽ ꓓꓴ ꓬꓰ ꓡꓯ꓿ ꓠꓱ. ꓐꓯ ꓢꓴ ꓐꓴ ꓔꓯ ꓐꓯ ꓛꓬ, ꓗꓷ ꓟ ꓝꓴꓲ ꓮ ꓙꓵꓽ ꓔꓯ ꓡꓳ. ꓟꓴ ꓢꓲ ꓠꓬꓲ ꓚꓲ. ꓛꓬꓝꓴꓲ ꓔꓯ ꓭ. ꓐ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓪꓴ‐ꓢ ꓠꓵꓻ ꓠꓲ, ꓔꓯ ꓧꓪ ꓓꓴ ꓬꓰ ꓡꓯ꓿ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓶ ꓓꓰꓽ ꓓꓴ ꓬꓰ ꓡꓯ꓿
