ꓤ ꓖꓴ ꓤ ꓟꓶ ꓒꓰ ꓡꓯ ꓘꓳ ꓟꓽ ꓓ ꓟ ( Sunday reflection)
ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (27) ꓫꓵꓽ ꓠꓽꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ,ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ ꓶ (10ꓽ2‐16) ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓤ ꓖꓴ ꓤ ꓟꓶ ꓒꓰ ꓡꓯ ꓘꓳ ꓟꓽ ꓓꓽ ꓟ ꓚꓱ, ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓔꓯ ꓒ‐ꓡꓲ‐ꓢꓷ ꓐꓴ ꓡꓰ ꓟꓳ‐ꓫ ꓡꓰ ꓠꓽ ꓤ ꓟꓶ ꓔꓯ ꓒꓰ ꓓꓽ ꓡ ꓐꓰ ꓠꓽ ꓠꓬꓲˍ ꓟ ꓥ ꓡꓳ꓿ ꓟꓳ‐ꓫꓲ ꓠꓬ ꓥꓪ ꓠꓴ ꓔꓯ ꓤ ꓟꓶ ꓒꓰ ꓝꓲ ꓓꓽ ꓡꓳ ꓐꓰ ꓐꓯ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓠꓴ ꓮ ꓡꓰ ꓬꓰ ꓐ ꓡ ꓡ ꓐꓰ ꓠ ꓠꓬꓲˍ ꓡꓳ꓿ ꓟꓳ‐ꓫꓲ ꓠꓬ ꓠꓴ ꓪ ꓔꓯ ꓒꓰ ꓝꓲ ꓟ ꓠꓬ ꓠꓴ ꓪ ꓠꓲ, ꓟ ꓩꓴ ꓟ ꓪꓴ. ꓠꓬꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓚꓰꓼ ꓬꓲ ꓪꓴ. ꓢꓲꓽ ꓫꓬ ꓕꓳ ꓶ ꓗꓪ ꓪꓴ‐ꓢ ꓡꓰ ꓞꓳ ꓑ ꓤ ꓠꓬ ꓬꓲ ꓐ, ꓐ ꓟ, ꓟ ꓔꓯ ꓧ, ꓗꓷ ꓢꓲ ꓬꓲ ꓤ ꓟꓶ ꓔꓯ ꓝꓱ ꓡꓰ ꓥꓳ꓿ ꓖꓳ ꓡꓱ ꓢꓲ ꓠꓬꓲ ꓬꓲ ꓪ ꓠꓬꓲꓽ ꓣꓳ ꓠꓬ ꓕꓲ ꓧꓪꓽ ꓡꓰ ꓒꓬꓱꓼ ꓡꓰ ꓥꓳ꓿ ꓬꓲ ꓪ ꓠꓽ ꓝꓮꓲ ꓠꓬꓲꓽ ꓣꓳ ꓟꓽ ꓥ꓿ꓕꓲ ꓧꓪꓽ ꓡꓰ ꓥꓳ꓿ ꓪꓴ‐ꓢ ꓡꓰ ꓝꓱ ꓔ ꓟ ꓔꓯ ꓞꓳ ꓤ ꓡꓰ ꓕꓽ ꓧꓰ, ꓗꓷ ꓝꓲ꓾ ꓐꓯ ꓖꓶ ꓡꓳ꓿
ꓪꓴ‐ꓢ ꓟꓲ ꓙꓱ ꓗꓪ ꓡꓯꓽ ꓒꓯ ꓝ ꓔ ꓟ ꓠꓬꓲ ꓟ ꓡ ꓞꓳ ꓠꓬ ꓧ, ꓟꓽ ꓓ ꓟ ꓥ ꓡꓳ꓿ ꓧ, ꓢꓴ ꓐꓴ ꓠꓬ ꓪꓴ‐ꓢ ꓔꓯ ꓛꓬ ꓡꓰ ꓢꓴ ꓐꓴ ꓟꓽ ꓔꓱ ꓬꓰ ꓢꓴ ꓐꓴ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓠꓬꓲꓽ ꓕꓱ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓤ ꓠꓱ ꓤ ꓐꓴ ꓔꓯ ꓶꓻ ꓥꓳꓽ ꓙꓱ ꓖꓶ ꓟ ꓥ ꓡꓳ꓿ ꓝꓲ ꓓꓴ ꓐꓴ ꓠꓬ ꓤ ꓠꓱ ꓤ ꓐꓴ ꓔꓯ ꓬꓲ ꓪ ꓔꓬ ꓗꓪ ꓟꓽ ꓡ ꓠ, ꓟ ꓗꓽ ꓕꓽ ꓗꓷ ꓟ ꓥꓡꓳ꓿ ꓖꓳ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓳ. ꓟꓳ ꓗꓷ ꓠꓬ ꓤ ꓠꓱ ꓤ ꓐꓴ ꓔꓯ ꓬꓲ ꓔꓬ ꓗꓪ ꓡ ꓝꓲ ꓠ, ꓟ ꓐꓯ ꓗꓷ ꓟ ꓥ ꓡꓳ꓿ ꓬꓲ ꓪ ꓔꓯ ꓡꓯꓽ ꓒꓯ, ꓚꓰ, ꓖꓶ ꓢꓲ ꓶꓻ ꓥꓳꓽ ꓙꓱ ꓖꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓪꓴ‐ꓢ ꓟꓲ ꓙꓱ ꓗꓪ ꓡꓯꓽ ꓒꓯ, ꓝ ꓔ ꓢꓴ ꓐꓴ ꓔꓯ ꓠꓲ, ꓟ ꓡ ꓞꓳ ꓐꓴ ꓘꓴꓽ ꓗꓪ ꓪꓴ‐ꓢ ꓟꓲ ꓙꓱ ꓗꓪ ꓪꓵꓼ ꓘꓶꓽ ꓚ ꓔ ꓟ ꓠꓬ ꓮ ꓘꓶ. ꓛꓲ ꓒꓴꓽ ꓡꓳ ꓬꓰ ꓟ ꓥ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓪꓴ‐ꓢ ꓟꓲ ꓙꓱ ꓗꓪ ꓦꓲꓻ ꓕꓵ ꓗꓪ ꓕꓵ ꓢꓴ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓠꓬ ꓠꓲ, ꓒꓴ ꓟ ꓥ ꓡꓳ꓿
ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓤ ꓑ ꓤ ꓐꓰ ꓤ ꓑ ꓤ ꓤ ꓟꓶ ꓤ ꓐꓰ ꓤ ꓟꓶ ꓤ ꓕꓱ ꓡꓰ ꓔꓬ ꓟ ꓔꓯ ꓣꓳ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓕꓱ ꓟ ꓔꓯ ꓘꓴ ꓜꓲꓼ ꓞꓳ ꓟꓲ ꓟꓽ ꓠꓲ, ꓫꓵˍ ꓢꓲꓺꓒ ꓬꓰ‐ꓢꓴ ꓟꓲ ꓟꓽ ꓠꓲ, ꓒꓴ ꓟ ꓥ ꓡꓳ꓿ ꓕꓱ ꓡꓱ ꓬꓰ ꓢꓴ ꓐꓴ ꓠꓬ ꓪꓴ‐ꓢ ꓠꓬ ꓛꓬ ꓡꓰ ꓢꓴ ꓐꓴ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ ꓚꓰ, ꓬꓲ ꓪꓴ. ꓕꓯ ꓡꓰ ꓤ ꓑ ꓤ ꓐꓰ ꓤ ꓟꓶ ꓤ ꓚꓰꓼ ꓔ ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪ ꓮ ꓘꓶ. ꓛꓲ ꓤ ꓟꓳ ꓠ, ꓟ ꓙꓵ, ꓟꓲ ꓥ ꓡꓳ꓿
ꓣꓳ ꓠꓬꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓠ, ꓟ ꓣꓳꓺ ꓚꓵ, ꓟ ꓥ ꓡꓳ꓿ ꓤ ꓠꓱ ꓤ ꓐꓴ ꓠꓬ ꓐ, ꓐ ꓟ, ꓟ ꓔꓯ ꓙꓵꓻ ꓟ ꓡꓰ ꓣꓳ ꓥ ꓟꓲ ꓐ, ꓐ ꓪꓴ‐ꓢ ꓔꓯ ꓙꓵꓻ ꓢꓲ ꓠꓬꓲ ꓞꓳ ꓙꓳ ꓠ, ꓟ ꓣꓳꓺ ꓚꓵ, ꓟ ꓥ ꓡꓳ꓿ ꓝꓮꓲ ꓔꓱ, ꓚꓵ, ꓟ ꓐꓰ ꓙꓺ ꓣꓳ ꓠꓲ, ꓟ ꓣꓱ ꓢꓲꓠꓬꓲ ꓣꓳ ꓚꓲ. ꓛꓬ ꓟꓬꓱꓽ ꓓꓳꓽ ꓧꓪ ꓟ ꓟꓽ ꓥ ꓪꓴ‐ꓢ ꓠꓲ, ꓡꓶꓽ ꓗꓪ ꓛꓳ ꓫꓱ, ꓢꓴ ꓐꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬꓲꓽ ꓟ ꓡ ꓞꓳ ꓜꓱ ꓟ ꓡꓯ ꓒꓯ, ꓝ ꓟ ꓔꓯ ꓮ ꓘꓶ. ꓛꓲ ꓠꓲ, ꓒꓴ ꓟ ꓐꓰ ꓪꓴ‐ꓢ ꓟꓲ ꓙꓱ ꓗꓪ ꓪꓵ ꓙꓱ ꓔ ꓟ ꓔꓯ ꓠꓬ ꓡ ꓞꓳ ꓐꓴ ꓧ, ꓟꓽ ꓓ ꓟ ꓥ ꓡꓳ꓿ ꓧ, ꓢꓴ ꓐꓴ ꓥ ꓟꓲ ꓝꓴꓲ ꓓꓽ ꓟ ꓙꓳ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓢꓲꓽ ꓫꓬ ꓟ ꓠꓬꓲꓽ ꓟ ꓡ ꓞꓳ ꓝꓱ ꓟ ꓑꓮꓲ ꓔꓯ ꓬꓰ ꓪ ꓠ, ꓟ ꓢꓯꓼ ꓕꓵꓼ ꓡꓯ꓿ ꓡꓯ ꓒꓯ, ꓝ ꓓꓳ ꓢꓴ ꓐꓴ ꓥ
