ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓪꓴ. ꓓꓵ ꓓꓶ ꓗꓷ ꓢꓴ ꓪ ꓔꓲ. ꓩꓴ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓓꓳꓽ ꓔꓯ ꓑ ꓙꓽˍ ꓕꓯ ꓓꓵꓽ ꓙꓽ ꓟꓶˍ ꓡꓳ꓾ ꓙꓳꓺ ꓛꓱꓽ ꓠꓬꓲ ꓗꓷ ꓡꓰˍ ꓡꓰꓳ ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿ ꓟ. ꓟꓲꓽ ꓝꓲ. ꓠꓬ ꓡꓴ‐ꓘ ꓕꓳꓽ ꓶ 9ꓽ7‐9 ꓥꓳ꓿
ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓪꓴ. ꓓꓵ ꓔꓯ ꓓꓶ ꓗꓷ ꓢꓴ ꓪ ꓔꓲ. ꓩꓴ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓓꓳꓽ ꓑ ꓙꓽˍ ꓕꓯ ꓬꓲ ꓠꓬ ꓠꓲ, ꓟ ꓗꓪ ꓙꓳꓺ ꓛꓱꓽ ꓠꓬꓲ ꓗꓷ ꓡꓰꓳ꓿ ꓕꓱ ꓟ ꓠꓬ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓢꓯ. ꓬꓲꓼ ꓡ ꓫꓵꓽ ꓥ ꓡ꓿ ꓟꓽ ꓥ ꓠꓬ ꓮ ꓫꓵꓽ ꓥ ꓡ ꓐꓰ ꓬꓲ ꓠꓲ, ꓟ ꓠꓯꓸꓼ ꓗꓪ ꓙꓳꓺ ꓛꓱꓽ ꓠꓬꓲ ꓓꓵꓽ ꓙ ꓟꓶ ꓔꓬ ꓡꓳ꓿ ꓪ ꓔꓲ. ꓩꓴ‐ꓡꓲ ꓡꓰ ꓕꓱ ꓡꓱ ꓐꓯˍ ꓡꓳ꓿ ꓬꓳ‐ꓦ ꓔꓯ ꓠꓽ ꓥꓪ ꓡꓰ ꓪꓴ. ꓓꓵ ꓓꓶ ꓗꓷꓳ꓿ ꓖꓳ ꓡꓱ ꓢꓲ ꓥꓪ ꓑ ꓙꓽˍ ꓟ ꓕꓱ ꓟꓬ ꓫꓵꓽ ꓬꓰ ꓢꓴ ꓕꓱ ꓕꓲ ꓣꓳ ꓠꓬ ꓮꓽ ꓟ ꓥ ꓡꓳ꓾ ꓐꓯ ꓢꓲ ꓬꓲ ꓔꓯ ꓟꓳꓻ ꓠ, ꓟ ꓬꓲ ꓚꓱ, ꓧꓪˍ ꓡꓳ꓾ ꓐꓯ ꓟ ꓟ. ꓟꓲꓽ ꓝꓲ. ꓥ ꓡꓳ꓿ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓢꓷ. ꓡꓰ ꓓꓴ ꓕꓲ ꓙꓰꓽ ꓠꓬ ꓮ ꓫꓵꓽ ꓥ ꓡ ꓐꓯˍ ꓠꓬ꓾ ꓮ ꓡꓲ ꓘꓶ. ꓛꓲ ꓪꓽ ꓠꓬꓲˍ ꓟ ꓪ ꓔꓲ. ꓥˍ ꓟꓲ꓾ ꓮ ꓡꓲ ꓘꓶ ꓛꓲ ꓓꓻˍ ꓟ ꓞꓳ ꓤ ꓥˍ ꓟꓲ ꓡ ꓞꓳ ꓔꓯ ꓢꓰꓼ ꓗꓷˍ ꓕꓯ ꓠꓽ ꓢꓲ ꓒ ꓬꓰ‐ꓢꓴ ꓡˍ ꓟ ꓖꓳ ꓕꓲ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓛꓲ ꓔꓲ ꓗꓪ ꓟꓳꓼ ꓡꓰ ꓪˍ ꓥꓳ꓿ ꓓꓵꓽ ꓙꓽ ꓟꓬꓽ ꓠꓬꓲ ꓙꓳꓺ ꓛꓱꓽ ꓠꓬꓲ ꓐꓰ ꓢꓲ ꓒ ꓬꓰ‐ꓢꓴ ꓗꓪ ꓟꓳꓼ ꓡꓰ ꓠ ꓔˍ ꓟ ꓥꓳ꓾ ꓐꓰ ꓐꓯˍ ꓟ ꓬꓲ ꓢꓷ. ꓡꓰ ꓓꓴ ꓥ ꓡꓳ꓿
