ꓬꓰ‐ꓢꓴ ꓔꓯ ꓛꓳ ꓠꓲ, ꓫꓵ ꓢꓴ ꓔꓯ ꓟ. ꓖꓶˍ ꓟ (Sunday reflection) 7.9.2025
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓗꓪ ꓐꓰ (23) ꓫꓵꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 14ꓽ22‐33 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓬꓰ‐ꓢꓴ ꓔꓯ ꓛꓳ ꓠꓲ, ꓫꓵˍ ꓢꓴ ꓔꓯ ꓟ. ꓖꓶ ꓟ ꓢꓲꓽ ꓫꓬ ꓕꓳ ꓶ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓮꓽ ꓟ ꓥꓪ ꓔꓯ ꓡ ꓠꓬ꓾ ꓬꓲ ꓚꓲ. ꓛꓬ ꓐ, ꓐꓼ ꓟ, ꓟˍ ꓐꓰ ꓤ ꓟꓶ ꓤ ꓠꓱ ꓐꓰ ꓬꓲꓼ ꓤ ꓠꓬꓲ ꓤ ꓐꓰ꓾ ꓮ. ꓝꓲ ꓠꓬꓲ ꓟˍ ꓐꓰ ꓬꓲ ꓚꓲ. ꓛꓬ ꓔꓯ ꓠꓲ, ꓠꓵˍ ꓟ ꓢꓶ. ꓟꓽ ꓞꓲ ꓥꓪ ꓔꓯ ꓟꓽ ꓠꓲ, ꓫꓵ ꓕꓯ ꓠꓽ ꓥꓪ ꓛꓳꓽ ꓒꓯ, ꓬꓰ ꓟꓽ ꓒꓬꓱ ꓡ꓿ ꓝꓮꓲ ꓮꓽ ꓟ ꓥˍ ꓟꓲ ꓬꓲ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓑꓱ. ꓢꓲ ꓥꓪ ꓔꓯ ꓟꓽ ꓛꓳ ꓠꓬ ꓥꓪ ꓛꓳꓽ ꓒꓯ, ꓬꓰ ꓟꓽ ꓒꓬꓱꓼ ꓡ ꓐꓰ ꓢꓲꓽ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿ ꓝꓮꓲ ꓖꓳ ꓟˍ ꓡꓰ ꓐꓰ ꓠꓴ ꓪ ꓮ ꓡꓲ ꓕꓲ ꓣꓳˍ ꓟꓲ ꓬꓲ ꓙꓳˍ ꓟ ꓮ ꓙꓵꓽ ꓔꓯ ꓟꓽ ꓡꓳ ꓒꓰ, ꓕꓯ ꓠꓽ ꓥꓪ ꓛꓳꓽ ꓒꓯ, ꓬꓰ ꓟꓽ ꓒꓬꓱꓼ ꓡ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓬꓲ ꓛꓳꓽ ꓒꓯ, ꓬꓲ ꓗ. ꓠꓯ ꓢꓲ ꓛꓳꓽ ꓢꓴ ꓐꓴ ꓠꓬ ꓮ ꓡꓰ ꓐꓰ ꓬꓰ ꓠꓯ, ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓝꓮꓲ ꓬꓲ ꓗ. ꓠꓯ ꓢꓲ ꓛꓳꓽ ꓢꓴ ꓐꓴ ꓠꓬ ꓮ ꓡꓰ ꓐꓰ ꓬꓰ ꓠꓯ, ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓛꓳꓽ ꓠ, ꓟ ꓓꓴ ꓙ ꓗꓷ ꓠꓬ ꓮ ꓘꓶ. ꓛꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓐꓰ ꓫ. ꓓꓴ ꓔꓯ ꓧꓪ. ꓡꓰ ꓠ, ꓟ ꓢꓲꓺ ꓒ ꓔꓯ ꓢꓯꓼ ꓪ ꓣꓴ ꓠ, ꓟ ꓣꓳ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓛꓳꓽ ꓕꓯ ꓫ. ꓓꓴ ꓟꓷ ꓓꓴ ꓮ ꓟꓬ, ꓔꓳ, ꓜꓳ ꓡ ꓟ ꓐꓰ ꓢꓴ ꓡꓰ ꓟꓽ ꓔꓱ, ꓟꓽ ꓜꓳ ꓚꓱ, ꓗꓪ ꓐꓰ ꓝꓴꓲ ꓧꓪ. ꓟ ꓬꓰ ꓡ ꓟ ꓔꓯ ꓟ. ꓖꓶ ꓟ ꓥ ꓡꓳ꓿ ꓣꓳ ꓔꓬ ꓦꓲꓻ ꓐꓰ ꓣꓳ ꓠꓯ, ꓗꓪ ꓙꓳ ꓟ ꓮ ꓙꓵꓽ ꓔꓯ ꓡꓳ ꓔ ꓢꓲ ꓠꓬꓲ ꓠ, ꓟ ꓐꓰ ꓬꓲ ꓟꓶ ꓠꓬ ꓣꓳ ꓢꓯꓼ ꓟꓬ ꓔꓯ ꓐꓰ ꓢꓲꓺ ꓒ ꓐꓱ ꓶ ꓖꓶ ꓠ, ꓟ ꓣꓳ ꓔꓯ ꓟ. ꓖꓶ ꓔ ꓟ ꓥꓡꓳ꓿
ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓬꓲ ꓗ. ꓠꓯ ꓢꓲ ꓛꓳꓽ ꓢꓴ ꓕꓲ ꓣꓳ ꓠꓬ ꓮ ꓡꓰ ꓫꓵꓽ ꓬꓰ ꓠꓯ ꓟ ꓠꓬ ꓓꓽ ꓪꓴ. ꓕꓲ ꓫꓵꓽ ꓠꓬ ꓣꓳ ꓦꓲꓻ ꓗꓪ ꓔꓬ ꓟ ꓐ, ꓐ ꓟ, ꓟ ꓐꓴ ꓔꓯ ꓧ, ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓓꓽ ꓪꓴ. ꓬꓲ ꓔꓶ. ꓖꓶ ꓠ, ꓟ ꓥ ꓡꓳ꓿ ꓢꓲꓺ ꓒ ꓔꓯ ꓮ ꓙꓵꓽ ꓢꓴ ꓕꓯ ꓢꓲ ꓒꓴ ꓠ, ꓟ ꓐꓰ ꓙꓵꓻ ꓠ, ꓟ ꓥ ꓡꓳ꓿
ꓝꓮꓲ ꓣꓳ ꓠꓯ, ꓗꓪ ꓙꓳ ꓟ ꓠꓲ, ꓫꓬ. ꓮ ꓙꓵꓽ ꓔꓯ ꓛ ꓗꓷ ꓢꓲ ꓠꓬꓲ ꓒꓴ ꓫꓵˍ ꓠꓯ, ꓗꓪ ꓣꓳ ꓠꓲ, ꓟ ꓔꓯ ꓟꓽ ꓥꓳꓽ ꓠ, ꓟ ꓥ ꓡꓳ꓿ ꓝꓮꓲ ꓫ. ꓓꓴ ꓟꓷ ꓢꓴ ꓐꓴ ꓔꓯ ꓬꓰ ꓙ ꓔꓳ ꓙ ꓠ, ꓟ ꓢꓲꓺ ꓒ ꓠꓲ, ꓒꓴ ꓟ ꓥ ꓡꓳ꓿
ꓢꓽ ꓫꓵꓽ ꓕꓲ ꓫꓵꓽ ꓠꓬ ꓚꓲ. ꓛꓬ ꓡꓯꓼ ꓐꓳ ꓔꓶ ꓔꓯ ꓑꓱ. ꓢꓲ ꓠꓬꓲ ꓢꓲꓺ ꓒ ꓗ. ꓠꓯ ꓛꓳꓽ ꓠ, ꓟꓥ ꓡꓳ꓿ ꓚꓲ. ꓛꓬ ꓡꓯꓼ ꓐꓳ ꓔꓶ. ꓐꓯ ꓟ ꓠꓬ ꓣꓳ ꓢꓯ. ꓔꓬ ꓟ ꓙꓵ, ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓠꓲ, ꓫ. ꓟꓬ ꓫ. ꓓꓴ ꓐꓰ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓮ ꓙꓵꓽ ꓔꓯ ꓢꓲꓺ ꓒ ꓐꓰ ꓕꓲ ꓪ ꓔꓳ, ꓧꓪ. ꓡꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿ ꓮ ꓡꓰ ꓫꓵꓽ ꓫꓵˍ ꓪꓴ ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓔꓯ ꓟꓽ ꓧ, ꓡꓰ ꓠ, ꓟ ꓣꓳ ꓬꓰ ꓠꓯ, ꓟ ꓥ ꓡꓳ꓿
ꓠꓴ ꓥꓪ ꓠꓬ ꓣꓳ ꓠꓯ, ꓗꓪ ꓙꓳ ꓟ ꓟꓽ ꓙꓲ ꓟꓽ ꓜꓳ ꓫꓱ. ꓮ ꓙꓵꓽ ꓔꓯ ꓡꓳ. ꓗꓷ ꓠ, ꓟ ꓢꓯꓼ ꓕꓵꓼ ꓠꓯ, ꓟ ꓥ ꓡꓳ꓿ ꓝꓮꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓺ ꓒ ꓐꓰ ꓬꓲ ꓙꓵ, ꓣꓴ ꓢꓲ ꓠꓬꓲ ꓪꓽ ꓘꓴ ꓠ, ꓟ꓾ ꓦꓻ ꓢꓯꓼ ꓪ ꓙꓳ ꓟ ꓢꓲꓽ ꓫꓬ ꓕꓳ ꓶ ꓵꓻ ꓢꓲ ꓠꓬꓲ ꓪꓽ ꓘꓴ ꓠ, ꓟ ꓬꓰ ꓠꓯ, ꓟ ꓥ ꓡꓳ꓿
ꓟꓲ‐ꓢ ꓔꓲ ꓓꓴ ꓗꓪ ꓙꓰ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓔꓯ ꓘꓳ, ꓣꓴ ꓠ, ꓟ ꓣꓳ ꓢꓯꓼ ꓕꓵꓼ ꓠꓯ, ꓟ ꓥ ꓡꓳ꓿ ꓝꓮꓲ ꓢꓲꓽ ꓫꓬ‐ꓟ‐ꓦ ꓪꓴ‐ꓢ ꓔꓯ ꓣꓳ ꓔꓯ ꓧꓳꓽ ꓪꓴ. ꓟꓴ ꓖꓶ ꓡ ꓠ, ꓟ ꓣꓳ ꓶꓻ ꓓꓰꓽ ꓠ, ꓟ ꓥ ꓡꓳ꓿
ꓙꓻ ꓣꓳ ꓟ ꓠꓲ, ꓟ ꓗꓪ ꓐꓰ ꓣꓳ ꓠꓯ ꓫ. ꓓꓴ ꓟꓷ ꓢꓴ ꓔꓯ ꓣꓱ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓓꓴ ꓬꓰ ꓡꓯ꓿ ꓠꓬ. ꓠꓬꓲ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓛꓳꓽ ꓒꓯ, ꓒꓬꓱꓼ ꓡ ꓠ, ꓟ ꓮ ꓫꓵꓽ ꓠꓬ ꓣꓳ ꓗꓽ ꓕꓽ ꓔꓬ ꓡ ꓣꓳ ꓓꓴ ꓙ ꓡꓯ꓿ ꓠꓬꓲ. ꓠꓬꓲ ꓗꓪ ꓢꓯꓼ ꓕꓵꓼ ꓢꓲ ꓠꓬꓲ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬꓽ ꓫ. ꓓꓴ ꓮ ꓙꓵꓽ ꓔꓯ ꓢꓲꓺ ꓒ ꓐꓰ ꓕꓲ ꓪ ꓚꓲ. ꓚꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓑꓱ. ꓔ ꓢꓲ ꓠꓬꓲ ꓛꓳ ꓓꓴ ꓬꓰ ꓡꓯ꓿ ꓙꓲ ꓟ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓙꓲ ꓟ ꓢꓲꓺ ꓒ ꓗ. ꓠꓯ ꓢꓲ ꓛꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
