ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓔꓯ꓾ ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓞꓳ ꓐꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓫˍ ꓡꓳ꓿ ꓥꓪ ꓝꓮꓲ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ ꓞꓳ ꓐꓳ ꓕꓲ ꓣꓳ ꓪꓴ‐ꓢ ꓗꓴꓷꓼ ꓗꓪ ꓓꓵꓽ ꓡꓰ ꓠ, ꓟ ꓠꓬ꓾ ꓡꓳꓽ ꓕꓳ ꓕꓲ ꓘ, ꓪꓳꓼ ꓠ ꓗ ꓗꓪ ꓗꓳ. ꓙꓻ ꓙꓰ ꓠ, ꓟ ꓢꓶ. ꓟꓽ ꓞꓲ ꓫˍ ꓡꓳ꓾ ꓐꓯˍ ꓡꓳ꓿
ꓟ. ꓟꓲꓽ ꓝꓲ. ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓕꓯ꓾ ꓚꓵ ꓚꓵ ꓬꓰ‐ꓢꓴ ꓠꓬ ꓐꓳ ꓶ ꓙꓳˍ ꓟ ꓔꓯ ꓟꓽ ꓠꓲ, ꓒꓴ ꓢꓴ ꓕꓲ ꓣꓳ ꓥ ꓡ? ꓖꓳ ꓟ ꓡꓰꓽ ꓟꓽ ꓞꓲꓺ ꓬꓲ ꓠꓬ ꓐꓳ ꓢꓴ꓾ ꓐꓳ ꓠꓲ, ꓫꓵ ꓢꓴ ꓐꓴ ꓔꓯ ꓮ ꓫꓵꓽ ꓪꓴ. ꓠꓬꓲ ꓕꓱ ꓡꓱ ꓡꓲꓽ ꓡꓲꓽ ꓡꓰꓽ ꓙꓳꓺ ꓗꓽ ꓖꓶ ꓔꓬ ꓟ ꓥ ꓡ?
ꓬꓰ‐ꓢꓴ ꓠꓬ ꓐꓳ ꓶ ꓐꓰ ꓞꓳ ꓐꓳ ꓐꓴ ꓔꓯ ꓬꓲ ꓒꓳ, ꓔꓳ, ꓔꓬ ꓟ ꓟꓽ ꓥ ꓐꓯˍ ꓟ ꓔꓯ ꓣꓳ ꓢꓷ.ˍ ꓡꓳ꓿ ꓬꓲ ꓗ ꓠꓯ. ꓛꓳ ꓔꓬ ꓟ ꓬꓲ ꓛꓳꓽ ꓒꓯ, ꓐꓴ ꓘꓴꓽ ꓠꓯꓸꓼ ꓗꓪ ꓒꓴ ꓫꓵ ꓙꓳ ꓢꓴ ꓥˍ ꓟꓲ ꓐˍ ꓡꓳ꓾ ꓟꓬꓱ ꓓꓳꓽ ꓪꓴꓽˍ ꓟ ꓝꓲ. ꓫ ꓢꓴ ꓕꓲ ꓐꓱ ꓥˍ ꓟꓲ ꓚꓬꓼˍ ꓟ ꓥ ꓡꓳ꓿ ꓖꓳ ꓟ ꓘꓴꓽ ꓠꓯꓸꓼ ꓗꓪ ꓕꓲ ꓣꓳ ꓠꓬ ꓬꓲ ꓝꓲ ꓓꓴ ꓒꓬꓱꓼ ꓡ ꓗꓷꓳ꓿
ꓖꓳ ꓡꓱ ꓠꓬꓲ ꓬꓰ‐ꓢꓴ ꓕꓱ ꓡꓱ ꓐꓯˍ ꓟ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓟ ꓢꓷ. ꓠꓲ, ꓙꓽ ꓜꓲꓼ ꓠꓲ, ꓔꓯ ꓝꓮꓲ ꓕꓲ ꓧꓪ, ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿
ꓥꓳꓽ ꓙꓱ 28ꓽ6 ꓗꓪ “ꓔꓱ, ꓠꓲ, ꓡꓰ ꓞꓳ ꓙꓳˍ ꓟ ꓞꓳ ꓫ ꓠꓬ꓾ ꓖꓳꓼ ꓠꓲ, ꓣꓱꓽˍ ꓟ ꓞꓳ ꓐꓳ ꓢꓶ. ꓟꓽ ꓞꓲ ꓙꓲˍ ꓡꓳ” ꓐꓰ ꓐꓳ ꓔ ꓡꓳ꓿ ꓟꓴ ꓖꓪ 37ꓽ16 ꓗꓪ ꓥˍ ꓟꓲ ꓕꓱ ꓟ ꓐꓰ ꓕꓲ ꓡꓰ, ꓐꓳ ꓔ ꓡꓳ꓿
ꓝꓮꓲ ꓥꓳꓽ ꓙꓱ 23ꓽ4 ꓗꓪ ꓥˍ ꓟꓲ꓾ ꓞꓳ ꓐꓳ ꓐꓳ ꓡ ꓠ, ꓟ ꓢꓯꓼ ꓕꓵꓼ ꓪꓴꓽ ꓧꓶ ꓢꓴ ꓕꓽ ꓬꓰ꓿ ꓬꓲ ꓠꓽ ꓝꓲ. ꓗꓪ ꓠꓽ ꓗꓴ.ˍ ꓟ ꓙꓽ ꓗꓴ. ꓠꓲ, ꓙꓳ ꓢꓴ ꓬꓰ꓾ ꓐꓰ ꓐꓯ ꓔ ꓡꓳ꓿
ꓬꓰ‐ꓢꓴ ꓠꓬ ꓐꓳ ꓢꓴ ꓐꓴ ꓠꓬ ꓪꓴ‐ꓢ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓢꓴ ꓒꓬꓱꓼ ꓡ ꓟꓽ ꓓ ꓐꓯ ꓠ ꓛꓲ ꓐꓯ ꓔ ꓡꓳ꓿
ꓡꓳꓽ ꓕꓳ ꓐꓯˍ ꓟ ꓠꓬ ꓩꓴ‐ꓡꓲ‐ꓫꓵ ꓟꓵꓽ (ꓑꓮꓡꓰꓢꓔꓲꓠꓰ) ꓗꓪ ꓪꓴꓽ ꓓꓰ ꓡꓰˍ ꓟ ꓙꓱꓽ ꓤ ꓕꓲ ꓙꓰꓽ ꓥ ꓡꓳ꓾ ꓐꓰ ꓢꓷ. ꓔˍ ꓡꓳ꓿ ꓝꓮꓲ ꓪꓳꓼ ꓠ ꓗ ꓐꓯˍ ꓟ ꓠꓬ ꓐꓵ ꓞꓶꓽ ꓟꓶ ꓛꓲ ꓢꓲˍ ꓕꓯ ꓣꓱꓽˍ ꓟ ꓪꓳꓼ ꓬꓲ ꓠ ꓗ ꓔꓯ ꓐꓯˍ ꓟˍ ꓡꓰ ꓐꓰ꓾ ꓝꓮꓲ ꓦꓬꓼ ꓠꓬꓲ ꓖꓳ ꓟ ꓗꓪ ꓟꓶꓽ ꓘꓶ ꓟꓰ ꓡˍ ꓕꓯ ꓡꓳ ꓒꓱ ꓗꓪ ꓓꓵꓽ ꓡꓰˍ ꓟ ꓗ ꓘꓶꓽ ꓓꓽ ꓟ ꓚꓵ. ꓗꓷ ꓠꓬ꓾ ꓡꓳ ꓒꓱ ꓗꓪ ꓓꓵꓽ ꓓꓵꓽ ꓓꓳ ꓓꓳ ꓬꓰ ꓔꓬ ꓟ ꓪꓰ ꓤ ꓐꓴ ꓓꓵꓽ ꓓꓳ ꓠ, ꓟ ꓐꓱ ꓶ ꓮ ꓘꓶ. ꓣꓳˍ ꓟ ꓗ ꓘꓶꓽ ꓔꓯ ꓔꓯꓺ ꓔˍ ꓡꓳ꓾ ꓐꓰ ꓐꓯ ꓓ,ˍ ꓡꓳ꓿ ꓡ ꓞꓳ ꓕꓲ ꓣꓳ ꓠꓬ ꓗ ꓘꓶꓽ ꓖꓳ ꓟ ꓗꓪ ꓓꓵꓽ ꓙꓰ ꓠ, ꓟ ꓐꓱ ꓶ ꓖꓳ ꓓꓱꓽ ꓗꓴꓺ ꓢꓲ ꓓꓵꓽ ꓙꓰ ꓪˍ ꓡꓳ꓿ ꓖꓳ ꓡꓱ ꓥˍ ꓟꓲ ꓡꓳꓽ ꓕꓳ ꓕꓲ ꓘ, ꓓꓵꓽ ꓡꓰ ꓠ, ꓟ ꓠꓽ ꓟꓲ ꓛꓬ ꓗꓪ ꓟꓳꓼ ꓢꓲ ꓓꓵꓽ ꓙꓰ ꓪ ꓠ ꓗ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓰ‐ꓢꓴ ꓠꓬ ꓐꓳ ꓶ ꓙꓳˍ ꓟ ꓐꓰ ꓗꓴ. ꓙꓲꓽ ꓙꓳ ꓢꓲ ꓮ ꓫꓵꓽ ꓑꓶ. ꓓꓴ ꓕꓱ ꓘꓶ ꓛꓲ ꓙꓳꓺ ꓗꓽ ꓖꓶ ꓔꓬ ꓡ ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ꓿
ꓐꓳ ꓶ ꓠꓬ ꓣꓳ ꓐꓴ ꓔꓯ ꓛꓬ ꓡꓰ ꓥꓳꓽ ꓡꓰˍ ꓟ ꓚꓱ, ꓗꓪ ꓧꓳꓽ ꓙꓰˍ ꓡꓳ꓿ ꓒꓴ ꓫꓵ ꓙꓳˍ ꓕꓯ ꓪꓴ‐ꓢ ꓔꓯ ꓟꓽ ꓓꓵꓽ ꓙꓽ ꓟꓶ ꓟꓶ ꓐꓰ ꓚꓲ. ꓛꓬ ꓖꓳ ꓓꓱꓽ ꓔꓯ ꓡꓰꓽ ꓚꓲ. ꓛꓬ ꓦ ꓡꓱˍ ꓟ ꓚꓱ, ꓗꓪ ꓧꓳꓽ ꓙꓰˍ ꓡꓳ꓿ ꓟꓳ. ꓖꓶ ꓓꓴ 3ꓽ17 ꓗꓪ “ꓠꓴ ꓠꓬ꓾ ꓥꓪ ꓠꓽ ꓒꓵꓽ ꓮꓽ ꓟꓬ, ꓧꓪ ꓟꓶ ꓡꓰ ꓢꓲ꓾ ꓞꓳ ꓐꓳ ꓒꓬꓱꓼ ꓡ ꓠꓬꓲ ꓣꓱꓽ ꓟꓽ ꓡꓳꓼ ꓟ ꓕꓲ ꓫꓵˍ ꓟꓲ ꓟꓽ ꓙꓳ꓾ ꓐꓯˍ ꓟꓲ꓾ ꓠꓴ ꓠꓽ ꓫ. ꓙꓵˍ ꓟ ꓐꓰ꓾ ꓫꓱ. ꓤ ꓠꓯ, ꓟ ꓐꓰ꓾ ꓫ.ˍ ꓟ ꓐꓰ꓾ ꓟꓬ ꓔꓶˍ ꓟˍ ꓐꓰ ꓙꓬꓽ ꓡꓯꓽ ꓟꓴ ꓗ, ꓟ ꓠꓴ ꓟꓽ ꓢꓷ.꓾ ꓐꓰ ꓐꓯ ꓔ ꓡꓳ꓿
ꓝꓮꓲ ꓐꓳ ꓶ ꓠꓬ ꓣꓳ ꓐꓴ ꓔꓯ ꓠꓻ ꓡꓰ ꓝꓲˍ ꓟ ꓠꓲ, ꓡꓶꓽ ꓐꓰ ꓦꓯ. ꓠꓲ, ꓙꓵꓽˍ ꓟ ꓚꓱ, ꓗꓪ ꓧꓳꓽ ꓙꓰˍ ꓡꓳ꓾ ꓐꓰ 1 ꓕꓲ‐ꓟꓳ‐ꓕꓲ‐ꓪꓴ 6ꓽ9‐10 ꓗꓪ ꓐꓳ ꓔ ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓠꓬ ꓣꓳ ꓔꓯ ꓪꓽ ꓠꓬꓲˍ ꓟ ꓚꓵ ꓘꓶꓽ ꓕꓲ ꓟ ꓖꓶ ꓔ ꓡꓳ꓿ ꓣꓳ ꓫ ꓔ ꓟ ꓠꓬ ꓒꓲꓼ ꓡꓰ ꓟꓶꓽ ꓡꓰ ꓢꓲ꓾ ꓣꓳ ꓢꓴ ꓔꓯ ꓖꓶ ꓔ ꓟ ꓔꓯ ꓠꓬ ꓣꓳ ꓫ ꓟꓶˍ ꓥꓳ꓿ ꓢꓴ ꓔꓯ ꓐꓱꓻ ꓖꓶˍ ꓟ ꓠꓬ ꓮ ꓟꓶ ꓟꓲ ꓠꓯ ꓗꓪ ꓔꓬ ꓟ ꓕꓲ ꓤꓶꓻ ꓗꓪˍ ꓟꓲ꓾ ꓡ ꓠ, ꓟ ꓕꓲ ꓤꓶꓻ ꓗꓪˍ ꓟꓲ ꓵꓻ ꓖꓴ ꓟꓽ ꓓꓻ ꓠ ꓛꓲ ꓮꓽ ꓟꓬ, ꓟꓶ ꓡˍ ꓥꓳ꓿ (ꓥꓳꓽ ꓙꓱ 3ꓽ9‐10꓾ ꓡꓴ‐ꓘ 6ꓽ38)꓿
ꓬꓰ‐ꓢꓴ ꓠꓬ ꓣꓳ ꓔꓯ ꓒꓴ ꓗꓪ ꓐꓰ ꓪꓴꓻ ꓟꓶ ꓟꓽ ꓓꓻ ꓟ꓾ ꓞꓳ ꓘꓴꓽˍ ꓟꓲ ꓘꓴꓽ ꓔꓯ, ꓙꓰ ꓟꓽ ꓠ ꓟ ꓒꓵꓽ ꓶ ꓣꓳ ꓔꓯ ꓖꓶ ꓔ ꓡꓳ꓿ ꓣꓳ ꓒꓵꓽ ꓶ ꓓ,ˍ ꓟ ꓗꓪ ꓣꓳ ꓠꓲ, ꓟ ꓠꓬ ꓖꓳ ꓗꓪ ꓓ, ꓡꓳ ꓐꓰ ꓬꓰ‐ꓢꓴ ꓐꓯ ꓔ ꓟ ꓡꓰ ꓐꓰ꓾ ꓣꓳ ꓠꓲ, ꓟ ꓥꓳꓺ ꓓ, ꓖꓴ ꓗꓪ ꓠꓬ ꓣꓳ ꓐꓱ ꓶ ꓮ ꓓꓲꓽ ꓒꓵꓽˍ ꓟ ꓒꓵꓽ ꓶ ꓓ, ꓡꓳ ꓐꓯˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓣꓳ ꓠꓲ, ꓟ ꓔꓯ ꓣꓳ ꓫ ꓒꓵꓽ ꓔ ꓢꓲ ꓠꓬꓲ ꓪꓴ‐ꓢ ꓐꓰ ꓕꓲ ꓞꓲꓼ ꓕꓲ ꓑ ꓟ ꓬꓲ ꓗꓴꓷꓼ ꓗꓪ ꓣꓳ ꓒꓵꓽ ꓶ ꓔꓯ ꓟꓽ ꓗꓶ ꓔ ꓕꓯ ꓠꓽ꓾ ꓣꓳ ꓔꓯ ꓙꓳˍ ꓟ ꓐꓳ ꓶ ꓣꓳ ꓒꓵꓽ ꓶ ꓠꓬ ꓣꓳ ꓔꓯ ꓟꓲ ꓠꓯ ꓕꓱ ꓟ ꓗꓪ ꓡꓰꓽ ꓞꓳ, ꓞ, ꓝꓲˍ ꓥꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓣꓳ ꓒꓵꓽ ꓶ ꓔꓯ ꓮ ꓡꓲ ꓗꓪ ꓗꓶ ꓔ ꓡ? ꓣꓳ ꓠꓲ, ꓟ ꓥꓳꓺ ꓓ, ꓖꓴ ꓠꓬ ꓮ ꓡꓲ ꓗꓪ ꓥ ꓡ꓾ ꓣꓳ ꓒꓵꓽ ꓶ ꓔꓯ ꓟꓲ ꓠꓯ ꓗꓪ ꓙꓳˍ ꓟ ꓐꓳ ꓶ ꓠꓯꓸꓼ ꓗꓪ ꓗꓶ ꓔ ꓡ꓾ ꓟꓽ ꓥ ꓠꓬ ꓪꓴ‐ꓢ ꓐꓰ ꓬꓲ ꓗꓴꓷꓼ ꓗꓪ ꓗꓶ ꓔ ꓡ꓾ ꓐꓯˍ ꓟ ꓔꓯ ꓠꓬꓲ. ꓠꓬꓲ ꓗꓪ ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓯ꓿
