ꓔ‐ꓟ‐ꓩꓴ. ꓓꓲꓻ ꓢꓴ ꓞꓲ ꓣꓳ ꓓꓽ ꓡꓰ ꓡꓰ ꓟ (Sunday reflection)
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (29) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ,ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 17ꓽ11‐19 ꓝꓲ ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓔ‐ꓟ‐ꓩꓴ. ꓓꓲꓻ ꓢꓴ ꓞꓲ ꓣꓳ ꓔꓯ ꓓꓽ ꓡꓰ ꓝꓲˍ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓗꓪ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓙꓰˍ ꓕꓯ ꓢ‐ꓟ‐ꓡꓲ ꓐꓰ ꓐ‐ꓡꓲ‐ꓡꓲ ꓟꓵꓽ ꓠꓬꓲꓽ ꓗꓴ. ꓚꓺ ꓗꓪ ꓗꓳ. ꓬꓯꓼ ꓡꓳ꓿ ꓕꓱ ꓗꓪ ꓔ‐ꓟ‐ꓩꓴ. ꓓꓰꓽ ꓢꓴ ꓞꓲ ꓣꓳ ꓔꓯ ꓔꓳ, ꓜꓳꓽ ꓡꓳ꓿ ꓖꓳ ꓕꓯ ꓓ‐ꓟ‐ꓩꓴ ꓓꓲꓻ ꓢꓴ ꓐꓴ ꓠꓬ ꓢꓯꓼ ꓓꓽ ꓡꓰ ꓢꓲꓺ ꓒ ꓬꓰ‐ꓢꓴ ꓡꓰ ꓔꓯ ꓠꓻ ꓫꓬ ꓖꓶ ꓠ, ꓟ ꓘꓴ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓔꓲꓺꓒ ꓐꓴ ꓔꓯ ꓠꓴ ꓪ ꓖꓳ ꓓꓱ ꓟꓳ. ꓖꓶ ꓬꓰ꓾ ꓐꓰ ꓐꓯ ꓖꓶ ꓗꓷ ꓟ ꓥ ꓡꓳ꓿
ꓕꓱ ꓞꓲ ꓣꓳ ꓗꓪ ꓐꓰ ꓢ‐ꓟ‐ꓡꓲ ꓡ ꓞꓳ ꓕꓲ ꓣꓳ ꓠꓬ ꓬꓲ ꓠꓻ ꓓꓴ ꓗꓪ ꓐꓰ ꓓꓽ ꓡꓰ ꓠꓬ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡ ꓢꓲ ꓠꓬꓲ ꓪꓴ‐ꓢ ꓔꓯ ꓫ. ꓟꓳ ꓒꓴ ꓗ ꓬꓰ ꓗꓷ ꓟ ꓥ ꓡꓳ꓿ ꓖꓳ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓓꓻ ꓡꓰ ꓢꓴ ꓞꓲ ꓣꓳ ꓟꓽ ꓥ ꓡ? ꓠꓱ. ꓐꓯ ꓗꓴ ꓣꓳ ꓟ ꓮ ꓡꓲ ꓗꓪ ꓙꓰ ꓗꓷ ꓡ? ꓐꓰ ꓐꓯ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓢ‐ꓟ‐ꓡꓲ ꓡ ꓞꓳ ꓕꓲ ꓣꓳ ꓠꓬ ꓙꓵꓻ ꓠꓲ, ꓮ ꓟꓬ, ꓙꓳ ꓟ ꓐꓰ ꓫ. ꓟꓳ ꓗꓴ ꓟ ꓠꓲ, ꓟ ꓙꓳ ꓟ ꓔꓯ ꓟꓬꓱꓽ ꓓꓳꓽ ꓖꓶ ꓗꓷ ꓟ ꓥ ꓡꓳ꓿
ꓕꓱ ꓔ‐ꓟ‐ꓩꓴ. ꓠꓻ ꓓꓴ ꓓꓲꓻ ꓟ ꓞꓲ ꓣꓳ ꓠꓯ, ꓗꓪ ꓐꓰ ꓗꓴ. ꓣꓳ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓠꓬ ꓠꓻ ꓓꓴ ꓓꓽ ꓡꓰ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓫ. ꓟꓳ ꓐꓯ ꓠ, ꓟ ꓟꓲ ꓡꓰ ꓥ ꓡꓳ꓿ ꓬꓲ ꓪ ꓠꓬ ꓔ‐ꓟ‐ꓩꓴ ꓠꓻ ꓓꓴ ꓔꓯ ꓓꓽ ꓡꓰ ꓟ ꓕꓳ ꓶ ꓣꓴ ꓠ, ꓟ ꓔꓲꓺ ꓒ ꓐꓴ ꓠꓯ, ꓗꓪ ꓙꓰ ꓢꓲ ꓠꓬꓲ ꓬꓲ ꓪ ꓠꓻ ꓓꓴ ꓓꓽ ꓡꓰ ꓟ ꓚꓱ, ꓔꓯ ꓡ ꓞꓳ ꓔꓯ ꓐꓯ ꓟ. ꓖꓶ ꓠ, ꓟ ꓧꓶ. ꓕꓯ ꓙꓰ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓻ ꓠꓬꓲ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓐꓴ ꓐ ꓙ ꓗꓷ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓙꓵꓻ ꓠꓲ, ꓙꓳ ꓟ ꓪꓴ. ꓠꓬꓲ ꓔ‐ꓟ‐ꓩꓴ. ꓠꓻ ꓓꓴ ꓓꓽ ꓡꓰ ꓟ ꓔꓯ ꓡꓳ. ꓟꓳ ꓗꓷ ꓟ ꓥ ꓡꓳ꓿ ꓔ‐ꓟ‐ꓩꓴ. ꓠꓻ ꓓꓴ ꓠꓬ ꓖꓳ ꓕꓲ ꓙꓵ, ꓗꓪ ꓮ ꓘꓶ. ꓛꓲ ꓟꓽ ꓫꓬ ꓟ꓾ ꓡ ꓞꓳ ꓐꓴ ꓐꓰ ꓕꓲ ꓪ ꓔꓬ ꓟꓽ ꓙꓲ ꓟ ꓠꓻ ꓫꓬ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓕꓱ ꓡꓰ ꓫꓵꓽ ꓠꓻ ꓫꓵꓽ ꓔꓯ ꓫꓬ, ꓖꓶ ꓟ ꓥ ꓡꓳ꓿ ꓬꓲ ꓠꓬ ꓞꓳ ꓙꓲ ꓟꓽ ꓙꓲ ꓟꓽ ꓘꓶꓽ ꓠꓻ ꓫꓬ, ꓖꓶ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓝꓴꓲ ꓙꓳ ꓢꓴ ꓟꓽ ꓙꓳ ꓢꓴ ꓮ ꓙꓵꓽ ꓢꓴ ꓔꓯ ꓠꓲ, ꓠꓵ ꓟ ꓢꓲꓺ ꓒ ꓥ ꓟ ꓔꓯ ꓣꓳ ꓔꓯ ꓟ. ꓖꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓤꓶꓻ ꓗꓪ ꓥ ꓟꓲ ꓣꓳ ꓠꓯ, ꓗꓪ ꓧꓳꓽ ꓖꓳ ꓓꓱ ꓘꓴꓽ ꓗꓪ ꓮ ꓫꓵꓽ ꓠꓻ ꓔꓬ ꓡ? ꓝꓮꓲ ꓦꓻ ꓕꓲ ꓒꓳ, ꓗꓪ ꓮ ꓫꓵꓽ ꓠꓻ ꓓꓴ ꓙꓳ ꓡ ꓣꓳ ꓔꓯ ꓢꓲꓺꓒ ꓬꓰ‐ꓢꓴ ꓡꓰ ꓢꓯꓼ ꓓꓽ ꓟ ꓡꓰ ꓔ‐ꓟ‐ꓩꓴ. ꓓꓲꓻ ꓢꓴ ꓐꓴ ꓡꓰ ꓣꓳ ꓔꓯ ꓪꓽ ꓘꓴ ꓠ, ꓟ ꓘꓴꓽ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓠꓻ ꓓꓴ ꓗꓪ ꓐꓰ ꓠꓻ ꓡꓰ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓫ. ꓟꓳ ꓒꓴ ꓗ, ꓟ ꓙꓳ ꓟ ꓥ ꓡꓳ꓿ ꓜ ꓓꓴ ꓜ ꓓꓳ ꓗ. ꓠꓯ ꓢꓲꓺ ꓒ ꓔꓯ ꓫ. ꓟꓳ ꓠꓯ, ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓙꓲ ꓢꓴ ꓢꓲꓺ ꓒ ꓐꓴ ꓠꓬ ꓣꓳ ꓮ ꓡꓰ ꓕꓲ ꓙꓵ, ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓫ. ꓟꓳ ꓒꓴ ꓗ, ꓫ. ꓕꓱ ꓠ, ꓟ ꓪꓽ ꓘꓴ ꓠ, ꓟ ꓬꓲ ꓙꓵ, ꓛ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓢꓲ ꓬꓲ ꓧꓪꓽ ꓥ ꓟ ꓢꓲꓽ ꓫꓬ ꓖꓳ ꓓꓱ ꓔꓯ ꓘꓳ, ꓣꓴ ꓠ, ꓟ ꓮ ꓘꓶ. ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓠꓬ ꓟꓲ‐ꓢ ꓔꓶ ꓟ ꓢꓲꓺ ꓒ ꓬꓰ‐ꓢꓴ ꓬꓲ ꓢꓲ ꓬꓲ ꓧꓪ ꓚꓵˍ ꓥ ꓟ ꓢꓲꓽ ꓫꓬ ꓖꓳ ꓓꓱ ꓔꓯ ꓘꓳ, ꓣꓴ ꓟꓶ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓠꓯ, ꓗꓪ ꓮ ꓡꓰ ꓫꓵꓽ ꓠꓲ, ꓫ. ꓟꓬ, ꓫ. ꓓꓴ ꓠꓻ ꓓꓴ ꓑꓬ ꓓꓴ ꓙꓳ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓡ ꓢꓲ ꓠꓬꓲ ꓶ ꓓꓰꓽ ꓪꓽ ꓘꓴ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
