Lꓴ‐ꓘ ꓿ 4ꓽ31‐37
ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵꓽ ꓘꓹ-ꓒꓱ-ꓠꓴ ꓟꓬꓱꓺ ꓔ ꓟ ꓡꓳ ꓒꓱ ꓗꓪ ꓬꓯꓼ ꓡ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓬꓲ ꓪꓽ ꓔꓯ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ꓬꓲ ꓟꓸ ꓖꓶˍ ꓟ ꓔꓯ ꓬꓲ ꓪꓽ ꓓꓵꓽ ꓙ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓐꓯ ꓘꓶ ꓠꓽ ꓙꓵꓽ ꓪ ꓙꓳˍ ꓡꓳ꓿
ꓜꓲꓼ ꓦꓲ ꓠꓯꓸꓼ ꓗꓪ ꓟꓽ ꓫꓬ ꓠꓲꓽ ꓓꓯꓹ ꓟ ꓞꓳ ꓑꓸ ꓤ ꓕꓲ ꓣꓳ ꓔꓬ ꓡꓳ꓿ ꓠꓲꓽ ꓠꓬ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ꓾ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓠꓴ ꓠꓬ ꓥꓪ ꓠꓴꓽˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓥꓪ ꓠꓴꓽ ꓔꓯ ꓟꓶꓽ ꓬꓰ ꓝꓲˍ ꓐꓰ ꓡꓻ ꓡ? ꓠꓴ ꓮꓽ ꓟ ꓥ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓪꓴ-ꓢ ꓬꓲ ꓢꓲꓽ ꓫꓬ ꓢꓴ ꓖꓳꓻ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ ꓕꓼ ꓢꓲ꓾ ꓕꓽ ꓪꓳꓹ꓾ ꓬꓲ ꓔꓯˍ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓠꓲꓽ ꓡꓰ ꓮꓽ ꓙꓵ ꓢꓴ ꓟꓳꓻ ꓟꓳꓻ ꓡꓰꓽ ꓖꓳ ꓕꓲ ꓣꓳ ꓔꓯ ꓚꓵꓹ ꓓꓳꓽ ꓗꓷ ꓢꓲ꓾ ꓬꓲ ꓔꓯˍ ꓐꓰ ꓓꓳ ꓡ ꓡꓳ꓿ ꓡꓽ ꓞꓳ ꓖꓳ ꓕꓲ ꓣꓳ ꓠꓽ ꓮ ꓡꓲˍ ꓟꓲ ꓟꓽ ꓗꓷ ꓡꓰ꓿ꓖꓳ ꓡꓱ ꓠꓬ ꓮꓽ ꓙꓵ ꓢꓴ ꓓꓵꓽ ꓙ ꓟꓶ ꓡꓰ ꓢꓲ꓾ ꓟꓽ ꓫꓬ ꓠꓲꓽ ꓔꓯˍ ꓟꓲ ꓬꓲ ꓙꓵꓽ ꓪˍ ꓐꓰ ꓪꓽ ꓠꓬꓲˍ ꓟ ꓡꓰ ꓕꓵꓼ ꓪꓽ ꓖꓶꓽ ꓗꓷ ꓠꓬ ꓓꓳ ꓙꓰˍ ꓟ ꓕꓱ ꓟ ꓠꓬ꓾ ꓮ ꓡꓲ ꓡꓳ ꓫꓵꓽ ꓟꓸ ꓟꓲꓽ ꓥ ꓡ?꓾ ꓐꓰ ꓠ ꓠꓬꓲ ꓡꓯꓽ ꓘꓳˍ ꓡꓳ꓿ꓖꓳ ꓡꓱ ꓢꓲ ꓬꓰ-ꓢꓴ ꓬꓲ ꓓꓳꓽ ꓠꓬ ꓚꓳ ꓡꓳ ꓟ ꓟꓵꓽ ꓮꓽ ꓙꓵ ꓗꓪ ꓚ ꓒꓬꓱ ꓙꓰˍ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓠꓬ ꓘ‐ꓒꓱ‐ꓠꓴ ꓜꓲꓼ ꓦꓲ ꓗꓪ ꓠꓲꓽ ꓓꓯ, ꓢꓴ ꓕꓲ ꓣꓳ ꓔꓯ ꓠꓲꓽ ꓖꓼ ꓓꓳ ꓖꓶˍ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓠꓬ ꓡ ꓞꓳ 4 ꓙꓰꓽ ꓔꓯ ꓟꓳꓻ ꓪˍ ꓟ ꓥ ꓡꓳ꓿
ꓬꓲ ꓪꓴ. ꓕꓲ ꓙꓰꓽ ꓠꓬ ꓢꓲ ꓒ ꓬꓰ‐ꓢꓴ꓿ ꓢꓲ ꓒ ꓬꓰ‐ꓢꓴ ꓠꓬ ꓢꓴ ꓔꓯ ꓩꓴ ꓖꓶ ꓗꓷ ꓢꓴ꓾ ꓬꓰ ꓙ ꓢꓴ꓾ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓐꓰ ꓢꓯꓼ ꓪ ꓖꓶ ꓢꓴ꓾
ꓝꓮꓲ ꓠꓬꓲꓽ ꓙꓰꓽ ꓕꓲ ꓙꓰꓽ ꓟ ꓠꓬ꓾ ꓢ‐ꓓꓯ꓿ ꓢ‐ꓓꓯ ꓐꓯˍ ꓟ ꓖꓣꓰꓰꓗ ꓥꓳꓽ ꓕꓱ ꓟ ꓠꓬ꓾ ꓢꓴ ꓔꓯ ꓟꓬꓱ ꓓꓳꓽ ꓒꓬ, ꓢꓴ꓾ ꓢꓴ ꓔꓯ ꓐꓬ ꓡꓰ ꓝꓲ ꓢꓴ꓾ ꓐꓯˍ ꓟ ꓬꓲ ꓬꓲ. ꓢꓲ ꓙꓳˍ ꓡꓳ꓿
ꓢ ꓙꓰꓽ ꓕꓲ ꓙꓰꓽ ꓟ ꓠꓬ꓾ ꓠꓲꓽ ꓜꓶꓽ ꓞ, ꓟ ꓟꓶ ꓢꓴ꓿ ꓟꓬꓽ ꓠꓬꓲ ꓠꓬ ꓟꓽ ꓙꓲꓻ ꓡꓳ ꓫꓵꓽ ꓕꓲ ꓫꓵꓽ ꓫꓵꓽ ꓡꓰ ꓞꓳ, ꓔˍ ꓟ ꓟꓶ ꓢꓴ꓿ ꓥˍ ꓟ ꓕꓲ ꓫꓵꓽ ꓫꓵꓽ ꓡꓰ ꓜꓶꓽ ꓞ, ꓟ ꓟꓶ ꓢꓴ꓿
ꓡꓲꓺ ꓫꓵꓽ ꓕꓲ ꓫꓵꓽ ꓠꓬ꓾ ꓑ ꓫꓬ ꓡ ꓞꓳ꓿ ꓬꓲ ꓪ ꓐꓴ ꓠꓬ ꓓꓵꓽ ꓙ ꓮʼ ꓠꓬꓲ꓾ ꓒꓰ. ꓩꓴ ꓠꓬꓲ ꓐꓰ ꓬꓲ ꓪ ꓓꓵꓽ ꓙ ꓟꓶˍ ꓟ ꓔꓯ ꓡꓰꓽ ꓐꓯ ꓡꓯ ꓘꓳ ꓠꓬꓲ ꓮ ꓫꓵꓽˍ ꓟꓲ ꓟꓽ ꓒꓬꓱꓼ ꓡ꓿ ꓮꓽ ꓔꓳ ꓔꓳ ꓚꓬꓽ ꓚ ꓔꓬ ꓢꓴ ꓐꓴ ꓥ ꓡꓳ꓿ ꓕꓱ ꓡ ꓞꓳ 4 ꓙꓰꓽ ꓟ ꓗꓪ ꓠꓴ ꓐꓰ ꓥꓪ ꓠꓬ ꓮ ꓡꓲ ꓕꓲ ꓫꓵꓽ ꓗꓪ ꓚꓬꓼ ꓢꓴ꓾ ꓐ ꓢꓴ ꓥ ꓡ ꓐꓯˍ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ꓾ ꓙꓲꓻˍ ꓟ ꓕꓲ ꓙꓰꓽ ꓔꓯ ꓢꓲꓺ ꓣꓴ ꓛꓳ ꓫꓱꓽ ꓐ ꓡ ꓠ, ꓟ ꓢꓯꓼ ꓕꓵꓼ ꓙꓰ ꓓꓴ ꓬꓰ ꓡꓯ꓿
