ꓣꓳꓺ ꓟ ꓗ ꓘꓶꓽ ꓗꓪ ꓓꓵꓽ ꓡꓰ ꓠꓯ,ˍ ꓟ (Sunday reflection )
ꓠꓬꓲ.ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (21) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ (13ꓽ22꓿30) ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓓꓵ ꓡꓰ ꓢꓴ ꓐꓴ ꓠꓬ ꓮ ꓟꓬ, ꓟꓽ ꓙꓳ ꓡ ꓐꓰ ꓠ ꓠꓬꓲˍ ꓗꓷ ꓟ ꓥ ꓡꓳ꓿
ꓖꓳ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓠꓬ ꓣꓳꓺ ꓟ ꓗ ꓘꓶꓽ ꓗꓪ ꓐꓰ ꓓꓵꓽ ꓡꓰ ꓠ, ꓟ ꓢꓯꓼ ꓕꓵꓼ꓿ ꓮ ꓡꓰ ꓐꓯ ꓠꓬ ꓢ, ꓖꓪ ꓓꓵꓽ ꓙꓰ ꓠꓲ, ꓫꓵˍ ꓟꓲ ꓓꓵꓽ ꓙꓰ ꓟꓽ ꓪ ꓢꓴ ꓮ ꓟꓬ, ꓙꓳˍ ꓥꓳ꓿
ꓢꓲꓺ ꓒ ꓢꓲꓽ ꓒ ꓡ ꓢꓲ ꓗ ꓘꓶ ꓚꓵ. ꓗꓷ ꓠꓬ ꓠꓴ ꓪ ꓠꓽ ꓠꓱ ꓠꓱ, ꓟ.ꓼ ꓗꓪ ꓦꓰꓼ ꓞ, ꓢꓲ ꓠꓬꓲ ꓗ ꓘꓶꓽ ꓲꓼ ꓢꓲ ꓢꓲ ꓒꓽꓳ ꓥꓪ ꓠꓴꓽ ꓔꓯ ꓗ ꓘꓶꓽ ꓒꓴ ꓖꓶ ꓡꓯ ꓐꓯ ꓟꓲ ꓠꓴ ꓪ ꓔꓯ ꓥꓪ ꓟꓽ ꓢꓷ. ꓠꓴ ꓪ ꓮ ꓡꓰ ꓗꓪ ꓐꓰ ꓡ ꓥ ꓟꓲ ꓥꓪ ꓟꓽ ꓢꓷ. ꓐꓰ ꓒꓳ, ꓖꓶ ꓡˍ ꓥꓳ ꓐꓰ ꓐꓯ ꓔ ꓟ ꓢꓲꓽ ꓫꓬ ꓕꓳ ꓶ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓔꓯ ꓞꓳ ꓡꓯ. ꓤ ꓡꓰ ꓟꓴ ꓗꓪ ꓗꓴꓷꓼ ꓗꓪ ꓚꓬꓴ ꓟꓶ ꓡꓰ ꓢꓴ ꓐꓴ ꓠꓬ ꓮ ꓟꓬ, ꓟꓽ ꓙꓳ ꓡ ꓐꓰ ꓠ ꓠꓬꓲˍ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟꓬ, ꓡꓳ ꓟꓽ ꓟꓬ, ꓡꓳ ꓐꓰ ꓟꓽ ꓐꓯ ꓟ. ꓖꓶ ꓔ꓿ ꓖꓳ ꓡꓱ ꓐꓯ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳꓺ ꓓꓰ ꓟ ꓗ ꓘꓶꓽ ꓗꓪ ꓐꓰ ꓓꓵ ꓡꓰ ꓠ, ꓟ ꓢꓯꓼ ꓕꓵꓼ ꓐꓰ ꓠꓴ ꓥꓪ ꓥ ꓟꓲ ꓐꓯ ꓔ ꓟ ꓥ ꓡꓳ꓿
ꓡ ꓞꓳ ꓮ ꓟꓬ, ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵ ꓡꓰ ꓠ, ꓟ ꓢꓯꓼ ꓕꓵꓼ ꓥ ꓟꓲ ꓓꓵ ꓡꓰ ꓟꓽ ꓓ ꓟ ꓚꓱ, ꓔꓯ ꓞꓳ ꓡꓯ. ꓤ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓠ, ꓟ ꓠꓬ ꓟꓽ ꓙꓲ ꓟ ꓟꓬꓱ ꓔꓯ ꓟꓽ ꓬꓰ ꓝꓮꓲ ꓝꓴꓲ ꓔꓯ ꓤ ꓟꓳ ꓟ ꓡꓰ ꓟꓽ ꓡꓳ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓙꓲ ꓟ ꓟꓬꓱꓽ ꓔꓯ ꓥ ꓟꓲ ꓬꓰ ꓠ, ꓟ ꓣꓱ ꓬꓯꓼ ꓟ ꓥ ꓡꓳ꓿ ꓙꓲ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓢꓯꓼ ꓕꓵꓼ ꓠ, ꓔ ꓟ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓘꓴꓽ ꓗꓪ ꓡ‐ꓜ‐ꓣꓴ ꓐꓰ ꓞꓳ ꓐꓳ ꓒꓽ ꓐꓴ ꓔꓯꓺ ꓥꓳꓽ ꓔꓯ ꓣꓳ ꓢꓷ. ꓟ ꓥ ꓡꓳ꓿ ꓞꓳ ꓐꓳ ꓒꓽ ꓠꓬ ꓫꓵꓻ ꓡꓰ ꓢꓲ ꓠꓬꓲ ꓛꓬ ꓟꓵꓽ ꓗꓪ ꓛꓲ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓝꓴꓲ ꓬꓰ ꓢꓲ ꓠꓬꓲ ꓛꓲ ꓡꓰ ꓟꓽ ꓥ꓿ ꓙꓲ ꓟ ꓟꓬꓱꓽ ꓬꓰ ꓠ, ꓟ ꓟꓲ ꓡꓰ ꓟ ꓪꓴ. ꓠꓬꓲ ꓛꓬ ꓟꓵꓽ ꓗꓪ ꓛꓲ ꓡꓰ ꓟ ꓥ ꓡꓳ꓿ ꓠꓴ ꓥꓪ ꓥ ꓟꓲ ꓝꓴꓲ ꓔꓯ ꓤ ꓟꓳ ꓟ ꓡꓰ ꓐꓰ ꓙꓲ ꓟ ꓟꓬꓱꓽ ꓗꓪ ꓢꓯꓼ ꓕꓵꓼ ꓢꓲ ꓠꓬꓲ ꓬꓰ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿
ꓠꓬ. ꓠꓬꓲ ꓣꓳ ꓡꓳ. ꓟꓳ ꓟ ꓡꓴ‐ꓘ ꓕꓳ ꓶ 13ꓽ 27 ꓝꓲ. ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓟꓽ ꓙꓲ ꓟꓽ ꓜꓳ ꓟ ꓬꓰ ꓢꓴ ꓠꓴ ꓪ ꓠꓴ ꓪ ꓮ ꓙꓵꓽ ꓠꓬ ꓥꓪ ꓔꓯ ꓐꓰꓧ, ꓙꓰ ꓐꓰ ꓐꓯ ꓖꓶ ꓡ ꓥꓳ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓽ ꓙꓲ ꓟꓽ ꓙꓳ ꓟ ꓟꓬꓱꓽ ꓔꓯ ꓡꓰ ꓬꓰ ꓔꓬ ꓢꓴ ꓐꓴ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓠ, ꓟ ꓫ. ꓔ ꓟ ꓥ ꓡꓳ꓿
ꓠꓴ ꓥꓪ ꓠꓬ ꓣꓳ ꓞꓳ ꓫꓱ, ꓚꓱ, ꓓꓵꓽ ꓙ ꓚꓱ, ꓬꓰ ꓟ ꓟꓬꓱꓽ ꓮ ꓙꓵꓽ ꓢꓲꓺ ꓒ ꓠꓲ, ꓒꓴ ꓟ ꓚꓱ, ꓗꓪ ꓬꓰ ꓐ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓱ ꓬꓯꓼ ꓣꓱ ꓞꓼ ꓔꓬ ꓟ ꓢꓴ ꓐꓴ ꓔꓯ ꓐ ꓡ ꓟ ꓕꓲ ꓒꓳ, ꓗꓪ ꓐꓰ ꓬꓰ ꓙ ꓔꓳ, ꓙ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
ꓢꓲꓺ ꓒ ꓡꓰ ꓚꓺ ꓖꓴ ꓧꓳꓽ ꓟꓳ ꓖꓶ ꓡ ꓟ ꓗꓪ ꓞꓳ ꓫꓱ, ꓓꓴ ꓬꓰ ꓡꓯ꓿ ꓠꓬꓲ. ꓠꓬꓲ ꓗꓪ ꓐꓰ ꓙꓲ ꓟ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓬꓰ ꓡꓯ꓿ ꓣꓳꓺ ꓟ ꓗ ꓘꓶꓽ ꓗꓪ ꓓꓵꓽ ꓡꓰ ꓟꓶ ꓠ, ꓟ ꓣꓳ ꓢꓯ. ꓔꓬ ꓟ ꓤꓶꓻ ꓠꓯ, ꓗꓪ ꓫ. ꓓꓴ ꓟꓷꓼ ꓓꓴ ꓮ ꓟ, ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓐꓰ ꓕꓲ ꓪ ꓢꓯ. ꓔꓬ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓫ. ꓟꓳ ꓪ
