ꓮ ꓡꓰ ꓫꓵ ꓡ ꓞꓳ ꓠꓬ ꓖꓳ ꓓꓱ ꓔꓲꓹ ꓐ ꓡ ꓡ꓾
ꓮꓽ ꓟ ꓥ ꓟꓲ ꓖꓳ ꓓꓱ ꓔꓲꓹ ꓐ ꓡ ꓡꓳ꓾ ꓖꓳ ꓓꓱ ꓔꓲꓹ ꓐ ꓡ ꓟ ꓡꓰ ꓟꓽ ꓞꓲ ꓖꓳ ꓓꓱ ꓟꓲ ꓔꓲꓹ ꓐ ꓡ ꓡꓳ= ꓮꓽ ꓟ ꓥ ꓟꓲ ꓖꓳ ꓓꓱ ꓟꓽ ꓔꓲꓹ ꓢꓴ ꓥ ꓔ ꓑꓳꓸ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓥ ꓔ ꓑꓳꓸ ꓖꓳ ꓓꓱ ꓔꓲꓹ ꓠ ꓡꓳ ꓐꓰ ꓐꓳ ꓔ ꓡꓳ= ꓗ ꓕꓳ ꓡꓲꓗ ꓘꓴ ꓜꓲꓼ ꓞꓳ ꓘꓴ ꓠꓯꓼ ꓗꓪ ꓖꓳ ꓓꓱ ꓔꓲꓹ ꓟ ꓚꓱꓹ ꓗꓪ ꓞꓳ ꓪꓴ ꓓꓵ ꓙ ꓗꓴꓸ ꓟ ꓬꓲꓸ ꓞꓲꓼ ꓟꓽ ꓛꓲ ꓡ ꓕꓯ ꓥ ꓟꓲ ꓮ ꓟꓲꓽ ꓤ ꓮ ꓐꓲ ꓤ ꓔꓯ ꓥ ꓟꓲ ꓖꓳ ꓓꓱ ꓔꓲꓹ ꓖꓶ_ ꓟ ꓙꓳ_ ꓡꓳ= ꓮ ꓫꓵ ꓑꓶ ꓓꓴ ꓖꓳ ꓓꓱ ꓔꓲꓹ ꓖꓶ_ ꓡ? ꓥ ꓡꓳ꓾ ꓮꓽ ꓐ ꓮ ꓟ ꓣꓱ ꓢꓴ ꓠꓬ ꓚꓲ ꓛꓬ ꓤ ꓠꓱ ꓔꓯ ꓐꓱ ꓖꓶ ꓟꓸ ꓖꓶ ꓠꓹ ꓟ ꓶꓻ ꓙꓳ_ ꓡꓳ= ꓕꓱ ꓟ ꓡꓰ ꓟꓽ ꓞꓲ ꓤ ꓫꓵꓸ ꓤ ꓠꓱ ꓕꓱ ꓟ ꓠꓬ ꓦꓶ ꓦꓶ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓠꓹ ꓟ ꓠꓲꓹ ꓡꓶꓽ ꓙꓳ_ ꓡꓳ= ꓮ ꓫꓵ ꓑꓶ ꓓꓴ ꓥ ꓡ꓾ ꓔꓯ ꓥꓳ꓾ ꓬꓲ ꓞꓲꓼ ꓪꓴꓽ ꓡ ꓕꓯ ꓢꓲ ꓬꓲ ꓔꓯ ꓙꓲ_ ꓟ ꓐꓰ ꓟꓽ ꓙꓲ_ ꓟ ꓢꓲ ꓗꓴꓸ ꓕꓯ ꓢꓲ ꓡꓰ ꓬꓲ ꓔꓯ ꓖꓳ ꓓꓱ ꓔꓲꓹ ꓖꓶ ꓕꓯ ꓠꓬ ꓮ ꓘꓶꓸ ꓙꓲ_ ꓟ꓾ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓟ ꓙꓲ ꓖꓴ ꓚꓱꓹ ꓔꓯ ꓬꓲ ꓞꓲꓼ ꓣꓳ ꓕꓯ ꓡꓰ ꓟꓽ ꓘꓳꓹ ꓣꓴ ꓟꓶ ꓮ ꓐꓲ ꓤ ꓐꓴ ꓔꓯ ꓞꓲꓼ ꓣꓳ_ ꓟ ꓦꓬꓼ ꓠꓬꓲ ꓗꓪ ꓖꓳ ꓓꓱ ꓟꓽ ꓔꓲꓹ ꓖꓶ ꓟ ꓠꓬ ꓮ ꓫꓵ ꓔꓯ ꓫꓱꓹ ꓡ꓾ ꓐꓰ ꓣꓳ ꓔꓯ ꓠꓬꓲ ꓕꓯ ꓤ ꓠꓱ ꓤ ꓕꓱ ꓟ ꓠꓬ ꓣꓴ ꓓ ꓫꓵ ꓑꓶ ꓓꓴ ꓬꓲ ꓔꓯ ꓕꓳ ꓕꓽ ꓖꓶ ꓢꓴ ꓐꓱ ꓫꓱꓹ ꓡꓳ= ꓮꓽ ꓐꓽ ꓮ ꓟ ꓠꓬ ꓕꓳ ꓠꓬ ꓮ ꓘꓶꓸ ꓬꓲ ꓒꓵꓽ ꓙꓳ ꓟ ꓬꓲ ꓪ ꓢꓷꓸ ꓡꓳ= ꓕꓳ ꓶ ꓢꓳ ꓟ ꓗꓪ ꓐꓰ ꓤ ꓠꓱ ꓤ ꓕꓱ ꓟ ꓠꓬ ꓙꓲ ꓖꓴ ꓙꓳ_ ꓡꓳ ꓐꓯ_ ꓟ ꓮꓽ ꓐꓽ ꓮ ꓟ ꓢꓷꓸ ꓡꓳ= ꓖꓳ ꓡꓱ ꓠꓬꓲ ꓚꓲ ꓛꓬ ꓤ ꓠꓱ ꓔꓯ ꓬꓲꓪ ꓕꓳ ꓶ ꓬꓲ ꓒꓵꓽ ꓟꓽ ꓢꓷꓸ ꓥ ꓟꓲ ꓓꓵꓽ ꓙ ꓟꓽ ꓗꓴꓸ ꓢꓲ ꓥ ꓟꓲ ꓕꓳ ꓶ ꓢꓳ ꓝꓲ_ ꓡꓳ꓾
ꓕꓱ ꓟ ꓡꓰ ꓐꓰ ꓤ ꓠꓱ ꓤ ꓐꓴ ꓠꓬ ꓠꓵꓻ ꓠꓲꓹ ꓐꓯ_ ꓟ ꓠꓬ ꓮ ꓫꓵ ꓥ ꓡꓲ ꓟꓽ ꓢꓷꓸ ꓢꓲ ꓕꓯ ꓠꓵꓻ ꓠꓲꓹ ꓕꓱ ꓟ ꓘꓳꓹ ꓣꓴ ꓟꓶ_ ꓡꓳ꓾ ꓮꓽ ꓐ ꓮ ꓟ ꓗꓪ ꓐꓰ ꓠꓵꓻ ꓠꓲꓹ ꓕꓱ ꓟ ꓔꓯ ꓒ ꓐꓲ ꓘꓳꓹ ꓣꓴ ꓟꓶ_ ꓡꓳ=ꓬꓲ ꓠꓬ ꓠꓵꓻ ꓠꓲꓹ ꓐꓯ_ ꓟ ꓮ ꓫꓵ ꓥ ꓡꓲ ꓟꓽ ꓢꓷꓸ ꓢꓲ ꓖꓳ ꓡꓱ ꓥ ꓟꓲ ꓠꓵꓻ ꓠꓲꓹ ꓕꓱ ꓟ ꓠꓬ ꓬꓲ ꓘꓳꓹ ꓣꓴ ꓟꓶ ꓟ ꓥꓳ= ꓖꓳ ꓟ ꓡꓰ ꓐꓰ ꓤ ꓠꓱ ꓤ ꓕꓱ ꓟ ꓠꓬ ꓢꓯꓼ ꓟꓬ ꓐꓯ_ ꓟ ꓮ ꓫꓵ ꓥ ꓡꓲ ꓟꓽ ꓢꓷꓸ ꓢꓲ ꓕꓯ ꓡꓰ ꓢꓯꓼ ꓟꓬ ꓕꓲ ꓟ ꓪꓴ-ꓢ ꓡꓰ ꓖꓶ ꓗꓷꓳ= ꓢꓯꓼ ꓟꓬ ꓕꓲ ꓟ ꓬꓲ ꓘꓳꓹ ꓣꓴ ꓟꓶ ꓡꓰꓳ=ꓖꓳ ꓡꓱ ꓠꓬꓲ ꓬꓲ ꓟꓽ ꓢꓷꓸ ꓢꓲ ꓕꓯ ꓡꓰ ꓙꓲ_ ꓟ ꓮ ꓙꓵ ꓬꓲ ꓡꓰ ꓘꓳꓹ ꓣꓴ ꓟꓶ_ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓖꓳ ꓓꓱ ꓔꓲꓹ ꓟ ꓥ ꓟꓲ ꓮ ꓘꓶꓸ ꓙꓲ_ ꓟ ꓬꓲ ꓚꓱꓹ ꓕꓲ ꓚꓱꓹ ꓕꓱ ꓟ ꓔꓯ ꓠꓬ ꓞꓲꓼ ꓣꓳ ꓕꓯ ꓡꓰ ꓖꓳ ꓓꓱ ꓔꓲꓹ ꓖꓶ ꓠꓯ_ ꓡꓳ= ꓐ ꓡ ꓕ ꓑꓳꓸ ꓠꓯꓼ ꓡꓰ ꓖꓶ ꓠꓯꓹ ꓡꓳ꓾ ꓐꓰ ꓘꓴ ꓜꓲꓼ ꓞꓳ ꓗꓪ ꓐꓰ ꓟꓳꓸ ꓖꓶ ꓠꓯꓹ ꓡꓳ=ꓕꓱ ꓟ ꓠꓬ ꓙꓲ ꓖꓴ ꓚꓱꓹ ꓥ ꓡꓳ꓾ ꓮ ꓫꓵ ꓑꓶ ꓓꓴ ꓥ ꓡ꓾ ꓪꓴ-ꓢ ꓠꓬ ꓛꓬꓼ ꓔꓬ ꓡꓳ꓾ ꓪꓴ-ꓢ ꓠꓬ ꓞꓳ ꓤ ꓥ ꓕ ꓑꓳꓸ ꓔꓯ ꓠꓲꓹ ꓠꓵꓻ ꓢꓲ ꓠꓬꓲ ꓤ ꓠꓱ ꓤ ꓐꓴ ꓔꓯ ꓥ ꓟꓲ ꓬꓲ ꓤ ꓫꓵꓸ ꓤ ꓠꓱ ꓒꓬꓱꓼ ꓡ ꓠꓹ ꓟ ꓠꓲꓹ ꓡꓶꓽ ꓙꓳ_ ꓡꓳ꓾ ꓐꓯ_ ꓟ ꓘꓴ ꓜꓲꓼ ꓞꓳ ꓗꓪ ꓐꓰ ꓟꓳꓸ ꓖꓶ ꓡ ꓡꓳ= ꓮꓽ ꓟ ꓥ ꓟꓲ ꓪꓴ-ꓢ ꓔꓯ ꓙꓵꓻ ꓢꓴ ꓠꓬ ꓖꓳ ꓓꓱ ꓔꓲꓹ ꓠ ꓗꓹ ꓡꓳ= ꓮꓽ ꓐ ꓮ ꓟ ꓣꓱ ꓢꓴ ꓥ ꓟꓲ ꓚꓲ ꓛꓬ ꓤ ꓠꓱ ꓔꓯ ꓐ ꓡ ꓔ ꓑꓳꓸ ꓠꓯꓼ ꓠꓯꓼ ꓔꓲꓺ ꓒ ꓔꓬ ꓗꓪ ꓙꓰ ꓢꓲ ꓠꓬꓲ ꓖꓳ ꓓꓱ ꓔꓲꓹ ꓖꓶ ꓠꓹ ꓟ ꓮ ꓘꓶꓸ ꓬꓲꓼ ꓠꓬꓲꓸ ꓖꓶ ꓔ ꓟ ꓥ ꓡꓳ= ꓠꓯꓼ ꓠꓯꓼ ꓔꓲꓹ ꓟꓶ ꓠꓬꓲ ꓟꓬ ꓠꓬꓲ ꓙꓲ_ ꓡꓳ꓾ ꓮ ꓫꓵ ꓑꓶ ꓓꓴ ꓥ ꓡ꓾ ꓠꓲꓽ ꓢ-ꓓꓯ ꓝꓴꓲ ꓡꓰ ꓕꓳ ꓞ ꓟ ꓗꓪ ꓐꓰ ꓡꓲꓹ ꓙꓰ ꓟ ꓚꓱꓹ ꓥ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓚꓲ ꓛꓬ ꓤ ꓠꓱ ꓔꓯ ꓖꓳ ꓓꓱ ꓔꓲꓹ ꓖꓶ ꓠꓹ ꓟ ꓕꓽ ꓟꓲ ꓡꓰ ꓐꓰ ꓬꓲꓼ ꓠꓬꓲ ꓖꓶ ꓠꓲꓹ ꓫꓵ_ ꓡꓳ=
