ꓕꓲ ꓧꓪ, ꓙꓳˍ ꓠꓬ ꓢꓲ ꓒ ꓬꓰ‐ꓢꓴ ꓔꓯ꓾ ꓒ‐ꓡꓲ‐ꓢꓷ ꓐꓴ ꓔꓯ ꓙꓵꓽ ꓢꓴ ꓞꓳ ꓔꓲ ꓕꓲ ꓣꓳ ꓜꓻ ꓘꓴ ꓖꓶ ꓜꓽˍ ꓡꓳ꓿ ꓕꓱ ꓡꓱ ꓜꓻ ꓘꓴ ꓖꓶ ꓜꓽˍ ꓕꓯ ꓞꓳ ꓤ ꓮ ꓟꓬ, ꓠꓬ ꓔꓬ ꓔꓶ. ꓙꓲꓻˍ ꓟ ꓗꓪ꓾ ꓞꓳ ꓪꓴꓽ ꓞꓳ ꓔꓲ ꓠꓬꓲ ꓠ. ꓖꓴ ꓗꓪ ꓢꓲꓺ ꓢꓲ ꓠꓬꓲ ꓠꓬꓲ ꓠ. ꓔꓬ ꓟ ꓔꓯ ꓢꓲ ꓒ ꓬꓰ‐ꓢꓴ ꓡꓳ. ꓟꓳˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓪ ꓔꓯ꓾ ꓠꓴ ꓪ ꓔꓯ ꓢꓴ ꓡꓰ ꓘꓴ ꓖꓶ ꓜꓽ ꓘꓴ ꓖꓶ ꓓꓳꓻˍ ꓕꓯ ꓮ ꓘꓶ. ꓙꓲꓻˍ ꓟ ꓬꓲ ꓔꓶ. ꓗꓪ ꓕꓽ ꓔꓬ꓿ ꓞꓳ ꓪꓴꓽ ꓞꓳ ꓔꓲ ꓐꓴ ꓬꓲ ꓔꓶ. ꓗꓪ ꓕꓽ ꓙꓰ꓿ ꓖꓳ ꓡꓱ ꓙꓰˍ ꓠꓬ ꓠꓴ ꓢꓶ. ꓟꓽ ꓞꓲ ꓒꓵꓽ ꓢꓴ ꓪꓴꓽ ꓢꓴ ꓕꓲ ꓣꓳ ꓡˍ ꓠꓬ ꓠꓴ ꓔꓯ꓾ ꓛꓳꓽ ꓒꓯ,ꓳ꓾ ꓕꓱ ꓕꓲ ꓣꓳ ꓐꓱ ꓶ ꓔꓬ, ꓖꓴ ꓝꓽ ꓖꓶ ꓡꓯ꓾ ꓐꓰ ꓐꓯ ꓡˍ ꓕꓯ ꓠꓴ ꓫ. ꓔꓳ ꓡꓰˍ ꓥꓳ꓿
ꓑꓮꓲꓽ ꓗꓪ ꓙꓰˍ ꓕꓯ ꓱˍ ꓟ ꓬꓲ ꓔꓶ. ꓗꓪ ꓠꓬꓲ ꓠ.꓾ ꓖꓳ ꓡꓱ ꓠꓬ ꓠꓴ ꓔꓯ꓾ ꓛꓳꓽ ꓒꓯ,ꓳ꓾ ꓮ ꓟꓴ. ꓟꓴ ꓗꓪ ꓡꓯ ꓐꓰ ꓘꓴˍ ꓕꓯ ꓠꓴ ꓠꓬ ꓪ ꓜꓲ ꓒꓵꓽ ꓙꓳˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓟ (ꓡꓴ‐ꓘ꓿ 14ꓽ7‐14) ꓗꓪ ꓣꓳ ꓑ ꓙꓽˍ ꓡꓳ꓿ ꓢ. ꓠꓯ ꓗꓪ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓵꓻ ꓠ, ꓟ ꓥ ꓡꓳ꓿ ꓙ ꓣꓳꓽ ꓠꓲ, ꓐꓯˍ ꓟ ꓠꓬ ꓮ ꓡꓲ ꓘꓶ ꓛꓲ ꓬꓳ. ꓚꓰꓽˍ ꓟ꓾ ꓙ ꓣꓳꓽ ꓠꓲ, ꓠꓬ ꓞꓳ ꓤ ꓕꓲ ꓣꓳ ꓔꓯ ꓮ ꓡꓲ ꓘꓶ ꓛꓲ ꓑ ꓡꓶ. ꓐ ꓡˍ ꓟ꓾ ꓞꓳ ꓤ ꓕꓲ ꓣꓳ ꓔꓯ ꓮ ꓡꓲ ꓘꓶ ꓛꓲ ꓪꓴꓽˍ ꓟ ꓬꓰ ꓐ ꓡˍ ꓡ꓾ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓡꓳ. ꓟꓳˍ ꓡꓳ꓿
ꓪꓴ‐ꓢ ꓠꓬ ꓮ ꓫꓵꓽ ꓑꓶ. ꓓꓴ ꓙ ꓣꓳꓽ ꓠꓲ, ꓔꓯ ꓕꓱ ꓘꓶ ꓛꓲ ꓠꓲ, ꓠꓵˍ ꓡ꓿ ꓙ ꓣꓳꓽˍ ꓟ ꓡ ꓞꓳ ꓙ ꓣꓳꓽˍ ꓟ ꓞꓳ ꓤ ꓔꓯ ꓬꓲ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓐꓰ ꓗꓶ ꓔ ꓢꓲ ꓬꓲ ꓔꓯ ꓠꓬꓲ ꓙ ꓡꓳ. ꓙˍ ꓟ꓾ ꓔ ꓙˍ ꓟ ꓔꓯ ꓮ ꓫꓵꓽ ꓑꓶ. ꓓꓴ ꓕꓱ ꓘꓶ ꓛꓲ ꓬꓰˍ ꓡ꓿ ꓙ ꓣꓳꓽ ꓠꓲ, ꓕꓱ ꓟ ꓠꓬ ꓮ ꓫꓵꓽ ꓥ ꓡ ꓣꓳ ꓡꓳ. ꓠꓬꓲ ꓡꓯ꓿ ꓥ ꓡꓳ꓾ ꓙ ꓣꓳꓽ ꓠꓲ, ꓐꓯˍ ꓟ ꓠꓬ ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓟꓶ ꓢꓴ ꓥ ꓡꓳ ꓐꓯˍ ꓟ ꓔꓯ ꓣꓷꓠ. ꓢꓴ ꓥ ꓡꓳ꓿ ꓪꓴ‐ꓢ ꓟꓽ ꓥ ꓠꓬ ꓣꓳ ꓛꓳ ꓤ ꓟꓽ ꓒꓬꓱꓼ ꓡ꓿ ꓪꓴ‐ꓢ ꓟꓽ ꓥ ꓠꓬ ꓣꓳ ꓮ ꓫꓵꓽ ꓡꓰ. ꓟꓽ ꓒꓬꓱꓼ ꓡ꓿ ꓚꓰꓼ ꓢꓴ ꓠꓬ ꓪꓴ‐ꓢ ꓥ ꓡꓳ꓿ ꓚꓰꓼ ꓢꓴ ꓠꓬ ꓪꓴ‐ꓢ ꓕꓲ ꓣꓳˍ ꓡꓰꓽ ꓙꓳˍ ꓡꓳ꓿ ꓕꓱ ꓟ ꓔꓯ ꓣꓷꓠ. ꓐ ꓡˍ ꓟ꓾ ꓕꓱ ꓟ ꓔꓯ ꓙꓵꓻ ꓐ ꓡˍ ꓟ ꓙ ꓣꓳꓽ ꓠꓲ, ꓙꓳˍ ꓟ ꓥ ꓡꓳ꓿
ꓝꓮꓲ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿ ꓥꓪ ꓠꓬ ꓛꓱꓼ ꓡꓱꓼ ꓚ ꓥ ꓡꓳ꓿ ꓠꓴ ꓪ ꓠꓬ ꓬꓲ ꓡꓯꓼ ꓗ. ꓥ ꓡꓳ꓿ ꓥꓪ ꓚꓳ. ꓗꓳ. ꓙꓰ ꓠꓬ ꓠꓴ ꓪ ꓠꓬ ꓮ ꓫꓵꓽ ꓟꓲ ꓬꓰ ꓟꓽ ꓐ ꓡ꓾ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓛꓱꓼ ꓡꓱꓼ ꓬꓲ ꓚꓺ ꓥ ꓟ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓠꓱꓽ ꓞ, ꓕꓯ꓾ ꓪꓴ‐ꓢ ꓗꓪ ꓐꓰ ꓣꓳ ꓗꓶ, ꓶꓽ ꓙꓰ ꓕꓯ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓣꓳ ꓢꓷ. ꓠꓲ, ꓣꓳ ꓢꓯꓼ ꓪ ꓗꓪ ꓐꓰˍ ꓡꓰꓽ ꓢꓯꓼ ꓕꓵꓼˍ ꓕꓯ ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓠꓬ ꓥꓳꓽˍ ꓡꓳ ꓐꓰ ꓐꓯˍ ꓟ ꓕꓲ ꓡꓰ, ꓥꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓚꓳ. ꓟꓽ ꓥ ꓠꓬ ꓠꓴ ꓪ ꓮ ꓫꓵꓽˍ ꓟꓲ ꓟꓽ ꓐ ꓡ ꓐꓯ ꓔ ꓥˍ ꓟꓲ ꓣꓳ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓴ ꓟꓽ ꓔꓬ ꓥˍ ꓟꓲ꓾ ꓪꓴ‐ꓢ ꓠꓴ ꓥꓪ ꓤꓶꓻ ꓗꓪ ꓟꓽ ꓡ ꓥˍ ꓟꓲ꓾ ꓪꓴ‐ꓢ ꓠꓴ ꓥꓪ ꓔꓯ ꓟꓽ ꓬꓰ ꓙ ꓥˍ ꓟꓲ ꓥꓪ ꓬꓰ ꓐ ꓡˍ ꓡꓳ꓿ ꓥꓪ ꓢꓷ. ꓠꓲ, ꓥꓪ ꓪꓴ. ꓓꓵ꓾ ꓥꓪ ꓢꓯꓼ ꓟꓬ꓾ ꓥꓪ ꓛꓲ ꓒꓯ, ꓡꓯꓽ ꓒꓯ, ꓗꓪ ꓐꓰ ꓥꓪ ꓬꓰ ꓐ ꓡˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓒꓳ, ꓔꓳ, ꓟ ꓪꓴ‐ꓢ ꓔꓯ ꓒꓳ, ꓔꓳ, ꓟ ꓡꓰ ꓐꓰ ꓗꓷ ꓡꓰˍ ꓡꓳ꓿ ꓖꓳ ꓡꓱ ꓠꓬꓲ ꓕꓰ ꓡꓰ ꓟꓽ ꓗꓷ ꓡꓰ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓠꓬ ꓙ ꓣꓳꓽ ꓠꓲ, ꓣꓱꓽ ꓢꓲ ꓠꓬꓲ ꓞꓳ ꓙꓳ ꓐꓰ ꓣꓳ ꓔꓯ ꓟ. ꓖꓶ ꓡˍ ꓡꓳ꓿
ꓝꓮꓲ ꓙ ꓣꓳꓽ ꓠꓲ, ꓙꓳ ꓢꓴ ꓠꓬ ꓮ ꓫꓵꓽ ꓬꓰˍ ꓥ ꓟꓲ ꓪꓴ‐ꓢ ꓐꓰ ꓠꓲ, ꓟ ꓙ ꓡꓯ ꓘꓳ ꓢꓲ ꓠꓬꓲ ꓕꓲ ꓡꓰ, ꓬꓰˍ ꓡꓳ꓾ ꓐꓯˍ ꓟ ꓣꓳ ꓡꓳ. ꓟꓳꓻˍ ꓡꓳ꓿ ꓬꓲ ꓠꓬ ꓮ ꓫꓵꓽ ꓬꓰˍ ꓥ ꓟꓲ ꓮ ꓫꓵꓽ ꓓꓵꓽ ꓙꓽˍ ꓥ ꓟꓲ ꓦꓻ ꓕꓲ ꓚꓱ, ꓗꓪ ꓙ ꓫꓱꓽ ꓙꓰˍ ꓥ ꓟꓲ ꓬꓲ ꓚꓲ. ꓛꓬ ꓢꓯꓼ ꓪ ꓬꓲ ꓚꓲ. ꓛꓬ ꓢꓷ. ꓠꓲ, ꓬꓲ ꓢꓷ. ꓔ ꓟ ꓠꓽ ꓟꓽ ꓡꓳꓼ꓿ ꓪꓴ‐ꓢ ꓟꓽ ꓬꓰ ꓙ ꓠꓬ ꓟꓽ ꓓꓻ꓾ ꓐꓯˍ ꓟ ꓔꓯ ꓢꓷ.ˍ ꓟ ꓑꓶ. ꓓꓴ ꓮ ꓕꓯ ꓥ ꓟꓲ ꓙ ꓣꓳꓽ ꓠꓲ, ꓡꓰ ꓪꓴ‐ꓢ ꓐꓰ ꓖꓪ ꓙꓱ ꓡꓯ ꓘꓳ ꓢꓲ ꓠꓬꓲ ꓪꓴ‐ꓢ ꓔꓯ ꓪꓽ ꓘꓴ ꓢꓲ ꓠꓬꓲ ꓬꓰˍ ꓡꓳ꓿ ꓕꓲ ꓫꓵꓽ ꓫꓵꓽ ꓬꓰˍ ꓥ ꓟꓲ꓾ ꓬꓲ ꓤꓶꓻ ꓗꓪ ꓕꓲ ꓫꓵꓽ ꓫꓵꓽ ꓓꓵꓽ ꓙꓽ ꓞꓷ, ꓥ ꓟꓲ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓪꓴ‐ꓢ ꓣꓱꓽ ꓛꓰꓽ ꓗꓪ ꓐꓰ ꓪꓽ ꓘꓴ ꓢꓲ ꓠꓬꓲ ꓬꓲ ꓞꓳ ꓙꓳˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓠꓲ, ꓠꓵˍ ꓟ ꓙ ꓣꓳꓽ ꓠꓲ, ꓥ ꓡꓳ꓿
ꓞꓳ ꓤ ꓐꓯˍ ꓟ ꓠꓬ ꓚꓰꓼ ꓔ ꓟ ꓟꓶ ꓢꓴ ꓥ ꓟ ꓑꓶ. ꓓꓴ ꓪꓴ‐ꓢ ꓟꓽ ꓥ ꓠꓬ ꓮ ꓫꓵꓽ ꓥˍ ꓟꓲ ꓬꓰ ꓟꓽ ꓐ ꓡ ꓐꓯˍ ꓟ ꓔꓯ ꓙꓵꓻ ꓔ ꓢꓲ ꓠꓬꓲ ꓚꓵ ꓚꓵ ꓚꓲ. ꓛꓬ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓔꓯˍ ꓡꓰꓽ ꓦ ꓡꓱ ꓠ, ꓟ ꓠꓬ ꓮ ꓘꓶ. ꓬꓳ. ꓚꓰꓽˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙ ꓣꓳꓽ ꓠꓲ, ꓟ ꓙꓳ ꓢꓴ ꓠꓬ ꓬꓲ ꓬꓰˍ ꓟ ꓬꓲ ꓞꓳ ꓙꓳˍ ꓟ ꓮ ꓙꓵꓽ ꓧꓪ. ꓡꓰˍ ꓕꓯ ꓥ ꓟꓲ꓾ ꓕꓱ ꓟ ꓠꓬ ꓪꓴ‐ꓢ ꓣꓱꓽ ꓛꓰꓽ ꓥ ꓡꓳ꓿ ꓪꓴ‐ꓢ ꓬꓰ ꓙˍ ꓟ ꓑꓶ. ꓓꓴ ꓪꓴ‐ꓢ ꓥꓪ ꓔꓯ ꓔ ꓙˍ ꓟ ꓑꓶ. ꓓꓴ ꓕꓱ ꓟ ꓧꓪ. ꓡꓰ ꓫꓵꓽ ꓥ ꓡꓳ꓾ ꓓꓻ ꓡꓰ ꓫꓵꓽ ꓥ ꓡꓳ꓾ ꓐꓰ ꓐꓯ ꓑꓶˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓠꓲ, ꓠꓵ ꓓꓰ ꓡꓰˍ ꓟ ꓙ ꓣꓳꓽˍ ꓟ ꓠꓲ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙ ꓣꓳꓽ ꓠꓲ, ꓠꓬ ꓮ ꓘꓶ. ꓬꓳ. ꓚꓰꓽˍ ꓡꓳ꓿ ꓣꓳ ꓤꓶꓻ ꓗꓪ ꓙ ꓣꓳꓽ ꓠꓲ, ꓐꓯˍ ꓟ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓮ ꓘꓶꓽ ꓒꓵꓽˍ ꓟ ꓤꓲꓻ ꓟ꓾ ꓮ ꓘꓶ. ꓒꓵꓽˍ ꓟ ꓒꓴ ꓫꓵ ꓕꓲ ꓫꓵꓽ ꓥ ꓟ ꓑꓶ. ꓓꓴ ꓮ ꓕꓯ ꓥ ꓟꓲ ꓚꓲ. ꓛꓬ ꓡꓯꓼ ꓚꓳ. ꓡꓯꓼ ꓖꓳꓼ ꓠꓯꓸꓼ ꓗꓪ ꓙꓲꓻˍ ꓟ ꓕꓱ ꓟ ꓔꓯ ꓪꓳ ꓫꓳ. ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿ ꓙ ꓣꓳꓽˍ ꓟ ꓗꓪ ꓐꓰ ꓣꓳ ꓐꓱ ꓶ ꓮ ꓘꓶ. ꓙꓲꓻˍ ꓟ ꓟꓶ ꓡꓰˍ ꓡꓳ꓿
ꓪꓴ‐ꓢ ꓬꓲ ꓚꓰꓼ ꓫꓵꓽ ꓚꓰꓼ ꓙꓰꓽ ꓔꓯ ꓚꓰꓼ ꓔ ꓕꓯ ꓥˍ ꓟꓲ ꓞꓳ ꓤ ꓔꓯ ꓠꓬ ꓬꓲ ꓐꓰ ꓫꓱ.ˍ ꓟ ꓔꓯ ꓚꓰꓼ ꓔ ꓡꓳ꓿ ꓕꓱ ꓟ ꓔꓯ ꓙ ꓣꓳꓽ ꓠꓲ, ꓗꓪ ꓐꓰ ꓡꓰꓽ ꓣꓳ ꓟꓳꓻ ꓐ ꓡˍ ꓡꓳ꓿ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓯꓸꓼ ꓗꓪ ꓓꓯ, ꓟ ꓪꓴ‐ꓢ ꓶꓻ ꓒꓬꓱꓽ ꓟꓳꓻ ꓐ ꓡ ꓠ, ꓟ ꓐꓱ ꓶ ꓙ ꓣꓳꓽ ꓠꓲ, ꓣꓱꓽ ꓞ, ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓔ ꓟ ꓡꓰ ꓐꓰ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓙ ꓣꓳꓽ ꓠꓲ, ꓗꓶ ꓡꓯ꓿ ꓣꓳ ꓕꓲ ꓙꓰꓽ ꓙꓰꓽ ꓓꓵꓽ ꓙꓽ ꓞꓷ, ꓥ ꓟꓲ ꓪꓴ‐ꓢ ꓔꓯ ꓪꓽ ꓘꓴ꓿ ꓕꓲ ꓫꓵꓽ ꓫꓵꓽ ꓬꓰˍ ꓥ ꓟꓲ ꓪꓴ‐ꓢ ꓔꓯ ꓖꓪ ꓙꓱ꓿ ꓕꓲ ꓫꓵꓽ ꓫꓵꓽ ꓣꓳ ꓤꓶꓻ ꓗꓪ ꓔꓳ, ꓜꓳꓽ ꓡˍ ꓥ ꓟꓲ꓾ ꓮ ꓫꓵꓽ ꓬꓰˍ ꓥ ꓟꓲ ꓪꓴ‐ꓢ ꓐꓰ ꓗꓴ. ꓙꓲꓽ ꓙꓳ ꓢꓲ ꓠꓬꓲ ꓣꓳ ꓠꓲ, ꓟ ꓕꓲ ꓟ ꓡꓱꓸꓼ ꓬꓲ ꓔꓯ ꓠꓳꓽ ꓞ, ꓢꓲ ꓠꓬꓲ ꓞꓳ ꓙꓳ ꓙꓰ ꓡꓯ꓿ ꓢꓲ, ꓜꓲ ꓕꓲ ꓜꓲ ꓗꓪ ꓬꓲ ꓚꓰ ꓐꓰ ꓟꓽ ꓠꓶꓼ ꓓ, ꓟ ꓬꓲ ꓡꓯꓼ ꓗ. ꓐꓴ ꓠꓬ ꓙꓴꓺ ꓡꓰ ꓢꓲ ꓠꓬꓲ ꓫꓵꓻ ꓬꓰˍ ꓡꓳ꓿ ꓛꓵꓽ ꓡꓰˍ ꓡꓳ꓿ ꓕꓱ ꓟˍ ꓡꓰ ꓐꓰ ꓣꓳ ꓢꓯꓼ ꓟꓬ ꓥ ꓕ ꓑꓳꓸꓼ ꓬꓲ ꓚꓰ ꓥ ꓟꓲ ꓢꓲ ꓒ ꓬꓰ‐ꓢꓴ ꓐꓰ ꓗꓶ, ꓶꓽ ꓡꓰ ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓠꓳꓽ ꓓ, ꓕꓯ ꓣꓳ ꓠꓬ ꓮ ꓡꓲ ꓥˍ ꓟꓲ ꓞꓷ, ꓬꓰˍ ꓥꓳ꓿ ꓣꓳ ꓢꓯꓼ ꓪ ꓠꓬ ꓟꓽ ꓐꓲ ꓡ꓿ ꓣꓳ ꓢꓯꓼ ꓪ ꓠꓬ ꓟꓽ ꓡꓳꓼ ꓡ꓾ ꓕꓱ ꓟ ꓔꓯ ꓣꓳ ꓓꓵꓽ ꓙꓽ ꓡꓯ꓿ ꓕꓱ ꓟ ꓔꓯ ꓬꓲ ꓜꓶ ꓓꓵꓽ ꓙꓽ ꓠꓬꓲ ꓢꓲ ꓠꓬꓲ ꓙ ꓣꓳꓽ ꓠꓲ, ꓠꓬ ꓞꓳ ꓤ ꓕꓲ ꓣꓳ ꓔꓯ ꓕꓱ ꓘꓶ ꓛꓲ ꓢꓯꓼ ꓪ ꓖꓶ ꓐ ꓡˍ ꓡꓳ꓾ ꓐꓯˍ ꓟ ꓔꓯ ꓓꓵꓽ ꓙ ꓠꓬꓲ ꓡꓯ꓿
