ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓣꓳ..ˍ ꓟ ꓗ ꓘꓶꓽ ꓒꓰꓼ ꓗꓪ ꓓꓵꓽ ꓙꓰ꓾ ꓢꓯꓼ ꓕꓵꓼ꓾ ꓐꓰ ꓐꓯ ꓔ ꓡꓳ꓿ ꓟꓴ ꓗꓪ ꓗꓴꓷꓼ ꓗ ꓘꓶꓽ ꓐꓰꓼ ꓠꓬ ꓮ ꓘꓶ. ꓣꓳˍ ꓟ ꓑꓶ. ꓓꓴ ꓚꓲ. ꓛꓬ ꓚꓳꓽ ꓚꓲ. ꓛꓬ ꓣꓳꓺ ꓣꓳꓺˍ ꓡꓰꓽ ꓬꓰ ꓢꓴ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓢꓯꓼ ꓕꓵꓼ ꓢꓲ ꓠꓬꓲ ꓟꓴ ꓗꓪ ꓗꓴꓷꓼ ꓖꓳ ꓟ ꓘꓴꓽ ꓗꓪ ꓓꓵꓽ ꓙꓰ ꓠ, ꓟ ꓢꓯꓼ ꓕꓵꓼ ꓢꓴˍ ꓡꓰꓽ ꓟꓴ ꓗꓪ ꓗꓴꓷꓼ ꓗꓪ ꓪ ꓓꓯꓻ ꓙꓰ ꓓ, ꓡꓳ꓾ ꓐꓰ ꓐꓯ ꓔ ꓡꓳ꓿
ꓡꓴ‐ꓘ 13ꓽ22‐30 ꓗꓪ ꓠꓬ ꓡ ꓞꓳ ꓕꓲ ꓣꓳ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓢꓴ ꓚꓬꓴ. ꓟꓶ ꓢꓴ ꓠꓬ ꓟꓬꓽˍ ꓡ꓾ ꓠꓲ.ˍ ꓡ꓾ ꓐꓰ ꓠꓺ ꓠꓬꓲˍ ꓕꓯ ꓬꓲ ꓠꓬ꓾ ꓣꓳˍ ꓟ ꓗ ꓘꓶꓽ ꓗꓪ ꓓꓵꓽ ꓙꓰ ꓠ, ꓟ ꓢꓯꓼ ꓕꓵꓼ꓿ ꓮ ꓡꓲꓳ ꓐꓯˍ ꓠꓬ ꓪꓴꓽˍ ꓟ ꓗ ꓘꓶꓽ ꓗꓪ ꓞꓳ ꓤ ꓮ ꓟꓬ, ꓓꓵꓽ ꓙꓰ ꓠꓲ, ꓫꓵˍ ꓡꓳ꓿ ꓞꓳ ꓤ ꓮ ꓟꓬ, ꓠꓬ ꓪꓴꓽˍ ꓟ ꓢꓻˍ ꓟ ꓗ ꓘꓶꓽ ꓗꓪ ꓙꓰ ꓔꓬ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓟꓴ ꓗꓪ ꓗꓴꓷꓼ ꓗ ꓘꓶꓽ ꓠꓽ ꓮ ꓘꓶ. ꓣꓳˍ ꓡꓳ꓾ ꓐꓰ ꓬꓲ. ꓡꓰ ꓐꓯˍ ꓡꓳ꓿
ꓡꓯꓼ ꓫꓵ ꓬꓲ ꓡꓰ꓾ ꓦꓬꓼ ꓠꓬꓲ ꓬꓲ ꓙꓵ, ꓛꓲ ꓡˍ ꓕꓯ ꓡ ꓞꓳ ꓮ ꓐꓲ ꓠꓬ ꓗ ꓘꓶꓽ ꓚꓵ. ꓗꓷˍ ꓕꓯ ꓠꓴ ꓪ ꓕꓲ ꓐꓱ ꓟ ꓠꓬ꓾ ꓢꓲꓺ ꓒꓽꓳ ꓗ ꓘꓶꓽ ꓒꓴ ꓖꓶ ꓡꓯ꓿ ꓥꓪ ꓠꓴꓽ ꓠꓬ ꓠꓴ ꓐꓰ ꓕꓲ ꓪꓽˍ ꓜꓽ ꓓꓳꓻ ꓗꓷꓳ꓿ ꓥꓪ ꓠꓴꓽ ꓠꓬ ꓠꓴ ꓟꓬꓱ ꓣꓱꓽ ꓢꓲ ꓠꓬꓲ ꓠꓲꓽ ꓢ‐ꓓꓯ ꓔꓯ ꓖꓼ ꓗꓷꓳ꓾ ꓐꓰ ꓐꓯ ꓡˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓦꓲꓻ ꓘꓴꓽ ꓗꓪ ꓔꓬ ꓟ ꓢꓲꓺ ꓒ ꓠꓬ꓾ ꓠꓴ ꓪ ꓮꓽ ꓟ ꓥ ꓡ꓾ ꓥꓶˍ ꓟ ꓬꓰ ꓢꓴ ꓙꓰ ꓗꓷ꓾ ꓐꓰ ꓐꓯ ꓢꓲ ꓠꓬꓲ ꓠꓴ ꓪ ꓔꓯ ꓖꓼ ꓓꓳ ꓡˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓔꓯꓺ ꓥꓳꓽ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿
ꓕꓱ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓕꓲ ꓖꓼ꓾ ꓢꓲꓺ ꓒ ꓬꓰ‐ꓢꓴ ꓔꓯ ꓢꓲꓺ ꓒ ꓢꓲꓺ ꓒ ꓘꓴꓻ ꓕꓲ ꓖꓼ꓾ ꓬꓰ‐ꓢꓴ ꓬꓰ‐ꓢꓴ ꓘꓴꓻ ꓕꓲ ꓖꓼ꓾ ꓙꓵꓻ ꓕꓲ ꓖꓼ ꓟꓴ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓬꓰ꓾ ꓐꓯˍ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓟ ꓥ ꓡꓳ꓿ ꓮꓽ ꓟˍ ꓡꓰꓽ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓡ꓿ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓲ ꓐ, ꓐ ꓠꓲ, ꓡꓶꓽ ꓛꓳ ꓢꓴˍ ꓡꓰꓽ ꓟꓴ ꓗꓪ ꓗꓴꓷꓼ ꓗꓪ ꓓꓯꓻ ꓙꓰˍ ꓡꓳ ꓐꓯˍ ꓟ ꓫꓬꓽ ꓫꓬꓽ ꓡꓰꓽ ꓣꓳ ꓔꓯ ꓡꓴ‐ꓘ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓟꓳ. ꓖꓶ ꓡˍ ꓡꓳ꓿
ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮ ꓫꓵꓽ ꓔꓯ ꓫꓱ.ˍ ꓡ ꓐꓯˍ ꓠꓬ꓾ ꓣꓳꓽ ꓬꓲꓻ ꓙꓬ ꓪꓳ. ꓔꓲ. ꓫꓵ ꓬꓯꓼ ꓞꓰ ꓬꓰˍ ꓟ ꓘꓴꓽ ꓗꓪ ꓔ ꓔ ꓫꓵ ꓗꓪ ꓣꓳ ꓢꓯꓼ ꓕꓵꓼ ꓢꓲ ꓠꓬꓲ ꓡꓲꓺ ꓜꓶꓽ ꓢꓲ ꓚꓲ. ꓛꓬ ꓡꓯ ꓒꓯ, ꓗꓪ ꓐꓰ ꓚꓴ. ꓢꓲ ꓠꓬꓲ ꓓꓯꓻ ꓙꓰˍ ꓟ ꓔꓯ ꓫꓱ.ˍ ꓡꓳ꓿ ꓬꓲꓻ ꓙꓬ ꓠꓬ ꓪꓳ. ꓔꓲ. ꓫꓵ ꓬꓲꓻ ꓙꓰˍ ꓥ ꓟꓲ ꓣꓳ ꓠꓬ ꓔ ꓔ ꓫꓵ ꓗꓪ ꓓꓯꓻ ꓢꓯꓼ ꓕꓵꓼ ꓙꓰˍ ꓟ ꓞꓳ ꓤ ꓥ ꓡꓳ꓿ ꓮ ꓫꓵꓽ ꓥ ꓟꓲ ꓟꓲ ꓠꓯ ꓕꓱ ꓟ ꓗꓪ ꓢꓻ ꓢꓻ ꓡꓰꓽ ꓟꓶˍ ꓫꓵꓽ ꓟꓽ ꓙꓳ꓿ ꓮꓽ ꓔꓳꓺ ꓟꓶˍ ꓫꓵꓽ ꓟꓽ ꓙꓳ꓿ ꓮ ꓫꓵꓽ ꓥˍ ꓟꓲ ꓬꓲ ꓒꓵꓽ ꓬꓲ ꓙꓳˍ ꓡꓳ꓿ ꓮ ꓫꓵꓽ ꓥˍ ꓟꓲ ꓢꓯꓼ ꓕꓵꓼ ꓠ ꓔˍ ꓡꓳ꓿
ꓕꓱ ꓡꓰ ꓐꓰ ꓟꓲ ꓠꓯ ꓕꓱ ꓟ ꓗꓪ ꓣꓳ ꓛꓲ ꓡˍ ꓟ ꓚꓰ ꓮ ꓫꓵꓽ ꓥˍ ꓟꓲ ꓮꓽ ꓔꓳ ꓟꓶˍ ꓟ꓾ ꓮꓽ ꓔꓳ ꓖꓶ ꓡˍ ꓟ ꓟꓽ ꓙꓳ꓿ ꓮ ꓫꓵꓽ ꓥˍ ꓟꓲ ꓢꓯꓼ ꓕꓵꓼ ꓠ ꓔˍ ꓫꓵꓽ ꓡꓰꓽ ꓥ ꓡꓳ꓿ ꓮ ꓫꓵꓽ ꓥˍ ꓟꓲ ꓚꓲ. ꓛꓬ ꓚꓵ. ꓬꓲ ꓓꓳ ꓢꓲ꓾ ꓣꓳ ꓚꓲ. ꓛꓬ ꓢꓯꓼ ꓪ ꓣꓱꓽ ꓢꓲ꓾ ꓣꓳ ꓚꓲ. ꓛꓬ ꓙꓳˍ ꓟ ꓧꓪꓽ ꓖꓳ ꓓꓱꓽ ꓢꓯꓼ ꓪ ꓮ ꓙꓵꓽ ꓣꓱꓽ ꓢꓲ ꓠꓬꓲ ꓢꓯꓼ ꓕꓵꓼ ꓠ ꓔˍ ꓫꓵꓽˍ ꓡꓰꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓛꓲ ꓡˍ ꓟ ꓚꓰ ꓣꓳ ꓠꓬ ꓢꓻ ꓢꓻ ꓡꓰꓽ ꓗꓳ. ꓙ ꓙꓰ ꓠ, ꓟ ꓕꓽ ꓓꓵꓽ ꓙꓽ ꓔ꓿
ꓥ ꓡꓳ꓾ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓙꓵꓻˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓠꓲ, ꓠꓵˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓔꓳ, ꓜꓳꓽ ꓠ ꓔˍ ꓟ ꓫ. ꓙꓵ ꓟꓷꓼ ꓙꓵ ꓓꓴ ꓠꓬ ꓟꓽ ꓟꓶꓽ ꓬꓰ꓾ ꓟꓽ ꓒꓲꓼ ꓡꓰ꓿ ꓣꓳ ꓠꓯꓸꓼ ꓘꓴꓽ ꓗꓪ ꓐꓰ ꓟꓽ ꓓꓳ ꓙꓰ꓿ ꓮ ꓡꓲ ꓐꓰ ꓬꓰ ꓠ ꓔˍ ꓡ꓿ ꓢꓲ ꓒ ꓬꓰ‐ꓢꓴ ꓢꓯꓼ ꓪ ꓗꓪ ꓐꓰ ꓣꓳ ꓕꓱ ꓟ ꓔꓯ ꓙ ꓙꓰ ꓠ, ꓟ ꓢꓯꓼ ꓕꓵꓼ ꓠ ꓔˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓕꓲ ꓖꓼ ꓮ ꓫꓵꓽ ꓟꓲ ꓬꓰ ꓟꓽ ꓛꓵꓳ꓿ ꓮ ꓫꓵꓽˍ ꓟꓲ ꓪꓴ‐ꓢ ꓬꓰ ꓙˍ ꓡꓳ ꓐꓯˍ ꓟ ꓟꓽ ꓥ꓿ ꓥ ꓡꓳ꓾ ꓬꓲ ꓬꓰ ꓙˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓚꓲ. ꓛꓬ ꓚꓵ. ꓬꓲꓻ ꓓꓳ ꓢꓲ ꓠꓬꓲ ꓢꓯꓼ ꓕꓵꓼ ꓠ ꓗ, ꓡꓳ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ꓾ ꓟꓲ ꓠꓯ ꓕꓱ ꓟ ꓗꓪ ꓮꓽ ꓔꓳ ꓟꓶˍ ꓫꓵꓽ ꓟꓽ ꓙꓳ꓿ ꓮ ꓫꓵꓽ ꓥˍ ꓟꓲ ꓬꓲ ꓒꓵꓽ ꓙꓳˍ ꓫꓵꓽ ꓡꓰꓽ ꓥ ꓡꓳ꓿ ꓠꓴ ꓟꓶ ꓠꓲ, ꓫꓵˍ ꓟ ꓖꓳ ꓕꓲ ꓟ ꓟ ꓬꓲ ꓒꓵꓽ ꓪꓴꓽˍ ꓠꓬ ꓪꓴꓽˍ ꓡꓰ ꓬꓲ ꓒꓵꓽ ꓖꓶ ꓠ ꓗˍ ꓡꓳ꓿ ꓠꓴ ꓢꓯꓼ ꓪ ꓖꓶ ꓠ ꓗˍ ꓡꓳ꓿ ꓠꓴ ꓒꓴ ꓫꓵ ꓣꓱꓽ ꓠ ꓗˍ ꓡꓳ꓿ ꓠꓴ ꓢꓷ. ꓠꓲ, ꓖꓶ ꓠ ꓗˍ ꓡꓳ꓿ ꓠꓴ ꓠꓲ, ꓫꓵˍ ꓟ ꓖꓳ ꓟ ꓣꓳꓺˍ ꓠꓬ ꓣꓳꓺˍ ꓡꓰ꓾ ꓪꓴꓽˍ ꓠꓬ ꓪꓴꓽˍ ꓡꓰ ꓠꓴ ꓢꓯꓼ ꓪ ꓖꓶ ꓠ ꓗˍ ꓡꓳ꓿ ꓪꓴꓽ ꓧꓶꓻ ꓠ ꓗˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓡꓰ ꓚꓰꓼ ꓔˍ ꓟ ꓔꓱ, ꓚꓵˍ ꓟ ꓬꓲ ꓫꓵꓽ ꓕꓲ ꓫꓵꓽ ꓥ ꓡꓳ꓿
ꓖꓳ ꓡꓱ ꓠꓬꓲ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽˍ ꓟ ꓡꓴ‐ꓘ ꓕꓳꓽ ꓶ ꓡꓰꓽ ꓟꓽ ꓛꓲ꓾ ꓟ. ꓟꓲꓽ ꓠꓬꓲꓽ ꓔꓳ, ꓕꓲ ꓔꓳ, ꓗꓪ ꓦꓲ‐ꓐꓱ‐ꓣꓴ ꓕꓳꓽ ꓶ 12ꓽ5‐7, 11‐23 ꓗꓪ ꓠꓬ꓾ ꓥꓪ ꓤꓽꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓯꓼ ꓪ ꓖꓶ ꓘꓶꓽ ꓔꓯ ꓠꓴ ꓟꓲ ꓡꓰ, ꓗꓷꓳ꓿ ꓪꓴ‐ꓢ ꓠꓬ ꓬꓲ ꓠꓲ, ꓠꓵ ꓢꓴ ꓔꓯ ꓪ ꓜꓲ ꓟ. ꓖꓶ ꓑꓱ ꓖꓶˍ ꓡꓳ꓿ ꓢꓲ, ꓓꓻ ꓣꓱꓽˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓣꓳ ꓮꓽ ꓐ ꓮ ꓟ ꓣꓱꓽ ꓢꓴ꓾ ꓟ. ꓒ ꓣꓱꓽ ꓢꓴ ꓚꓲ. ꓛꓬ ꓤ ꓫꓵ. ꓤ ꓠꓱ ꓔꓯ ꓠꓲ, ꓠꓵˍ ꓕꓯ ꓬꓲ ꓜꓲ ꓐꓰ ꓟ. ꓙꓽˍ ꓡꓳ꓿
ꓮꓽ ꓟ ꓥˍ ꓟꓲ ꓚꓲ. ꓛꓬ ꓤ ꓠꓱ ꓔꓯ ꓙꓲˍ ꓟ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓡꓳ꓿ ꓧ.ˍ ꓟ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓡꓳ꓿ ꓪꓴꓽ ꓡ ꓕꓯ ꓠꓬ ꓢꓷ. ꓠꓲ, ꓙꓳ ꓒ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓡꓳ꓿ ꓪꓴ‐ ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓟꓬꓱ ꓓꓳꓽ ꓙꓳˍ ꓟ ꓤ ꓠꓱ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓡꓳ꓿ ꓕꓱ ꓡꓱ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓕꓯ ꓣꓳ ꓠꓬ ꓮꓽ ꓔꓳ ꓬꓲ ꓔꓯ ꓡꓳ ꓦ ꓔ ꓟꓽ ꓓꓻ꓿ ꓬꓲ ꓟꓽ ꓠ ꓠ, ꓔꓯ ꓣꓳ ꓓꓶꓽˍ ꓡꓳ꓿ ꓕꓱ ꓟ ꓠꓬ ꓣꓳ ꓮꓽ ꓐ ꓮ ꓟ ꓐꓴ ꓬꓰˍ ꓟ ꓬꓰ ꓚꓱ, ꓕꓲ ꓚꓱ, ꓥ ꓡꓳ꓿
ꓕꓱ ꓟˍ ꓡꓰ ꓐꓰ ꓪꓴ‐ꓢ ꓠꓬ ꓬꓲ ꓤ ꓫꓵ. ꓤ ꓠꓱ ꓮ ꓙꓵꓽ ꓔꓯ꓾ ꓬꓲ ꓟꓬꓽ ꓠꓬꓲ ꓠꓲ, ꓠꓵ ꓢꓴ ꓔꓯ ꓠꓬ ꓬꓲ ꓠꓬ ꓟ. ꓖꓶ ꓑꓱ ꓖꓶˍ ꓟ ꓮ ꓘꓶ. ꓬꓰˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓬꓲ ꓠꓯꓸꓼ ꓘꓴꓽ ꓗꓪ ꓐꓰ ꓪꓴ‐ꓢ ꓟꓬꓱ ꓓꓳꓽ ꓓꓳ ꓡ ꓠ, ꓟ꓾ ꓬꓲ ꓠꓯꓸꓼ ꓘꓴꓽ ꓗꓪ ꓐꓰ ꓪꓴ‐ꓢ ꓟꓬꓱ ꓓꓳꓽ ꓛꓵꓽ ꓔꓴ ꓠ, ꓟ ꓬꓲ ꓔꓶ ꓙꓱꓼ ꓙꓳˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓤꓶꓻ ꓗꓪ ꓫ. ꓙꓵ ꓟꓷꓼ ꓙꓵ ꓓꓴ ꓔꓳ, ꓜꓳꓽ ꓠꓬꓲˍ ꓡ꓿ ꓕꓱ ꓟ ꓠꓬ ꓣꓳ ꓔꓳ, ꓜꓳꓽ ꓠ ꓔˍ ꓟ꓾ ꓟ. ꓟꓲꓽ ꓘꓴꓽ ꓗꓪ ꓓꓵˍ ꓟ ꓡꓰ ꓐꓰ ꓑꓮꓣꓔ ꓳꓝ ꓔꓣꓮꓲꓠꓲꓠꓖ ꓐꓰ ꓐꓯˍ ꓟ ꓪꓴ‐ꓢ ꓣꓳ ꓔꓯ ꓟ. ꓖꓶˍ ꓟ ꓪꓴ‐ꓢ ꓣꓳ ꓔꓯ ꓑꓱ ꓖꓶˍ ꓟ ꓬꓲ ꓔꓶ. ꓕꓲ ꓔꓶ. ꓥ ꓐꓰ ꓘꓳ ꓣꓴ ꓢꓲ ꓠꓬꓲ ꓔꓳ, ꓜꓳꓽ ꓔꓬ ꓟ ꓠꓲ, ꓫ ꓟꓬ ꓫ ꓓꓴ꓾ ꓟꓬ ꓐꓲ ꓓꓳ ꓓꓴ ꓕꓱ ꓟ ꓔꓯ ꓬꓲ ꓜꓶ ꓐꓰ ꓢꓯꓼ ꓕꓵꓼ ꓢꓲ ꓠꓬꓲ ꓘꓳ ꓗꓳ. ꓠ, ꓟ ꓙ ꓣꓳꓽ ꓠꓲ, ꓡꓰ ꓞꓳ ꓙꓳ꓿ ꓖꓳ ꓡꓱ ꓬꓰˍ ꓠꓬ ꓠꓱ. ꓐꓯ ꓮ ꓫꓵꓽ ꓥˍ ꓟꓲ ꓬꓲ ꓔꓯ ꓕꓲꓺ ꓡꓰ ꓟꓽ ꓓꓻꓳ꓿ ꓠꓱ. ꓐꓯ ꓮ ꓫꓵꓽ ꓔꓯ ꓥˍ ꓟꓲ ꓬꓲ ꓔꓯ ꓓꓳꓽ ꓡꓰ ꓠ ꓛꓲ ꓬꓰ ꓟꓽ ꓐ ꓡꓺꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓮ ꓫꓵꓽ ꓔꓯ ꓥˍ ꓟꓲ ꓬꓲ ꓧꓪ. ꓡꓰ꓾ ꓣꓳ ꓔꓷ, ꓙ ꓙꓰ ꓟ ꓑꓶ. ꓓꓴ ꓣꓳ ꓠꓬ ꓓꓶꓽ ꓡꓯ ꓘꓳˍ ꓟ ꓧꓪ. ꓡꓰ ꓟ ꓑꓶ. ꓓꓴ ꓮ ꓫꓵꓽ ꓔꓯ ꓥˍ ꓟꓲ ꓙꓳꓺ ꓟꓽ ꓛꓵ ꓟ ꓡꓰ ꓗꓷ ꓡꓰˍ ꓥꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓣꓳ ꓔꓳ, ꓜꓳꓽ ꓔꓬ ꓟ ꓠꓲ, ꓫ ꓟꓬ ꓫ ꓓꓴ ꓕꓱ ꓟ ꓔꓯ ꓑꓶ. ꓑꓶ. ꓡꓰꓽ ꓢꓯꓼ ꓙꓳ ꓪꓽ ꓠꓬꓲ ꓠꓬꓲˍ ꓡꓰꓽ ꓘꓳ ꓗꓳ. ꓙꓰ ꓢꓲ ꓪꓴ‐ꓢ ꓥꓪ ꓔꓯ ꓬꓰ ꓙ ꓔꓬ ꓡꓳ꓾ ꓪꓴ‐ꓢ ꓥꓪ ꓔꓯ ꓠꓲ, ꓠꓵˍ ꓡꓳ꓾ ꓐꓯˍ ꓟ ꓔꓯ ꓙꓵꓻ ꓢꓲ ꓠꓬꓲ ꓡꓳ, ꓙ ꓬꓰ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿ ꓮ ꓙꓵꓽ ꓔꓯ ꓫ. ꓟꓳ꓿
