ꓢꓲ ꓫꓬ ꓑ ꓑ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓢꓲ ꓒ ꓬꓰ-ꓢꓴ ꓖꓳ ꓟ ꓘꓴ ꓠꓯꓼ ꓗꓪ ꓔꓬ ꓡꓳ꓾ ꓐꓰ ꓙꓵꓻ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓥꓪ ꓢꓲ ꓓꓳ ꓥꓪ ꓧꓪ ꓜ ꓐꓰ ꓐꓯ ꓔ ꓡꓳ= ꓖꓳ ꓟ ꓡꓰ ꓐꓰ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓔꓯ ꓜ ꓔꓬ ꓓꓳ ꓔꓬ ꓡꓳ= ꓟꓲ-ꓢ ꓐꓯ_ ꓟ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴ ꓗꓪ ꓟꓽ ꓓ ꓣꓳꓸ ꓚꓵ ꓓꓰ ꓡꓰ_ ꓟ꓾ ꓒꓵꓽ ꓓꓰ ꓡꓰ_ ꓟ ꓥ ꓡꓳ= ꓮ ꓫꓵ ꓑꓶ ꓓꓴ ꓐꓯ ꓠꓬ ꓖꓳ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓢꓲ ꓬꓲ ꓧꓪ ꓜ ꓟ ꓑꓶ ꓓꓴ ꓥ ꓡꓳ= ꓕꓱ ꓡꓱ ꓜ ꓟ ꓗꓪ ꓐꓰ ꓬꓲ ꓶꓼ ꓤ ꓫꓱꓹ ꓤ ꓠꓬ ꓬꓲ ꓪꓴꓸ ꓕꓲ ꓟ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓠꓲꓹ ꓕꓲ ꓪꓼ ꓗꓷ ꓡꓰ_ ꓟ ꓶꓼ ꓤ ꓫꓱꓹ ꓤ ꓟꓶ_ ꓡꓳ= ꓣꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓢꓲ ꓬꓲ ꓧꓪ ꓔꓯ ꓜ ꓓꓳ ꓗꓷ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓯꓼ ꓘꓴꓽ ꓗꓪ ꓓꓵꓽ ꓡ ꓢꓲ ꓠꓬꓲ ꓣꓳ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓓꓵꓽ ꓙꓰ ꓢꓲ ꓠꓬꓲ ꓕꓲ ꓠꓲꓹ ꓕꓲ ꓪ ꓗꓷ ꓡꓰ_ ꓡꓳ= ꓣꓳ ꓧꓪ ꓖꓳ ꓓꓱ ꓣꓳ ꓢꓲ ꓘꓴ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓢꓲ ꓓꓵ ꓡ ꓡꓳ=ꓠꓲꓽ ꓢ-ꓓꓯ ꓔꓯ ꓧꓪꓸ ꓡꓰ_ ꓟ꓾ ꓣꓱ ꓛꓰ ꓝꓮꓲ ꓢꓲ ꓒ ꓬꓰ-ꓢꓴ ꓔꓯ ꓒ ꓐꓲ ꓠꓲꓹ ꓠꓵꓻ ꓐ ꓡ ꓟ ꓣꓱ ꓛꓰ ꓟꓶ ꓡꓰ_ ꓡꓳ= ꓝꓮꓲ ꓠꓬꓲꓽ ꓫꓵ ꓕꓲ ꓫꓵ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓟ ꓗꓪ ꓐꓰ ꓣꓳ ꓝꓴꓲ ꓔꓯ ꓖꓽ ꓖꓶ ꓟꓶ_ ꓡꓳ= ꓢꓲ ꓒ ꓬꓰ-ꓢꓴ ꓣꓳ ꓠꓯꓼ ꓘꓴꓽ ꓗꓪ ꓓꓵ ꓡ ꓟ ꓗꓪ ꓐꓰ ꓣꓳ ꓠꓯꓼ ꓘꓴ ꓗꓪ ꓙꓳ_ ꓟ꓾ ꓣꓳ ꓬꓰ ꓛꓬ ꓗꓷ ꓟ ꓝꓴꓲ ꓣꓳ ꓢꓷꓸ ꓟ ꓟꓽ ꓢꓷꓸ ꓢꓷꓸ ꓬꓰ ꓛꓬ ꓗꓷ ꓟ ꓝꓴꓲ ꓮ ꓙꓵ ꓔꓯ ꓢꓲ ꓒ ꓬꓰ-ꓢꓴ ꓠꓬ ꓢꓲ ꓫꓬ ꓖꓶ_ ꓡꓳ= ꓮ ꓫꓵ ꓑꓶ ꓓꓴ ꓥ ꓡ꓾ ꓢꓲ ꓒ ꓬꓰ-ꓢꓴ ꓠꓬ ꓝꓴꓲ ꓮ ꓙꓵ ꓔꓯ ꓬꓲ ꓢꓲ ꓗꓪ ꓐꓰ ꓢꓲ ꓫꓬ ꓗꓷ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓧꓪ ꓖꓳ ꓓꓱ ꓠꓯꓼ ꓘꓴ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓢꓲ ꓬꓲ ꓧꓪ ꓔꓯ ꓣꓳ ꓜ ꓕꓯ ꓣꓳ ꓬꓰ ꓗꓷ ꓟ ꓛꓬ ꓗꓷ ꓟ ꓝꓴꓲ ꓮ ꓙꓵ ꓔꓯ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓢꓲ ꓗꓪ ꓐꓰ ꓢꓲ ꓫꓬ ꓖꓶ_ ꓡꓳ= ꓣꓳ ꓝꓴꓲ ꓪꓴ ꓪꓴ ꓣꓳ ꓣꓳ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓒꓵ ꓒꓵ ꓡꓰ ꓘꓳꓹ ꓣꓴ ꓕꓯ ꓣꓳ ꓖꓴꓲ ꓮ ꓙꓵ ꓔꓯ ꓬꓲ ꓡꓰ ꓖꓽ ꓖꓶ ꓖꓶ_ ꓡꓳ= ꓮ ꓡꓰ ꓔ ꓥ ꓐꓯ ꓠꓬ ꓝꓴꓲ ꓐꓰ ꓢꓲ ꓒ ꓬꓰ-ꓢꓴ ꓕꓲ ꓪꓼ ꓔꓬ ꓟꓽ ꓠ꓾ ꓠꓲꓽ ꓢ-ꓓꓯ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓕꓲ ꓪꓼ ꓔꓬ ꓟꓽ ꓠ꓾ ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓘꓳꓹ ꓣꓴ ꓟ ꓗꓪ ꓐꓰ ꓣꓳ ꓠꓯꓼ ꓘꓴ ꓗꓪ ꓙꓳ_ ꓟ ꓮ ꓙꓵ ꓠꓬ ꓒꓰꓼ ꓬꓰ_ ꓡꓳ= ꓟꓶꓽ ꓬꓰ_ ꓡꓳ= ꓣꓳ ꓠꓬ ꓢꓲ ꓫꓬ ꓡ ꓡꓳ= ꓝꓮꓲ ꓢꓽ ꓫꓵ ꓕꓲ ꓫꓵ ꓟ ꓠꓬ ꓣꓳ ꓠꓬ ꓘꓴ ꓜꓲꓼ ꓞꓳ ꓐꓰ ꓕꓲ ꓠꓲꓹ ꓕꓲ ꓪꓼ ꓗꓷ ꓡꓰ_ ꓡꓳ= ꓮ ꓫꓵ ꓑꓶ ꓓꓴ ꓥ ꓡ꓾ ꓣꓳ ꓘꓴ ꓜꓲꓼ ꓞꓳ ꓘꓴ ꓗꓪ ꓠꓬ ꓮ ꓗꓪ ꓥ ꓟꓲ ꓢꓲ ꓫꓬ ꓑ ꓑ ꓕꓱ ꓟ ꓕꓯ ꓘꓳꓹ ꓣꓴ ꓔꓬ ꓡꓳ= ꓐꓶ ꓓꓳ ꓗꓪ ꓐꓰ ꓐꓶ ꓓꓵ ꓗꓪ ꓛꓲ ꓕꓱ ꓡꓱ ꓢꓯꓼ ꓕꓵꓼ ꓔꓬ ꓟ ꓥ ꓡꓳ=ꓮ ꓗꓪ ꓥ ꓟꓲ ꓟꓲ-ꓢ ꓐꓯ_ ꓟ ꓙꓳ_ ꓡꓳ= ꓮ ꓗꓪ ꓥ ꓟꓲ ꓢꓲ ꓫꓬ ꓑ ꓑ ꓔꓯ ꓘꓳꓹ ꓣꓴ ꓔꓬ ꓡꓳ= ꓖꓳ ꓡꓱ ꓠꓬꓲ ꓣꓳ ꓕꓱ ꓟ ꓔꓯ ꓘꓳꓹ ꓣꓴ ꓕꓯ ꓘꓴ ꓜꓲꓼ ꓞꓳ ꓕꓲ ꓟ ꓡꓱꓼ ꓗꓪ ꓕꓲ ꓠꓲꓹ ꓕꓲ ꓪ ꓔꓬ ꓟꓶ_ ꓟ ꓣꓱ ꓛꓰ ꓝꓮꓲ ꓶꓼ ꓤ ꓫꓱꓹ ꓤ ꓒꓯꓹ ꓟꓶ_ ꓟ ꓤꓱ ꓛꓰ ꓟꓶ ꓡꓰ_ ꓡꓳ= ꓝꓮꓲ ꓢꓲ ꓫꓬ ꓑ ꓑ ꓘꓳꓹ ꓣꓴ_ ꓟ ꓗꓪ ꓐꓰ ꓫꓸ ꓢꓴ ꓟꓷꓼ ꓢꓴ ꓔꓯ ꓬꓰ ꓙ ꓝꓲ_ ꓟ ꓢꓯꓼ ꓪ ꓖꓶ_ ꓡꓳ= ꓮ ꓫꓵ ꓑꓶ ꓓꓴ ꓥ ꓡ꓾ ꓢꓲ ꓒ ꓬꓰ-ꓢꓴ ꓠꓬ ꓞꓳ ꓫꓸ ꓔꓯ ꓠꓲꓹ ꓠꓵꓻ ꓢꓴ ꓥ ꓡꓳ=ꓣꓳ ꓢꓲ ꓫꓬ ꓑ ꓑ ꓔꓯ ꓘꓳꓹ ꓣꓴ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓯꓼ ꓘꓴ ꓗꓪ ꓢꓲ-ꓫꓬ-ꓟ-ꓦ ꓢꓯꓼ ꓪ ꓗꓪ ꓐꓰ ꓞꓳ ꓫꓸ ꓔꓯ ꓬꓰ ꓙ ꓠꓹ ꓟ ꓣꓳ ꓔꓯ ꓕꓵꓼ ꓪ ꓖꓶ ꓡ ꓡꓳ= ꓣꓳ ꓔꓯ ꓙꓲ_ ꓟ ꓬꓰ ꓠꓹ ꓟ ꓢꓯꓼ ꓪ ꓖꓶ ꓡ ꓡꓳ= ꓝꓮꓲ ꓬꓲꓸ ꓟꓶꓽ ꓕꓲ ꓫꓵ ꓟ ꓠꓬ ꓢꓲ ꓫꓬ ꓑ ꓑ ꓔꓯ ꓘꓳꓹ ꓣꓴ ꓟ ꓗꓪ ꓐꓰ ꓣꓳ ꓮꓽ ꓟ ꓔꓯ ꓥ ꓟꓲ ꓠꓲꓹ ꓠꓵꓻ ꓐ ꓡ ꓟ ꓣꓱ ꓛꓰ ꓟꓶ ꓡꓰ_ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓮ ꓡꓰ ꓫꓵ ꓡ ꓞꓳ ꓮ ꓡꓰ ꓫꓵ ꓔꓯ ꓥ ꓟꓲ ꓠꓲꓹ ꓠꓵꓻ ꓟ ꓡꓰ ꓐꓰ ꓬꓲ ꓢꓲ ꓬꓲ ꓧꓪ ꓜ ꓢꓴ ꓠꓬ ꓮ ꓡꓰ ꓫꓵ ꓔꓯ ꓥ ꓟꓲ ꓠꓲꓹ ꓠꓵꓻ ꓐ ꓡ ꓟ ꓣꓱ ꓛꓰ ꓬꓲ ꓡꓰ ꓖꓶ ꓡ ꓡꓳ= ꓖꓳ ꓡꓱ ꓠꓬꓲ ꓢꓲ ꓫꓬ ꓑ ꓑ ꓔꓯ ꓮ ꓕꓯ ꓟꓲ ꓠꓲꓹ ꓪꓴꓽ ꓪꓴꓽ ꓡꓰ ꓘꓳꓹ ꓣꓴ ꓓꓴ ꓬꓰ ꓡꓯ꓾ ꓵ ꓖꓴ ꓟꓽ ꓓ ꓟ ꓶꓼ ꓤ ꓫꓱꓹ ꓤ ꓖꓶ ꓡ ꓡꓳ꓾
