ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓔꓴ‐ꓣ‐ꓗꓲ ꓐꓰ ꓡꓰꓐꓮꓠꓳꓠ ꓗꓪ ꓶꓼ ꓓꓳ ꓫꓱ, ꓓꓳ ꓚꓳ ꓙꓰ ꓠ, ꓟ꓾
ꓔꓲꓺ ꓒ ꓪ ꓔꓲ ꓣꓳ. ꓦꓲꓻ ꓚꓰ ꓗꓪ ꓐꓰ ꓓꓲꓣꓰꓚꓔꓳꓣ ꓟꓮꓔꓔꓰꓳ ꓐꓣꓴꓠꓲ ꓡꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓮ ꓟꓶ 11 ꓦ ꓟ ꓐꓰ 12 ꓦ ꓕꓯ ꓔꓴ‐ꓣ‐ꓗꓲ ꓐꓰ ꓡꓰꓐꓮꓠꓳꓠ ꓗꓪ ꓶꓼ ꓓꓳ ꓫꓱ, ꓓꓳ ꓚꓳ ꓙꓰ ꓓꓴ ꓥ ꓡꓳ꓾ ꓐꓰ ꓐꓯ ꓑꓶ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓬꓲ ꓪꓴ. ꓕꓲꓽ ꓧꓪ, ꓟ ꓠꓱ. ꓐꓯꓼ ꓗꓴꓷꓼ ꓶꓼ ꓓꓳ ꓫꓱ, ꓓꓳ ꓚꓳ ꓙꓰ ꓟ ꓐꓰ 11 ꓦ 27 ꓠꓬꓲ ꓗꓪ ꓐꓰ 30 ꓠꓬꓲ ꓗꓪ ꓛꓲ ꓔꓴ‐ꓣ‐ꓗꓲ ꓗꓪ 12 ꓦ 2 ꓠꓬꓲ ꓗꓪ ꓛꓲ ꓡꓰꓐꓮꓠꓳꓠ ꓗꓪ ꓚꓳ ꓙꓰ ꓓꓴ ꓥꓳ꓿
ꓔꓲꓺ ꓒ ꓪ ꓔꓲ ꓠꓬ ꓠꓬꓲꓽ ꓗꓴꓷꓼ ꓡꓱꓼ ꓗꓪ ꓐꓰ ꓗꓴꓷꓼ ꓢꓲ ꓒ ꓐꓰ ꓘꓴ ꓜꓲꓼ ꓞꓳ ꓪꓴ. ꓓꓵ ꓣꓱ ꓢꓴ ꓐꓴ ꓘꓴ ꓔ ꓟ ꓔꓯ ꓘꓳ, ꓣꓴ ꓜꓲ ꓠ, ꓟ ꓕꓱ ꓟ ꓔꓯ ꓪꓴ. ꓔꓴ ꓗꓷ ꓟ ꓥ ꓡꓳ꓿
ꓔꓴ‐ꓣ‐ꓗꓲ ꓚꓱ, ꓗꓪ First Council of Nicaea ꓬꓰ ꓗꓷ ꓟ 1700 ꓘꓳꓼ ꓐꓲ_ ꓟ ꓚꓵ. ꓟꓶ ꓓꓴ ꓐꓰ ꓲꓜꓠꓲꓗ ꓡꓳ ꓒꓱ ꓗꓪ ꓐ ꓓꓴ ꓥ ꓡꓳ꓿ ꓡꓰꓐꓮꓠꓳꓠ ꓗꓪ ꓚꓳ ꓙꓰ ꓠ, ꓟ ꓔꓯ ꓠꓬ ꓮ ꓟꓶ ꓬꓲ ꓙꓵ, ꓛꓲ ꓡ ꓕꓯ ꓐꓯ ꓑꓶ ꓓꓴ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓦꓮꓔꓲꓚꓮꓠ ꓓꓳꓽ ꓫꓵ ꓐꓳ ꓑꓶ ꓔꓶ. ꓗꓪ ꓐꓰ ꓓꓳ ꓫꓵ ꓣꓴ ꓢꓴ Olivier Bonnel ꓡꓰ ꓐꓯ ꓔ ꓟ ꓗꓪ ꓔꓲꓺ ꓒ ꓓꓽ Caser Essayan ꓡꓰ ꓔꓲꓺ ꓒ ꓪ ꓔꓲ ꓡꓰꓐꓮꓠꓳꓠ ꓗꓰ ꓚꓳ ꓙꓰ ꓡ ꓟ ꓠꓬ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓫ. ꓔꓬ ꓢꓴ ꓐꓴ ꓐꓱ ꓶ “ꓥꓳ ꓡꓳ. ꓓꓴ ꓪꓴꓽ ꓓꓰ ꓡꓰ_ ꓟ ꓚꓱ,” ꓥ ꓡꓳ ꓐꓰ ꓐꓯ ꓔ ꓡꓳ꓿
“ꓡ ꓞꓳ ꓐꓴ ꓐꓱ ꓶ ꓢꓲ ꓡꓲ, ꓟ꓾ ꓔꓱ, ꓜꓳ ꓟ ꓐꓰ ꓡ ꓞꓳ ꓐꓴ ꓞꓳ ꓙꓳ ꓚꓱ, ꓔꓯ ꓒꓵꓽ ꓛꓳ_ ꓟ ꓗꓪꓐꓰ ꓠꓱ. ꓐꓯꓼ ꓚꓱ, ꓟꓽ ꓙꓳ ꓐꓰ ꓐꓯ_ ꓟ ꓔꓯ ꓣꓳ ꓮ ꓙꓵ ꓐꓱ ꓶ ꓢꓲ ꓡꓲ, ꓟ ꓔꓯ ꓧꓳꓽ ꓔꓯ, ꓡ ꓢꓲ ꓝꓮꓲ ꓧꓪ. ꓛꓲ ꓡ ꓠ, ꓟ ꓥꓳ ꓡꓳ. ꓔ ꓡꓳ꓾” ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓓꓽ ꓡꓰ ꓡꓰꓐꓮꓠꓳꓠ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓐꓰ ꓟꓴꓢꓡꓲꓟꓢ ꓐꓴ ꓥ ꓟꓲ ꓔꓲꓺ ꓒ ꓪ ꓔꓲ ꓔꓯ ꓥꓳ ꓡꓳ. ꓔꓬ ꓟ ꓔꓯ ꓐꓯ ꓔ ꓡꓳ꓿ ꓬꓲ ꓪ ꓠꓬ ꓡꓰꓐꓮꓠꓳꓠ ꓐꓱ ꓶ ꓗꓴꓷꓼ ꓫꓵ ꓪꓴ ꓢꓰꓼ ꓡꓯ ꓘꓳ ꓓꓴ ꓐꓯ_ ꓟ ꓐꓯ ꓘꓶꓽ ꓓꓰ ꓢ ꓠꓱ. ꓐꓯꓼ ꓐꓯ ꓘꓶꓽ ꓔꓯ ꓥꓳ ꓡꓳ. ꓔ ꓟ꓾ ꓮ. ꓣꓳ ꓡꓳ. ꓒꓽ ꓕꓲ ꓣꓳ꓾ ꓐ, ꓐ ꓕꓲ ꓣꓳ ꓗꓪ ꓐꓰ ꓡꓰ ꓐ ꓙ ꓓ_ ꓟ ꓐꓯ ꓘꓶꓽ ꓔꓯ ꓠ ꓠ, ꓠꓲ, ꓫꓵ_ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓓꓽ ꓡꓰ ꓐꓯ ꓔꓯ ꓣꓳ. ꓚꓰ ꓗꓪ ꓐꓰ ꓐꓯ ꓑꓶ ꓔ ꓡꓳ꓿
