ꓞꓳ ꓤ ꓕꓲ ꓣꓳ ꓔꓬ ꓟꓽ ꓢ ꓕꓯ ꓠꓻ ꓓꓴ ꓐꓬ ꓓꓴ ꓔꓳ, ꓜꓳ ꓕꓯ ꓕꓱ ꓟ ꓠꓬ ꓮ ꓘꓶ. ꓓꓵ ꓙ ꓪꓴ ꓧꓶ ꓓꓴ ꓕꓲ ꓫꓵ ꓥ ꓡꓳ꓾ ꓞꓳ ꓤ ꓮ ꓡꓲ ꓕꓲ ꓫꓵ ꓥ ꓟꓲ ꓮꓽ ꓠꓱ ꓗꓳ. ꓡ ꓟ ꓕꓲ ꓠꓬꓲ ꓗꓪ ꓐꓰ ꓮ ꓟꓶ ꓗꓪ ꓛꓲ ꓠꓻ ꓫꓵ ꓠꓻ ꓙꓰ ꓔꓳ, ꓜꓳ ꓕꓯ ꓠꓲ, ꓟ ꓫ. ꓟ꓾ ꓝꓮꓲ ꓮ ꓫꓵ ꓡꓲ ꓬꓰ ꓠꓲ, ꓟꓽ ꓫꓵ ꓟ꓾ ꓫꓵꓻ ꓗꓪ ꓛꓲ ꓠꓲ, ꓟ ꓫ. ꓟ ꓟꓲ ꓙꓳ_ ꓡꓳ꓿ ꓖꓳ ꓡꓱ ꓠꓬꓲ ꓮꓽ ꓟ ꓥ ꓟꓲ ꓠꓻ ꓓꓴ ꓐꓬ ꓓꓴ ꓕꓱ ꓟ ꓔꓯ ꓙꓳꓺ_ ꓡꓳ꓿ ꓖꓳ ꓡꓱ ꓠꓬꓲ ꓠꓻ ꓓꓴ ꓐꓬ ꓓꓴ ꓔꓳ, ꓜꓳ ꓡ ꓕꓯ ꓠꓻ ꓓꓴ ꓕꓱ ꓟ ꓬꓲꓼ ꓔ ꓖꓴ ꓕꓯ ꓢꓲ ꓗꓪ ꓓꓳ ꓡꓰ ꓗꓪ ꓛꓲ ꓕꓱ ꓡꓱ ꓔꓳ, ꓜꓳ ꓡ ꓕꓯ ꓡ ꓞꓳ ꓠꓬꓲꓽ ꓫꓵ ꓓꓳ ꓡ ꓡꓳ꓿ ꓬꓲ ꓪꓴ. ꓕꓲ ꓫꓵ ꓟ ꓠꓬ ꓬꓲ. ꓠꓲ, ꓟ ꓫ. ꓟ ꓥ ꓡꓳ꓾ ꓮ ꓫꓵ ꓑꓶ ꓓꓴ ꓥ ꓡ ꓐꓯ ꓠꓬ꓾ ꓬꓲ ꓮ ꓟꓬ ꓪꓽ ꓘꓴ ꓥ ꓟꓲ ꓮ ꓟꓬ ꓗꓪ ꓛꓲ ꓪꓴ‐ꓢ ꓟꓬꓱꓽ ꓣꓱ ꓥ ꓟꓲ ꓬꓲ ꓔꓯ ꓠꓻ ꓓꓴ ꓕꓱ ꓡꓱ ꓫꓵ ꓖꓶ_ ꓡꓳ ꓐꓰ ꓐꓯ ꓢꓲ ꓠꓬꓲ ꓪꓴ‐ꓢ ꓔꓯ ꓬꓲ ꓠꓲ, ꓦꓶ_ ꓡꓳ꓿ ꓪꓴ‐ꓢ ꓔꓯ ꓠꓲ, ꓜꓳ ꓡ ꓡꓳ꓿ ꓪꓴ‐ꓢ ꓔꓯ ꓬꓲ ꓪꓽ ꓘꓴ ꓘꓶꓽ ꓟꓽ ꓠ ꓠ, ꓐꓯ ꓢꓲ ꓠꓬꓲ ꓪꓴ‐ꓢ ꓔꓯ ꓙꓱ ꓫꓵ ꓡꓲ ꓙꓳ ꓡ ꓡꓳ꓿ ꓮ ꓡꓰꓳ ꓐꓯ ꓠꓬ ꓠꓻ ꓓꓴ ꓑꓬ ꓓꓴ ꓖꓳ ꓟ ꓔꓯ ꓬꓲ ꓘꓳ, ꓣꓴ ꓟꓽ ꓐ ꓡ꓾ ꓖꓳ ꓡꓱ ꓠꓬꓲ ꓬꓲ ꓠꓬ ꓙꓱ ꓠꓬꓲ ꓦꓶ ꓠꓬꓲ ꓗꓷ ꓡꓰ ꓡꓳ꓿ ꓠꓬꓲꓽ ꓫꓵ ꓕꓲ ꓫꓵ ꓟ ꓠꓬ ꓬꓲ ꓠꓬ ꓠꓻ ꓓꓴ ꓕꓱ ꓟ ꓔꓯ ꓘꓳ, ꓣꓴ ꓡꓳ꓾ ꓝꓮꓲ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮ ꓫꓵ ꓥ ꓟꓲ ꓟꓽ ꓕꓷ ꓞ, ꓐꓷ ꓐꓯ ꓢꓲ ꓠꓬꓲ ꓠꓲ, ꓟ ꓠꓯꓼ ꓘꓴ ꓗꓪ ꓪꓴ‐ꓢ ꓔꓯ ꓡꓯꓼ ꓙꓱ ꓡ ꓡꓳ꓾ ꓬꓲ ꓠꓲ, ꓟ ꓠꓬ ꓪꓴ‐ꓢ ꓔꓯ ꓡꓰ ꓠꓲ, ꓟ ꓓꓵ ꓔꓬ ꓡꓳ꓾ ꓪꓴ‐ꓢ ꓕꓲ ꓣꓳ ꓡꓰ ꓕꓷ ꓞ, ꓟ ꓥ ꓡꓳ꓾ ꓐꓰ ꓐꓯ ꓢꓲ ꓠꓬꓲ ꓪꓴ‐ꓢ ꓔꓯ ꓡꓰ ꓧꓪ, ꓡꓳ꓿ ꓠꓻ ꓓꓴ ꓒꓬ ꓓꓴ ꓠꓬꓲꓽ ꓗꓳ. ꓚ. ꓗꓪ ꓐꓰ ꓪꓴ‐ꓢ ꓔꓯ ꓫꓱ. ꓖꓶ ꓐ ꓡ ꓡꓳ꓿ ꓠꓻ ꓓꓴ ꓐꓬ ꓓꓴ ꓠꓬ ꓕꓲ ꓫꓵ ꓥ ꓟꓲ ꓡ ꓞꓳ ꓠꓬ ꓠꓬꓲꓽ ꓫꓵ ꓗꓷ ꓡꓰ_ ꓡꓳ꓿

ꓮꓽ ꓠꓱ ꓕꓯ ꓘꓶꓽ ꓫꓵꓼ ꓡꓵ ꓟ ꓦꓬꓼ ꓠꓬꓲ ꓗꓪ ꓠꓻ ꓓꓴ ꓔꓯ ꓠꓬ ꓝꓴꓲ ꓐꓰ ꓗꓳ. ꓙꓰ ꓙꓳ ꓟ ꓐꓰ ꓡꓳ. ꓟꓳ ꓗꓳ. ꓡ ꓡꓳ꓾ ꓕꓱ ꓟ ꓮ ꓙꓵ ꓔꓯ ꓝꓮꓲ ꓕꓲ ꓧꓪ, ꓬꓲ ꓫꓵꓼ ꓫꓬ, ꓖꓶ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓥ ꓡꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓠꓻ ꓫꓬ, ꓒꓽ ꓥ ꓡꓳ꓾ ꓬꓲ ꓟꓲ ꓠꓯ ꓗꓪ ꓔꓬ ꓕꓯ ꓠꓻ ꓓꓴ ꓐꓬ ꓓꓴ ꓮ ꓙꓵ ꓔꓯ ꓬꓲ ꓡꓰ ꓫꓬ, ꓖꓶ ꓗꓷ_ ꓡꓳ꓿ ꓬꓲ ꓡꓰ ꓟꓬ ꓢꓶꓽ ꓠꓬꓲ ꓟꓽ ꓟꓳ ꓢꓴ ꓔꓯ ꓠꓬꓲ ꓟꓳ ꓝꓲ_ ꓡꓳ꓿ ꓬꓲꓼ ꓔ ꓖꓴ ꓗꓪ ꓓꓳ ꓞ, ꓢꓴ ꓔꓸꓯ ꓔꓴ ꓡ ꓝꓲ_ ꓡꓳ꓾ ꓕꓱ ꓟ ꓠꓬ ꓬꓲ ꓢꓯꓼ ꓪ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓻ ꓓꓴ ꓕꓱ ꓟ ꓠꓬ ꓣꓳ ꓐꓱ ꓶ ꓕꓲ ꓧꓪ, ꓧꓪ, ꓪꓴ‐ꓢ ꓟꓬꓱꓺ ꓓꓳ ꓓꓳ ꓠ, ꓟ ꓥ ꓟꓲ ꓥ ꓡꓳ꓾

ꓖꓳ ꓡꓱ ꓠꓬꓲ ꓣꓳ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓥ ꓟꓲ ꓠꓻ ꓢꓴ ꓑꓬ ꓢꓴ ꓐꓴ ꓔꓯ ꓬꓲ ꓪ ꓔꓯ ꓟꓰ ꓞꓶ ꓟꓰ ꓖꓶ_ ꓟ꓾ ꓢꓮꓚꓣꓮꓟꓰꓠꓔ ꓕꓲ ꓟ ꓙꓳ_ ꓡꓳ꓾ ꓢꓮꓚꓣꓮꓟꓰꓠꓔ ꓖꓳ ꓟ ꓔꓯ ꓘꓳ, ꓣꓴ ꓟꓶ ꓢꓴ ꓠꓬ ꓝꓴꓲ ꓖꓽ ꓖꓶ ꓟꓶ ꓟ ꓗꓪ ꓐꓰ ꓠꓻ ꓟ ꓗꓪ ꓐꓰ ꓓ ꓡꓰ ꓫꓵ ꓟꓲ ꓙꓳ_ ꓡꓳ꓿ ꓢꓲ ꓒ ꓠꓯꓼ ꓗꓪ ꓬꓲꓼ ꓟꓶ ꓡꓰ ꓫꓵ ꓟꓲ ꓙꓳ_ ꓡꓳ꓿ ꓖꓳ ꓡꓱ ꓠꓬꓲ ꓟꓰ ꓞꓶ ꓖꓳ ꓟ Anointing of the sick ꓐꓰ ꓐꓯ_ ꓟ ꓮ ꓘꓶ. ꓠꓻ ꓔꓬ ꓢꓴ ꓔꓯ ꓟꓰ ꓞꓶ ꓟꓰ ꓖꓶ_ ꓟ ꓚꓱ, ꓔꓯ ꓝꓮꓲ ꓕꓲ ꓫꓵ ꓠ ꓗꓪ ꓠ ꓠ, ꓓꓴ ꓬꓰ ꓡꓯ꓿