ꓝꓴꓲ ꓐꓰ ꓐꓯ_ ꓟ ꓠꓬ ꓪꓴ‐ꓢ ꓔꓯ ꓣꓳ ꓒꓳ, ꓔꓳ_ ꓟ꓾ ꓪꓴ‐ꓢ ꓔꓯ ꓟꓽ ꓠ ꓡꓳ_ ꓟ꓾ꓪꓴ‐ꓢ ꓐꓰ ꓕꓲ ꓠꓲ, ꓕꓲ ꓪ ꓔꓬ ꓟ ꓗꓪ ꓐꓰ ꓧ, ꓙꓰ ꓟ ꓚꓱ, ꓥ ꓡꓳ꓾ ꓕꓱ ꓟ ꓡꓰ ꓐꓰ ꓣꓳ ꓝꓴꓲ ꓬꓰ ꓗꓷ ꓕꓯ ꓣꓳ ꓠꓬ ꓚꓲ ꓛꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓥ ꓟꓲ ꓶꓽ ꓡꓰ_ ꓡꓳ꓿ ꓧꓪꓽ ꓖꓳ ꓓꓱ ꓕꓲ ꓒꓳ, ꓗꓪ ꓠꓶꓽ ꓓ_ ꓥ ꓟꓲ ꓠꓲ, ꓟ ꓶꓽ ꓤ ꓶꓽ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓝꓴꓲ ꓗꓪ ꓐꓰ ꓓꓵꓽ ꓙ ꓒꓳ, ꓡꓲꓼ ꓡ ꓐꓰ ꓐꓯ ꓕꓯ ꓪꓴ‐ꓢ ꓖꓽ ꓖꓶ_ ꓟ ꓚꓱ, ꓔꓯ ꓧꓪ ꓠ, ꓟ ꓡꓰ ꓟꓽ ꓞꓲ ꓘꓴ ꓜꓲꓼ ꓞꓳ ꓘꓴ ꓠꓯꓼ ꓗꓪ ꓐꓰ ꓝꓮꓲ ꓕꓲ ꓧꓪ, ꓒꓳ, ꓑ ꓡꓯ ꓘꓳ ꓠ, ꓟ ꓠꓲ, ꓧꓳ, ꓫꓵ ꓧꓳ, ꓡꓰ ꓠ, ꓟ ꓣꓳ ꓬꓰ ꓠ ꓗ, ꓡꓳ꓿
ꓝꓴꓲ ꓔꓯ ꓮꓽ ꓟ ꓖꓽ ꓖꓶ ꓐ ꓡ ꓡ꓾? ꓥ ꓡꓳ꓾ ꓪꓴ‐ꓢ ꓡꓰ ꓝꓴꓲ ꓔꓯ ꓖꓽ ꓖꓶ ꓐ ꓡ ꓡꓳ꓾ ꓢꓲ ꓒ ꓬꓰ‐ꓢꓴ ꓬꓲ ꓚꓲ ꓛꓬ ꓐꓯ ꓔ ꓡꓳ꓿ ꓡ ꓞꓳ ꓮ ꓐꓲ ꓠꓬ ꓟꓴ ꓗꓪ ꓟꓲ ꓠꓯ ꓙꓵꓽ ꓪ ꓮ ꓙꓵ ꓙꓳ ꓟ ꓑꓶ ꓓꓴ ꓬꓲ ꓠꓬ ꓮꓽ ꓟ ꓝꓴꓲ ꓔꓯ ꓥ ꓟꓲ ꓖꓽ ꓖꓶ ꓐ ꓡ ꓡꓳ꓾ ꓐꓰ ꓐꓯ ꓢꓲ ꓠꓬꓲ ꓟ‐ꓘꓳ ꓕꓳ ꓶ 5ꓽ 2 ꓾ ꓡꓴ‐ꓘ ꓕꓳ ꓶ 7ꓽ 48 ꓗꓪ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓫꓵ ꓗꓪ ꓐꓰ ꓧꓳ. ꓓꓳ ꓗꓷ ꓟ ꓗꓪ ꓐꓰ ꓞꓳ ꓤ ꓮ ꓙꓵ ꓔꓯ ꓚꓬꓴ ꓟꓶ ꓟ ꓗꓪ ꓐꓰ ꓬꓲ ꓠꓬ ꓬꓲ ꓶꓼ ꓓꓳ ꓫꓱ. ꓓꓳ ꓖꓳ ꓟ ꓔꓯ ꓝꓲ ꓓꓴ ꓐꓴ ꓗꓪ ꓐꓰ ꓕꓲ ꓟꓵꓽ ꓕꓲ ꓫꓵ ꓡꓱꓼ ꓗꓪ ꓝꓲ ꓩꓴ ꓗꓷ_ ꓡꓳ꓿ꓬꓲ ꓪ ꓔꓯ ꓥ ꓟꓲ ꓙꓵꓽ ꓪ ꓖꓶ ꓗꓷ_ ꓡꓳ꓿ ꓬꓲ ꓪ ꓓꓳ ꓙꓰ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓚꓱ, ꓚꓺ ꓟ. ꓖꓶ ꓠ, ꓟ ꓢꓲ ꓒ ꓬꓰ‐ꓢꓴ ꓕꓵꓼ ꓪ ꓔꓯ ꓛꓳ ꓠ, ꓟ꓾ ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓡꓰ ꓐꓰ ꓬꓲ ꓪ ꓠꓬ ꓖꓼ ꓬꓰ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓪ ꓔꓯ ꓖꓶ ꓔ ꓟ ꓙꓵꓽ ꓪ ꓗꓪ ꓐꓰ ꓝꓴꓲ ꓖꓽ ꓖꓶ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓕꓱ ꓡꓱ ꓐꓰ ꓝꓴꓲ ꓬꓰ ꓗꓷ ꓗ ꓠꓯ. ꓪꓴ‐ꓢ ꓠꓯꓼ ꓘꓴꓽ ꓗꓪ ꓐꓰ ꓖꓽ ꓖꓶ_ ꓟ ꓟꓶ ꓠ, ꓟ ꓡꓰ ꓟꓽ ꓞꓲ ꓘꓴ ꓜꓲꓼ ꓞꓳ ꓠꓯꓼ ꓘꓴ ꓗꓪ ꓥ ꓟꓲ ꓣꓳ ꓠꓬ ꓝꓮꓲ ꓕꓲ ꓧꓪ, ꓠꓲ, ꓧꓳ, ꓡꓰ ꓠ, ꓟ ꓣꓳ. ꓚꓵ_ ꓡꓳ꓿ ꓝꓴꓲ ꓬꓰ ꓗꓷ ꓟ ꓑꓶ ꓓꓴ ꓣꓳ ꓠꓬ ꓘꓴ ꓜꓲꓼ ꓞꓳ ꓗꓪ ꓐꓰ ꓥ ꓟꓲ ꓶꓽ ꓡꓰ_ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓙꓳ_ ꓟ ꓙꓵꓽ ꓪ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓥ ꓟꓲ ꓖꓶ_ ꓡꓳ꓿ ꓟ‐ꓕꓲ 16ꓽ 9 ꓗꓪ ꓠꓴ ꓠꓬ ꓒꓲ‐ꓕꓱ ꓥ ꓡꓳ꓾ ꓠꓴ ꓔꓯ ꓟꓴ ꓗꓪ ꓗꓴꓷꓼ ꓢꓳꓼ ꓥꓪ ꓖꓶ_ ꓥꓳ꓾ ꓠꓴ ꓡꓰ ꓛꓳ ꓔ ꓢꓴ ꓥ ꓕ ꓑꓳ. ꓠꓬ ꓛꓳ ꓔ ꓥꓳ꓾ ꓠꓴ ꓡꓰ ꓒꓶ ꓩꓴ ꓗꓷ ꓢꓴ ꓥ ꓕ ꓑꓳ. ꓠꓬ ꓒꓶ ꓩꓴ ꓟꓶ_ ꓥꓳ꓿ ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓔꓯ ꓖꓶ_ ꓟ ꓕꓵꓼ ꓪ ꓥ ꓡꓳ꓿ ꓕꓱ ꓕꓵꓼ ꓪ ꓘꓴ ꓠꓯꓼ ꓗꓪ ꓝꓴꓲ ꓔꓯ ꓖꓽ ꓖꓶ_ ꓟ ꓥ ꓟꓲ ꓔꓬ ꓡꓳ꓿ ꓝꓴꓲ ꓔꓯ ꓒꓶ ꓩꓴ ꓖꓶ_ ꓟ ꓙꓵ ꓪ ꓥ ꓟꓲ ꓙꓳ_ ꓡꓳ꓿ ꓖꓳ ꓡꓱ ꓠꓬꓲ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓪꓴ‐ꓢ ꓡꓰ ꓖꓶ ꓔ ꓟ ꓕꓵꓼ ꓪ ꓔꓯ ꓣꓴ ꓢꓲ ꓠꓬꓲ ꓝꓴꓲ ꓣꓷꓠ. ꓖꓶ_ ꓟ ꓔꓯ ꓬꓰ ꓖꓶ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓔꓲꓺ ꓒ ꓓꓽ ꓐꓴ ꓔꓲꓺ ꓒ ꓐꓴ ꓔꓬ ꓗꓪ ꓙꓰ ꓢꓲ ꓠꓬꓲ ꓝꓴꓲ ꓣꓷꓠ. ꓔꓬ ꓟ ꓥ ꓡꓳ꓾ ꓖꓳ ꓡꓱ ꓠꓬꓲ ꓣꓳ ꓠꓬ ꓝꓴꓲ ꓟꓽ ꓣꓷꓠ. ꓕꓯ ꓣꓳ ꓧꓶ. ꓕꓯ ꓓꓵꓽ ꓙ ꓠ ꓔ ꓟ ꓠꓬ ꓣꓳ ꓠꓬ ꓝꓴꓲ ꓬꓰ ꓗꓷꓳ꓿ ꓣꓳ ꓠꓬ ꓛꓬ ꓗꓷꓳ꓾ꓪꓴ‐ꓢ ꓔꓯ ꓥ ꓟꓲ ꓘꓴ ꓜꓲꓼ ꓞꓳ ꓔꓯ ꓥ ꓟꓲ ꓛꓬ ꓗꓷꓳ꓾ ꓖꓳ ꓡꓱ ꓠꓬꓲ ꓣꓳ ꓝꓴꓲ ꓣꓷꓠ. ꓗꓷ ꓗ. ꓠꓯ. ꓣꓳ ꓠꓬ ꓖꓽ ꓖꓶ_ ꓟ ꓟꓶ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓢꓲ ꓡꓲ, ꓟ ꓠꓯꓼ ꓘꓴ ꓗꓪ ꓛꓲ ꓬꓰꓳ꓾ꓠꓲ, ꓒꓴ ꓗ, ꓛꓲ ꓢꓲ ꓠꓬꓲ ꓡ ꓠ, ꓟ ꓦꓬꓼ ꓠꓬꓲ ꓗꓪ ꓛꓳ ꓙꓳ ꓠ ꓗ, ꓡꓳ ꓐꓯ_ ꓟ ꓕꓱ ꓟ ꓔꓯ ꓢꓷ. ꓠ, ꓟ ꓣꓳ. ꓚꓵ_ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓠꓯꓼ ꓗꓪ ꓙꓽ ꓣꓳ_ ꓟ ꓠꓲ, ꓟ ꓡꓰ ꓮ ꓕꓯ ꓥ ꓟꓲ ꓚꓲ ꓛꓬ ꓝꓴꓲ ꓔꓯ ꓣꓷꓠ. ꓐ ꓡ ꓢꓲ ꓠꓬꓲ ꓢꓲ ꓡꓲ, ꓡꓲ, ꓐꓰ ꓗꓳ. ꓙꓰ ꓐ ꓡ ꓝꓲ꓾
