ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯˍ ꓡꓳ꓿ ꓥꓪ ꓠꓬ ꓟꓲ ꓠꓯ ꓕꓱ ꓟ ꓗꓪ ꓢꓲ ꓡꓲ ꓟ ꓣꓴ ꓔꓯ, ꓡˍ ꓡꓳ ꓕꓽ ꓓꓵꓽ ꓙꓽ꓿ ꓥꓪ ꓠꓬ ꓮ. ꓔꓳ. ꓔꓯ ꓣꓴ ꓔꓯ, ꓡˍ ꓡꓳ꓾ ꓐꓰ ꓡꓴ‐ꓘ 12ꓽ49‐53 ꓗꓪ ꓡꓳ. ꓠꓬꓲˍ ꓕꓯ ꓟꓳˍ ꓡꓳ꓿ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓥˍ ꓟꓲ ꓣꓳ ꓑ ꓙꓽˍ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓮ ꓔꓳ. ꓔꓯ ꓔꓯ, ꓡˍ ꓐꓰ ꓐꓯˍ ꓕꓯ ꓟꓽ ꓙꓵꓻ ꓢꓴ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓤꓲˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓬꓲ ꓕꓱ ꓡꓱ ꓬꓰˍ ꓥ꓿ ꓬꓲ. ꓬꓲ ꓢꓲ ꓮ ꓫꓵꓽ ꓥ ꓡ꓿ ꓬꓲ ꓠꓬ ꓗꓪ ꓡꓰ ꓝꓲ ꓠ, ꓟ꓾ ꓐꓰꓽ ꓡꓰ ꓝꓲ ꓠ, ꓟ꓾ ꓐꓱ ꓡꓰ ꓝꓲ ꓠ, ꓟ ꓐꓱ ꓶ ꓬꓲ ꓛꓲ ꓡˍ ꓡꓳ ꓐꓰ ꓐꓯ ꓔ ꓡꓳ꓿ꓬꓲ ꓮ ꓔꓳ. ꓕꓱ ꓟ ꓮ ꓫꓵꓽ ꓥ ꓡ꓾ ꓣꓳ ꓡꓳ. ꓠꓬꓲ ꓡꓯ꓿
ꓮ ꓔꓳ. ꓐꓰ ꓐꓯˍ ꓕꓯ ꓬꓲ ꓬꓰ ꓐ ꓡˍ ꓟ (3) ꓙꓰꓽ ꓙꓳˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓮ ꓔꓳ. ꓬꓰ ꓐ ꓡˍ ꓟ ꓬꓲ ꓪꓴ. ꓕꓲꓽ ꓫꓵꓽ ꓟ ꓠꓬ꓾ ꓐꓬ ꓬꓰ ꓘꓴˍ ꓟ ꓬꓲ ꓢꓯꓼ ꓪ ꓙꓳˍ ꓡꓳ꓿ ꓮ ꓡꓲ ꓫꓵꓽ ꓔꓯ ꓥˍ ꓟꓲ ꓬꓲ ꓐꓬ ꓜꓽ ꓗꓷ ꓘꓴˍ ꓡꓳ꓿ ꓢꓲ, ꓜꓲ ꓢꓲ, ꓟꓲ꓾ ꓧꓳꓺ ꓓꓳ ꓧꓳꓺ ꓟꓲ꓾ ꓮ ꓡꓲ ꓫꓵꓽ ꓔꓯ ꓥˍ ꓟꓲ ꓬꓲ ꓠꓬ ꓐꓬ ꓜꓽ ꓘꓴˍ ꓟ ꓢꓯꓼ ꓬꓲ ꓔꓯ ꓙꓳˍ ꓡꓳ꓿ ꓬꓲ ꓢꓯꓼ ꓪꓽ ꓠꓬꓲ ꓡˍ ꓕꓯ ꓮ ꓫꓵꓽ ꓥ ꓟꓲ ꓬꓲ ꓔꓯ ꓗꓽ ꓔ. ꓟꓽ ꓐ ꓡ꓿ ꓮ ꓙꓵꓽ ꓬꓲ ꓡꓰ ꓐꓬ ꓐ ꓡˍ ꓟ ꓔꓯ ꓣꓳ ꓡꓳ. ꓟꓳˍ ꓡꓳ꓿ ꓕꓱ ꓟ ꓠꓬ ꓬꓲ ꓢꓯꓼ ꓪ ꓬꓲ ꓪꓴ. ꓕꓲ ꓙꓰꓽ ꓟ ꓥ ꓡꓳ꓿
ꓬꓲ ꓢꓯꓼ ꓪ ꓠꓬꓲꓽ ꓙꓰꓽ ꓕꓲ ꓙꓰꓽ ꓟ ꓠꓬ꓾ ꓞꓻˍ ꓟ ꓥ ꓡꓳ꓿ ꓮ ꓔꓳ. ꓕꓱ ꓟ ꓠꓬ ꓞꓻˍ ꓟ ꓑꓶ. ꓓꓴ ꓬꓲ ꓒ ꓕꓲꓺ ꓗꓪ ꓙꓰ ꓟꓽ ꓓꓻ꓿ ꓬꓲ ꓠꓬ ꓬꓲ ꓠꓬ ꓞꓻ ꓢꓯꓼ ꓙꓳˍ ꓟ ꓑꓶ. ꓓꓴ ꓣꓳ ꓪꓳꓽ ꓒꓬꓽ ꓪꓳꓽ ꓟꓲ ꓚꓬ. ꓜꓽˍ ꓟ꓾ ꓮ ꓔꓳ. ꓗꓳꓺˍ ꓟ꓾ ꓬꓲ ꓠꓬ ꓙꓬˍ ꓟ ꓔꓯ ꓡꓱꓻ ꓡꓰ ꓝꓲ ꓐ ꓡˍ ꓡꓳ꓿ ꓞꓻˍ ꓟ ꓢꓯꓼ ꓪ ꓬꓲ ꓔꓯ ꓙꓳˍ ꓡꓳ꓿ ꓬꓲ ꓠꓬ ꓐꓬ ꓗꓴ.ˍ ꓟ ꓡꓰꓽ ꓟꓽ ꓞꓲꓺ ꓐꓬ ꓜꓽ ꓙꓰˍ ꓟ ꓡꓰꓽ ꓟꓽ ꓞꓲꓺ ꓡꓱꓻˍ ꓟ ꓢꓯꓼ ꓪ ꓥˍ ꓟꓲ ꓬꓲ ꓖꓶˍ ꓡꓳ꓿ ꓞꓻˍ ꓟ ꓢꓯꓼ ꓪ ꓥˍ ꓟꓲ ꓬꓲ ꓖꓶˍ ꓡꓳ꓿
ꓢꓺ ꓫꓵꓽ ꓕꓲ ꓫꓵꓽ ꓟ ꓠꓬ ꓠꓬꓲ ꓟꓳꓻ ꓓꓴ ꓖꓶˍ ꓡꓳ꓿ ꓠꓯ ꓞꓲ,ˍ ꓟ ꓗꓪ ꓮ ꓔꓳ. ꓕꓱ ꓟ ꓙꓳˍ ꓠꓬ ꓠꓬꓲ ꓟꓳꓻ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓮ ꓔꓳ. ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓢꓺ ꓫꓵꓽ ꓙꓳˍ ꓟ ꓥ ꓡꓳ꓿ ꓬꓲ ꓪꓴ. ꓕꓲ ꓫꓵꓽ ꓟ ꓠꓬ ꓐꓬ ꓜꓽ ꓘꓴˍ ꓟ ꓢꓯꓼ ꓪ ꓙꓳˍ ꓡꓳ꓿ ꓠꓬꓲꓽ ꓫꓵꓽ ꓕꓲ ꓫꓵꓽ ꓠꓬ ꓞꓻ ꓘꓴˍ ꓟ ꓢꓯꓼ ꓪ ꓙꓳˍ ꓡꓳ꓿ ꓢꓺ ꓫꓵꓽ ꓕꓲ ꓫꓵꓽ ꓟ ꓠꓬ ꓠꓬꓲ ꓟꓳꓻ ꓓꓴ ꓖꓶ ꓐ ꓡˍ ꓡꓳ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ, ꓡ ꓟ ꓮ ꓔꓳ. ꓐꓯˍ ꓟ ꓠꓬ ꓣꓳ ꓣꓱꓽ ꓔꓬ ꓟ ꓮ ꓔꓳ. ꓔꓯ ꓐꓯˍ ꓟ ꓟꓽ ꓥ꓿ ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ,꓾ ꓢꓲ ꓒ ꓬꓰ‐ꓢꓴ ꓠꓲ, ꓟ ꓠꓯꓸꓼ ꓗꓪ ꓐꓬ ꓔꓴ ꓔꓬ ꓟ ꓠꓵꓻ ꓠꓲ, ꓮ ꓔꓳ. ꓔꓯ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓮ ꓔꓳ. ꓥˍ ꓟꓲ ꓖꓳ ꓟ ꓡꓰ ꓐꓰ ꓥ ꓡꓳ꓿ ꓬꓲ ꓠꓬ ꓐꓬ ꓜꓽ ꓙꓰ ꓘꓴˍ ꓡꓳ꓿ ꓣꓳ ꓝꓴꓲ. ꓮ ꓙꓵꓽ꓾ ꓣꓳ ꓬꓰ ꓛꓬ ꓬꓰ ꓥꓳꓽ ꓡꓰ ꓗꓷ ꓟ ꓝꓴꓲ. ꓮ ꓙꓵꓽ ꓔꓯ ꓬꓲ ꓠꓵꓻ ꓠꓲ, ꓗꓪ ꓐꓰ ꓐꓬ ꓜꓽ ꓙꓰ ꓝꓲꓳ꓿ ꓖꓳ ꓡꓱ ꓠꓬꓲ ꓬꓲ ꓔꓯ ꓠꓲ, ꓠꓵ ꓢꓴ꓾ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓠꓬ ꓮ ꓔꓳ. ꓖꓳ ꓟ ꓐꓬˍ ꓟ ꓟꓶ ꓡꓰˍ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓮ ꓔꓳ. ꓖꓳ ꓟ ꓠꓬ ꓬꓲ ꓔꓯ ꓙꓵꓻ ꓢꓴ ꓠꓯꓸꓼ ꓘꓴꓽ ꓗꓪ ꓓꓵꓽ ꓡꓰ ꓢꓲ ꓠꓬꓲ ꓮ ꓙꓵꓽ ꓐꓬ ꓜꓽ ꓙꓰˍ ꓡꓳ꓿ ꓖꓳ ꓡꓱ ꓐꓬ ꓜꓽ ꓙꓰˍ ꓕꓯ ꓟꓽ ꓢꓲꓽ ꓟꓽ ꓫꓬ ꓟ꓾ ꓥꓶˍ ꓟ ꓕꓱ ꓡꓱ ꓫꓵꓽ ꓮ ꓙꓵꓽ ꓠꓬ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓡꓰˍ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓔꓯ ꓘꓳ ꓣꓴ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓮ ꓔꓳ. ꓖꓳ ꓟ ꓔꓯ ꓘꓳ ꓣꓴ ꓟꓶ ꓡꓰ ꓟ ꓥ ꓡꓳ꓿ ꓮ ꓔꓳ. ꓔꓯ ꓢꓺ ꓫꓵꓽ ꓙꓳˍ ꓟ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓚꓵ ꓚꓵ ꓙꓵꓻ ꓢꓲ ꓘꓳ ꓣꓴ ꓟꓶ ꓢꓴ ꓠꓬ꓾ ꓬꓲ ꓠꓲ, ꓟ ꓠꓯꓸꓼ ꓗꓪ ꓮ ꓕꓯ ꓥ ꓟꓲ ꓮ ꓔꓳ. ꓐꓬ ꓓ, ꓢꓲ ꓠꓬꓲ ꓡꓱꓻ ꓓ, ꓡꓳ꓿ ꓮ ꓔꓳ. ꓠꓬ ꓣꓳ ꓔꓯ ꓙꓬˍ ꓟ ꓗꓪ ꓐꓰ ꓗꓽ ꓕ. ꓐ ꓡˍ ꓟ ꓡꓰ ꓐꓰ꓾ ꓣꓳ ꓠꓲ, ꓟ ꓥˍ ꓟꓲ ꓠꓲ, ꓟ ꓙꓬˍ ꓟ꓾ ꓠꓲ, ꓟ ꓫ.ˍ ꓟ ꓕꓱ ꓡꓱ ꓮ ꓙꓵꓽ ꓗꓪ ꓐꓰ ꓬꓲ ꓠꓬ ꓗꓽ ꓕ. ꓙ ꓖꓶˍ ꓟ ꓥ ꓡꓳ꓿ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓮ ꓕꓯ ꓥˍ ꓟꓲ ꓡꓱꓻ ꓡꓱꓻ ꓡꓰꓽ ꓓ, ꓢꓲ ꓠꓬꓲ ꓣꓳ ꓠꓬ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓐ ꓡˍ ꓡꓳ꓿
ꓖꓳ ꓟ ꓡꓰꓽ ꓟꓽ ꓞꓲꓺ ꓠꓬꓲ ꓟꓳꓻ ꓓꓴ ꓙꓳˍ ꓡꓳ꓿ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓠꓯ ꓞꓲˍ ꓟ ꓟꓽ ꓙꓳ꓿ ꓠꓬꓲ ꓟꓳꓻ ꓓꓴ ꓙꓳˍ ꓟ ꓑꓶ. ꓓꓴ ꓠꓱ. ꓐꓯ ꓢꓴ ꓔꓯ ꓥˍ ꓟꓲ ꓣꓳ ꓠꓬ ꓠꓬꓲ ꓟꓳꓻ ꓓꓴ ꓖꓶ ꓐ ꓡˍ ꓟ ꓥ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓗꓪ ꓐꓰ ꓡˍ ꓟ ꓬꓲ ꓮ ꓔꓳ. ꓐꓯˍ ꓟ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓕꓯ ꓣꓳ ꓥˍ ꓟꓲ ꓕꓱ ꓢꓺ ꓫꓵꓽ ꓔꓯ ꓬꓰ ꓐ ꓡˍ ꓡꓳ꓿ ꓮ ꓡꓲ ꓥ ꓡ꓿ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓠꓯꓸꓼ ꓘꓴꓽ ꓗꓪ ꓣꓳ ꓞꓳ ꓙꓳ ꓐ ꓡˍ ꓟ ꓡꓰꓽ ꓟꓽ ꓞꓲ ꓠꓲ, ꓟ ꓠꓯꓸꓼ ꓗꓪ ꓡꓱꓻˍ ꓟ꓾ ꓗ, ꓛꓲꓽˍ ꓟ ꓕꓱ ꓡꓱ ꓫꓵꓽ ꓔꓳ, ꓜꓳꓽˍ ꓥꓳ꓿
ꓣꓳ ꓟꓲ ꓠꓯ ꓕꓱ ꓟ ꓗꓪ ꓠꓬ ꓟꓽ ꓥ ꓫꓵꓽ ꓮ ꓔꓳ. ꓥˍ ꓟꓲ ꓖꓳ ꓡꓱ ꓙꓳˍ ꓢꓰꓽ ꓡꓳ꓿ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓠꓲ, ꓟ ꓫ. ꓟ ꓮ ꓔꓳ.꓾ ꓚꓵ ꓚꓵ ꓞꓻˍ ꓟ ꓑꓶ. ꓓꓴ ꓕꓲ ꓐꓱ ꓙꓳˍ ꓟ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓧꓶꓽ ꓛꓵꓽ ꓫꓵꓻ ꓟˍ ꓟꓲ ꓙꓳˍ ꓡꓳ꓿ ꓠꓱ. ꓐꓯ ꓕꓯꓽ ꓢꓲ ꓗꓪ ꓢꓶ. ꓟꓽ ꓞꓲꓺ ꓠꓯꓸꓼ ꓘꓴꓽ ꓗꓪ ꓮ ꓔꓳ. ꓖꓳ ꓟ ꓠꓬ ꓞꓻˍ ꓡꓳ꓿ ꓖꓳ ꓡꓱ ꓠꓬꓲ ꓫꓵꓽ ꓟꓽ ꓙꓳ ꓟ ꓑꓶ. ꓓꓴ ꓧꓶꓽ ꓛꓵꓽ ꓫꓵꓻ ꓫꓵꓽ ꓮ ꓟꓬ, ꓙꓳˍ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓠꓲ, ꓟ ꓫ.ˍ ꓟ ꓠꓲ, ꓟ ꓙꓬˍ ꓟ ꓮ ꓔꓳ. ꓡꓰꓽ ꓐꓬ ꓓ, ꓕꓯ꓾ ꓝꓮꓲ ꓥꓶˍ ꓟ꓾ ꓦꓯ. ꓠꓲ, ꓙꓵˍ ꓟ ꓮ ꓔꓳ. ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓓ, ꓕꓯ ꓣꓳ ꓚꓲ. ꓛꓬ ꓚꓳꓽ ꓚꓲ. ꓛꓬ ꓫꓵꓻ ꓙꓰˍ ꓟ ꓕꓲ ꓡꓰ, ꓥꓳ꓿ ꓮ ꓔꓳ. ꓖꓳ ꓟ ꓐꓱ ꓶ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓮ ꓔꓳ. ꓔꓯ ꓣꓱꓽ ꓞ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓮ ꓔꓳ. ꓔꓯ ꓟꓶ ꓡꓰꓳ꓿ ꓖꓳ ꓟ ꓔꓯ ꓟꓽ ꓫꓵꓻ ꓡꓰ ꓠ, ꓟ ꓣꓳ ꓮ ꓕꓯ ꓟꓲ ꓗꓪꓼ ꓫꓵꓼ ꓠ ꓔ ꓡꓳ꓿ ꓖꓳ ꓟ ꓔꓯ ꓣꓳ ꓢꓲ, ꓛꓴ ꓠ ꓔˍ ꓡꓳ꓿ ꓮ ꓫꓵꓽ ꓢꓲ, ꓛꓴ ꓠ ꓔˍ ꓡ꓿ ꓢꓲ ꓒ ꓬꓰ‐ꓢꓴ ꓐꓰ ꓮ ꓕꓯ ꓟꓲ ꓗꓴ. ꓙꓲꓽ ꓙꓳ꓿ ꓬꓲ ꓔꓯ ꓠꓲ, ꓠꓵꓻ꓿ ꓬꓲ ꓔꓯ ꓪꓽ ꓘꓴ꓿ ꓕꓲ ꓠꓬꓲ ꓕꓲ ꓠꓬꓲ ꓬꓲ ꓠꓯꓸꓼ ꓗꓪ ꓐꓰ ꓣꓳ ꓠꓬ ꓬꓲ ꓒ ꓕꓲꓺ ꓗꓪ ꓔꓬ ꓢꓲ ꓠꓬꓲ ꓣꓳ ꓮ ꓔꓳ. ꓔꓯ ꓟꓽ ꓫꓵꓻ ꓡꓰ ꓝꓲ ꓠ, ꓟ ꓢꓯꓼ ꓕꓵꓼ ꓠ ꓔˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓠꓲ, ꓫꓵˍ ꓟ ꓮ ꓔꓳ. ꓠꓬ ꓠꓵꓻ ꓠꓲ, ꓮ ꓔꓳ. ꓥ ꓡꓳ꓿ ꓬꓲ ꓠꓬ ꓞꓳ ꓤ ꓔꓯ ꓠꓻ ꓡꓰ ꓝꓲ ꓐꓰ ꓐꓯˍ ꓟ ꓠꓽ ꓟꓽ ꓥ꓿ ꓖꓳ ꓡꓱ ꓐꓯˍ ꓥ ꓟꓲ ꓟꓽ ꓙꓵꓻ ꓢꓴ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓐꓯˍ ꓥ꓾ ꓐꓯ ꓢꓲ ꓬꓲ ꓔꓯ ꓤꓲꓻ ꓢꓴ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓙꓵꓻ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓮ ꓔꓳ. ꓐꓯˍ ꓟ ꓠꓬ ꓠꓵꓻ ꓠꓲ, ꓮ ꓔꓳ. ꓥꓳ ꓐꓯˍ ꓟ ꓣꓳ ꓢꓷ. ꓢꓲ ꓠꓬꓲ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓐꓰ ꓮ ꓔꓳ. ꓐꓬ ꓡ ꓝꓲ ꓡꓯ꓿
