ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓝꓴꓲꓸ ꓐꓰ ꓐꓯˍ ꓟ ꓠꓬ ꓣꓳ ꓔꓯ ꓪꓴ-ꓢ ꓐꓰ ꓶꓽ ꓤ ꓗꓪ ꓗꓶꓹ ꓶꓽ ꓡꓰ ꓝꓲˍ ꓡꓳ= ꓪꓴ-ꓢ ꓐꓰ ꓧꓹ ꓙꓰ ꓝꓲˍ ꓡꓳ= ꓪꓴ-ꓢ ꓠꓯꓸꓼ ꓘꓴꓽ ꓗꓪ ꓐꓰ ꓓꓳ ꓙꓰ ꓝꓲˍ ꓟ ꓠꓬ ꓝꓴꓲꓸ ꓥ ꓡꓳ= ꓝꓴꓲꓸ ꓣꓳ ꓠꓶꓽ ꓛꓳꓽ ꓗꓪ ꓐꓰ ꓥˍ ꓟꓲ ꓶꓽ ꓤ ꓗꓪ ꓗꓶꓹ ꓶꓽ ꓡꓰ ꓝꓲˍꓡꓳ= ꓣꓳ ꓒ ꓕꓲꓺ ꓗꓪ ꓔꓬ ꓟ ꓣꓳ ꓠꓶꓽ ꓛꓳꓽ ꓕꓲ ꓛꓳꓽ꓾ ꓥ ꓠꓬ ꓣꓳ ꓢꓷꓸ ꓡꓯ ꓘꓳˍ ꓟ ꓫꓵꓽ ꓤ ꓧꓪ ꓤ ꓘꓴꓽ ꓠꓯꓸꓼ ꓗꓪ ꓐꓰ ꓣꓳ ꓔꓯ ꓗꓶꓹ ꓶꓽ ꓡꓰ ꓝꓲˍ ꓟ ꓠꓬ ꓝꓴꓲꓸ ꓥ ꓡꓳ= ꓕꓱ ꓟˍ ꓡꓰ ꓐꓰ ꓣꓳ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓥˍ ꓟꓲ ꓶꓽ ꓤ ꓗꓷ ꓡꓰ ꓝꓲˍ ꓟ ꓠꓬ ꓝꓴꓲꓸ ꓥ ꓡꓳ= ꓮ ꓫꓵꓽ ꓬꓲꓸ ꓬꓲ ꓢꓲ ꓥ ꓡ= ꓣꓳ ꓠꓬ ꓕꓲ ꓣꓳˍ ꓡꓰꓽ ꓙꓳˍ ꓥ ꓟꓲ ꓣꓳ ꓠꓲꓹ ꓟ ꓠꓯꓸꓼ ꓘꓴꓽ ꓗꓪ ꓠꓬꓲꓽ ꓫꓵꓽ ꓙꓽ ꓐꓰꓽ ꓙꓽ ꓗꓪ ꓠꓲꓹ ꓟ꓾ ꓪꓴꓸ ꓔꓲꓸ ꓪꓴꓸ ꓑ ꓗꓷ ꓡꓰ ꓝꓲˍ ꓡꓳ= ꓕꓱ ꓟ ꓠꓬ ꓝꓴꓲꓸ ꓥ ꓡꓳ=
ꓖꓳ ꓡꓱ ꓠꓬꓲ ꓝꓴꓲꓸ ꓐꓰ ꓐꓯˍ ꓕꓯ ꓪꓴ-ꓢ ꓐꓰ ꓚꓳ ꓡꓳ ꓚꓳ ꓫꓵ ꓗꓪ ꓔꓬ ꓟ ꓠꓶꓽ ꓛꓳꓽ ꓕꓲ ꓛꓳꓽ ꓐꓰ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓔꓯ ꓶꓽ ꓤ ꓗꓶꓹ ꓶꓽ ꓡꓰ ꓝꓲˍ ꓟ ꓥ ꓡꓳ= ꓣꓳ ꓢꓸ ꓠꓯ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓡꓴ-ꓘ ꓕꓳꓽ ꓶ 17ꓽ11-19 ꓥ ꓡꓳ= ꓟꓸ ꓟꓲꓽ ꓘꓴꓽ ꓗꓪ ꓠꓬ ꓔꓸ ꓟ ꓩꓴꓸ ꓓꓲꓻ ꓢꓴ ꓞꓲꓺ ꓣꓳ ꓠꓬ ꓢꓲ ꓒ ꓔꓬ ꓗꓪ ꓡ ꓢꓲ ꓠꓬꓲ ꓫꓱꓸ ꓤ ꓠꓹ ꓟ ꓓꓰꓽˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓫꓱꓸ ꓤ ꓢꓲ ꓠꓬꓲ ꓬꓲ ꓪ ꓠꓻ ꓔꓯ ꓫꓬꓹ ꓖꓶˍ ꓡꓳ= ꓬꓲ ꓪ ꓐꓴ ꓠꓬ ꓔꓲꓺ ꓒ ꓐꓴ ꓔꓯ ꓟꓸ ꓖꓶˍ ꓟ ꓚ ꓚꓱꓹ ꓗꓪ ꓠꓻ ꓓꓴ ꓓꓻ ꓡꓰˍ ꓕꓯ ꓕꓲ ꓣꓳ ꓠꓬ ꓚꓱꓹ ꓬꓲꓼ ꓡ ꓢꓲ ꓠꓬꓲ ꓪꓴ-ꓢ ꓔꓯ ꓫꓸ ꓟꓳˍ ꓟ꓾ ꓢꓲ ꓒ ꓬꓰ-ꓢꓴ ꓔꓯ ꓫꓸ ꓟꓳˍ ꓟ ꓔꓯ ꓣꓳ ꓑ ꓙꓽˍ ꓡꓳ=
ꓢꓲ ꓒ ꓬꓰ-ꓢꓴ ꓦꓬꓼ ꓠꓬꓲ ꓗꓪ ꓔꓸ ꓟꓼ ꓩꓴꓸ ꓓꓲꓻ ꓢꓴ ꓐꓯˍ ꓟ ꓠꓬ ꓝꓴꓲꓸ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓥ ꓡꓳ= ꓬꓲ ꓪ ꓗꓶꓸ ꓚꓲꓸ ꓗꓪ ꓮꓸ ꓥꓼ ꓗꓳꓸ ꓡꓱꓸ ꓕꓲ ꓟ ꓓꓱꓼ ꓢꓲ ꓠꓬꓲ꓾ “ꓥꓪ ꓠꓬ ꓔꓸ ꓟꓼ ꓩꓴꓸ ꓓꓲꓻ ꓠꓻ ꓙꓳ ꓢꓴ ꓕꓲ ꓣꓳ ꓥ ꓡꓳ= ꓥꓪ ꓔꓯˍ ꓐꓰ ꓶꓽ ꓤ ꓙꓰ ꓡꓯ” ꓐꓰ ꓐꓯ ꓢꓲ ꓠꓬꓲ ꓞꓳ ꓤ ꓟꓳꓻˍ ꓕ ꓑꓳꓸꓼ ꓕꓱ ꓡꓱ ꓘꓴꓻ ꓢꓲ ꓠꓬꓲ ꓔꓬꓹ ꓪˍ ꓟ ꓥ ꓡꓳ= ꓝꓮꓲ ꓬꓲ ꓪ ꓠꓬ ꓝꓮꓲꓸ ꓝꓲ ꓘꓴꓽ ꓠꓯꓸꓼ ꓗꓪ ꓔꓬꓹ ꓟꓽ ꓓꓻ= ꓬꓲ ꓪ ꓠꓬ ꓪꓽˍ ꓟꓲ ꓘꓴ ꓟꓽ ꓓꓻ= ꓖꓳ ꓡꓱ ꓠꓬꓲ ꓢꓲꓽ ꓫꓬ ꓦꓲ ꓘꓴꓽ ꓗꓪ ꓥˍ ꓟꓲ ꓓꓵꓽ ꓙꓰ ꓪ ꓟꓽ ꓓꓻ ꓟ ꓑꓶꓸ ꓓꓴ ꓬꓲ ꓪ ꓚꓳꓽ ꓬꓲ ꓪ ꓝꓴꓲꓸ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓔꓬꓹ ꓪˍ ꓟ ꓥ ꓡꓳ= ꓕꓱ ꓟˍ ꓡꓰꓽ ꓟꓽ ꓞꓲꓺ ꓬꓲ ꓪ ꓫꓵꓽ ꓤ ꓧꓪ ꓤ ꓬꓲ ꓪ ꓦꓲꓻ ꓢꓴ ꓐꓰ ꓥˍ ꓟꓲ ꓶꓽ ꓤ ꓐꓰ ꓔꓬ ꓪˍ ꓟ ꓥ ꓡꓳ= ꓬꓲ ꓪ ꓠꓬ ꓘꓹ ꓠꓱ ꓫꓱꓸ ꓟꓸ ꓗꓪ ꓔꓬ ꓢꓲ ꓠꓬꓲ ꓕꓰ ꓡꓰ ꓐꓰ ꓞꓳ ꓙꓳ ꓪˍ ꓟ ꓥ ꓡꓳ=
ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓬꓲ ꓪ ꓟꓳꓻ ꓡꓰˍ ꓕꓯ ꓬꓲ ꓪ ꓔꓳꓹ ꓜꓳꓽ ꓡꓰˍ ꓕꓯ ꓬꓲ ꓪ ꓠꓬ ꓬꓲꓸ ꓘꓴꓽ ꓠꓯꓸꓼ ꓗꓪ ꓚꓱꓹ ꓬꓲꓼ ꓙꓰ ꓪˍ ꓟ ꓙꓵꓽ ꓪ꓾ ꓪꓴ-ꓢ ꓠꓵꓻ ꓠꓲꓹ ꓘꓳ ꓣꓴ ꓟꓶˍ ꓟ ꓬꓲ ꓔꓶꓸ ꓕꓲ ꓟ ꓒꓬꓱꓼ ꓡˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓢꓲꓽ ꓫꓬ ꓦꓲ ꓗꓪ ꓧꓶꓸ ꓕꓯ ꓙꓰ ꓝꓲˍ ꓡꓳ= ꓪꓴ-ꓢ ꓐꓰ ꓧꓶꓸ ꓔꓯ ꓧꓳꓹ ꓑ ꓡꓯ ꓘꓳ ꓝꓲˍ ꓡꓳ= ꓪꓴ-ꓢ ꓬꓲ ꓪ ꓗꓶꓹ ꓶꓽ ꓡꓰ ꓟ ꓔꓯ ꓧꓶꓸ ꓔꓯ ꓠꓶꓽ ꓡꓰ ꓝꓲˍ ꓡꓳ= ꓗ ꓠꓯꓸ ꓬꓲ ꓫꓵꓽ ꓤ ꓧꓪ ꓤ ꓔꓯ ꓟꓳꓸ ꓖꓶ ꓝꓲˍ ꓡꓳ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓬꓰ ꓖꓶˍ ꓟ ꓥ ꓡꓳ= ꓕꓱ ꓟ ꓗꓪ ꓐꓰ ꓣꓳ ꓔꓯ ꓮ ꓫꓵꓽ ꓟꓳꓸ ꓖꓶ ꓡ ꓔꓬ ꓡ= ꓣꓳ ꓠꓬ ꓝꓴꓲꓸ ꓙꓳ ꓢꓴ= ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓙꓵˍ ꓕꓯ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓠꓲꓹ ꓠꓵˍ ꓕꓯ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓠꓯꓸꓼ ꓘꓴꓽ ꓗꓪ ꓐꓰ ꓪꓴ-ꓢ ꓐꓰ ꓠꓶꓽ ꓡꓰˍ ꓡꓳ=
