ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓒꓲ‐ꓕꓱ ꓔꓯ꓾ ꓥꓪ ꓗ ꓠꓯ. ꓢꓲ ꓛꓳ ꓡꓯ꓾ ꓐꓰ ꓐꓯ ꓖꓶˍ ꓡꓳ꓿ ꓒꓲ‐ꓕꓱ ꓠꓬ ꓙꓳˍ ꓟ ꓮ ꓙꓵꓽ ꓬꓲ ꓡꓳ ꓔꓲ. ꓬꓰꓳ꓾ ꓐꓰ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ (ꓡꓴ‐ꓘ꓿ 5ꓽ1‐11) ꓗꓪ ꓟ ꓥꓳ꓿
ꓟ. ꓟꓲꓽ ꓝꓲ. ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓬ ꓗꓪ ꓛꓲ ꓡˍ ꓡꓳ꓿ ꓒꓲ‐ꓕꓱ ꓠꓬ ꓖꓳ ꓕꓲ ꓙꓵ, ꓗꓪ ꓥꓪ. ꓑꓱ. ꓫꓬ, ꓔꓬ ꓡꓳ꓿ ꓒꓲ‐ꓕꓱ ꓔꓯ ꓥꓪ. ꓧꓪ ꓟꓶˍ ꓡ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓠ ꓠꓬꓲˍ ꓕꓯ ꓒꓲ‐ꓕꓱ ꓠꓬ꓾ ꓕꓲ ꓦꓬꓽ ꓡꓱꓸꓼ ꓥꓪ. ꓓꓳꓽ ꓗꓷˍ ꓟꓲ ꓕꓲ ꓟˍ ꓟꓲ ꓟꓽ ꓟꓶ꓾ ꓐꓰ ꓐꓯˍ ꓡꓳ꓿ ꓖꓳ ꓕꓯ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓯ.ˍ ꓟ ꓬꓲꓻ ꓙꓬ ꓘꓴꓽ ꓗꓪ ꓙꓰ ꓢꓲ ꓥꓪ. ꓓꓳꓽ ꓙꓰ꓾ ꓐꓰ ꓐꓯˍ ꓕꓯ ꓥꓪ. ꓑꓱ. ꓧꓽ ꓡꓰ ꓠ ꓛꓲ ꓥꓪ. ꓓꓳꓽ ꓟꓶ ꓡꓰꓳ꓿
ꓖꓳ ꓕꓯ ꓒꓲ‐ꓕꓱ ꓠꓬ ꓢꓲ ꓒ ꓬꓰ‐ꓢꓴ ꓛꓲ ꓔꓲꓺ ꓗꓪ ꓟꓳꓼ ꓡꓰ ꓢꓲ ꓠꓬꓲ꓾ ꓥꓪ ꓗꓪ ꓐꓰ ꓧ, ꓙꓰ꓾ ꓥꓪ ꓠꓬ ꓝꓴꓲ. ꓙꓳ ꓢꓴ ꓥ ꓡꓳ ꓢꓲꓺ ꓒꓽꓳ꓾ ꓐꓰ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ꓾ ꓒꓲ‐ꓕꓱꓳ꓾ ꓥꓪ ꓕꓱ ꓡꓱ ꓖꓳ ꓑꓳꓸꓼ ꓠꓴ ꓔꓯ ꓡ ꓞꓳ ꓓꓳꓽ ꓢꓴ ꓬꓰ ꓝꓲˍ ꓥꓳ꓿ ꓥꓪ ꓗ ꓠꓯ. ꓢꓲ ꓛꓳꓻ ꓡꓯ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓠꓬ ꓒꓲ‐ꓕꓱ ꓠꓬ ꓬꓲ ꓙꓳˍ ꓟ ꓮ ꓙꓵꓽ ꓔꓯ ꓡꓳ ꓔꓲ. ꓬꓰ ꓢꓲ ꓢꓲ ꓒ ꓗ ꓠꓯ. ꓢꓲ ꓛꓳꓻ ꓙꓰˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓒꓲ‐ꓕꓱ ꓔꓯ ꓣꓳꓽ ꓡꓳ. ꓠꓬꓲ ꓡꓯ꓿ ꓒꓲ‐ꓕꓱ ꓠꓬ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓡˍ ꓕꓯ ꓬꓲ ꓠꓬ ꓙꓳꓺ ꓠꓬꓲ ꓛꓱꓽ ꓠꓬꓲ ꓐꓰ ꓗ, ꓡꓳ꓿ ꓮ ꓫꓵꓽ ꓑꓶ. ꓓꓴ ꓠꓬꓲ ꓥ ꓡ ꓐꓯˍ ꓠꓬ ꓒꓲ‐ꓕꓱ ꓤꓶꓻ ꓗꓪ ꓝꓴꓲ. ꓮ ꓟꓬ, ꓙꓳˍ ꓡꓳ꓿ ꓝꓮꓲ ꓠꓬ ꓬꓲ ꓡꓰ ꓟꓽ ꓧ ꓟˍ ꓟꓲ ꓮ ꓟꓬ, ꓬꓰˍ ꓟ ꓑꓶ. ꓓꓴ ꓬꓲ ꓠꓬ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓳꓺ ꓛꓱꓽ ꓔꓬ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓥꓪ ꓗ ꓠꓯ. ꓢꓲ ꓛꓳꓻ ꓡꓯ꓾ ꓐꓰ ꓘꓴˍ ꓡꓳ꓿ ꓖꓳ ꓕꓯ ꓠꓬ ꓒꓲ‐ꓕꓱ ꓠꓬ ꓬꓲ ꓙꓳˍ ꓟ ꓮ ꓙꓵꓽ ꓡꓳ ꓔꓲ. ꓬꓰ ꓢꓲ ꓛꓳꓻ ꓙꓰˍ ꓡꓳ꓿
ꓕꓱ ꓗꓪ ꓒꓲ‐ꓕꓱ ꓠꓬ ꓮ ꓫꓵꓽ ꓔꓯ ꓡꓳ ꓔꓲ. ꓬꓰˍ ꓡ ꓐꓯˍ ꓠꓬ꓾ ꓟ. ꓟꓲꓽ ꓝꓲ. ꓗꓪ ꓠꓬ ꓬꓲ ꓐ, ꓐ꓾ ꓬꓲ ꓥꓪ. ꓓꓳꓽ ꓗꓷ ꓟ ꓡꓲ ꓐꓰ ꓙꓳˍ ꓟ ꓮ ꓙꓵꓽ ꓡꓳ ꓔꓲ. ꓬꓰˍ ꓡꓳ꓾ ꓐꓰ ꓣꓳ ꓕꓱ ꓡꓱ ꓑ ꓙꓽˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓕꓱ ꓟ ꓕꓯꓽ ꓢꓲ ꓒꓲ‐ꓕꓱ ꓔꓯ ꓢꓲ ꓒ ꓬꓰ‐ꓢꓴ ꓡꓳ ꓔꓲ. ꓬꓰ ꓝꓲ ꓠꓲ, ꓫꓵˍ ꓟ ꓠꓬ ꓮ ꓫꓵꓽ ꓥ ꓡ ꓐꓯˍ ꓠꓬ ꓟꓽ ꓧꓺ ꓟ ꓝꓴꓲ.꓾ ꓟꓽ ꓧꓺ ꓟ ꓓꓵꓽ ꓙꓽˍ ꓟ꓾ ꓟꓽ ꓧꓺ ꓟ ꓬꓰˍ ꓟ ꓮ ꓙꓵꓽ ꓗꓪ ꓐꓰ ꓠꓴ ꓡꓳ ꓔꓲ. ꓬꓰ ꓢꓲ ꓢꓲ ꓒ ꓗ ꓠꓯ. ꓢꓲ ꓛꓳꓻ ꓡꓯ ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓝꓴꓲ. ꓠꓯꓸꓼ ꓗꓪ ꓟ ꓟꓽ ꓥ ꓥ ꓐꓰ꓾ ꓢꓲꓽ ꓫꓬˍ ꓟ ꓢꓯꓼ ꓟꓬ ꓬꓲ ꓫꓵꓼ ꓟꓶ ꓠ, ꓟ ꓐꓱ ꓶ ꓒꓲ‐ꓕꓱ ꓔꓯ ꓢꓲ ꓒ ꓬꓰ‐ꓢꓴ ꓘꓴˍ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓮ ꓙꓵꓽ ꓔꓯ ꓥˍ ꓟꓲ ꓒꓲ‐ꓕꓱˍ ꓡꓰ ꓐꓰ ꓮ ꓙꓵꓽ ꓔꓯ ꓡꓳꓺ ꓔꓲ. ꓬꓰ ꓢꓲ ꓢꓲ ꓒ ꓗ ꓠꓯ. ꓢꓲ ꓗꓪ ꓛꓳꓻ ꓠ, ꓟ ꓥꓳ꓿ ꓣꓳ ꓡꓳ ꓔꓲ. ꓬꓰ ꓠ, ꓟ ꓠꓬ ꓟꓽ ꓧꓺ ꓟ ꓮ ꓙꓵꓽ꓾ ꓠꓲ, ꓦꓯ. ꓟ ꓮ ꓙꓵꓽ꓾ ꓟꓽ ꓙꓲꓻ ꓟ ꓮ ꓙꓵꓽ ꓡꓳ ꓔꓲ. ꓬꓰ ꓢꓲ ꓢꓲ ꓒ ꓠꓯꓸꓼ ꓗꓪ ꓢꓯꓼ ꓟꓬ ꓬꓲ ꓫꓵꓼ ꓟꓶ ꓡꓰ ꓠ, ꓟ ꓐꓱ ꓶ ꓣꓳ ꓛꓳꓻ ꓙꓰ ꓠ, ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓱ ꓶ ꓢꓯꓼ ꓟꓬ ꓬꓲ ꓫꓵꓼ ꓥꓳ꓿ ꓟꓽ ꓥ ꓥꓳ ꓐꓯˍ ꓕꓯ ꓠꓽ ꓣꓳ ꓠꓽ ꓢꓯꓼ ꓟꓬ ꓬꓲ ꓐꓰꓽ ꓥ ꓟ ꓟꓽ ꓧꓺ ꓟ ꓤꓶꓻ ꓠꓯꓸꓼ ꓗꓪ ꓡꓰꓽ ꓣꓳ ꓫꓵꓻ ꓘꓪ ꓡꓰˍ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓢꓯꓼ ꓟꓬ ꓫꓵꓼ ꓘꓴˍ ꓟ ꓡꓰ ꓐꓰ ꓣꓳ ꓔꓯ ꓥˍ ꓟꓲ ꓘꓴꓻ ꓔꓬ ꓟ ꓥ ꓡꓳ꓿ ꓖꓳ ꓕꓯ ꓠꓬ ꓣꓳ ꓟꓽ ꓙꓲꓻ ꓟ ꓮ ꓙꓵꓽ ꓔꓯ ꓣꓳ ꓡꓳ ꓒꓰ, ꓗꓷ ꓢꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓢꓲ ꓒ ꓔꓯ ꓣꓳ ꓟꓶ ꓠ, ꓟ ꓐꓱ ꓶ ꓣꓳ ꓛꓳꓻ ꓙꓰ ꓓꓴ ꓥꓳ꓿
