ꓟ‐ꓕꓲ ꓿23ꓽ23‐26
ꓠꓲꓹ ꓟ ꓠꓬꓲꓽ ꓔꓱꓹ ꓣꓱ ꓢꓴ ꓙꓵꓽ ꓗ ꓟꓸ ꓒˍ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠ꓾ ꓑꓴꓸ ꓧꓳꓺˍ ꓐꓰ ꓠꓸ ꓐꓳꓽ ꓪꓳꓽ ꓤˍ ꓐꓰ ꓠꓸ ꓐꓳ ꓪꓳ ꓓꓽ ꓟ ꓣꓴ ꓢꓲ꓾ ꓞꓲ ꓐꓱꓻ ꓕꓲ ꓐꓱ ꓔꓲ ꓖꓶˍ ꓡꓳ꓿ ꓙꓵꓽ ꓗ ꓗꓪ ꓟꓬꓽ ꓠꓬꓲ ꓒꓵꓽˍ ꓟ꓾ ꓔꓱꓹ ꓜꓳꓽˍ ꓟ ꓐꓰ ꓫꓱꓸ ꓤˍ ꓟ ꓐꓰ ꓦ ꓡꓱ ꓐꓳˍ ꓟ ꓠꓽ ꓠꓴ ꓪꓽ ꓟꓽ ꓬꓰ꓿ ꓕꓱ ꓟꓬ ꓫꓵꓽ ꓟˍ ꓟꓲ ꓠꓱꓸ ꓐꓯꓼ ꓟ ꓐꓰ ꓕꓲ ꓡꓰꓹꓼ ꓬꓰ ꓙꓲꓽ ꓙꓳˍ ꓟ ꓥ ꓡꓳ꓿
ꓟꓬ ꓔꓶ ꓢꓲ ꓙ ꓖꓴ ꓧꓳꓽ ꓢꓴ ꓐꓴꓳ꓾ ꓠꓴ ꓪꓽ ꓠꓬ ꓬꓲꓹ ꓑꓵꓸ ꓤ ꓔꓯ ꓞꓶꓻ ꓓꓳ ꓡ ꓢꓲ꓾ ꓡꓳꓽ ꓕꓳꓺ ꓔꓯ ꓖꓴꓻ ꓓꓵꓽ ꓡꓰˍ ꓡꓳ꓿ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓙꓵꓽ ꓗ ꓟꓸ ꓒˍ ꓐꓰ ꓒ-ꓡꓲ-ꓢꓷ ꓐꓴ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓠꓽ ꓡꓴ ꓗꓶꓸˍ ꓐꓰ ꓐꓯꓻ ꓔꓯ ꓬꓲ ꓕꓯꓽ ꓢꓲ ꓗꓪ ꓫꓬꓻ ꓫꓬꓻˍ ꓡꓰꓽ ꓞꓲꓽˍ ꓡꓳ꓿
ꓖꓳ ꓡꓱ ꓥ ꓟꓲ ꓠꓯꓸꓼ ꓗꓪ ꓠꓽ꓾ ꓚꓲꓸ ꓛꓬ ꓔꓯ ꓙꓵꓽ ꓟꓽ ꓐ ꓡ ꓟ ꓐꓰ ꓢꓴ ꓔꓯ ꓘꓳꓹ ꓜꓽˍ ꓟ ꓐꓲ ꓞꓹ ꓡꓳ꓿ꓟꓬ ꓔꓶ ꓢꓴ ꓒ-ꓡꓲ-ꓢꓷ ꓐꓴꓳ꓾ ꓡꓴ ꓗꓶˍ ꓐꓰ ꓐꓯꓻ ꓠꓯꓸꓼ ꓗꓪ ꓧꓶꓸ ꓕꓯꓽ ꓞꓲꓽ ꓫꓬꓻ ꓡꓰ ꓝꓲ꓿ ꓖꓳ ꓡꓱ ꓠꓬ ꓕꓯꓽ ꓢꓲ ꓗꓪˍ ꓟꓲ ꓫꓬꓻ ꓫꓬˍ ꓡꓰ ꓒꓬꓱꓼ ꓡ ꓥꓳ꓾ ꓐꓯˍ ꓡꓳ꓿
ꓠꓬꓲ. ꓠꓬꓲ ꓢꓯꓼ ꓟꓬ ꓖꓶˍ ꓟ ꓪꓴ‐ꓢ ꓐꓯ ꓘꓶꓽ ꓗꓪ ꓣꓳ ꓐꓴ ꓠꓬ ꓒ‐ꓡꓲ‐ꓢꓷ ꓐꓴ ꓐꓰ ꓙꓵꓽ ꓗ ꓟ. ꓒ ꓐꓴˍ ꓡꓰ ꓐꓰ ꓟꓽ ꓬꓰ ꓠ, ꓟ ꓢꓲ ꓒ ꓬꓰ‐ꓢꓴ ꓡꓰ ꓙꓳꓺ ꓗꓽ ꓖꓶ ꓔ ꓡꓳ꓿ ꓬꓲ ꓪ ꓐꓴ ꓠꓬ ꓬꓴ‐ꓔ ꓪꓴ. ꓓꓵ ꓣꓱꓽ ꓢꓴ ꓐꓴ ꓥ ꓢꓲ ꓠꓬꓲ ꓙꓵꓽ ꓗ ꓐꓰ ꓡꓲꓽ ꓒꓰꓼ ꓔꓯ ꓬꓲ ꓪ ꓛꓳ ꓫꓱꓽˍ ꓡꓳ꓿ ꓬꓲ ꓪ ꓠꓬ ꓡ ꓞꓳ ꓮ ꓟꓬ, ꓟꓲꓽ ꓙꓬ ꓗꓪ ꓙꓲꓻˍ ꓟ ꓞꓳ ꓤ ꓕꓲ ꓣꓳ ꓡꓰ ꓐꓰ ꓣꓱꓽ ꓬꓰ ꓔꓬ ꓥˍ ꓟꓲ ꓪꓴ‐ꓢ ꓬꓲ ꓠꓵꓻ ꓠꓲ, ꓚꓱ, ꓗꓪ ꓠꓽ ꓟꓽ ꓛꓳ ꓫꓱꓽ꓿ ꓮ ꓘꓶ. ꓣꓱꓽ ꓞ, ꓔꓬ ꓢꓴ ꓐꓴ ꓔꓯ ꓠꓵꓻ ꓠꓲ, ꓟꓳ. ꓖꓶ ꓠ, ꓟ ꓢꓶ. ꓟꓽ ꓞꓲꓺ ꓬꓲ ꓪ ꓠꓬ ꓮ ꓫꓵꓽˍ ꓟꓲ ꓣꓱꓽ ꓟꓽ ꓬꓯꓼ ꓟ ꓙꓵꓽ ꓗ ꓗꓪ ꓡꓰꓽ ꓞꓳ ꓙꓳ ꓔꓬ ꓡꓳ꓿ ꓡꓲꓽ ꓒꓰꓼ ꓗꓪ ꓡꓰꓽ ꓞꓳ ꓙꓳ ꓔꓬ ꓟ ꓥ ꓡꓳ꓿
ꓪꓴ‐ꓢ ꓠꓬ ꓣꓳ ꓞꓳ ꓤ ꓠꓲ, ꓟ ꓠꓯꓸꓼ ꓗꓪ ꓙꓳˍ ꓟ ꓙꓲꓻˍ ꓟ ꓐꓰ ꓟꓽ ꓙꓲꓻ ꓟ ꓮ ꓙꓵꓽ ꓔꓯ ꓟꓳꓻˍ ꓟ ꓢꓷ.ˍ ꓟ ꓪꓴ‐ꓢ ꓥ ꓡꓳ꓿ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓞꓳ ꓤ ꓮ ꓟꓬ, ꓙꓲꓻ ꓖꓴ ꓐꓱ ꓶ ꓔꓱ, ꓔꓱ, ꓚꓵ ꓚꓵ ꓡꓰꓽ ꓛꓳ ꓫꓱꓽ ꓔꓬ ꓡ꓾ ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ ꓠ ꓔˍ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓪꓴꓽ ꓓꓰ ꓡꓰˍ ꓟ ꓙꓵꓽ ꓗ ꓥ ꓟ “ꓠꓴ ꓪ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵꓻ ꓡꓯ ꓘꓳ” ꓐꓰ ꓐꓯ ꓔꓲ. ꓬꓰ ꓟ ꓡꓰ ꓐꓰ ꓛꓳ ꓫꓱꓽ ꓐ ꓡ ꓠ, ꓟ ꓢꓯꓼ ꓕꓵꓼ ꓠ ꓔˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓕꓱ ꓡꓱ ꓪꓽ ꓘꓴ ꓡꓯ꓿ ꓠꓵꓻ ꓠꓲ, ꓢꓲ ꓒ ꓥꓪ ꓠꓴꓽ ꓐ, ꓐꓽꓳ꓾ ꓢꓲ ꓒ ꓠꓴ ꓔꓯ ꓫꓱ.ˍ ꓟ ꓠꓲ, ꓟ ꓙꓳ ꓠ, ꓟ ꓣꓱꓽ ꓛꓰꓽ ꓖꓶ ꓡꓯ꓿ ꓖꓳ ꓡꓱ ꓢꓲ ꓡꓰꓽ ꓥꓪ ꓐꓰ ꓠꓶꓽ ꓢꓴ ꓐꓴ ꓥ ꓟ ꓥꓪ ꓕꓲꓽ ꓦꓲꓻ ꓢꓴ ꓐꓴ꓾ ꓛꓳꓽ ꓤ ꓛꓳꓽ ꓒꓯ, ꓐꓴ ꓡꓰꓽ ꓟꓽ ꓞꓲꓺ ꓛꓴꓽ ꓙꓳ ꓢꓴ ꓐꓴ ꓕꓯꓽ ꓢꓲ ꓗꓪ ꓥˍ ꓟꓲ ꓠꓵꓻ ꓠꓲ, ꓖꓶ ꓐ ꓡˍ ꓟ ꓢꓯꓼ ꓪ ꓣꓱꓽ ꓛꓰꓽ ꓟꓶ ꓡˍ ꓟ ꓥ ꓡꓳ꓿
