ꓪꓽ ꓘꓴˍ ꓟ ꓔꓯ ꓥꓳꓽ (Sunday reflection)
ꓮ ꓙꓵꓽ ꓔꓯ ꓧꓪ. ꓧꓪ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (29) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓵꓻ ꓠ,ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 18ꓽ 1‐8 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲ꓾ꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓮ ꓕꓯ ꓥ ꓟꓲ ꓟꓽ ꓙꓬ ꓡꓰ ꓡꓰ ꓪꓽ ꓘꓴ ꓠ, ꓟ ꓐꓯ ꓖꓶ ꓔ ꓟ ꓥ ꓢꓲ ꓠꓬꓲ ꓟꓶꓽ ꓛꓵꓽ ꓟ ꓕꓲ ꓣꓳ ꓐꓰ ꓐꓯ ꓟꓴ ꓫꓬ, ꓢꓲꓺ ꓒ ꓔꓯ ꓥꓳꓽ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓗꓪ ꓡꓳ ꓒꓱ ꓗꓪ ꓪꓴ‐ꓢ ꓥ ꓟꓲ ꓟꓽ ꓙꓳꓺ ꓟ ꓐꓯ ꓟꓴ ꓫꓬ, ꓒꓽ ꓕꓲ ꓣꓳ ꓔꓬ ꓡꓳ꓿ ꓝꓮꓲ ꓟꓶꓽ ꓛꓵꓽ ꓟ ꓟꓲ ꓕꓲ ꓣꓳ ꓔꓬ ꓡꓳ꓿ ꓟꓶꓽ ꓛꓵꓽ ꓟ ꓮ ꓕꓯ ꓥ ꓟꓲ ꓐꓯ ꓟꓴ ꓫꓬ, ꓒꓽ ꓔꓬ ꓗꓪ ꓙꓰ ꓢꓲ ꓠꓬꓲ ꓬꓲ ꓔꓯ ꓔꓳ, ꓢꓴ ꓔꓯ ꓧꓪ. ꓡꓰ ꓠ, ꓟ ꓐꓯ ꓟꓴ ꓫꓬ, ꓖꓶ ꓠ, ꓟ ꓓꓰꓽ ꓡꓳ꓿ ꓬꓲ ꓪꓴ. ꓕꓯ ꓬꓲ ꓠꓬ ꓬꓰ ꓙ ꓠꓲ, ꓟꓽ ꓫꓵ꓿ ꓖꓳ ꓡꓱ ꓥ ꓟꓲ ꓟꓶ ꓛꓵꓽ ꓟ ꓠꓬ ꓟꓽ ꓠꓽ ꓠꓽ ꓮ ꓕꓯ ꓥ ꓟꓲ ꓡ ꓢꓲ ꓠꓬꓲ ꓓꓰꓽ ꓟ ꓪꓴ. ꓠꓬꓲ ꓬꓰ ꓙ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓠꓬ ꓮ ꓘꓶ. ꓣꓳ ꓚꓵ, ꓟ ꓠꓬ ꓪꓽ ꓘꓴ ꓠ, ꓟ ꓥ ꓡꓳ꓿ ꓣꓳ ꓪꓽ ꓘꓴ ꓕꓯ ꓟꓽ ꓠꓽ ꓠꓽ ꓟꓽ ꓙꓬ ꓡꓰ ꓡꓰ ꓙꓵꓻ ꓠꓲ, ꓙꓳ ꓙꓳ ꓡꓰ ꓪꓽ ꓘꓴ ꓠ,ꓟ ꓣꓳ ꓚꓵ, ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓠ, ꓡꓳ ꓗꓷ ꓟ ꓢꓲ ꓫꓬ ꓕꓳ ꓶ ꓗꓪ ꓟꓶꓽ ꓛꓵꓽ ꓟ ꓕꓲ ꓣꓳ ꓠꓬ ꓬꓲ ꓔꓯ ꓢꓴ ꓡꓰ ꓟꓽ ꓙꓲ ꓟ ꓬꓰ ꓡ ꓟ ꓪꓴ. ꓠꓬꓲ ꓐꓯ ꓟꓴ ꓫꓬ, ꓒꓽ ꓠꓯ ꓗꓪ ꓙꓰ ꓢꓲ ꓠꓬꓲ ꓟꓽ ꓠꓽ ꓠꓽ ꓓꓰꓽ ꓗꓷ ꓕꓯ ꓐꓯ ꓟꓴ ꓫꓬ, ꓒꓽ ꓥ ꓟꓲ ꓬꓲ ꓔꓯ ꓬꓰ ꓙ ꓗꓷ ꓟ ꓥ ꓡꓳ꓿ ꓣꓳ ꓥ ꓟꓲ ꓐ, ꓐ ꓪꓴ‐ꓢ ꓠꓯ, ꓗꓪ ꓶꓼ ꓓꓰꓽ ꓪꓽ ꓘꓴ ꓟ ꓙꓵ, ꓕꓯ ꓟꓶ ꓛꓵꓽ ꓟ ꓡꓰ ꓐꓰ ꓟꓽ ꓠꓽ ꓠꓽ ꓠꓲ, ꓟ ꓟꓽ ꓐꓬ ꓡꓰ ꓙꓵꓻ ꓠꓲ, ꓙꓳ ꓙꓳ ꓡꓰ ꓪꓽ ꓘꓴ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓮ ꓕꓯ ꓥ ꓟꓲ ꓟꓽ ꓙꓬ ꓡꓰ ꓡꓰ ꓟꓽ ꓠꓽ ꓠꓽ ꓪꓽ ꓘꓴ ꓠ, ꓟ ꓔꓯ ꓟ. ꓖꓶ ꓟ ꓡꓰ ꓐꓰ ꓠꓬꓲ. ꓠꓬꓲ ꓣꓳ ꓮ ꓙꓵꓽ ꓢꓴ ꓔꓯ ꓥ ꓟꓲ ꓠꓲ, ꓟ ꓟꓽ ꓐꓬ ꓡꓰ ꓟꓽ ꓠꓽ ꓠꓽ ꓶꓼ ꓓꓰꓽ ꓪꓽ ꓘꓴ ꓠ, ꓟ ꓣꓳ ꓚꓵ, ꓟ ꓔꓯ ꓟ. ꓖꓶ ꓔ ꓟ ꓥꓡꓳ꓿ ꓪꓽ ꓘꓴ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓮ ꓘꓶ. ꓛꓲ ꓣꓳ ꓚꓵ, ꓟ ꓥ ꓡꓳ꓿ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓐꓰ ꓫ. ꓕꓱ ꓠ, ꓟ ꓣꓳ ꓮ ꓡꓰ ꓫꓵꓽ ꓔꓳ, ꓜꓳ ꓔꓬ ꓟ ꓔꓯ ꓐꓯ ꓟ. ꓖꓶ ꓬꓲ ꓠꓯ, ꓗꓪ ꓢꓯꓼ ꓪ ꓣꓴ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ \
ꓣꓳ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓣꓳ ꓮ ꓡꓰ ꓐꓰ ꓓꓴ ꓙ ꓟ ꓣꓳ ꓮ ꓡꓰ ꓐꓰ ꓔꓳ, ꓜꓳ ꓔꓬ ꓟ ꓚꓱ, ꓮ ꓙꓵꓽ ꓔꓯ ꓢꓲꓺ ꓒ ꓔꓯ ꓐꓯ ꓟ. ꓖꓶ ꓪꓽ ꓘꓴ ꓠ, ꓟ ꓥ ꓡꓳ꓿ ꓣꓳ ꓚꓲ. ꓛꓬ ꓶꓼ ꓤ ꓠꓱ, ꓤ ꓶ ꓓꓰꓽ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓧꓪꓽ ꓖꓳ ꓓꓱ ꓔꓬ ꓢ ꓠ, ꓟ ꓐꓰ ꓧꓪ ꓧꓪ ꓟꓬꓱꓽ ꓬꓰ ꓐ ꓡ ꓠ, ꓟ ꓢꓯꓼ ꓪ ꓮ ꓟꓬ, ꓫꓵꓽ ꓔꓯ ꓶꓼ ꓓꓰꓽ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿
ꓝꓮꓲ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓘꓳ, ꓣꓴ ꓟꓶ ꓟ ꓣꓱ ꓛꓰ ꓡꓯꓽ ꓫꓴꓻ ꓔꓯ ꓫ. ꓟꓳ ꓠꓯ, ꓟ ꓟꓲ ꓙꓳ ꓟ ꓥ ꓡꓳ꓿
ꓣꓳ ꓪꓽ ꓘꓴ ꓟ ꓚꓱ, ꓮ ꓙꓵꓽ ꓔꓯ ꓐꓲ ꓜꓲꓼ ꓡꓰ ꓠ, ꓟ ꓐꓰ ꓪꓴ‐ꓢ ꓡꓰ ꓖꓶ ꓡ ꓠ, ꓟ ꓚꓲ. ꓛꓬ ꓔꓯ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓗꓪ ꓞꓳ ꓫꓱ, ꓠ, ꓟ ꓥ ꓡꓳ꓿ ꓣꓳ ꓠꓯ, ꓗꓪ ꓙꓳ ꓟ ꓣꓳ ꓘꓳ, ꓣꓴ ꓟꓶ ꓟ ꓮ ꓙꓵꓽ ꓔꓯ ꓪꓴ‐ꓢ ꓔꓯ ꓖꓶ ꓠ, ꓟ ꓐꓰ ꓔꓶ ꓖꓶ ꓠ, ꓟ ꓬꓰ ꓠꓯ, ꓟ ꓥ ꓡꓳ꓿ ꓣꓳ ꓬꓰ ꓟ ꓟꓬꓱꓽ ꓮ ꓙꓵꓽ ꓥ ꓟꓲ ꓢꓲꓺ ꓒ ꓠꓲ, ꓡꓶꓽ ꓒꓬꓱꓼ ꓡ ꓠ, ꓟ ꓔꓶ ꓙꓶ ꓛ ꓠ, ꓟ ꓥ ꓡꓳ꓿ ꓣꓳ ꓪꓽ ꓘꓴ ꓚꓱ, ꓮ ꓙꓵꓽ ꓔꓯ ꓪꓴ‐ꓢ ꓡꓰ ꓟꓽ ꓡꓰ ꓡ ꓥ ꓟꓲ ꓠꓲ, ꓟ ꓟꓽ ꓙꓬ ꓠ, ꓟ ꓥ ꓡꓳ꓿
ꓣꓳ ꓟꓲ ꓠꓯ ꓗꓪ ꓔꓬ ꓟ ꓐ, ꓐ ꓟ, ꓟ ꓐꓴ ꓠꓬ ꓣꓳ ꓤ ꓠꓱ ꓐꓴ ꓔꓯ ꓬꓲ ꓪ ꓡꓰ ꓓꓰꓽ ꓟ ꓮ ꓙꓵꓽ ꓔꓯ ꓖꓶ ꓢꓴ ꓐ, ꓐ ꓟ, ꓟ ꓠꓬ ꓟꓽ ꓔꓬ ꓟ ꓥ ꓡꓳ꓿ ꓣꓳ ꓶꓼ ꓓꓰꓽ ꓗꓷ ꓟ ꓮ ꓙꓵꓽ ꓔꓯ ꓐ, ꓐ ꓪꓴ‐ꓢ ꓡꓰ ꓣꓳ ꓚꓵ, ꓚꓵ, ꓣꓱ ꓬꓯꓼ ꓣꓱ ꓞ ꓡ ꓟ ꓙꓵ, ꓕꓯ ꓣꓳ ꓔꓯ ꓖꓶ ꓡ ꓓꓴ ꓥꓳ꓿ ꓪꓴ‐ꓢ ꓠꓬ ꓣꓳ ꓔꓯ ꓮ ꓡꓰ ꓕꓲ ꓙꓵ, ꓟ ꓮ ꓫꓵꓽ ꓖꓶ ꓠ, ꓟ ꓮ ꓡꓰ ꓐꓰ ꓬꓰ ꓖꓶ ꓠ, ꓟ ꓙꓲ ꓟ ꓡ ꓞꓳ ꓒꓬꓱꓼ ꓡ ꓠ, ꓟ ꓣꓳ ꓔꓯ ꓬꓰ ꓙ ꓔꓬ ꓢꓴ ꓥ ꓡꓳ꓿
ꓪꓴ‐ꓢ ꓠꓬ ꓣꓳ ꓔꓯ ꓙꓲ ꓟ ꓔꓯ ꓡꓰ ꓖꓶ ꓢꓴ ꓥ ꓡꓳ꓿ ꓣꓳ ꓔꓯ ꓙꓲ ꓖꓴ ꓙꓳ ꓟ ꓔꓯ ꓡꓰ ꓖꓶ ꓢꓴ ꓪꓴ‐ꓢ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓠꓲ, ꓟ ꓟꓽ ꓐꓬ ꓡꓰ ꓟꓽ ꓠꓽ ꓠꓽ ꓟꓽ ꓙꓬ ꓡꓰ ꓡꓰ ꓮ ꓕꓯ ꓥ ꓟꓲ ꓪꓽ ꓘꓴ ꓠ, ꓟ ꓘꓴ ꓔꓬ ꓟ ꓥ ꓡꓳ꓿ ꓣꓳ ꓪꓽ ꓘꓴ ꓕꓯ ꓪꓴ‐ꓢ ꓠꓲ, ꓡꓶ ꓒꓬꓱꓼ ꓡ ꓝꓲ. ꓐꓰ ꓪꓽ ꓘꓴ ꓠꓯ, ꓟ ꓥ ꓡꓳ꓿ ꓪꓴ‐ꓢ ꓔꓯ ꓮ ꓕꓯ ꓥ ꓟꓲ ꓪꓽ ꓘꓴ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓗꓪ ꓞꓳ ꓫꓱ, ꓢꓴ ꓒꓬꓱꓼ ꓡ ꓠ , ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
