ꓣꓳ ꓮ ꓙꓵ ꓠꓯꓼ ꓗꓪ ꓠꓬꓲ ꓟꓳ ꓓꓴ ꓟꓽ ꓙꓳ ꓟ ꓠꓯ ꓞꓲꓹ ꓟ ꓙꓵꓹ ꓕꓱ ꓡꓱ ꓔꓳꓹ ꓜꓳ ꓠꓬꓲ ꓗꓴꓸ_ ꓥꓳ= ꓕꓱ ꓡꓱ ꓙꓵꓹ ꓕꓯ ꓡ ꓞꓳ ꓐꓴ ꓠꓯꓼ ꓗꓪ ꓢꓲꓺ ꓣꓴ ꓓꓴ ꓬꓲ ꓚꓱꓹ 3 ꓟ ꓙꓳ_ ꓡꓳ= ꓬꓲꓸ ꓪꓴꓸ ꓕꓲ ꓟ ꓟ ꓠꓬ꓾ ꓮ ꓫꓵ ꓑꓶ ꓓꓴ ꓠꓯ ꓞꓲꓹ ꓡ ꓐꓰ ꓠꓲꓹ ꓦꓶ_ ꓟ꓾ ꓕꓱ ꓡꓱ ꓞꓳ ꓫꓵ ꓠꓬ ꓞꓳ ꓙꓲꓽ ꓥ ꓡꓳ꓾ ꓝꓮꓲ ꓠꓬꓲ ꓟ ꓕꓲ ꓟ ꓟ ꓠꓬ꓾ ꓠꓬꓲ ꓟꓳ ꓓꓴ ꓪ ꓡ ꓠ ꓗꓪ ꓛꓲ ꓮ ꓫꓵ ꓡꓲ ꓟꓽ ꓬꓰ ꓬꓰ ꓡꓳꓸ ꓔꓬ ꓟ꓾ ꓕꓱ ꓡꓱ ꓞꓳ ꓫꓵ ꓠꓬ ꓞꓳ ꓒꓵ ꓥ ꓡꓳ꓾ ꓬꓲꓸ ꓟꓶꓽ ꓢ ꓟ ꓕꓲ ꓟ ꓟ ꓠꓬ꓾ ꓠꓬꓲ ꓟꓳ ꓓꓴ ꓪ ꓟꓶ ꓠꓹ ꓟ ꓚꓲ ꓛꓬ ꓔꓱꓹ ꓚꓲ ꓛꓬ ꓢꓯꓼ ꓕꓵꓼ_ ꓟ꓾ ꓥ ꓡꓳ꓾ ꓙꓲ ꓢꓴ ꓢꓲ ꓤ ꓐꓴ ꓚꓲ ꓛꓬ ꓠꓬ ꓠꓬꓲ ꓟꓳ ꓓꓴ ꓔꓯ ꓖꓶ ꓢꓴ ꓒꓬꓱꓼ ꓡꓰ ꓠ ꓔ ꓡꓳ= ꓚꓲ ꓛꓬ ꓠꓬ ꓠꓬꓲ ꓟꓳ ꓓꓴ ꓡꓯ ꓖꓶ ꓠꓹ ꓟ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓬꓺ ꓡꓰ ꓘꓴ ꓐ ꓡ ꓠ ꓔ ꓡꓳ= ꓖꓳ ꓕꓱ ꓢꓲ ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓠꓬꓲ ꓟꓳ ꓓꓴ ꓖꓶ ꓐ ꓡ ꓥꓳ=
ꓠꓬꓲꓸ ꓠꓬꓲ ꓟ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ-ꓢꓴ ꓡꓰ “ꓮꓽ ꓟ ꓥ ꓟꓲ ꓟꓬ ꓡꓴꓻ ꓟꓬ ꓗꓷ ꓠꓬ꓾ ꓡꓴꓻ ꓕꓲ ꓫꓵꓽ ꓡꓰ ꓝꓴꓸ ꓔ꓾ ꓥ ꓠꓬ ꓘꓹ ꓛꓽ ꓠꓯꓸ ꓘꓪ ꓗꓶ ꓔ ꓢꓴ ꓟꓽ ꓙꓳ= ꓦꓲ ꓗꓪ ꓓꓵꓽ ꓡ ꓢꓴ ꓔꓯ ꓠꓬꓲ ꓟꓳ ꓝꓲ ꓠꓹ ꓟ ꓟꓬ ꓡꓴ ꓕꓲ ꓗꓪ ꓗꓶ ꓔ ꓠ ꓗꓹ ꓟ ꓥꓳ=” ꓐꓰ ꓬꓲ ꓔꓯ ꓥꓳꓽ ꓐꓯ ꓔ ꓡꓳ=
ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓡꓰ ꓐꓰ ꓟꓬ ꓡꓴꓻ ꓔꓯ ꓡꓴꓻ ꓕꓲ ꓫꓵ ꓡꓰ ꓝꓴꓸ ꓔ ꓟ ꓡꓰ ꓟꓽ ꓬꓰ ꓬꓰ꓾ ꓟꓬ ꓡꓴ ꓕꓲ ꓗꓪ ꓗꓶ ꓔ ꓟ ꓡꓰ ꓐꓰ ꓣꓳ ꓙꓵꓻ ꓠꓲꓹ ꓔꓯ ꓥ ꓟꓲ ꓕꓱ ꓡꓱ ꓑꓲꓸ ꓞꓹ ꓓꓴ ꓟꓽ ꓬꓰ ꓬꓰ ꓡ ꓞꓳ ꓮ ꓟꓬꓹ ꓔꓯ ꓢꓷꓸ ꓙ ꓟꓳ ꓙ ꓢꓲ ꓠꓬꓲ ꓟꓳ ꓓꓴ ꓡꓯ ꓖꓶ ꓐ ꓡ ꓠꓹ ꓟ ꓙꓵ ꓙꓳ_ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓠꓬ ꓣꓳ ꓠꓲꓹ ꓟ ꓘꓴꓽ ꓗꓪ ꓟꓽ ꓙꓲ_ ꓟ꓾ ꓮ ꓙꓵ ꓔꓯ ꓣꓴ ꓡꓳ ꓗꓷ ꓡ ꓟ ꓥꓳ= ꓕꓱ ꓠꓬꓲ ꓟꓳ ꓓꓴ ꓔꓯ ꓚꓲ ꓛꓬ ꓡꓰ ꓘꓳꓹ ꓣꓴ ꓓꓵ ꓙ ꓟ ꓡꓰ ꓟꓽ ꓥ꓾ ꓠꓱꓸ ꓐꓯꓼ ꓢꓴ ꓔꓯ ꓥ ꓟꓳ ꓢꓷꓸ ꓙ ꓟꓳ ꓙ ꓠꓹ ꓟ ꓥ ꓡꓳ=
“ꓙꓳ ꓢꓴ ꓔꓯ ꓠꓽ ꓡꓴꓽ ꓖꓶ ꓡ_ ꓢꓰꓽ ꓥꓳ= ꓟꓽ ꓙꓳ ꓢꓴ ꓔꓯ ꓠꓽ ꓬꓲ ꓙꓳ_ ꓡꓳ ꓓꓵꓽ ꓙ ꓔ ꓟ_ ꓟꓲ ꓬꓲ ꓔꓯ_ ꓐꓰ ꓣꓴ ꓔꓯꓹ ꓙꓰ_ ꓥꓳ꓾” ꓐꓰ ꓠꓬꓲ ꓠꓬꓲ ꓟ ꓢꓲ ꓫꓬ ꓗꓪ ꓐꓰ ꓢꓷꓸ ꓡꓰ ꓝꓲ_ ꓟ ꓥ ꓡꓳ= ꓪꓴ-ꓢ ꓡꓰ ꓖꓶ ꓔ ꓟ ꓣꓱ ꓛꓰ ꓠꓬꓲ ꓟꓳ ꓓꓴ꓾ ꓢꓲ ꓡꓲꓹ ꓟ꓾ ꓠꓵꓻ ꓠꓲꓹ꓾ ꓙꓵꓻ ꓠꓲꓹ ꓔꓯ ꓣꓳ ꓤꓶꓻ ꓗꓪ ꓝꓮꓲ ꓟꓽ ꓣꓱ ꓠꓬ ꓟꓽ ꓖꓶ ꓠꓬ ꓬꓲꓸ ꓟꓶꓽ ꓗꓪ ꓠꓬ ꓟꓶꓽ ꓡꓰ ꓡ ꓥꓳ꓾ ꓣꓴ ꓔꓯꓹ ꓙꓰ ꓟ ꓟꓶ ꓡ ꓥꓳ ꓐꓰ ꓢꓯꓼ ꓖꓶ ꓩꓴ ꓡ ꓥꓳ=
