ꓞꓳ ꓤ ꓕꓲ ꓣꓳ ꓗꓪ ꓡ ꓞꓳ ꓮ ꓟꓬ, ꓟꓳꓻ ꓐ ꓡˍ ꓟ ꓕꓯꓽ ꓢꓲ ꓗꓪ ꓟ Public Life ꓐꓰ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓡꓰꓽ ꓢꓷ. ꓐ ꓡˍ ꓟ ꓠꓯꓸꓼ ꓗꓪ ꓟ Private Life ꓐꓰ ꓐꓯˍ ꓟ ꓙꓳˍ ꓟ ꓥ ꓡꓳ꓿ ꓕꓱ ꓠꓬꓲꓽ ꓙꓰꓽ ꓡꓱꓸꓼ ꓠꓬ ꓬꓳ. ꓚꓰꓽˍ ꓡꓳ꓿ ꓕꓯꓽ ꓢꓲ ꓕꓲ ꓒꓳ, ꓗꓪ ꓐꓰ ꓡˍ ꓟ ꓠꓱ. ꓐꓯ ꓕꓲ ꓣꓳ ꓐꓰ ꓙꓻ ꓡꓯ ꓘꓳˍ ꓟ꓾ ꓣꓱꓽ ꓬꓰˍ ꓟ꓾ ꓫ. ꓕꓱˍ ꓟ ꓕꓱ ꓡꓱ ꓫꓵꓽ ꓗꓪ ꓙꓲˍ ꓠꓬ ꓠꓲˍ ꓡꓰ꓾ ꓟꓽ ꓙꓲꓻ ꓠꓬ ꓟꓽ ꓙꓲꓻ ꓡꓰ ꓠꓯꓸꓼ ꓗꓪ ꓕꓲ ꓒꓳ, ꓗꓪ ꓬꓯꓼ ꓡꓰˍ ꓟ ꓥ ꓡꓳ꓿ ꓝꓮꓲ ꓕꓲ ꓚꓱ, ꓐꓯˍ ꓠꓬ ꓣꓳ ꓠꓲ, ꓟ ꓠꓯꓸꓼ ꓗꓪ ꓫ. ꓔꓬ ꓟ꓾ ꓗ, ꓛꓲꓽ ꓔꓬ ꓟˍ ꓥ ꓟꓲ ꓕꓯꓽ ꓢꓲ ꓕꓲ ꓒꓳ, ꓗꓪ ꓬꓯꓼ ꓡˍ ꓟ ꓥ ꓡꓳ꓿ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶꓻ ꓔꓬ ꓕꓯ ꓠꓱ ꓫꓳ. ꓟ. ꓗꓪ ꓥˍ ꓟꓲ ꓙꓳꓺ ꓓꓴ ꓒꓬꓱꓼ ꓡˍ ꓡꓳ꓿ ꓖꓳ ꓟ ꓑꓶ. ꓓꓴ ꓠꓱ ꓫꓳ. ꓟ. ꓗꓪ ꓡꓰꓽ ꓟꓽ ꓞꓲ꓾ ꓠꓯꓸꓼ ꓘꓪ ꓟ ꓠꓲ, ꓟ ꓔꓯ ꓥˍ ꓟꓲ ꓢꓲꓽ ꓫꓬ ꓡꓰ ꓠ ꓮ ꓕꓯ ꓟꓲ ꓬꓰ ꓠ ꓔˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓡꓴ‐ꓘ꓿11ꓽ37‐41) ꓗꓪ꓾ ꓙꓵꓽ ꓗ ꓒ ꓐꓴ ꓒ‐ꓡꓲ‐ꓢꓷ ꓐꓴ ꓠꓬ ꓕꓯꓽ ꓢꓲ ꓕꓲ ꓒꓳ, ꓗꓪ ꓖꓳ ꓓꓱꓽ ꓗꓪ ꓞꓲꓽˍ ꓟ ꓔꓯ ꓮ ꓕꓯ ꓟꓲ ꓒꓵꓽ ꓗ ꓬꓰ ꓔꓬ ꓥˍ ꓟꓲ ꓠꓲ, ꓟ ꓔꓱ, ꓜꓳꓽˍ ꓟ꓾ ꓫꓱ. ꓤˍ ꓟ ꓐꓰ ꓠꓲ, ꓟ ꓒꓴˍ ꓟ ꓔꓯ ꓠꓬ ꓮ ꓕꓯ ꓟꓲ ꓟꓽ ꓬꓰ꓿ ꓖꓳ ꓡꓱ ꓬꓰ ꓠ, ꓟ ꓟꓲ ꓡꓰ, ꓔꓬ ꓡꓳ꓿ ꓖꓳ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓡꓰ “ꓕꓯꓽ ꓢꓲ ꓗꓪ ꓟ ꓚꓰꓼ ꓔ ꓢꓴ ꓡꓰ ꓠꓯꓸꓼ ꓗꓪ ꓟˍ ꓟꓲ ꓚꓰꓼ ꓔ ꓡꓳ ꓟꓽ ꓥ ꓡ” ꓐꓰ ꓒ‐ꓡꓲ‐ꓢꓷ ꓐꓴ ꓔꓯ ꓐꓯ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓣꓳ ꓖꓳ ꓓꓱꓽ ꓔꓯ ꓐꓲꓻ ꓡ ꓠ꓾ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓡꓰ ꓠ ꓢꓯꓼ ꓕꓵꓼˍ ꓟ ꓡꓰ ꓐꓰ ꓣꓳ ꓠꓲ, ꓟ ꓐꓰ ꓣꓳ ꓦ ꓔꓯ ꓥˍ ꓟꓲ ꓢꓲꓽ ꓫꓬ ꓡꓰ ꓠ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
