ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (22) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 14ꓽ1ꓽ7‐14 ꓝꓲ. ꓗꓪ ꓛꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓒ‐ꓡꓲ‐ꓢꓷ ꓐꓴ ꓔꓯ ꓙꓵꓽ ꓢꓴ ꓦꓲꓻ ꓕꓲ ꓦꓲꓻ ꓗꓪ ꓓꓵ ꓡꓰ ꓢꓲ ꓠꓬꓲ ꓜ ꓜꓽ ꓗꓷ ꓕꓯ ꓪꓰ ꓤ ꓐꓴ ꓠꓬ ꓞꓳ ꓪꓴꓽ ꓠꓬꓲ. ꓠ. ꓖꓴ ꓔꓯ ꓢꓲ ꓣꓴ ꓟ ꓔꓯ ꓬꓰ‐ꓢꓴ ꓟꓳ ꓕꓯ ꓔꓯꓺ ꓥꓳꓽ ꓡꓰ ꓬꓲ ꓪ ꓔꓯ ꓐꓯ ꓟ. ꓖꓶ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓢꓴ ꓡꓰ ꓠꓴ ꓪ ꓔꓯ ꓤ ꓟꓶ ꓝꓱ ꓑꓮꓲ ꓗꓪ ꓘꓴˍ ꓕꓯ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬꓲ. ꓠ. ꓖꓴ ꓗꓪ ꓕꓽ ꓠꓬꓲ. ꓠ. ꓬꓰ꓿ ꓢꓴ ꓡꓰ ꓠꓴ ꓪ ꓔꓯ ꓘꓴ ꓡ ꓕꓯ ꓟꓽ ꓒꓵꓽ ꓟ ꓠꓬꓲ. ꓠ. ꓖꓴ ꓗꓪ ꓧꓶ. ꓕꓯ ꓠꓬꓲ. ꓠ. ꓐꓰ ꓐꓯ ꓖꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓐꓯ ꓟ. ꓖꓶ ꓡ ꓟ ꓠꓬ ꓮ ꓡꓲꓳ ꓐꓯ ꓠꓬ ꓚꓲ. ꓛꓬ ꓔꓯ ꓓꓳ, ꓟꓴ ꓢꓴ ꓥ ꓕ ꓑꓳ,ꓠꓬ ꓱʼ ꓡꓰˍ ꓥꓳ꓿ ꓚꓲ. ꓛꓬ ꓔꓯ ꓙ ꓣꓳꓽ ꓡꓰ ꓝꓲ ꓢꓴ ꓠꓽ ꓓꓳ, ꓟꓴ ꓟꓶ ꓥꓳ ꓐꓰ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓠꓬ ꓮ ꓘꓶ. ꓙꓲ ꓟ ꓟꓬꓱꓽ ꓮ ꓘꓶ. ꓙꓲ ꓟ ꓣꓱ ꓫꓵꓽ ꓣꓱ ꓙꓲ ꓔꓯ ꓡꓰ ꓣꓳ ꓠꓲ, ꓫꓵˍ ꓢꓴ ꓟꓲ ꓠꓯ ꓡ ꓞꓳ ꓐꓴ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓣꓳ ꓠꓬ ꓮ ꓟꓴ ꓟꓴ ꓗꓪ ꓔꓬ ꓠꓲ, ꓫꓵˍ ꓝꓮꓲ ꓮ ꓘꓶ. ꓓꓽ ꓒꓽ ꓒꓬꓱꓼ ꓡ ꓠ,ꓟ ꓐꓱ ꓶ ꓟꓲ ꓛꓬ ꓗꓪ ꓐꓰ ꓮꓽ ꓤ ꓤ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿
ꓠꓬꓲ. ꓠꓬꓲ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓚꓲ. ꓛꓬ ꓔꓯ ꓙ ꓣꓳ ꓢꓴ ꓔꓯ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓟꓬꓱꓽ ꓓꓳꓽ ꓖꓶ ꓠ, ꓟ ꓐꓰ ꓬꓲ ꓔꓯ ꓛꓵ ꓓꓴ ꓠ, ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓚꓵ ꓚꓵ ꓙ ꓣꓳ ꓟ ꓠꓲ, ꓙꓳ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓢꓲꓺꓒ ꓬꓰ‐ꓢꓴ ꓒꓬꓱ ꓔꓯ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓘꓴꓽ ꓗꓪ ꓙ ꓣꓳ ꓟ ꓠꓲ, ꓟ ꓮ ꓘꓶ. ꓟꓽ ꓙꓳ ꓡꓰ ꓟ ꓔꓯ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓗ. ꓠꓯ ꓢꓲ ꓛꓳꓽ ꓢꓴ ꓐꓴ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓙ ꓣꓳ ꓟ ꓐꓵ ꓞꓲ ꓖꓪ ꓔ ꓠ, ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓗꓪ ꓐꓰ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓡꓰ ꓣꓳ ꓔꓯ ꓓꓳ, ꓟꓴ ꓡ ꓟ ꓟꓬꓱꓺ ꓓꓳꓽ ꓖꓶ ꓡ ꓟ ꓔꓯ ꓣꓳ ꓕꓽ ꓧꓪ ꓡꓯ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓟꓬꓱꓺ ꓓꓳꓽ ꓖꓶ ꓡ ꓟ ꓔꓯ ꓣꓳ ꓧꓪ ꓓꓴ ꓬꓰ ꓡꓯ꓿ ꓕꓱ ꓡꓱ ꓬꓰ ꓠ,ꓟ ꓙ ꓣꓳ ꓟ ꓠꓲ, ꓙ ꓣꓳ ꓟ ꓠꓲ, ꓟ ꓙꓳ ꓢꓴ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓠ,ꓟ ꓥ ꓡꓳ꓿
ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓮ ꓐꓲ ꓥ ꓟꓲ ꓮ‐ꓠꓬꓲ ꓡꓳ ꓔꓴ ꓘꓴꓽ ꓗꓪ ꓣꓳ ꓐꓱ ꓶ ꓦꓵꓻ ꓡ ꓗꓷꓳ꓿ ꓝꓮꓲ ꓮ‐ꓓꓯ ꓐꓰ ꓰ‐ꓪ ꓡꓰ ꓬꓰ ꓛꓬ ꓗꓷ ꓟ ꓝꓴꓲ ꓔꓯ ꓣꓳ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓐꓴ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓠ,ꓟ ꓐ, ꓐ ꓪꓴ‐ꓢ ꓠꓬ ꓮ‐ꓐꓲ ꓔꓯ ꓟꓲ ꓠꓯ ꓫꓵꓻ ꓙ ꓗꓪ ꓛꓲ ꓚꓬꓴ ꓗꓷ ꓟ ꓠꓬ ꓙ ꓣꓳ ꓠꓲ, ꓟ ꓐꓱ ꓶ ꓚꓬꓴ ꓟꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓗꓪ ꓐꓰ ꓙ ꓣꓳ ꓟ ꓠꓲ, ꓟ ꓣꓳ ꓢꓲ ꓠꓬꓲ ꓢꓴ ꓡꓰ ꓣꓳ ꓔꓯ ꓟꓬꓱꓺ ꓓꓳꓽ ꓖꓶ ꓠ, ꓟ ꓟꓬꓱꓽ꓾ ꓝꓮꓲ ꓟꓬꓱꓺ ꓓꓳꓽ ꓧꓪ ꓟ ꓟꓬꓱꓽ ꓔꓯ ꓤ ꓟꓳ ꓢꓲ ꓠꓬꓲ ꓙ ꓣꓳ ꓠꓲ, ꓟ ꓡꓰ ꓫ. ꓓꓴ ꓟꓷ ꓢꓴ ꓐꓴ ꓔꓯ ꓬꓰ ꓙ ꓡꓯ꓿ ꓢꓲꓺꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓔ ꓟ ꓙ ꓣꓳ ꓠꓲ, ꓟ ꓔꓯ ꓮ ꓕꓯ ꓥ ꓟꓲ ꓣꓳ ꓠꓲ, ꓟ ꓘꓴꓽ ꓗꓪ ꓙꓳ ꓝꓲ ꓠ,ꓟ ꓢꓯꓼ ꓕꓵꓼ ꓡꓯ꓿ ꓮ ꓫꓵꓽ ꓟꓬꓱꓽ ꓬꓰ ꓥ ꓟꓲ ꓙ ꓣꓳ ꓟ ꓠꓲ, ꓡꓰ ꓣꓳ ꓬꓰ ꓡꓯ꓿ ꓢꓲꓺ ꓒ ꓔꓯ ꓣꓳ ꓧꓪ ꓡꓯ ꓫ. ꓟꓳ ꓪ꓿
