ꓟ‐ꓕꓲ꓿24ꓽ42‐51
ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓡ‐ꓞꓳ‐ꓮ‐ꓐꓲ ꓠꓽ ꓘꓴꓽ ꓒꓽˍ ꓡꓰ ꓐꓰ ꓣꓳ ꓤꓶꓻ ꓠꓯꓸꓼ ꓗꓪ ꓓꓵꓽ ꓡˍ ꓥꓳ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓗꓪ ꓐꓰ ꓣꓳ ꓦꓻ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓠꓬ꓾ ꓡ‐ꓞꓳ‐ꓮ‐ꓐꓲ ꓠꓽ ꓮ ꓕꓯ ꓡˍ ꓟꓽ ꓢꓷ.꓿ ꓘꓴꓽ ꓒ ꓮ ꓕꓯ ꓡˍ ꓟ ꓟꓽ ꓢꓷ. ꓟ ꓡꓰ ꓐꓰ ꓡˍ ꓥꓳ꓿ ꓦꓲ ꓢꓲ ꓒ ꓠꓬ ꓘꓴꓽ ꓒ ꓮ ꓕꓯ ꓡˍ ꓟ ꓔꓯ ꓢꓷ.ˍ ꓕꓯ ꓠꓽ ꓬꓲ ꓠꓽ ꓖꓳ ꓕꓲ ꓙꓵ, ꓗꓪ ꓔꓴ ꓢꓲ ꓠꓬꓲ ꓙꓽ ꓖꓶ ꓔˍ ꓥꓳ꓿ ꓘꓴꓽ ꓒ ꓟꓽ ꓡ ꓠ, ꓟ ꓥꓳ꓿ ꓖꓳ ꓟ ꓕꓲ ꓡꓰ, ꓥꓳ꓾ ꓡ‐ꓞꓳ‐ꓮ‐ꓐꓲ ꓥˍ ꓟꓲ ꓮ ꓕꓯ ꓡˍ ꓟ ꓟꓽ ꓢꓷ. ꓟ ꓑꓶ. ꓓꓴ ꓠꓴ ꓪ ꓮ ꓕꓯ ꓥˍ ꓟꓲ ꓙꓽ ꓖꓶ ꓢꓲ ꓠꓬꓲ ꓔꓬ꓾ ꓐꓰ ꓐꓯˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓗꓪ ꓠꓬ ꓣꓳ ꓔꓯ ꓠꓬꓲꓽ ꓫꓵꓽ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓡ‐ꓞꓳ‐ꓮ‐ꓐꓲ ꓠꓽ ꓘꓴꓽ ꓒˍ ꓡꓰ ꓐꓰ ꓮ ꓕꓯ ꓡˍ ꓟ ꓟꓽ ꓢꓷ. ꓟ ꓕꓲ ꓡꓰ, ꓗ, ꓡꓳ꓾ ꓐꓰ ꓐꓯˍ ꓥꓳ ꓐꓯˍ ꓠꓬ ꓕꓱ ꓟ ꓮ ꓫꓵꓽ ꓔꓯ ꓐꓯ ꓔꓬ ꓡ ꓐꓯ ꓠꓬ꓾ ꓡ‐ꓞꓳ‐ꓮ‐ꓐꓲ ꓥˍ ꓟꓲ ꓮ ꓕꓯ ꓡˍ ꓟ ꓟꓽ ꓢꓷ.꓿ ꓖꓳ ꓟ ꓑꓶ. ꓓꓴ ꓣꓳ ꓠꓬ ꓙꓽ ꓖꓶ ꓔ ꓠ, ꓟ ꓬꓲ ꓠꓬ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓕꓱ ꓟˍ ꓡꓰꓽ ꓟꓽ ꓞꓲ ꓘꓴꓽ ꓒ ꓥˍ ꓟꓲ ꓮ ꓕꓯ ꓡˍ ꓟ ꓕꓯ ꓣꓳ ꓟꓽ ꓢꓷ.꓿ ꓕꓱ ꓟ ꓑꓶ. ꓓꓴ ꓘꓴꓽ ꓒ ꓟꓽ ꓓꓵꓽ ꓡ ꓠ, ꓟ ꓥˍ ꓟꓲ ꓙꓽ ꓖꓶ ꓔ ꓠ. ꓟ ꓬꓲ ꓠꓬ ꓣꓳ ꓔꓯ ꓕꓱ ꓡꓱ ꓐꓰ ꓐꓯ ꓟ. ꓖꓶ ꓔꓬ ꓟ ꓥ ꓡꓳ꓿
ꓦꓲ ꓢꓲ ꓒ ꓐꓯˍ ꓟ ꓠꓬ ꓣꓳ ꓥ ꓡꓳ꓿ ꓣꓳ ꓤꓶꓻ ꓔꓯ ꓐꓯ ꓔꓬ ꓟ ꓥ ꓡꓳ꓿ ꓣꓳ ꓤꓶꓻ ꓔꓯ ꓣꓳ ꓠꓬ ꓮ ꓕꓯ ꓥˍ ꓟꓲ ꓠꓬꓲ ꓡꓳ. ꓙꓽ ꓖꓶ ꓔꓬ ꓠ, ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓢꓲ ꓒ ꓬꓰ‐ꓢꓴ ꓣꓳ ꓠꓯꓸꓼ ꓗꓪ ꓮ ꓔꓯ ꓓꓵꓽ ꓡˍ ꓥ ꓟꓽ ꓢꓷ.꓿ ꓣꓳ ꓟꓽ ꓥꓳ ꓡꓳ. ꓔ ꓟ ꓗꓪ ꓘꓴꓽ ꓒˍ ꓡꓰ ꓐꓰ ꓓꓵꓽ ꓡˍ ꓥꓳ꓿ ꓕꓱ ꓟˍ ꓡꓰꓽ ꓟꓽ ꓞꓲ ꓣꓳ ꓤꓶꓻ ꓠꓯꓸꓼ ꓗꓪ ꓠꓬ ꓞꓳ ꓘꓴꓽ ꓥ ꓟ ꓠꓲꓽ ꓢ‐ꓓꓯ ꓥˍ ꓟꓲ ꓟꓽ ꓙꓲꓻ ꓫꓬ ꓟ ꓥˍ ꓟꓲ ꓣꓳ ꓤꓶꓻ ꓠꓯꓸꓼ ꓗꓪ ꓓꓵꓽ ꓡˍ ꓥꓳ꓿ ꓣꓳ ꓤꓶꓻ ꓦꓲ ꓠꓯꓸꓼ ꓗꓪ ꓓꓵꓽ ꓡˍ ꓥꓳ꓿
ꓢꓲ ꓒ ꓬꓰ‐ꓢꓴ ꓣꓳ ꓦꓲ ꓠꓯꓸꓼ ꓗꓪ ꓓꓵꓽ ꓡˍ ꓕꓯ ꓬꓲ ꓙꓲ ꓐꓰ ꓬꓲ ꓔꓯ ꓣꓳ ꓘꓳ ꓣꓴ ꓔ ꓥꓳ ꓐꓯ ꓠꓬ ꓣꓳ ꓤꓶꓻ ꓥ ꓟ ꓣꓳ ꓦꓲꓻ ꓠꓽ ꓗ, ꓛꓲꓽˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓡˍ ꓟ ꓔꓯ ꓣꓳ ꓠꓬ ꓟꓽ ꓥꓳ ꓡꓳ. ꓔꓬ ꓥꓳ ꓐꓯ ꓠꓬ ꓖꓳ ꓕꓲ ꓙꓵ, ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓟꓽ ꓘꓳ ꓣꓴ ꓣꓴ ꓐꓰ ꓠꓱ. ꓐꓯ ꓘꓴꓽ ꓒ ꓥ ꓟ ꓠꓲꓽ ꓢ‐ꓓꓯ ꓟꓽ ꓙꓲꓻ ꓟ꓾ ꓟꓬꓱꓽ ꓟꓽ ꓙꓲꓻ ꓟ ꓔꓯ ꓣꓳ ꓘꓳ ꓣꓴ ꓪ ꓡꓰ ꓗꓴ.ˍ ꓡꓳ꓿ ꓖꓳ ꓡꓱ ꓘꓳ ꓣꓴ ꓪ ꓡꓰ ꓕꓯ ꓠꓽ ꓣꓳ ꓤꓶꓻ ꓦꓲ ꓔꓯ ꓠꓲꓽ ꓢ‐ꓓꓯ꓾ ꓥ ꓠꓬ꓾ ꓖꓳ ꓟꓽ ꓙꓲꓻ ꓫꓬ ꓟ꓾ ꓫꓵꓻˍ ꓟ ꓮ ꓙꓵꓽ ꓠꓬ ꓣꓳ ꓤꓶꓻ ꓦꓲ ꓔꓯ ꓐꓬ ꓡꓰ ꓝꓲˍ ꓥꓳ꓿ ꓖꓳ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓠꓬꓲꓽ ꓙꓰꓽ ꓙꓳꓺ ꓗꓽ ꓖꓶ ꓔꓬ ꓟ ꓥ ꓡꓳ꓿
ꓬꓲ ꓪꓴ. ꓕꓲ ꓙꓰꓽ ꓟ ꓠꓬ ꓡ‐ꓞꓳ‐ꓮ‐ꓐꓲ ꓐꓱ ꓶ ꓠꓴ ꓪ ꓮ ꓕꓯ ꓥ ꓟꓲ ꓙꓽ ꓖꓶ ꓔꓬ꓾ ꓘꓳ ꓣꓴ ꓔꓬ꓿ ꓖꓳ ꓡꓱ ꓘꓳ ꓣꓴ ꓔꓬ ꓥꓳ ꓐꓯˍ ꓠꓬ ꓘꓴꓽ ꓒ ꓥ ꓟꓲ ꓟꓽ ꓙꓲꓻ ꓫꓬ ꓟ ꓠꓱ. ꓐꓯ ꓣꓳ ꓤꓶꓻ ꓔꓯ ꓐꓬ ꓡꓰ ꓝꓲ ꓓꓴ ꓮ ꓙꓵꓽ ꓠꓬ ꓟꓽ ꓓꓵꓽ ꓡ ꓠ, ꓟ ꓥꓳ꓿ ꓖꓳ ꓟ ꓔꓯ ꓣꓳ ꓕꓲ ꓧꓪ, ꓡꓰ ꓢꓷ. ꓓꓻˍ ꓟ ꓥ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓠꓬꓲ. ꓠꓬꓲ ꓣꓳ ꓤꓶꓻ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓡ‐ꓞꓳ‐ꓮ‐ꓐꓲ ꓮ ꓕꓯ ꓡˍ ꓟ ꓔꓯ ꓣꓳ ꓠꓲ, ꓟ ꓗꓪ ꓟꓽ ꓙꓳ꓿
ꓕꓱ ꓟ ꓑꓶ. ꓓꓴ ꓣꓳ ꓠꓬ ꓙꓽ ꓖꓶ ꓔˍ ꓟˍ ꓟꓲ ꓟꓽ ꓙꓳ꓿ ꓟꓽ ꓙꓳ ꓟ ꓑꓶ. ꓓꓴ ꓠꓬꓲ ꓣꓳ ꓦꓲ ꓠꓯꓸꓼ ꓗꓪ ꓮ ꓫꓵꓽ ꓓꓵꓽ ꓡˍ ꓡ ꓐꓯˍ ꓠꓬ ꓢꓲ ꓒ ꓬꓰ‐ꓢꓴ ꓓꓵꓽ ꓡˍ ꓕꓯ ꓠꓬ ꓣꓳ ꓟꓽ ꓘꓳ ꓣꓴ꓿ ꓢ‐ꓓꓯ ꓟꓽ ꓙꓲꓻ ꓟ ꓮ ꓙꓵꓽ ꓓꓵꓽ ꓡˍ ꓕꓯ ꓣꓳ ꓠꓬ ꓘꓳ ꓣꓴ ꓪ ꓡꓰˍ ꓥꓳ꓿ ꓖꓳ ꓡꓱ ꓘꓳ ꓣꓴ ꓟꓶ ꓡꓰ ꓖꓳ ꓑꓳ. ꓕꓯ ꓟꓽ ꓙꓲꓻ ꓫꓬ ꓟ ꓮ ꓙꓵꓽ ꓠꓬ ꓣꓳ ꓤꓶꓻ ꓦꓲꓻ ꓔꓯ ꓐꓬ ꓡꓰ ꓝꓲˍ ꓟ ꓑꓶ. ꓓꓴ ꓣꓳ ꓠꓬ ꓖꓳ ꓗꓪ ꓐꓬ ꓡꓰ ꓛꓵꓽ ꓡꓰ ꓟꓶꓽ ꓡꓰˍ ꓥꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓖꓳ ꓟ ꓔꓯ ꓢꓷ.ˍ ꓟ ꓑꓶ. ꓓꓴ꓾ ꓥꓪ ꓮ ꓕꓯ ꓡˍ ꓟ ꓠꓴ ꓪ ꓟꓽ ꓢꓷ. ꓠꓬꓲ꓾ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓠꓲ, ꓫꓵˍ ꓟ ꓠꓬ ꓠꓴ ꓪ ꓠꓲ, ꓟ ꓠꓯꓸꓼ ꓗꓪ ꓥꓪ ꓮ ꓕꓯˍ ꓟꓲ ꓓꓵꓽ ꓡ ꓠꓲ, ꓫꓵˍ ꓡꓳ꓿ ꓖꓳ ꓟ ꓑꓶ. ꓓꓴ ꓠꓴ ꓪ ꓧꓪ. ꓛꓲꓽ ꓛꓲꓽ ꓡꓰꓽ ꓔꓬ꓿ ꓥꓪ ꓔꓯ ꓠꓴ ꓪ ꓟꓽ ꓘꓳ ꓣꓴ ꓥꓳ ꓐꓯˍ ꓠꓬ ꓠꓴ ꓤꓶꓻ ꓔꓯ ꓐꓬ ꓡꓰ ꓝꓲˍ ꓟ ꓠꓱ. ꓐꓯ ꓮ ꓙꓵꓽ ꓓꓵꓽ ꓡˍ ꓥꓳ꓿ ꓖꓳ ꓕꓯ ꓠꓬ ꓠꓴ ꓠꓬ ꓐꓬ ꓡꓰ ꓪˍ ꓥꓳ ꓐꓰ ꓐꓯˍ ꓟ ꓙꓳꓺ ꓗꓽ ꓖꓶ ꓓꓴ ꓥˍ ꓟꓲ ꓣꓳ ꓔꓯ ꓢꓲ ꓒ ꓬꓰ‐ꓢꓴ ꓡꓰ ꓢꓲꓽ ꓢꓲꓽ ꓡꓰꓽ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥꓳ꓿
ꓖꓳ ꓟ ꓑꓶ. ꓓꓴ ꓙꓽ ꓖꓶ ꓔ꓾ ꓧꓪ. ꓛꓲꓽ ꓛꓲꓽ ꓡꓰꓽ ꓔꓬ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓮ ꓕꓯ ꓓꓵꓽ ꓡˍ ꓟ ꓔꓯ ꓘꓳ ꓣꓴ ꓐ ꓡ ꓠ, ꓟ ꓐꓰ ꓠꓱ. ꓐꓯ ꓘꓴꓽ ꓒ ꓥ ꓟ ꓠꓲꓽ ꓢ‐ꓓꓯ ꓟꓽ ꓙꓲꓻ ꓟ ꓮ ꓙꓵꓽ ꓣꓳ ꓤꓶꓻ ꓗꓪ ꓟꓽ ꓓꓵꓽ ꓪ ꓡꓰ ꓠ, ꓟ ꓗꓽ ꓔ ꓓꓴ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓙꓳꓺ ꓗꓽ ꓖꓶ ꓔꓬ ꓟ ꓥꓳ꓿
