ꓢꓲ ꓒ ꓬꓰ‐ꓢꓴ ꓡꓰ ꓦꓴ ꓠꓬ, ꓔꓬ ꓟ ꓚꓳ ꓑ. ꓔꓯ ꓥꓳꓽ ꓗꓪ ꓐꓰ ꓐꓯ ꓖꓶ ꓔ ꓡꓳ꓾ ꓦꓲ ꓢꓲ ꓒ ꓡꓰ ꓘꓴꓽ ꓒ ꓮ ꓡꓲ ꓕꓲ ꓙꓵ, ꓗꓪ ꓡ ꓟ ꓟꓽ ꓢꓷ. ꓟ ꓡꓰ ꓐꓰ ꓡ‐ꓞꓳ‐ꓮ‐ꓐꓲ ꓥ ꓟꓲ ꓠꓴ ꓪ ꓟꓽ ꓥꓳ ꓡꓳ. ꓟ ꓙꓵ, ꓗꓪ ꓡ ꓥꓳ꓾ ꓐꓰ ꓐꓯ ꓔ ꓟ ꓥ ꓡꓳ꓿
ꓙꓲ ꓢꓴ ꓢꓲ ꓤ ꓐꓴ ꓤꓶꓻ ꓗꓪ ꓥ ꓟꓲ ꓟꓬꓱꓽ ꓙꓵꓽ ꓪ ꓔꓯ ꓢꓷ. ꓗꓴ. ꓟ ꓐꓰ ꓧꓪ. ꓛꓲ ꓐꓰ ꓔꓬ ꓠ, ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓔꓯ ꓟꓬꓱꓽ ꓙꓵꓽ ꓪ ꓬꓲ. ꓚꓱ, ꓮ ꓟꓬ, ꓫꓵ ꓖꓶ ꓔ ꓡꓳ꓿ ꓕꓲ ꓦꓲꓻ ꓡ ꓞꓳ ꓐꓱ ꓶ ꓣꓳ ꓟꓬꓱꓽ ꓜꓴꓻ ꓗꓪ ꓥ ꓟꓲ ꓣꓳ ꓗꓳ. ꓡꓳ ꓗꓪ ꓥ ꓟꓲ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓥ ꓟꓲ ꓕꓱ ꓡꓱ ꓖꓶ ꓔ ꓟ ꓥ ꓡꓳ꓿ ꓟꓬꓱꓽ ꓙꓵꓽ ꓪ ꓙꓳ ꓟ ꓡꓰ ꓐꓰ ꓣꓳ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿ ꓢꓷ. ꓢꓲ ꓟꓽ ꓬꓰ ꓢꓴ ꓠꓬ ꓟꓬ ꓠꓬꓲ ꓟꓬꓱꓽ ꓙꓵꓽ ꓪ ꓙꓳ ꓢꓴ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓟꓬꓱꓽ ꓮ ꓫꓵ ꓬꓰ ꓠ ꓔ ꓡ ꓐꓰ ꓢꓷ. ꓥ ꓟꓲ ꓟꓽ ꓬꓰ ꓔꓬ ꓢꓴ ꓠꓬ ꓞꓳ ꓐꓵ ꓐꓵ ꓟ ꓓꓰ ꓢ ꓣꓳ ꓤꓶꓻ ꓗꓪ ꓮ ꓫꓵ ꓥ ꓟꓲ ꓖꓴ ꓖꓴ ꓓꓰ ꓓꓰ ꓟꓽ ꓙꓳ꓾ ꓛꓱꓼ ꓕꓲ ꓖꓼ ꓔꓬ ꓗꓴ. ꓟ ꓠꓲ, ꓟ ꓙꓳ ꓢꓴ ꓡꓰ ꓥ ꓡꓳ꓾ ꓬꓰ ꓠ ꓔ ꓟ ꓟꓬꓱꓽ ꓔꓯ ꓢꓷ. ꓔ ꓡꓳ꓾ ꓖꓳ ꓡꓱ ꓥ ꓟꓲ ꓟꓬꓱꓽ ꓙꓵꓽ ꓪ ꓔꓯ ꓟꓽ ꓢꓷ. ꓔ ꓪ ꓡꓰ ꓟꓽ ꓬꓰ ꓬꓰ ꓔꓬ ꓟ ꓠꓬ ꓦꓶ_ ꓟ ꓠꓲ, ꓟ ꓙꓳ ꓢꓴ ꓥ ꓡꓳ꓿ “ ꓞꓳ ꓤ ꓟꓬꓱꓺ ꓓꓳ ꓠꓬ ꓙꓵꓽ ꓪ ꓔꓯ ꓢꓷ. ꓗꓴ. ꓔ ꓟ ꓐꓰ ꓫꓱ, ꓡꓳ꓿ ꓟꓬꓱꓽ ꓙꓵꓽ ꓪ ꓔꓯ ꓢꓷ. ꓢꓲ ꓬꓰ ꓗꓴ. ꓢꓴ ꓠꓬ ꓟꓬꓱꓺ ꓓꓳ ꓙꓳ ꓢꓴ ꓥ ꓡꓳ꓾ ꓟꓬꓱꓺ ꓓꓳ ꓟꓽ ꓙꓳ ꓢꓴ ꓠꓬ ꓚꓲ ꓛꓬ ꓟꓬꓱꓽ ꓔꓯ ꓢꓷ. ꓥ ꓟꓲ ꓟꓽ ꓬꓰ ꓢꓴ ꓥ ꓡꓳ꓾ ꓐꓰ ꓟ. ꓒꓽ ꓕꓲꓽ ꓣꓳ ꓐꓯ ꓘꓶꓽ ꓙꓳ_ ꓟ ꓥꓳ꓿
ꓪꓴ‐ꓢ ꓐꓯ ꓘꓶꓽ ꓗꓪ ꓥ ꓟꓲ “ ꓚꓳ ꓑ. ꓕꓲ ꓣꓳ ꓠꓬ ꓬꓲ. ꓟꓬꓱꓽ ꓢꓲ ꓒꓽ ꓠꓲ, ꓡꓶꓽ ꓔꓯ ꓢꓷ. ꓥ ꓟꓲ ꓢꓲ ꓒꓽ ꓠꓲ, ꓡꓶꓽ ꓔꓯ ꓟꓽ ꓛꓳ ꓟ ꓚꓳ ꓑ. ꓔꓯ ꓠꓬ ꓝꓴꓲ ꓖꓶ ꓟꓶ_ ꓥꓳ꓾”ꓐꓰ ꓐꓯ ꓔ ꓡꓳ꓿ ꓣꓳ ꓤꓶꓻ ꓗꓪ ꓗꓪ ꓥ ꓟꓲ ꓟꓬꓱꓽ ꓙꓵꓽ ꓪ ꓔꓯ ꓢꓷ. ꓢꓲ ꓠꓬꓲ ꓬꓲ ꓔꓶꓻ ꓙꓱꓼ ꓐꓰ ꓙꓻ ꓫꓱꓽ ꓓꓴ ꓬꓰ ꓡꓯ꓾ ꓟꓬꓱꓽ ꓙꓵꓽ ꓪ ꓔꓯ ꓢꓷ. ꓠꓬ ꓙꓲ_ ꓟ ꓛꓳꓽ ꓒꓯ, ꓕꓲ ꓣꓳ ꓡꓰ ꓐꓰ ꓪꓴ‐ꓢ ꓠꓲ, ꓡꓶꓽ ꓔꓯ ꓐ ꓡ ꓟꓬ ꓛꓲ ꓢꓯꓼ ꓕꓵꓼ ꓢꓲ ꓟꓬꓱꓽ ꓬꓰ ꓙꓻ ꓫꓱꓽ ꓓꓴ ꓬꓰ ꓡꓯ꓿
ꓣꓳ ꓔꓯ ꓢꓷ. ꓡꓰ ꓝꓲ ꓟ ꓠꓬ꓾ ꓪꓴ‐ꓢ ꓠꓵꓻ ꓠꓲ, ꓐꓰ ꓕꓲ ꓪ ꓢꓷ. ꓗꓴ. ꓠ, ꓟ ꓥꓳ꓿ ꓪꓴ‐ꓢ ꓠꓬ ꓣꓳ ꓔꓯ ꓠꓲ, ꓠꓵꓻ ꓡꓳ꓿ ꓖꓳ ꓟ ꓡꓰ ꓐꓰ ꓟꓬꓱꓽ ꓙꓵꓽ ꓪ ꓕꓲ ꓟ ꓔꓯ ꓥ ꓟꓲ ꓖꓶ ꓡꓳ꓿ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓙꓻ ꓫꓱꓽ ꓔꓬ ꓟ ꓤꓶꓻ ꓗꓪ ꓥ ꓟꓲ ꓪꓴ‐ꓢ ꓔꓯ ꓔꓱ, ꓜꓳ ꓟ ꓙꓵꓻ ꓠꓲ, ꓐꓰ ꓢꓯ. ꓔꓬ ꓠ, ꓟ ꓥ ꓡꓳ꓿ ꓪꓴ‐ꓢ ꓝꓮꓲ ꓕꓲ ꓧꓪ, ꓡ ꓠ, ꓟ ꓐꓱ ꓶ ꓣꓳ ꓮ ꓕꓯ ꓟꓲ ꓙꓽ ꓖꓶ ꓢꓲ ꓧꓪ. ꓛꓲ ꓐꓰ ꓔꓬ ꓠ, ꓟ ꓥ ꓡꓳ꓾ ꓣꓳ ꓠꓯꓼ ꓙꓳ_ ꓟ ꓟꓬꓱꓽ ꓙꓵꓽ ꓪ ꓗꓪ ꓔꓱ, ꓔꓱ, ꓐꓰ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾
