ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓧꓪꓸ ꓧꓪꓸꓼ= ꓣꓳ ꓪꓽ ꓘꓴˍ ꓕꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓓꓻ ꓬꓳꓸ ꓚꓵˍ ꓟ ꓠꓲꓹ ꓟ ꓕꓲ ꓫꓵꓽ ꓙꓳˍ ꓡꓳ= ꓕꓱ ꓟ ꓠꓬ꓾ ꓣꓳ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓮ ꓫꓵꓽ ꓟꓽ ꓒꓵꓽ ꓟꓽ ꓚꓬꓹ꓾ ꓪꓴ-ꓢ ꓟꓲꓽ ꓙꓬ ꓗꓪ ꓣꓳ ꓠꓬ ꓬꓲ ꓠꓵꓻ ꓠꓲꓹ ꓕꓲ ꓟ ꓔꓯˍ ꓡꓰꓽ ꓣꓱꓽ ꓞꓹ ꓟ ꓥ ꓡꓳ= ꓮ ꓙꓵꓽ ꓠꓬ ꓬꓲ ꓣꓱꓽ ꓛꓰꓽ ꓥ ꓡꓳ= ꓮ ꓙꓵꓽ ꓠꓬ ꓬꓲ ꓔꓯˍ ꓟ ꓥ ꓡꓳ= ꓬꓲ ꓟꓽ ꓥ ꓠꓬ ꓮꓽ ꓟ ꓠꓬ ꓮ ꓫꓵˍ ꓟꓲ ꓬꓰ ꓟꓽ ꓐ ꓡ ꓐꓯˍ ꓟ ꓙ ꓣꓳꓽˍ ꓟ ꓠꓲꓹ ꓟ ꓔꓯ ꓧꓶꓸ ꓕꓯ ꓖꓶ ꓠ ꓗꓹ ꓡꓳ= ꓠꓲꓹ ꓟ ꓕꓱ ꓟ ꓙꓳˍ ꓕꓯ ꓡꓰꓽ ꓣꓳ ꓪꓽ ꓘꓴ ꓘꓶ ꓠꓬ ꓪꓴ-ꓢ ꓟꓲꓽ ꓙꓬˍ ꓗꓪ ꓛꓲ ꓬꓰˍ ꓡꓳ꓾ ꓐꓯˍ ꓟ ꓣꓳ ꓢꓷꓸ ꓠ ꓔˍ ꓡꓳ= ꓪꓽ ꓘꓴˍ ꓕꓯ ꓙ ꓣꓳꓽ ꓠꓲꓹ ꓕꓱ ꓟ ꓠꓬ ꓬꓳꓸ ꓚꓰꓽ ꓓꓰ ꓡꓰˍ ꓟ ꓥ ꓡꓳ= ꓣꓳ ꓕꓱ ꓟ ꓔꓯ ꓡꓯꓼ ꓫꓵ ꓠ ꓠꓹ ꓠꓹ ꓟ ꓐꓱ ꓶ ꓢꓲꓽ ꓫꓬ ꓕꓳꓽ ꓶ ꓔꓯ ꓧꓶꓸ ꓕꓯ ꓠ ꓠꓹ ꓓꓴ ꓬꓰ ꓡꓯ=
(ꓡꓴ-ꓘ=18ꓽ9-14) ꓚꓲꓸ ꓛꓬ ꓔꓱꓹ ꓜꓳꓽˍ ꓟ ꓔꓯ ꓦ ꓡꓱ ꓢꓲ꓾ ꓢꓴ ꓔꓯ ꓟꓳꓻ ꓟꓽ ꓟꓵꓺ ꓢꓴ ꓔꓯ꓾ ꓬꓰ-ꓢꓴ ꓠꓬ ꓔꓯ ꓥꓳꓽ ꓡꓰ ꓕꓱ ꓡꓱ ꓐꓯˍ ꓢꓰꓽ ꓡꓳ꓿ ꓡꓽ ꓞꓳ ꓠꓬꓲꓽ ꓣꓳ ꓠꓬ ꓪꓽ ꓘꓴ ꓠꓹ ꓟ ꓢꓲꓽ ꓫꓬ ꓦꓲ ꓗꓪ ꓓꓯ ꓙꓰˍ ꓡꓳ꓿ ꓕꓲ ꓣꓳ ꓠꓬ ꓒ-ꓡꓲ-ꓢꓷ ꓥ ꓢꓲ꓾ ꓕꓲ ꓣꓳ ꓠꓽ ꓝꓲꓸ ꓫ ꓢꓴ ꓥ ꓡꓳ꓿
ꓒ-ꓡꓲ-ꓢꓷ ꓠꓽ ꓦꓰꓼ ꓞꓹ ꓢꓲ꓾ ꓚꓲꓸ ꓛꓬ ꓔꓯ ꓟꓳꓸ ꓕꓱ ꓡꓱ ꓪꓽ ꓘꓴˍ ꓡꓳ꓿ ꓪꓴ-ꓢꓺꓳ꓾ ꓥꓪ ꓠꓽ ꓠꓱꓸ ꓐꓯ ꓢꓴˍ ꓡꓰ ꓐꓰ ꓢꓴ ꓔꓯ ꓘꓳꓹ ꓜꓽ ꓢꓴ ꓟꓽ ꓥ꓿ ꓟꓽ ꓔꓱꓹ ꓢꓴˍ ꓟꓲ ꓟꓽ ꓥ꓿ ꓦꓬꓽ ꓛꓳꓽ ꓧꓪ ꓢꓴˍ ꓟꓲ ꓟꓽ ꓥ꓿ ꓝꓮꓲ ꓝꓲꓸ ꓫ ꓢꓴ ꓕꓱ ꓕꓲ ꓣꓳ ꓡꓰ ꓐꓰˍ ꓟꓲ ꓟꓽ ꓗꓹ ꓠꓬꓲ ꓠꓴ ꓔꓯ ꓫꓸ ꓟꓳ꓿ ꓥꓪ ꓠꓬ ꓕꓲ ꓠꓽ ꓗꓪ ꓜꓽ ꓓꓴ ꓠꓬꓲꓽ ꓧꓪ ꓚꓲꓸˍ ꓡꓳ꓿ ꓥꓪ ꓟꓶˍ ꓟ ꓮꓽ ꓙꓵ ꓗꓪ ꓐꓰ ꓞꓲꓻ ꓐꓱ ꓕꓲ ꓐꓱ ꓠꓴ ꓔꓯ ꓡꓲꓸ ꓖꓶˍ ꓡꓳ꓾ ꓐꓯˍ ꓡꓳ꓿ ꓝꓲꓸ ꓫ ꓢꓴ ꓠꓽ ꓶꓽ ꓤ ꓗꓪ ꓦꓰꓼ ꓞꓹ ꓢꓲ꓾ ꓟꓴꓽ ꓗꓪ ꓗꓪ ꓡꓳꓸ ꓟꓽ ꓑꓶꓸ ꓑꓶ ꓳ’ ꓟꓶꓽ ꓓꓶꓽ ꓢꓲ꓾ ꓪꓴ-ꓢꓺꓳ꓾ ꓝꓴꓲ ꓙꓳ ꓢꓴ ꓥꓪ ꓔꓯ ꓫꓱꓸ ꓤ ꓙ ꓡꓯ꓾ ꓐꓯˍ ꓡꓳ꓿
ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓝꓲꓸ ꓫ ꓢꓴ ꓖꓳ ꓕꓲ ꓣꓳ ꓠꓬ ꓒ-ꓡꓲ-ꓢꓷ ꓖꓳ ꓕꓲ ꓣꓳ ꓢꓶꓸ ꓟ ꓞꓲ ꓔꓱꓹ ꓜꓳꓽˍ ꓟ ꓚꓬꓹ ꓟꓶ ꓢꓲ ꓬꓲ ꓦꓲ ꓗꓪ ꓬꓲꓼ ꓙꓰ ꓪˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓚꓲꓸ ꓛꓬ ꓔꓯ ꓓꓳꓹ ꓟꓴ ꓢꓴ ꓥ ꓕ ꓑꓳꓸ ꓔꓯ ꓠꓬ ꓱ’ꓺ ꓡꓰ ꓝꓲˍ ꓥꓳ꓿ ꓚꓲꓸ ꓛꓬ ꓙꓻ ꓣꓳꓽ ꓢꓴ ꓔꓯ ꓠꓽ ꓓꓳꓹ ꓟꓴ ꓖꓶˍ ꓥꓳ꓾ ꓐꓯˍ ꓡꓳ꓿ (ꓕꓱ ꓟ ꓠꓬ ꓪꓴ-ꓢ ꓐꓯ ꓘꓶ ꓥ ꓡꓳ=)
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓟꓲꓽ ꓙꓬ ꓗꓪ ꓮ ꓡꓲ ꓫꓵꓽ ꓪꓽ ꓘꓴ ꓘꓶ ꓠꓬ ꓛꓲ ꓬꓰˍ ꓡ ꓐꓯˍ ꓟ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓥ ꓡꓳ=
