ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓛꓳꓽ ꓒꓯꓹ ꓐꓴ ꓔꓯ ꓬꓰ ꓠ ꓔ ꓟ ꓟꓬꓱꓽ ꓙꓵꓽ ꓪ ꓠꓬꓲꓽ ꓟ ꓖꓶ_ ꓡꓳ= ꓪꓴ-ꓢ ꓗꓴꓷꓼ ꓐꓯ ꓒꓬꓱ ꓙꓰ ꓠꓹ ꓟ꓾ ꓟꓸ ꓟꓲꓽ ꓚꓺ ꓠꓹ ꓟ ꓐꓰ ꓠꓻ ꓫꓬꓹ ꓖꓶ ꓠꓹ ꓟ ꓥ ꓡꓳ= ꓪꓴ-ꓢ ꓗꓴꓷꓼ ꓐꓯ ꓒꓬꓱ ꓠꓹ ꓟ ꓠꓬ ꓦ ꓕꓲ ꓒꓳꓹ ꓐꓱ ꓶ ꓥ ꓢꓲ ꓠꓬꓲ ꓠꓻ ꓫꓬꓹ ꓖꓶ ꓠꓹ ꓟ ꓠꓬ ꓦ ꓐꓱ ꓶ ꓠꓲꓽ ꓖꓼ ꓓꓳ ꓠꓹ ꓟ ꓐꓰ ꓧꓪ ꓖꓳ ꓓꓱ ꓐꓱ ꓶ ꓥ ꓟꓲ ꓐ_ ꓡꓳ= ꓕꓱ ꓙꓵꓽ ꓪ ꓔꓯ ꓬꓰ ꓕꓯ ꓡ ꓞꓳ ꓐꓴ ꓔꓳꓹ ꓡ ꓟ ꓠꓬꓲꓽ ꓫꓵ ꓙꓳ_ ꓡꓳ= ꓘꓳꓹ ꓣꓴ ꓟ ꓐꓰ ꓟꓽ ꓘꓳꓹ ꓣꓴ ꓟ ꓥ ꓡꓳ= ꓘꓳꓹ ꓣꓴ ꓢꓴ ꓠꓬ ꓠꓲꓹ ꓡꓱ ꓡꓱ ꓐꓰ ꓘꓳꓹ ꓣꓴ ꓡ ꓥꓳ= ꓖꓳ ꓟ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓡꓰ ꓮ ꓫꓵ ꓥ ꓟꓲ ꓟꓽ ꓔꓯꓹ ꓙꓰ ꓠꓹ ꓟ ꓐꓯ ꓔ ꓟ ꓥ ꓡꓳ= ꓟꓽ ꓘꓳꓹ ꓣꓴ ꓡ ꓢꓴ ꓐꓰ ꓟꓳ ꓠꓬ ꓛꓲ ꓒꓯꓹ ꓗꓪ ꓟ ꓠꓱꓸ ꓦꓱꓽ ꓧꓶꓽ ꓟꓰꓸ ꓞꓰ ꓩꓴ ꓗꓷ ꓐꓰ ꓐꓯ ꓔ ꓟ ꓥ ꓡꓳ=
ꓥꓪ ꓬꓰ ꓠꓬ ꓮ ꓙꓵ ꓒꓬꓱꓼ ꓡ ꓥꓳ꓾ ꓧꓪꓸ ꓡꓰ ꓡ ꓥꓳ꓾ ꓐꓰ ꓓꓵꓽ ꓙ ꓔ ꓫꓵ ꓥ ꓟꓲ ꓔꓬ ꓢꓴ ꓙꓳ ꓡꓳ꓾ ꓕꓱ ꓟ ꓔꓯ ꓣꓳ ꓙ ꓟꓳ ꓠ ꓔ ꓫꓵ ꓥ ꓡꓳ=ꓣꓳ ꓙꓵꓽ ꓪ ꓠꓬ ꓢꓲ ꓒꓽ ꓡꓰ ꓝꓲ ꓔ ꓟ ꓙꓲ ꓢꓴ ꓢꓲ ꓤ ꓤꓶꓻ ꓗꓪ ꓐꓰ ꓢꓯꓸ ꓔꓬ ꓠꓹ ꓟ ꓥ ꓡꓳ= ꓣꓳ ꓗꓳ ꓡꓳ ꓗꓪ ꓐꓰ ꓘꓳꓹ ꓣꓴ ꓡ ꓟ꓾ ꓟꓽ ꓘꓳꓹ ꓣꓴ ꓡ ꓟ ꓠꓬ ꓬꓲ ꓪ ꓠꓲꓹ ꓡꓶꓽ ꓥ ꓡꓳ= ꓧꓪꓸ ꓡꓰ ꓟ꓾ ꓞꓳꓸ ꓡꓰ ꓟ ꓠꓬ ꓪꓴ-ꓢ ꓠꓲꓹ ꓡꓶꓽ ꓬꓲ ꓡꓰ ꓙ ꓖꓶ ꓡ ꓟ ꓥ ꓡꓳ= ꓣꓳ ꓠꓬ ꓚꓲ ꓛꓬ ꓬꓰ ꓠ ꓔ ꓟ ꓟꓬꓱꓽ ꓙꓵ ꓪ ꓔꓯ ꓣꓳ ꓢꓯꓼ ꓕꓵꓼ ꓬꓰ ꓠꓹ ꓟ ꓣꓳ ꓚꓵ ꓟ ꓥ ꓡꓳ=
