ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪ.꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ꓾ ꓟꓴ ꓗꓪ ꓗꓴꓷꓼ ꓠꓬ ꓤ ꓟꓶ ꓝꓱ ꓑꓮꓲꓽ ꓡꓰ ꓐꓰ ꓗ, ꓡꓳ꓾ ꓐꓰ ꓔꓯꓺ ꓥꓳꓽ ꓣꓱꓽ ꓢꓲ ꓐꓯ ꓖꓶ ꓡˍ ꓟ ꓗꓪ ꓐꓰ ꓣꓳ ꓦꓻ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ (ꓟ‐ꓕꓲ꓿22ꓽ1‐14) ꓗꓪ ꓟ ꓥꓳ꓿
ꓟꓴ ꓗꓪ ꓗꓴꓷꓼ ꓔꓯꓺ ꓥꓳꓽ ꓗꓪ ꓐꓰ ꓤ ꓟꓶ ꓝꓱ ꓑꓮꓲꓽ ꓡꓰ ꓐꓰ ꓗ, ꓡꓳ꓾ ꓐꓰ ꓐꓯˍ ꓟ ꓠꓬ ꓪ ꓔꓲ. ꓠꓬ ꓬꓲ ꓤ ꓐꓱ ꓶ ꓤ ꓟꓶ ꓝꓱ ꓑꓮꓲꓽ ꓬꓰ ꓖꓶˍ ꓡꓳ꓿ ꓤ ꓟꓶ ꓝꓱ ꓑꓮꓲꓽ ꓐꓱ ꓶ ꓬꓲ ꓠꓬ ꓙꓽ ꓖꓶ ꓗꓷˍ ꓡꓳ꓿ ꓖꓳ ꓗ ꓠꓯ. ꓬꓲ ꓝꓲ ꓓꓴ ꓐꓴ ꓔꓯ ꓙꓰ꓾ ꓥꓪ ꓛꓳꓽ ꓒꓯ,꓾ ꓥꓪ ꓠꓶꓽ ꓛꓳꓽ꓾ ꓥꓪ ꓗꓪ ꓛꓳꓽ ꓐꓴ ꓔꓯ ꓘꓴ ꓙꓰ꓾ ꓐꓰ ꓝꓲ ꓩꓴˍ ꓡꓳ꓿ ꓖꓳ ꓕꓯ ꓠꓬ ꓬꓲ ꓝꓲ ꓓꓴ ꓐꓴ ꓙꓰ ꓢꓲ ꓠꓬꓲ ꓐꓯ ꓖꓶˍ ꓕꓯ ꓕꓲ ꓐꓱ ꓙꓳˍ ꓟ ꓠꓬ꓾ ꓥꓪ ꓠꓬ, ꓟꓽ ꓟꓶ꓿ ꓥꓪ ꓡ ꓟꓽ ꓐ ꓡ ꓐꓰ ꓐꓯˍ ꓡꓳ꓿ ꓕꓲ ꓐꓱ ꓙꓳˍ ꓟ ꓠꓬ꓾ ꓥꓪ ꓟꓬꓱꓽ ꓙꓳˍ ꓡꓳ꓿ ꓥꓪ ꓔꓶ ꓜꓽ ꓔꓶ ꓓꓳꓻ ꓠꓯ, ꓡꓳ꓾ ꓐꓰ ꓐꓯˍ ꓡꓳ꓿ ꓕꓲꓽ ꓐꓱ ꓙꓳˍ ꓟ ꓠꓬ ꓥꓪ ꓡ ꓟꓽ ꓐ ꓡ ꓢꓰꓽ꓾ ꓐꓯˍ ꓡꓳ꓿
ꓖꓳ ꓕꓯ ꓝꓲ ꓓꓴ ꓐꓴ ꓠꓬ ꓪ ꓔꓲ. ꓔꓬ ꓗꓪ ꓬꓲꓼ ꓡ ꓗꓷ ꓢꓲ ꓠꓬꓲ ꓐꓯ ꓖꓶˍ ꓕꓯ ꓪ ꓔꓲ. ꓠꓬ ꓝꓮꓲ ꓕꓲ ꓧꓪ, ꓝꓲ ꓓꓴ ꓐꓴ ꓔꓯ ꓐꓯˍ ꓡꓳ꓿ ꓙꓰ꓾ ꓙ ꓖꓴ ꓙ ꓐꓽ ꓗꓪ ꓔꓬ ꓢꓴ꓾ ꓙ ꓫ. ꓗꓪ ꓔꓬ ꓢꓴ꓾ ꓮ ꓡꓲ ꓗꓪ ꓔꓬ ꓢꓴ ꓔꓯ ꓥˍ ꓟꓲ ꓥꓪ ꓤ ꓤ ꓟꓶ ꓝꓱ ꓑꓮꓲꓽ ꓗꓪ ꓘꓴ ꓔꓯ, ꓡꓯ꓾ ꓐꓰ ꓝꓲ ꓩꓴ ꓗꓷˍ ꓡꓳ꓿ ꓖꓳ ꓕꓯ ꓠꓬ ꓤ ꓟꓶ ꓝꓱ ꓑꓮꓲꓽ ꓠꓬ ꓒ ꓐꓲꓸꓼ ꓐꓰ ꓗꓷ ꓡꓰꓳ꓿ ꓪ ꓔꓲ. ꓠꓬ ꓤ ꓟꓶ ꓝꓱ ꓑꓮꓲꓽ ꓗꓪ ꓓꓵꓽ ꓡˍ ꓡꓳ꓿ ꓖꓳ ꓗꓪ ꓠꓬ ꓡ ꓞꓳ ꓕꓲ ꓣꓳ ꓔꓯ ꓬꓲ ꓡꓳ. ꓢꓷ.ˍ ꓡꓰꓳ꓿
ꓡ ꓞꓳ ꓖꓳ ꓕꓲꓽ ꓣꓳ ꓠꓬ ꓑꓮꓲꓽ ꓐꓵ ꓞꓶꓽ ꓟꓽ ꓖꓪꓽ ꓖꓪꓽ ꓐꓰ ꓖꓳ ꓗꓪ ꓔꓬ ꓡꓳ꓿ ꓖꓳ ꓕꓯ ꓪ ꓔꓲ. ꓠꓬ ꓬꓲ ꓔꓯ꓾ ꓗꓪ ꓛꓳꓽꓳ꓾ ꓠꓴ ꓮ ꓫꓵꓽ ꓑꓶ. ꓓꓴ ꓑꓮꓲꓽ ꓐꓵ ꓞꓶꓽ ꓟꓽ ꓖꓪꓽ ꓖꓪꓽ ꓡˍ ꓡ꓾ ꓐꓰ ꓬꓲ ꓔꓯ ꓠꓺ ꓠꓬꓲˍ ꓕꓯ ꓖꓳ ꓕꓲꓽ ꓣꓳ ꓠꓽ ꓬꓲ ꓔꓯ ꓮ ꓫꓵꓽ ꓒꓳ, ꓖꓶ ꓓꓴ ꓟꓽ ꓙꓳ꓿ ꓖꓳ ꓕꓯ ꓠꓬ ꓪ ꓔꓲ. ꓡꓰ ꓖꓳ ꓕꓲꓽ ꓣꓳ ꓔꓯ ꓠꓱ ꓫꓳ. ꓟ. ꓗꓪ ꓧꓳꓽ ꓓꓳ ꓙꓰ ꓐꓰ ꓐꓯ ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟꓴꓽ ꓗꓪ ꓗꓴꓷꓼ ꓔꓯꓺ ꓥꓳꓽ ꓥ ꓟ ꓤ ꓟꓶ ꓝꓱ ꓑꓮꓲꓽ ꓔꓯ ꓣꓳ ꓡꓳ. ꓠꓬꓲˍ ꓥꓳ ꓐꓯˍ ꓠꓬ ꓣꓳ ꓮꓽ ꓐꓽ ꓐ, ꓐꓽ ꓪꓴ‐ꓢ ꓔꓯ ꓔꓯꓺˍ ꓟ ꓥ ꓡꓳ꓿ ꓬꓲ ꓤ ꓐꓯˍ ꓟ ꓠꓬ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓔꓯꓺ ꓔ ꓟ ꓥ ꓡꓳ꓿ ꓘꓴ ꓔꓯ, ꓙꓰ ꓠ, ꓟ ꓬꓲ ꓡꓰ ꓢꓲ ꓔ ꓟ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓮ ꓙꓵꓽ ꓔꓯ ꓢꓲ ꓒ ꓬꓰ‐ꓢꓴ꓾ ꓤ ꓔꓲ. ꓬꓰ‐ꓢꓴ ꓘ‐ꓣꓲ‐ꓢ‐ꓔꓴ ꓗꓪ ꓐꓰ ꓑꓮꓲꓽ ꓗꓪ ꓡ ꓠ, ꓟ ꓘꓴˍ ꓥ ꓟꓲ ꓕꓲ ꓐꓱ ꓟ ꓠꓬ ꓒ‐ꓡꓲ‐ꓢꓷ ꓐꓴ꓾ ꓥ ꓠꓬ ꓬꓴ‐ꓔ ꓡ ꓞꓳ ꓕꓲ ꓐꓱ ꓟ ꓥꓳ꓿ ꓠꓬꓲ. ꓠꓬꓲ ꓑꓮꓲꓽ ꓐꓵꓻ ꓞꓶꓽ ꓟꓽ ꓖꓪꓽ ꓖꓪꓽ ꓡ ꓢꓴ ꓠꓬ ꓮ ꓡꓲ ꓫꓵꓽ ꓕꓲꓽ ꓣꓳ ꓥ ꓡ꓿ ꓑꓮꓲꓽ ꓐꓵꓻ ꓞꓶꓽ ꓖꓪꓽ ꓓꓴ ꓐꓰ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓘ‐ꓣꓲ‐ꓢ‐ꓔꓴ ꓡꓰ ꓣꓳ ꓔꓯ ꓚꓬꓴ. ꓖꓶ ꓗꓷꓳ꓾ ꓐꓰ ꓐꓯˍ ꓟ ꓖꓪꓽ ꓓꓴ ꓔꓯ ꓐꓯˍ ꓫꓵꓽ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓟꓴ ꓗꓪ ꓗꓴꓷꓼ ꓑꓮꓲꓽ ꓐꓵꓻ ꓞꓶꓽ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓖꓶ ꓔ ꓟ ꓚꓬꓴ. ꓟꓶ ꓡꓰꓳ꓾ ꓐꓰ ꓐꓯˍ ꓟ ꓑꓮꓲꓽ ꓐꓵꓻ ꓞꓶꓽ ꓖꓪꓽ ꓓꓴ ꓖꓳ ꓟ ꓔꓯ ꓐꓯˍ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓑꓮꓲꓽ ꓐꓵꓻ ꓞꓶꓽ ꓖꓳ ꓟ ꓥ ꓟ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓚꓬꓴ. ꓖꓶ ꓗꓷꓳ ꓐꓰ ꓙꓵꓻˍ ꓟ꓾ ꓬꓲ ꓣꓱꓽ ꓛꓰꓽ ꓔꓯ ꓣꓳꓽ ꓘꓳ ꓣꓴˍ ꓟ꓾ ꓖꓳ ꓟ ꓟꓽ ꓥ ꓥꓳ ꓐꓯˍ ꓠꓬ ꓣꓳꓽ ꓠꓬ ꓑꓮꓲꓽ ꓗꓪ ꓓꓵꓽ ꓡꓰ ꓪ ꓟꓽ ꓓꓻ꓿
ꓑꓮꓲꓽ ꓐꓯˍ ꓟ ꓠꓬ ꓟꓴ ꓗꓪ ꓗꓴꓷꓼ ꓔꓯ ꓐꓯˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓚꓬꓴ. ꓖꓶ ꓡˍ ꓟ ꓚꓬꓴ. ꓟꓶ ꓓꓴ ꓟꓴ ꓗꓪ ꓗꓴꓷꓼ ꓗꓪ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓣꓳ ꓚꓬꓴ. ꓟꓶ ꓡꓰꓳ ꓐꓰ ꓐꓯˍ ꓟ ꓔꓯ ꓣꓳ ꓙꓵꓻ ꓠ, ꓟ꓾ ꓣꓳ ꓠꓬ ꓘꓳ ꓣꓴ ꓠ, ꓟ ꓕꓱ ꓟ ꓔꓯ ꓐꓯ ꓔꓬ ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓗꓳ. ꓬꓰ ꓠꓬ ꓣꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓꓻ ꓐꓯˍ ꓟ ꓔꓯ ꓥ ꓟꓲ ꓣꓳ ꓢꓷ. ꓓꓴ ꓥꓳ꓿
ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓙꓵꓻ ꓙꓵꓻ ꓐꓰ ꓣꓳ ꓚꓲ. ꓛꓬ ꓚꓳꓽ ꓚꓲ. ꓛꓬ꓾ ꓟꓴ ꓗꓪ ꓗꓴꓷꓼ ꓗꓪ ꓥꓪ ꓚꓲ. ꓛꓬ ꓥꓪ ꓓꓵꓽ ꓬꓰ ꓓ,ˍ ꓡꓳ ꓐꓰ ꓐꓯ ꓟꓽ ꓓꓻ ꓐꓯˍ ꓟ ꓔꓯ ꓥ ꓟꓲ ꓐꓯ ꓬꓯꓼˍ ꓡꓳ꓿ ꓑꓮꓲꓽ ꓐꓵꓻ ꓞꓶꓽ ꓟꓽ ꓖꓪꓽ ꓖꓪꓽ ꓐꓰ ꓡ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓙꓵꓻ ꓙꓵꓻ ꓐꓰ ꓟꓴ ꓗꓪ ꓗꓴꓷꓼ ꓗꓪ ꓔ, ꓠꓲ, ꓫꓵˍ ꓟ ꓔꓯ ꓟꓲ ꓐꓯ ꓬꓲꓼˍ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟꓴ ꓗꓪ ꓗꓴꓷꓼ ꓔꓯꓺ ꓥꓳꓽ ꓠꓬ ꓣꓳ ꓔꓯ ꓟ. ꓖꓶ ꓡ ꓔꓬ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓘ‐ꓣꓲ‐ꓢ‐ꓔꓴ ꓡꓰ ꓣꓳ ꓔꓯ ꓚꓬꓴ. ꓖꓶ ꓗꓷꓳ ꓐꓯˍ ꓟ ꓔꓯ ꓣꓳ ꓙꓵꓻ ꓢꓲ ꓟꓴ ꓗꓪ ꓗꓴꓷꓼ ꓐꓵꓻ ꓞꓶꓽ ꓖꓪꓽ ꓢꓲ ꓠꓬꓲ꓾ ꓣꓳ ꓐ, ꓐ ꓪꓴ‐ꓢ ꓙꓽ ꓖꓶ ꓔ ꓟ ꓟꓴ ꓗꓪ ꓗꓴꓷꓼ ꓗꓪ ꓣꓳꓽ ꓔꓯ ꓘꓴ ꓔꓬ ꓟ ꓥꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿
