ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ “ꓤ ꓟꓳ꓾ ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓔꓯ ꓠꓴ ꓪ ꓟꓳꓻ ꓟꓽ ꓟꓵ ꓐꓰ ꓕꓽ ꓬꓰ꓾” ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ (ꓟ‐ꓕꓲ꓿18ꓽ1‐5, 10) ꓗꓪ ꓟ ꓥꓳ꓿ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓥꓪ ꓠꓴ ꓪ ꓔꓯ ꓔꓱ, ꓔꓱ,ˍ ꓐꓰ ꓐꓯ ꓖꓶˍ ꓠꓬꓲ ꓠꓴ ꓪ ꓒꓳ, ꓡꓰꓼ ꓡ ꓢꓲ ꓤ ꓠꓱ ꓤ ꓡꓰ ꓐꓰ ꓟꓽ ꓒꓬꓱꓼ ꓡ ꓠꓬ ꓮ ꓡꓲ ꓥˍ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓠꓴ ꓪ ꓓꓵꓽ ꓡꓰ ꓪ ꓟꓽ ꓓꓻ꓿ ꓖꓳ ꓡꓱ ꓠꓬꓲ ꓮꓽ ꓟ ꓥˍ ꓟꓲ ꓤ ꓠꓱ ꓤ ꓕꓱ ꓟ ꓡꓰ ꓐꓰ ꓚꓲ. ꓛꓬ ꓙ ꓣꓳꓽˍ ꓠꓬ꓾ ꓬꓲ ꓠꓽ ꓟꓴ ꓗꓪ ꓗꓴꓷꓼ ꓗꓪ ꓪ ꓜꓲ ꓪꓴꓽˍ ꓟ ꓥ ꓡꓳ꓾ ꓐꓰ ꓕꓱ ꓡꓱ ꓐꓯ ꓔˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓽ ꓣꓳ ꓮ ꓙꓵꓽ ꓠꓬ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓒꓳ, ꓬꓲꓼ ꓡ ꓠ, ꓟ ꓥꓳ꓿ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓒꓳ, ꓬꓲꓼ ꓡ ꓠ, ꓟ ꓠꓬ ꓮ ꓡꓲ ꓥ ꓡ ꓐꓯˍ ꓠꓬ ꓙ ꓣꓳˍ ꓟ ꓠꓲ, ꓟ ꓡꓰ ꓒꓳ, ꓬꓲꓼ ꓡ ꓠ, ꓟ ꓥꓳ꓿ ꓤ ꓠꓱ ꓤ ꓮ ꓙꓵꓽ ꓠꓬ ꓮ ꓘꓶ. ꓙ ꓣꓳˍ ꓟ ꓥ ꓡꓳ꓿ ꓤ ꓠꓱ ꓤ ꓕꓲ ꓣꓳ ꓔꓯ ꓮ ꓡꓲ ꓐꓯ ꓖꓶˍ ꓟꓲ ꓬꓲ ꓠꓬ ꓖꓳ ꓡꓱ ꓬꓰ ꓖꓶ ꓡˍ ꓡꓳ꓿ ꓤ ꓠꓱ ꓤ ꓕꓲ ꓣꓳ ꓔꓯ “ꓕꓱ ꓗꓪ ꓡꓯ” ꓐꓰ ꓐꓯˍ ꓠꓬ ꓬꓲ ꓡˍ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓤ ꓠꓱ ꓤ ꓠꓬ ꓠꓲ, ꓟ ꓮ ꓘꓶ. ꓢꓲꓽ ꓫꓬˍ ꓡꓳ꓿ ꓤ ꓠꓱ ꓤ ꓠꓬ ꓠꓲ, ꓟ ꓮ ꓘꓶ. ꓙ ꓣꓳˍ ꓡꓳ꓿ ꓖꓳ ꓟ ꓑꓶ. ꓓꓴ ꓪꓴ‐ꓢ ꓠꓬ꓾ ꓤ ꓠꓱ ꓤ ꓕꓱ ꓟˍ ꓡꓰ ꓐꓰ ꓟꓽ ꓒꓳ, ꓬꓲꓼ ꓡ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓟꓽ ꓓꓻ꓾ ꓐꓰ ꓕꓱ ꓘꓶ ꓛꓲ ꓐꓯˍ ꓟ ꓥ ꓡꓳ꓿
ꓕꓰ ꓟ ꓑꓶ. ꓓꓴ ꓮ ꓘꓶ. ꓙ ꓣꓳˍ ꓟ ꓤ ꓠꓱ ꓤ ꓕꓲ ꓣꓳ ꓔꓯ ꓠꓴ ꓪ ꓟꓳꓻ ꓟꓽ ꓟꓵ ꓕꓽ ꓬꓰ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓕꓱ ꓡꓱ ꓐꓯ ꓔˍ ꓡꓳ꓿ ꓤ ꓟꓳ꓾ ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓔꓯ ꓠꓴ ꓪ ꓟꓳꓻ ꓟꓽ ꓟꓵ ꓕꓽ ꓬꓰ꓿ ꓮ ꓡꓲꓳ ꓐꓯˍ ꓠꓬ ꓥꓪ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ ꓬꓲ ꓪ ꓔꓯ ꓔ, ꓙ ꓢꓴ ꓟꓴ ꓗꓪ ꓝꓲ ꓓꓴ ꓠꓬ ꓮ ꓕꓯ ꓥˍ ꓟꓲ ꓟꓴ ꓗꓪ ꓗꓪ ꓔꓬ ꓟ ꓐ, ꓐ ꓬꓲ ꓒꓬꓱꓽ ꓔꓯ ꓟꓳˍ ꓡꓳ꓾ ꓐꓰ ꓐꓯˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓤ ꓠꓱ ꓤ ꓕꓲ ꓣꓳ ꓔꓯ ꓟꓳꓻ ꓟꓽ ꓟꓵ ꓬꓰ ꓟꓽ ꓓꓻ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓤ ꓠꓱ ꓤ ꓕꓲ ꓣꓳ ꓘꓴˍ ꓡꓰ꓾ ꓥ ꓠꓬ꓾ ꓡ ꓞꓳ ꓕꓲ ꓣꓳ ꓘꓴ ꓡꓰ ꓔꓯ ꓠꓬ ꓟꓴ ꓗꓪ ꓝꓲ ꓓꓴ ꓙꓳˍ ꓡꓳ꓿ ꓠꓬꓲ. ꓠꓬꓲ ꓠꓴ ꓐꓰ ꓥꓪ꓾ ꓮ ꓙꓵꓽ ꓔꓯ ꓟꓴ ꓗꓪ ꓝꓲ ꓓꓴ ꓕꓲ ꓣꓳ ꓕꓲ ꓣꓳ ꓐꓰ ꓪꓴ‐ꓢ ꓡꓰ ꓝꓲ ꓩꓴ ꓔ ꓟ ꓥ ꓡꓳ꓿ ꓕꓱ ꓟ ꓔꓯ ꓠꓬ “ꓡꓳ. ꓙ ꓔꓬ ꓟ ꓟꓴꓽ ꓗꓪ ꓝꓲ ꓓꓴ” ꓐꓰ ꓣꓳ ꓕꓰ ꓡꓰ ꓐꓯ ꓔꓬ ꓟ ꓥ ꓡꓳ꓿ ꓣꓳ ꓪꓽ ꓘꓴ ꓘꓶꓽ ꓗꓪ ꓥˍ ꓟꓲ ꓥꓪ ꓔꓯ ꓡꓳ. ꓙ ꓔꓬ ꓟ ꓟꓴ ꓗꓪ ꓝꓲ ꓓꓴ꓾ ꓐꓯ ꓢꓲ ꓣꓳ ꓪꓽ ꓘꓴ ꓘꓶ ꓙꓳˍ ꓟ ꓥꓳ꓿
ꓕꓱ ꓟ ꓠꓬ “ꓥꓪ ꓔꓯ ꓡꓳ. ꓙ ꓔꓬ ꓟ ꓟꓴ ꓗꓪ ꓝꓲ ꓓꓴꓳ꓾ ꓐ, ꓐ ꓪꓴ‐ꓢ ꓡꓰ ꓥꓪ ꓔꓯ ꓠꓬ ꓡꓯ ꓒꓯ, ꓠꓯꓸꓼ ꓗꓪ ꓡꓯꓼ ꓙꓱ ꓔ ꓡꓳ꓿ ꓥꓪ ꓔꓯ ꓕꓲ ꓠꓬꓲ ꓕꓲ ꓦꓬ ꓡꓱꓸꓼ ꓡꓳ. ꓙ ꓖꓶ ꓢꓲ ꓥꓪ ꓔꓯ ꓠꓬꓲ ꓙ ꓖꓶ ꓡꓯ” ꓐꓰ ꓪꓽ ꓘꓴ ꓘꓶ ꓣꓳ ꓔꓯ ꓙꓳˍ ꓡꓳ꓿ ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓥˍ ꓟꓲ ꓟꓽ ꓡꓳ ꓒꓰ,꓿ ꓣꓳ ꓕꓲ ꓣꓳ ꓔꓵꓸꓼ ꓠꓲ, ꓟ ꓫ. ꓔꓬˍ ꓡ꓾ ꓣꓳ ꓕꓲ ꓣꓳ ꓔꓵꓸꓼ ꓮꓽ ꓟˍ ꓟꓲ ꓟꓽ ꓟꓳꓻ ꓐꓰ ꓠꓲ, ꓟ ꓙ ꓣꓳ ꓔꓬˍ ꓡ꓾ ꓠꓲ, ꓟ ꓫ. ꓔꓬ ꓡ꓿ ꓕꓽ ꓙꓳ꓿ ꓮ ꓫꓵꓽ ꓪꓴ. ꓠꓬꓲ ꓥ ꓡ꓿ ꓣꓳ ꓔꓯ ꓡꓳ. ꓙ ꓔꓬ ꓟ ꓟꓴ ꓗꓪ ꓝꓲ ꓓꓴ ꓠꓬ ꓣꓳ ꓐꓰ ꓕꓲ ꓡꓰ, ꓔꓬ ꓡꓳ꓿ ꓬꓲ ꓠꓬ ꓐ, ꓐ ꓪꓴ‐ꓢ ꓒꓬꓱꓽ ꓔꓯ ꓟꓳꓻ ꓢꓲ ꓠꓬꓲ ꓣꓳ ꓔꓯ ꓠꓬꓲ ꓙ ꓡꓳ. ꓙ ꓔꓬ ꓟ ꓥꓳ꓿
