ꓟꓲ‐ꓢ ꓬꓰ_ ꓟ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓖꓳ ꓓꓱ ꓐꓰ ꓫꓵ ꓢꓲ ꓫꓬ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓠꓬꓲꓽ ꓟ ꓕꓱ ꓟ ꓘꓴꓽ ꓠꓯꓼ ꓗꓪ ꓮ ꓫꓵ ꓑꓶ ꓓꓴ ꓑ ꓫꓬ ꓐꓴ ꓠꓬ ꓛꓱꓼ ꓡꓱꓼ ꓙꓵ ꓕꓱ ꓟ ꓔꓯ ꓟꓽ ꓘꓳ, ꓣꓴ ꓪ ꓡ?
ꓥ ꓡꓳ꓾ ꓣꓳ ꓕꓱ ꓟ ꓔꓯ ꓡꓳ. ꓠꓬꓲ ꓕꓯ ꓮ ꓠꓱ 1545 ꓘꓳꓼ ꓗꓪ ꓛꓲ ꓑ ꓫꓬ ꓐꓴ ꓐꓰ ꓔꓲꓺ ꓒ ꓐꓴ ꓠꓬ ꓕꓲ ꓡꓲ, ꓐꓰ ꓢꓲ ꓫꓬ ꓑ ꓑ ꓔꓯ ꓛꓱꓼ ꓡꓱꓼ ꓙꓵ ꓔꓯ ꓥ ꓟꓲ ꓘꓳ, ꓣꓴ ꓗꓳ. ꓡ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓫꓬ ꓑ ꓑ ꓘꓴꓽ ꓠꓯꓼ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓖꓳ ꓓꓱ ꓥ ꓡꓰ ꓟꓽ ꓞꓲ ꓬꓲ ꓫꓵ ꓬꓲ ꓧꓪ ꓮ ꓙꓵ ꓡꓱꓼ ꓬꓲ ꓘꓴꓽ ꓗꓪ ꓔꓬ ꓡꓳ꓾ ꓖꓳ ꓡꓱ ꓠꓬꓲ ꓬꓰ‐ꓢꓴ ꓬꓲ ꓧꓪꓽ ꓖꓳ ꓓꓱ ꓐꓰ ꓐꓯ ꓢꓲ ꓠꓬꓲ ꓖꓶ_ ꓕꓯ ꓘꓳ, ꓣꓴ ꓢꓴ ꓠꓬ ꓮꓟꓰꓠ꓾ ꓥ ꓡꓳ꓾ ꓐꓯ ꓢꓲ ꓠꓬꓲ ꓘꓳ, ꓣꓴ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓧꓪꓽ ꓛꓴ ꓐꓰ ꓟꓽ ꓐꓯ꓾ ꓢꓲ ꓫꓬ ꓑ ꓑ ꓘꓴꓽ ꓠꓯꓼ ꓗꓪ ꓥ ꓟꓲ ꓮ ꓡꓰ ꓛꓲ ꓦꓶ, ꓗꓷ ꓥ ꓟꓲ ꓬꓲ ꓘꓴꓽ ꓠꓯꓼ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓒ ꓐꓲ ꓓꓵ_ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓫꓬ ꓑ ꓑ ꓔꓯ ꓘꓳ, ꓣꓴ ꓠꓬ ꓬꓲ ꓫꓵ ꓬꓲ ꓧꓪ ꓔꓯ ꓘꓳ, ꓣꓴ_ ꓟ ꓥ ꓡꓳ꓿ ꓝꓮꓲ ꓮ ꓫꓵ ꓑꓶ ꓓꓴ ꓛꓱꓼ ꓡꓱꓼ ꓙꓵ ꓕꓱ ꓟ ꓔꓯ ꓟꓽ ꓖꓶ ꓡ ꓐꓰ ꓐꓯ ꓕꓯ ꓬꓲ ꓣꓱ ꓛꓰ ꓠꓬ ꓕꓲ ꓡꓲ, ꓥ ꓟ ꓑꓶ ꓓꓴ ꓢꓲ ꓫꓬ ꓑ ꓑ ꓔꓯ ꓘꓳ, ꓣꓴ ꓥ ꓟꓲ ꓛꓱꓼ ꓡꓱꓼ ꓙꓵ ꓔꓯ ꓘꓳ, ꓣꓴ ꓥ ꓟꓲ ꓬꓲ ꓣꓱ ꓛꓰ ꓠꓬ ꓕꓲ ꓡꓲ, ꓥ ꓡꓳ꓿ ꓖꓳ ꓡꓱ ꓠꓬꓲ ꓕꓱ ꓡꓱ ꓐꓰ ꓕꓲ ꓡꓲ, ꓟꓶ_ ꓟ ꓑꓶ ꓓꓴ ꓢꓲ ꓫꓬ ꓛꓱꓼ ꓡꓱꓼ ꓙꓵ ꓔꓯ ꓑ ꓫꓬ ꓐꓴ ꓔꓯ ꓟꓽ ꓖꓶ ꓬꓰ ꓗꓷ ꓥ ꓡꓳ꓿ ꓝꓮꓲ ꓕꓱ ꓡꓱ ꓐꓰ ꓞꓳ ꓤ ꓬꓲ ꓜꓴ ꓬꓲ ꓟꓯꓼ ꓬꓲ ꓦꓬ ꓣꓳ ꓛꓲ ꓔꓬ ꓕꓯ ꓠꓬ ꓛꓱꓼ ꓡꓱꓼ ꓙꓵ ꓔꓯ ꓮ ꓙꓵ ꓖꓶ ꓠ, ꓟ ꓥ ꓟꓲ ꓟꓽ ꓢ꓾ ꓕꓲ ꓧꓪ, ꓧꓪ, ꓧꓳ. ꓡꓰ_ ꓟ꓾ ꓠꓻ ꓫꓵ ꓛꓵ. ꓡꓰ_ ꓟ꓾ꓖꓳ ꓟ ꓡꓰ ꓟꓽ ꓞꓲ ꓛꓱꓼ ꓡꓱꓼ ꓙꓵ ꓮ ꓟꓬ, ꓖꓴ ꓡꓰ_ ꓟ꓾ ꓕꓱ ꓡꓱ ꓗꓷ ꓡꓰ_ ꓟ ꓥ ꓡꓳ꓿ ꓕꓲ ꓖ ꓕꓲ ꓧꓪ, ꓠꓬ ꓛꓱꓼ ꓡꓱꓼ ꓙꓵ ꓖꓳ ꓟ ꓧꓳ. ꓙꓰ_ ꓟ꓾ ꓞꓰ ꓡꓰ_ ꓟ꓾ ꓢꓴ ꓡꓰ ꓟꓽ ꓒꓵꓽ ꓬꓰ ꓡꓰ_ ꓟ꓾ ꓥ ꓟꓲ ꓗꓷ ꓡꓰ ꓗꓴ._ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓖꓳ ꓓꓱ ꓕꓲ ꓟ ꓔꓯ ꓘꓳ, ꓣꓴ ꓕꓯ ꓣꓱ ꓛꓰ ꓒ ꓐꓲ ꓟꓶ_ ꓠꓬ ꓮ ꓫꓵ ꓑꓶ ꓓꓴ ꓖꓶ ꓫꓵ ꓐꓯ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓖꓳ ꓗꓪ ꓐꓰ ꓑ ꓫꓬ ꓐꓴ ꓔꓯ ꓢꓲ ꓫꓬ ꓖꓳ ꓓꓱ ꓕꓲ ꓟ ꓡꓰ ꓖꓶ ꓩꓴ ꓡ ꓟ ꓥ ꓡꓳ꓿ꓖꓳ ꓡꓱ ꓥ ꓟꓲ ꓕꓲ ꓖ ꓕꓲ ꓧꓪ, ꓠꓬ ꓠꓬꓲꓽ ꓫꓵ ꓡꓱꓼ ꓖꓶ ꓫꓵ ꓙꓳ_ ꓡꓳ꓾ ꓡꓯ ꓒꓯ, ꓝꓲ. ꓕꓯ ꓢꓲ ꓫꓬ ꓑ ꓑ ꓬꓲ. ꓪꓴ. ꓘꓳ, ꓣꓴ ꓕꓯ ꓥ ꓡꓳ꓾
ꓖꓳ ꓡꓱ ꓠꓬ ꓠ ꓠꓬꓲ ꓘꓶꓽ ꓕꓲ ꓟ ꓓꓳ ꓡ ꓗꓴ._ ꓡꓳ꓿ ꓮ ꓫꓵ ꓑꓶ ꓓꓴ ꓢꓲ ꓫꓬ ꓖꓳ ꓓꓱ ꓕꓲ ꓟ ꓡꓰ ꓘꓳ, ꓣꓴ ꓠꓬ ꓐꓲ ꓜꓲꓼ_ ꓫꓵ ꓥ ꓠꓬ ꓛꓱꓼ ꓡꓱꓼ ꓙꓵ ꓔꓯ ꓮ ꓫꓵ ꓑꓶ ꓓꓴ ꓔꓲꓺ ꓒ ꓐꓴ ꓡꓰ ꓬꓰ ꓫꓵ꓾ ꓕꓲ ꓫꓵ ꓡꓰ ꓬꓰ ꓠꓬ ꓟꓽ ꓙꓲ_ ꓡ꓾ ꓟꓽ ꓧ, ꓡ꓾ ꓐꓰ ꓠ ꓠꓬꓲ ꓗꓴ._ ꓡꓳ꓿ ꓢꓲ ꓫꓬ ꓖꓳ ꓓꓱ ꓐꓰ ꓛꓱꓼ ꓡꓱꓼ ꓙꓵ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓫꓵ ꓬꓲ ꓧꓪ ꓔꓯ ꓝꓮꓲ ꓕꓲ ꓧꓪ, ꓫꓬ, ꓒꓬꓱꓼ ꓙꓰ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓡꓳ, ꓬꓰ ꓟ ꓟꓶꓽ ꓘꓶꓽ ꓜ ꓜ ꓑꓮꓲ ꓗꓪ ꓥꓪ ꓧꓪ ꓔꓯ ꓜ ꓥꓪ ꓫꓵ ꓔꓯ ꓓꓳ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓬꓲ ꓡꓯ ꓐꓳ ꓔꓶ. ꓓꓴ ꓕꓯ ꓢꓲ ꓗꓪ ꓬꓲ ꓧꓪ ꓖꓳ ꓓꓱ ꓠꓬ ꓢꓯꓼ ꓟꓬ ꓞꓷ, ꓗꓷ ꓢꓲ ꓠꓬꓲ ꓬꓲ ꓫꓵ ꓠꓬ ꓧꓳ. ꓙꓰ_ ꓡꓳ꓿ ꓕꓱ ꓟ ꓔꓯ ꓬꓲ ꓫꓵ ꓬꓲ ꓧꓪ ꓔꓯ ꓟꓲ‐ꓢ ꓛꓴ ꓔꓲ_ ꓟ ꓗꓪ ꓒꓬꓱꓼ ꓡꓰ ꓝꓲ_ ꓡꓳ꓿ꓖꓳ ꓡꓱ ꓠꓬꓲ ꓠꓬꓲꓽ ꓫꓵ ꓕꓱ ꓟ ꓟꓔꓯ ꓕꓲ ꓫꓵ ꓘꓳ, ꓣꓴ ꓟ ꓗꓪ ꓐꓰ ꓟꓶ_ ꓡꓳ ꓐꓯ_ ꓟ ꓔꓯ ꓢꓷ. ꓠ ꓗ, ꓡꓳ꓿ ꓔꓲꓺ ꓒ ꓐꓴ ꓠꓬ ꓛꓱꓼ ꓡꓱꓼ ꓙꓵ ꓐꓰ ꓑ ꓑ ꓠꓬꓲꓽ ꓫꓵ ꓣꓱ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓫꓵ ꓬꓲ ꓧꓪ ꓔꓯ ꓚꓰꓼ ꓗꓷ ꓗ. ꓠꓯ. ꓘꓳ, ꓣꓴ ꓢꓴ ꓠꓬ ꓕꓲ ꓫꓵ ꓘꓳ, ꓣꓴ ꓟ ꓗꓪ ꓐꓰ ꓮ ꓙꓵ ꓠꓬ ꓣꓱ ꓛꓰ ꓕꓲ ꓡꓲ, ꓟꓶ_ ꓟ ꓥ ꓡꓳ꓾
