ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓱ. ꓐꓯ ꓢꓴ ꓔꓳ, ꓜꓳꓽ ꓔꓬ ꓟ ꓫ. ꓙꓵ ꓓꓴ ꓔꓯ ꓣꓳ ꓠꓬ ꓮ ꓡꓲ ꓐꓰ ꓬꓰ ꓙ ꓖꓶ ꓠꓯ, ꓡ?
ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔˍ ꓟ ꓠꓬ꓾ ꓡ ꓞꓳ ꓕꓲ ꓣꓳ ꓣꓳ꓾ ꓥ ꓠꓬ꓾ ꓞꓳ ꓜꓴꓻ ꓔꓯ ꓟꓳꓻˍ ꓕ ꓑꓳ. ꓬꓰ‐ꓢꓴ ꓠꓬ “ꓮ ꓘꓶ. ꓫꓱ. ꓤˍ ꓡꓳ” ꓐꓰ ꓐꓯ ꓔˍ ꓡꓳ꓿
ꓠꓬꓲ. ꓠꓬꓲ ꓣꓳ ꓣꓱꓽ ꓔꓬ ꓟ Compassion ꓐꓰ ꓐꓯˍ ꓟ ꓫꓱ. ꓤˍ ꓟ꓾ ꓠꓲ, ꓙꓽ ꓟꓬ ꓗꓳˍ ꓟ꓾ ꓐꓯˍ ꓟ ꓐꓯ ꓘꓶꓽ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓫꓱ. ꓤ ꓠꓲ, ꓔꓯ ꓐꓲ ꓐꓲ ꓜꓲꓼ ꓜꓲꓼ ꓖꓴ ꓟꓳ. ꓖꓶ ꓟꓽ ꓐ ꓡ꓿ ꓐꓯ ꓘꓶꓽ ꓕꓱ ꓟ ꓠꓬ ꓠꓲ, ꓟ ꓠꓻ ꓢꓲ ꓠꓲ, ꓫ. ꓟꓬ ꓫ. ꓔꓬ ꓟ ꓐꓰ ꓬꓲ ꓒꓬꓱꓽ ꓗꓪ ꓛꓲ ꓬꓲ ꓠꓲ, ꓫˍ ꓟ ꓓꓳ ꓡˍ ꓟ ꓔꓯ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓐꓰ ꓢꓷ. ꓡꓰ ꓢꓲ ꓠꓬꓲ ꓖꓳ ꓓꓱꓽ ꓡꓰ ꓟ. ꓖꓶˍ ꓟ ꓔꓯ ꓐꓯˍ ꓟ ꓥ ꓡꓳ꓿
Lꓴ‐ꓘ 7ꓽ11‐17 ꓟꓶꓽ ꓛꓵꓽ ꓟ ꓤ ꓔꓲ. ꓫꓵꓻ ꓟ ꓪꓴ. ꓠꓬꓲ꓾ ꓔꓵ. ꓠ, ꓟ ꓐꓱ ꓶ ꓫꓵꓻ ꓟꓳꓻ ꓑꓱ. ꓓꓳ ꓡˍ ꓡꓳ꓿
ꓡꓱꓼ ꓜꓴ ꓔꓯ ꓟꓳ. ꓡ ꓔꓬ ꓟ ꓟꓶꓽ ꓛꓵꓽ ꓟ ꓐꓰ ꓞꓳ ꓜꓴꓻ ꓓꓽ ꓟ ꓔꓯ ꓟꓳꓻˍ ꓕꓯ ꓬꓰ‐ꓢꓴ ꓠꓬ ꓮ ꓫꓵꓽ ꓑꓶ. ꓓꓴ ꓕꓱ ꓘꓶ ꓛꓲ ꓠꓲ, ꓟ ꓫ. ꓙˍ ꓡ꓿
ꓬꓰ‐ꓢꓴ ꓠꓬ ꓞꓳ ꓡꓯ. ꓕꓲ ꓣꓳ ꓬꓲ ꓞꓲꓼ ꓟꓽ ꓙꓳ ꓡ ꓕꓯ ꓡꓰ ꓫꓵꓻ ꓟ ꓑꓶ. ꓓꓴ ꓠꓲ, ꓟ ꓫ.ˍ ꓟ ꓡꓰꓽ ꓟꓽ ꓞꓲ꓾ ꓦꓲꓺ ꓢꓲ ꓒˍ ꓟꓲ ꓟꓽ ꓔꓬ ꓟ ꓡꓰꓽ ꓟꓽ ꓞꓲꓺ ꓕꓲ ꓣꓳˍ ꓡꓰꓽ ꓙꓳˍ ꓟ ꓤ ꓔꓲ. ꓔꓯ ꓥˍ ꓟꓲ ꓐꓰꓽ ꓪ ꓡꓰˍ ꓟ ꓕꓱ ꓤ ꓟꓶ ꓤ ꓐꓱ ꓶ ꓬꓲ ꓠꓲ, ꓟ ꓠꓯꓸꓼ ꓗꓪ ꓐꓰ ꓐꓶꓽ ꓓꓳ ꓡˍ ꓟ ꓫꓱ. ꓤ ꓠꓲ, ꓔꓯ ꓟꓳ. ꓖꓶ ꓗꓷ ꓟ ꓥ ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓦꓬꓼ ꓠꓬꓲ ꓗꓪ ꓡ ꓞꓳ ꓕꓲ ꓣꓳ ꓜꓽ ꓓꓴ ꓓꓳꓻ ꓓꓴ ꓖꓪꓽ ꓓꓴ ꓬꓰ ꓙ ꓔꓳ, ꓙˍ ꓟ ꓗꓪ ꓦꓲꓻ ꓕꓲ ꓟ ꓗꓪ ꓡꓰꓽ ꓟꓶ ꓓ, ꓟ ꓥ ꓡꓳ꓿ ꓬꓲ ꓦꓲꓻ ꓘꓴꓽ ꓗꓪ ꓚꓳ. ꓗꓳ. ꓙꓰ ꓠꓬ ꓠꓱ. ꓐꓯ ꓗꓪ ꓟꓽ ꓙꓳ꓿ ꓮ ꓟꓶ ꓟ ꓡꓰ ꓬꓲ ꓜꓴꓻ ꓕꓲ ꓜꓴꓻ ꓜꓴꓻ ꓗꓪ ꓐꓰ ꓜꓽ ꓓꓴ ꓓꓳꓻ ꓓꓴ ꓖꓪꓽ ꓓꓴ ꓬꓰ ꓙ ꓔꓳ, ꓙ ꓡˍ ꓟ ꓟꓽ ꓙꓳ꓿ ꓦꓬꓼ ꓠꓬꓲ ꓖꓳ ꓟ ꓗꓪ ꓚꓲ. ꓛꓬ ꓦꓲꓻ ꓕꓲ ꓦꓲˍ ꓗꓪ ꓚꓳ. ꓡꓰꓽ ꓜꓽ ꓡꓳꓼ ꓓꓳꓻ ꓡꓳꓼ ꓖꓪꓽ ꓡꓳꓼ ꓓꓴ ꓙꓳˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓦꓲꓻ ꓢꓲ ꓒˍ ꓟꓲ ꓟꓽ ꓙꓳ ꓟ ꓡꓰꓽ ꓟꓽ ꓞꓲꓺ ꓤ ꓔꓲ. ꓥˍ ꓟꓲ ꓫꓵꓻ ꓗꓷˍ ꓕꓯ ꓠꓽ ꓕꓱ ꓟꓶꓽ ꓛꓵꓽ ꓟ ꓐꓱ ꓶ ꓬꓲ ꓜꓽ ꓓꓴ ꓓꓳꓻ ꓓꓴ ꓐꓱ ꓶ ꓬꓰ ꓫ. ꓓꓴ ꓙꓳ ꓡˍ ꓟ ꓥꓳ꓿
ꓪꓴ‐ꓢ ꓠꓬ ꓮ ꓡꓲ ꓕꓲ ꓣꓳ ꓫꓵꓻˍ ꓟ ꓔꓯ ꓥˍ ꓟꓲ ꓟꓽ ꓠꓲ, ꓒꓴ ꓟ ꓔꓯ ꓬꓲ‐ꓫꓲ‐ꓚꓰ 33ꓽ11 ꓗꓪ ꓐꓯ ꓔ ꓡꓳ꓿ ꓪꓴ‐ꓢ ꓠꓲ, ꓫꓵˍ ꓟ ꓠꓬ ꓢꓯ. ꓔꓬ ꓟ ꓥ ꓡꓳ꓾ ꓫꓵꓻˍ ꓟ ꓔꓯ ꓠꓽ ꓟꓽ ꓥ꓿
ꓤ ꓔꓲ. ꓐꓰ ꓐꓰꓽ ꓪ ꓡꓰ ꓟ ꓕꓱ ꓟꓶꓽ ꓛꓵꓽ ꓟ ꓐꓱ ꓶ ꓬꓲ ꓠꓲ, ꓟ ꓠꓯꓸꓼ ꓗꓪ ꓐꓰ ꓫꓱ. ꓤ ꓠꓲ, ꓡꓰꓽ ꓟꓽ ꓞꓲꓺ꓾ ꓝꓮꓲ ꓢꓯ. ꓬꓲꓼ ꓡ ꓝꓲ ꓐ ꓡˍ ꓟ꓾ ꓞꓳ ꓤ ꓔꓯ ꓐꓲꓻ ꓜꓲꓼ ꓡꓰ ꓝꓲˍ ꓟ ꓪꓽ ꓠꓬꓲˍ ꓟ ꓢꓯꓼ ꓪ ꓥˍ ꓟꓲ ꓬꓲ ꓔꓯ ꓙꓳˍ ꓡꓳ꓿ ꓖꓳ ꓡꓱ ꓠꓬꓲ ꓬꓰ ꓢꓴ ꓠꓬ ꓞꓳ ꓫꓵꓻ ꓓꓯ,ˍ ꓟ ꓖꓴꓽ ꓔꓯ ꓬꓲ ꓡꓯꓽ ꓒꓯ, ꓡꓰ ꓫꓱ, ꓖꓶˍ ꓡꓳ꓿
ꓫꓵꓻ ꓟꓳꓻ ꓔꓯ ꓕꓲꓺ ꓗꓷ ꓪ ꓡꓰˍ ꓕꓯ ꓕꓲꓺ ꓪ ꓡꓰ ꓢꓴ ꓖꓳ ꓕꓲ ꓣꓳ ꓠꓬ ꓟꓽ ꓢꓲꓽ ꓟꓽ ꓫꓬꓻ ꓗꓷ ꓡꓰˍ ꓡꓳ꓾ ꓐꓰ ꓬꓴ‐ꓔ ꓡ ꓞꓳ ꓐꓴ ꓘꓳ ꓣꓴ ꓔˍ ꓟ ꓡꓲꓽ ꓕꓲꓽ ꓟ ꓙꓳˍ ꓡꓳ꓿ ꓖꓳ ꓡꓱ ꓠꓬꓲ ꓬꓰ‐ꓢꓴ ꓡꓰ ꓫꓵꓻ ꓟꓳꓻ ꓖꓳ ꓟ ꓔꓯ ꓕꓲꓺ ꓖꓶ ꓗꓷ ꓟ ꓠꓬ ꓟꓶꓽ ꓛꓵꓽ ꓟ ꓖꓳ ꓕꓲ ꓣꓳ ꓔꓯ ꓫꓱ. ꓤˍ ꓟ ꓔꓯ ꓟꓳ. ꓖꓶˍ ꓟ ꓡꓰꓽ ꓟꓽ ꓞꓲ꓾ ꓞꓳ ꓤ ꓮ ꓙꓵꓽ ꓔꓯ ꓝꓴꓲ. ꓬꓲ ꓪꓽ ꓠꓬꓲˍ ꓟ꓾ ꓠꓲ, ꓟ ꓟꓽ ꓙꓲꓻ ꓟ ꓐꓰ ꓫꓵꓻ ꓓꓴꓽ ꓗꓪ ꓐꓰ ꓞꓳ ꓤ ꓮ ꓙꓵꓽ ꓔꓯ ꓡꓲ, ꓗꓷ ꓝꓲ ꓠꓲ, ꓫꓵˍ ꓡꓳ꓾ ꓐꓯˍ ꓟ ꓔꓯ ꓖꓴ ꓟ. ꓖꓶ ꓔꓬ ꓡꓳ꓿
“ꓤ ꓖꓴ ꓡꓯ.ꓳ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓔꓴ ꓡꓯ꓾” ꓐꓰ ꓐꓯ ꓘꓶꓽ ꓕꓲ ꓘꓶꓽ ꓤ ꓐꓯ ꓖꓶ ꓗꓷ ꓟ ꓬꓲ ꓐꓯ ꓘꓶꓽ ꓠꓬ ꓤ ꓖꓴ ꓡꓯ. ꓖꓳ ꓕꓲ ꓣꓳ ꓬꓲ ꓖꓳ ꓓꓱꓽ ꓔꓯ ꓢꓯ. ꓬꓲꓼ ꓡ ꓝꓲˍ ꓟ ꓡꓰꓽ ꓟꓽ ꓞꓲ꓾ ꓬꓲ ꓖꓳ ꓓꓱꓽ ꓐꓰ ꓬꓲ ꓦꓻ ꓠꓬꓲꓽ ꓟ ꓡꓱꓸꓼ ꓐꓱ ꓶ ꓩꓴ ꓗꓷ ꓟꓶˍ ꓟ ꓐꓰ ꓐꓲ ꓜꓲꓼˍ ꓟ ꓔꓯ ꓖꓶ ꓗꓷ ꓟ ꓥ ꓡꓳ꓿
ꓫꓵꓻ ꓓꓴꓻ ꓡꓰ ꓣꓴ ꓔꓯ, ꓙꓰ ꓟ ꓢꓯꓼ ꓟꓬ ꓖꓳ ꓟ ꓤ ꓖꓴ ꓡꓯ. ꓖꓳ ꓕꓲ ꓣꓳ ꓔꓯ ꓬꓰ‐ꓢꓴ ꓠꓬ ꓝꓮꓲ ꓡꓲ. ꓖꓶ ꓗꓷꓳ꓿ ꓬꓲ ꓪꓽ ꓠꓬꓲˍ ꓟ ꓢꓯꓼ ꓪ ꓗꓪ ꓐꓰ ꓫꓵꓻ ꓘꓪ ꓡꓰ ꓟ ꓤ ꓖꓴ ꓡꓯ. ꓔꓯ ꓝꓮꓲ ꓢꓯ. ꓬꓲꓼ ꓡ ꓝꓲꓳ꓿
ꓬꓰ‐ꓢꓴ ꓠꓬ ꓢꓯ. ꓔꓬ ꓢꓴ ꓐꓴ ꓢꓲ ꓒ ꓥ ꓟ ꓡꓰꓽ ꓟꓽ ꓞꓲ꓾ ꓫꓵꓻ ꓢꓴ ꓐꓴ ꓬꓲ ꓪ ꓢꓲꓺ ꓒˍ ꓟꓲ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓣꓳ ꓟꓲ ꓠꓯ ꓞꓳ ꓤ ꓐꓱ ꓶ ꓢꓰꓼ ꓗꓷ ꓟꓶˍ ꓕꓯ ꓥ ꓟꓲ꓾ ꓬꓲ ꓝꓲ ꓓꓴ ꓐꓴ ꓔꓯ ꓙ ꓟꓳ ꓘꓶꓽ ꓖꓶ ꓔꓲ. ꓬꓰ ꓗꓷ ꓟ ꓕꓲ ꓡꓰ,꓾ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓬꓲ ꓢꓯ. ꓬꓲꓼ ꓡˍ ꓟ ꓗꓪ ꓐꓰ ꓡꓱꓼ ꓜꓴ ꓙꓵꓽ ꓪ ꓔꓯ ꓥˍ ꓟꓲ ꓬꓲ ꓧꓪ. ꓡꓰꓳ꓿
ꓬꓰ‐ꓢꓴ ꓠꓬ ꓬꓲ ꓔꓯ ꓙꓵꓻ ꓢꓴ ꓮ ꓙꓵꓽ ꓔꓯ ꓬꓲ ꓙ ꓟꓳ ꓘꓶꓽ ꓖꓶ ꓔ ꓟ ꓠꓬ꓾ ꓬꓲ ꓢꓯ. ꓔꓬ ꓕ ꓑꓳꓸꓼ ꓣꓳ ꓐꓴ ꓥˍ ꓟꓲ ꓮ ꓟꓶ ꓟ ꓤꓶꓻ ꓗꓪ ꓐꓰ ꓡ ꓠ, ꓟ ꓤꓶꓻ ꓗꓪ ꓥˍ ꓟꓲ ꓬꓲ ꓐꓰ ꓕꓲ ꓪꓽˍ ꓐꓲ ꓜꓲꓼ ꓐꓲ ꓡꓶꓽˍ ꓟ ꓤꓶꓻ ꓔꓯ ꓟꓶ ꓡꓰˍ ꓥꓳ꓾ ꓐꓰ ꓐꓯˍ ꓟ ꓥ ꓡꓳ꓿ (ꓬꓳ‐ꓦ 14ꓽ19)꓿
ꓣꓳ ꓤꓶꓻ ꓗꓪ ꓫꓵꓽ ꓠꓬꓲ ꓓꓴ꓾ ꓠꓲ, ꓫ. ꓟꓬ ꓫ.ˍ ꓓꓴ꓾ ꓠꓲ, ꓟ ꓙꓬ ꓓꓴ ꓐꓴ ꓔꓯ ꓔꓳ, ꓜꓳꓽ ꓡˍ ꓕꓯ ꓐꓲ ꓜꓲꓼˍ ꓟ ꓤꓶꓻ ꓐꓰ ꓕꓲ ꓞꓲꓼ ꓕꓲ ꓑ ꓥꓳ ꓡꓳ. ꓓꓴ ꓔꓯ ꓖꓶ ꓐ ꓡˍ ꓟ ꓬꓰ‐ꓢꓴ ꓔꓯ ꓣꓳ ꓐꓴ ꓦ ꓡꓱ ꓐꓳ ꓐ ꓡ ꓠ, ꓟ꓾ ꓙꓵꓻ ꓐ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
