ꓡꓴ‐ꓘ꓿8ꓽ19‐21
ꓠꓬꓲ. ꓠꓬꓲ ꓪꓴ‐ꓢ ꓐꓯ ꓘꓶ ꓗꓪ ꓐꓰ ꓣꓳ ꓮ ꓙꓵꓽ ꓔꓯ ꓟ. ꓖꓶ ꓡ ꓔꓬ ꓟ ꓠꓬ꓾ ꓪꓴ‐ꓢ ꓤ ꓠꓱ ꓚꓵ ꓒꓬꓱꓼ ꓡꓰ ꓠ, ꓟ꓾ ꓥ ꓡꓳ꓿ ꓔꓱ, ꓚꓵˍ ꓟ ꓤ꓾ ꓮ. ꓟꓲꓽ ꓠꓬ ꓒꓵꓽˍ ꓟ ꓪꓴ‐ꓢ ꓐꓯ ꓘꓶ ꓔꓯ ꓠꓲ, ꓟ ꓗꓪ ꓗꓶ ꓔ ꓢꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓢꓴ ꓐꓴ ꓥ ꓡꓳ꓿ ꓫꓵꓺ ꓚꓵ ꓚꓵ ꓥ ꓡ ꓟꓽ ꓥ ꓡ ꓐꓯˍ ꓟ ꓔꓯ ꓮ ꓔꓳ. ꓡꓰ ꓛꓴꓻ ꓢꓲ ꓫꓵꓽ ꓠꓬꓲ ꓪˍ ꓟ ꓡꓰ ꓐꓰ꓾ ꓪꓴ‐ꓢ ꓤ ꓠꓱ ꓚꓵ ꓚꓵ ꓥ ꓟꓽ ꓥ ꓐꓯˍ ꓟ ꓔꓯ ꓠꓬ꓾ ꓬꓲ ꓮ ꓡꓲ ꓟꓬ ꓛꓲ ꓢꓯꓼ ꓕꓵꓼˍ ꓡ꓾ ꓟꓽ ꓢꓯꓼ ꓕꓵꓼ ꓡ꓾ ꓐꓯˍ ꓟ ꓗꓪ ꓐꓰ ꓔꓯꓺˍ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓡꓰ ꓬꓲ ꓢꓯꓼ ꓟꓬ ꓔꓯ ꓟꓽ ꓗ. ꓐꓽ ꓐꓽ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓢꓯꓼ ꓟꓬ ꓖꓶ ꓗꓷ ꓟ ꓗꓪ ꓐꓰ ꓪꓴ‐ꓢ ꓬꓲ ꓕꓲ ꓣꓳˍ ꓟ ꓤ ꓔꓲ. ꓚꓵ ꓥ ꓟ ꓔꓯ ꓟ. ꓖꓶ ꓗꓷꓳ꓿ ꓣꓳ ꓒꓵꓽ ꓒ ꓐꓴ ꓥ ꓟ ꓮ‐ꓐ‐ꓡ‐ꓦ꓾ ꓬꓲ‐ꓢ꓾ ꓬ‐ꓗꓴ ꓐꓴ ꓥˍ ꓟꓲ ꓖꓳ ꓟ ꓡꓰ ꓐꓰ ꓫ. ꓙꓵ ꓟꓶ ꓙꓵ ꓓꓴ ꓮ ꓙꓵꓽ ꓔꓯ ꓗꓳ. ꓘꓳ ꓗꓷ ꓕꓯ ꓢꓲ. ꓡꓰꓽ ꓪꓴ‐ꓢ ꓬꓲ ꓔꓱ, ꓚꓵˍ ꓟ ꓛꓳꓽ ꓒꓯ,꓾ ꓪꓴ‐ꓢ ꓬꓲ ꓫꓵꓽ ꓬꓲ ꓧꓪ ꓒꓬꓱꓼ ꓡ ꓗꓷꓳ꓿
ꓢꓲꓽ ꓫꓬ ꓕꓳꓽ ꓶ ꓬꓲ ꓪꓴ. ꓕꓲ ꓕꓱ ꓥ ꓟ ꓱ‐ꓢꓶ‐ꓡ ꓕꓳꓽ ꓶ 6 ꓕꓱ ꓗꓪ꓾ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓠꓬ ꓐꓶꓽ ꓗꓴꓷꓼ ꓗꓪ ꓮ ꓟꓬ, ꓘꓳꓼ ꓚꓳ ꓑ. ꓬꓰ ꓔꓬ ꓪˍ ꓥ ꓟꓲ꓾ ꓪꓴ‐ꓢ ꓐꓯ ꓘꓶ ꓔꓯ ꓬꓲ ꓪ ꓠꓲ, ꓟ ꓗꓪ ꓗꓶ ꓔ ꓢꓲ꓾ ꓮ ꓕꓯ ꓟꓲ ꓛꓳ ꓫꓱꓽ ꓔꓬ ꓟ ꓑꓶ. ꓓꓴ ꓡꓳ, ꓬꓰˍ ꓕꓯ ꓬꓲ ꓪ ꓠꓬ ꓘ‐ꓠ ꓟꓵꓽ ꓗꓪ ꓬꓲꓼ ꓙꓰ ꓠ, ꓟ ꓙꓵꓽ ꓪ ꓟꓶ ꓡꓰ ꓢꓲ꓾ ꓢꓲꓽ ꓫꓬ ꓦꓲ ꓔꓯ ꓥˍ ꓟꓲ ꓝꓮꓲ ꓕꓲ ꓧꓪ, ꓫꓬ, ꓐ ꓡ ꓗꓷꓳ꓿ ꓖꓳ ꓟˍ ꓡꓰ ꓐꓰ ꓣꓳ ꓥˍ ꓟꓲ ꓚꓲ. ꓛꓬ ꓤꓶꓻ ꓗꓪ ꓮ ꓡꓲ ꓒꓬꓱꓼ ꓔꓬ ꓥˍ ꓟꓲ꓾ ꓫ. ꓥˍ ꓟꓲ ꓢꓻˍ ꓥ ꓟꓲ꓾ ꓮ ꓕꓯ ꓟꓲ ꓕꓶ ꓞ, ꓔꓬ ꓟ ꓪꓴ‐ꓢ ꓐꓯ ꓘꓶꓽ ꓔꓯ ꓠꓲ, ꓟ ꓗꓪ ꓥꓳ ꓞ, ꓝꓲ ꓢꓲ ꓛꓳꓻ ꓫꓱꓽ ꓠ ꓗ, ꓡꓳ꓿ ꓖꓳ ꓡꓱ ꓬꓰˍ ꓕꓯ ꓣꓳ ꓠꓬ ꓪꓴ‐ꓢ ꓤ ꓠꓱ ꓚꓵ ꓒꓬꓱꓼ ꓡˍ ꓥꓳ꓿
ꓪꓴ‐ꓢ ꓐꓯ ꓘꓶꓽ ꓔꓯ ꓠꓲ, ꓟ ꓗꓪ ꓥꓳ ꓞ, ꓝꓲ ꓠ, ꓟ ꓮ ꓡꓲ ꓫꓵꓽ ꓠꓬ ꓣꓳ ꓐꓱ ꓶ ꓗꓽ ꓕ. ꓓꓴ ꓒꓬꓱꓼ ꓡꓰ ꓝꓲˍ ꓡ꓿ ꓖꓴꓽ ꓙꓴꓽ ꓥ ꓡ꓾ ꓟꓲ ꓠꓯ ꓢꓷ. ꓠꓲ, ꓥ ꓡ꓾ ꓟꓲ ꓠꓯ ꓫꓵꓽ ꓪꓴ ꓥ ꓡ꓾ ꓗꓴꓷꓼ ꓫꓵꓽ ꓪꓴ ꓥ ꓡ꓾ ꓖꓳ ꓡꓱ ꓟꓽ ꓥ ꓠꓬ ꓟꓲ ꓠꓯ ꓙꓵꓽ ꓗ ꓐꓴ ꓥ ꓡ꓿ ꓙꓳˍ ꓟ ꓮ ꓙꓵꓽ ꓕꓯꓽ ꓢꓲ ꓪꓴꓽ ꓓꓰˍ ꓟ ꓪꓴ‐ꓢ ꓙꓳ ꓔꓬˍ ꓡꓳ ꓟꓽ ꓥ ꓡ꓿ ꓖꓳ ꓟ ꓑꓶ. ꓓꓴ ꓪꓴ‐ꓢ ꓐꓯ ꓘꓶꓽ ꓔꓯ ꓧꓶ. ꓕꓯ ꓠꓲ, ꓟ ꓗꓪ ꓧꓳꓽ ꓔ ꓡꓯ꓿ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓠꓬ ꓟꓽ ꓕꓶ ꓞ, ꓟ ꓡꓰ ꓐꓰ꓾ ꓝꓮꓲ ꓕꓲ ꓤꓶꓻ ꓗꓪ ꓥˍ ꓟꓲ ꓣꓴ ꓔꓯ, ꓙꓰ ꓟꓽ ꓐ ꓡ꓿ ꓪꓴ‐ꓢ ꓐꓯ ꓘꓶˍ ꓡꓰꓽ ꓕꓲ ꓞꓲꓼ ꓕꓲ ꓑ ꓕꓶ ꓞ, ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓪꓴ‐ꓢ ꓐꓯ ꓘꓶ ꓔꓯ ꓠꓲ, ꓟ ꓗꓪ ꓗꓶ ꓔ ꓢꓲ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓫꓱꓽ ꓣꓱꓽ ꓬꓰˍ ꓟ ꓗꓪ ꓐꓰ ꓪꓴ‐ꓢ ꓤ ꓠꓱ ꓚꓵ ꓒꓬꓱꓼ ꓡ ꓠ, ꓟ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓪ ꓜꓲ ꓢꓯꓼ ꓕꓵꓼ ꓢꓲ ꓛꓳ ꓫꓱꓽ ꓣꓱꓽ ꓬꓰ ꓙꓰ ꓡꓯ꓿
