ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪ.꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓒꓲ‐ꓕꓱ ꓡꓰ꓾ ꓥꓪ ꓔꓯ ꓛꓬ ꓡ ꓢꓴ ꓔꓯ ꓮ ꓟꓬ ꓧꓪ, ꓖꓽ ꓖꓶ ꓠꓯ, ꓡ꓾ ꓐꓰ ꓠꓺ ꓠꓬꓲˍ ꓕꓯ ꓢꓲ ꓒ ꓬꓰ‐ꓢꓴ ꓡꓰ꓾ 70 ꓧꓪ, ꓟꓽ ꓞꓲꓺ꓾ 70 ꓝ. ꓟꓽ ꓞꓲ ꓖꓽ ꓖꓶ ꓠ ꓗˍ ꓡꓳ꓾ ꓐꓰ ꓒꓳ, ꓖꓶˍ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓠꓬꓲ. ꓠꓬꓲ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓮ ꓡꓲ ꓐꓰ ꓖꓽ ꓖꓶ ꓠꓯ, ꓡ ꓐꓯˍ ꓟ ꓔꓯ ꓔꓯꓺ ꓥꓳꓽ ꓣꓱꓽ ꓢꓲ ꓠꓬꓲ ꓐꓯ ꓖꓶˍ ꓟ ꓥ ꓡꓳ꓿
ꓔꓯꓺ ꓥꓳꓽ ꓠꓬ ꓮ ꓡꓲ ꓥ ꓡ ꓐꓯˍ ꓠꓬ꓾ ꓢꓲꓽ ꓒ ꓕꓲ ꓣꓳ ꓔꓬ, ꓗꓪ ꓪꓽ ꓤ ꓮ ꓟꓬ, ꓙꓳˍ ꓡꓳ꓿ ꓪꓽ ꓤ ꓮ ꓟꓬ, ꓟ ꓠꓯꓸꓼ ꓗꓪ ꓕꓲ ꓣꓳ ꓠꓬ ꓢꓲꓽ ꓒ ꓔꓯ ꓒꓴ ꓐꓵ ꓞ, ꓡꓳ꓿ ꓐꓵ ꓞ, ꓟ ꓑꓶ. ꓓꓴ ꓪꓽ ꓤ ꓖꓳ ꓟ ꓠꓬ꓾ ꓢꓲꓽ ꓒꓽꓳ ꓥꓪ ꓠꓴ ꓔꓯ ꓐꓵ ꓞ, ꓟ ꓥꓪ ꓡꓲ. ꓖꓶ ꓟꓽ ꓐ ꓡ ꓠꓬꓲ ꓥꓪ ꓔꓯ ꓫꓱ. ꓤ ꓡꓯ꓾ ꓐꓰ ꓓꓰꓽˍ ꓕꓯ꓾ ꓖꓳ ꓢꓲꓽ ꓒ ꓠꓽ ꓪꓽ ꓤ ꓖꓳ ꓕꓲ ꓣꓳ ꓔꓯ ꓬꓲ ꓡꓰ ꓫꓱ. ꓤ ꓢꓲ ꓠꓬꓲ ꓬꓲ ꓐꓵ ꓞ, ꓟ ꓮ ꓙꓵꓽ ꓖꓽ ꓖꓶ ꓗꓷꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲꓽ ꓒ ꓡꓰ ꓪꓽ ꓤ ꓖꓳ ꓟ ꓔꓯ ꓖꓽ ꓖꓶ ꓗꓷ ꓗ ꓠꓯ. ꓪꓽ ꓤ ꓖꓳ ꓟ ꓠꓬ ꓠꓱ. ꓐꓯ ꓪꓽ ꓤ ꓛꓳꓽ ꓒꓯ, ꓔꓯ ꓬꓲ ꓡꓰ ꓐꓵ ꓞ, ꓟ ꓔꓯ ꓓꓰꓽˍ ꓡꓳ ꓧꓪ.ˍ ꓡꓳ꓿ ꓖꓳ ꓕꓯ ꓪꓽ ꓤ ꓖꓳ ꓟ ꓔꓯ ꓐꓵ ꓞ, ꓢꓴ ꓬꓲ ꓛꓳꓽ ꓒꓯ, ꓠꓬ ꓕꓱ ꓡꓱ ꓐꓯˍ ꓡꓳ꓿ ꓛꓳꓽ ꓒꓯ,ꓳ꓾ ꓥꓪ ꓐꓵ ꓞ, ꓟ ꓔꓯ ꓕꓲ ꓑ, ꓤ ꓡꓳ. ꓠꓬ, ꓖꓶ ꓡꓯ꓿ ꓮ ꓟꓶ ꓠꓽ ꓠꓴ ꓔꓯ ꓥꓪ ꓖꓶ ꓟꓽ ꓐ ꓡ ꓢꓰꓽ꓿ ꓥꓪ ꓔꓯ ꓫꓱ. ꓤ ꓡꓯ꓾ ꓐꓰ ꓓꓰꓽˍ ꓡꓳ꓿
ꓖꓳ ꓡꓱ ꓐꓯˍ ꓥ ꓟꓲ ꓪꓽ ꓤ ꓖꓳ ꓟ ꓠꓽ ꓬꓲ ꓛꓳꓽ ꓒꓯ, ꓔꓯ ꓟꓽ ꓫꓱ. ꓤ ꓤ ꓐꓰ ꓘꓶ ꓠꓬꓲ ꓓꓶꓽ ꓠꓬꓲ꓾ ꓬꓲ ꓔꓯ ꓟꓽ ꓖꓶ ꓕ ꓑꓳꓸꓼ ꓟꓽ ꓫꓱ. ꓤ ꓤ ꓐꓰ ꓪꓽ ꓤ ꓖꓳ ꓟ ꓠꓬ ꓬꓲ ꓛꓳꓽ ꓒꓯ, ꓔꓯ ꓓꓶꓽ ꓔꓲ. ꓔꓬ ꓡꓳ꓿ ꓖꓳ ꓟ ꓔꓯ ꓪꓽ ꓤ ꓖꓳ ꓟ ꓬꓲ ꓢꓲ ꓒ ꓢꓷ. ꓡꓰˍ ꓕꓯ ꓠꓽ ꓢꓲꓽ ꓒ ꓡꓰ ꓪꓽ ꓤ ꓖꓳ ꓕꓲ ꓣꓳ ꓔꓯ ꓐꓱ ꓓꓴꓽ ꓗꓪ ꓐꓱ ꓗꓷ ꓢꓲ ꓠꓬꓲ ꓓꓶꓽ ꓠꓬꓲ꓾ ꓬꓲ ꓐꓵ ꓞ, ꓟ ꓚꓱ, ꓟꓽ ꓖꓴ ꓡꓰ ꓕ ꓑꓳꓸꓼ ꓪꓽ ꓤ ꓖꓳ ꓟ ꓔꓯ ꓖꓳ ꓗꓪ ꓐꓱ ꓔ ꓟ ꓥ ꓡꓳ꓿ ꓔꓯꓺ ꓥꓳꓽ ꓕꓱ ꓟ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓐꓯ ꓟꓳ. ꓖꓶˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ꓾ ꓢꓲ ꓒ ꓬꓰ‐ꓢꓴ ꓔꓯ ꓒꓲ‐ꓕꓱ ꓠꓬ ꓮ ꓟꓬ ꓧꓪ, ꓖꓽ ꓖꓶ ꓠꓯ, ꓡ ꓐꓰ ꓐꓯˍ ꓕꓯ꓾ ꓢꓲ ꓒ ꓬꓰ‐ꓢꓴ ꓠꓬ ꓫꓵꓽ ꓞꓲ ꓧꓪ, ꓟꓽ ꓞꓲꓺ ꓐꓰ ꓕꓱ ꓡꓱ ꓐꓯˍ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓮ ꓕꓯ ꓥˍ ꓟꓲ ꓖꓽ ꓖꓶ ꓠ, ꓟ ꓥꓳ꓿ ꓮ ꓡꓲ ꓐꓰ ꓖꓽ ꓖꓶ ꓠ ꓗˍ ꓡ ꓐꓯˍ ꓠꓬ ꓧꓶ. ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓔꓯꓺ ꓥꓳꓽ ꓖꓶˍ ꓟ ꓡꓰ ꓐꓰ꓾ ꓢꓲꓽ ꓒ ꓖꓳ ꓟ ꓠꓬ ꓬꓲ ꓔꓯ ꓫꓱ. ꓤ ꓠꓬꓲ ꓠꓵꓻ ꓠꓲ, ꓗꓪ ꓐꓰ ꓬꓲ ꓐꓵ ꓞ, ꓟ ꓔꓯ ꓖꓽ ꓖꓶˍ ꓟ ꓕꓲꓽ ꓡꓰ, ꓣꓳ ꓔꓯ ꓛꓬ ꓡ ꓟ ꓝꓴꓲ. ꓮ ꓙꓵꓽ ꓔꓯ ꓥˍ ꓟꓲ ꓣꓳ ꓠꓬ ꓠꓵꓻ ꓠꓲ, ꓗꓪ ꓐꓰ ꓖꓽ ꓖꓶ ꓠ, ꓟ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓔꓯ ꓛꓬ ꓡ ꓢꓴ ꓔꓯ ꓠꓬ ꓣꓳ ꓠꓬ ꓖꓽ ꓖꓶ ꓠꓲ, ꓟꓽ ꓫꓵ꓿ ꓕꓲꓽ ꓧꓪ,꓾ ꓠꓬꓲꓽ ꓧꓪ,꓾ ꓢ ꓧꓪ, ꓡꓰꓽ ꓖꓽ ꓖꓶ ꓐ ꓡˍ ꓡꓳ꓿ ꓢ ꓧꓪ, ꓕꓲ ꓧꓪ, ꓗꓪ ꓠꓬ ꓣꓳ ꓠꓬ ꓖꓽ ꓖꓶ ꓠꓲ, ꓟꓽ ꓫꓵ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ꓾ ꓠꓬꓲ. ꓠꓬꓲ ꓠꓴ ꓖꓽ ꓖꓶ ꓟꓽ ꓐ ꓡ ꓕꓯ ꓠꓽ ꓣꓳ ꓐꓵ ꓞ, ꓟ ꓝꓴꓲ. ꓥˍ ꓟꓲ ꓣꓳ ꓪꓴ‐ꓢ ꓡꓰ ꓟꓽ ꓖꓽ ꓖꓶ ꓟ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓔꓯ ꓛꓬ ꓡ ꓢꓴ ꓔꓯ ꓣꓳ ꓖꓽ ꓖꓶ ꓠ, ꓟ ꓠꓽ ꓮ ꓘꓶ. ꓫ.ˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓖꓽ ꓖꓶ ꓠ, ꓟ ꓠꓬ ꓠꓵꓻ ꓠꓲ, ꓟꓽ ꓪꓴꓽ ꓕꓯ ꓠꓽ ꓣꓳ ꓖꓽ ꓖꓶ ꓟꓽ ꓐ ꓡ꓿ ꓣꓳ ꓬꓲ ꓔꓯ ꓟꓽ ꓫꓱ. ꓤ ꓕꓯ ꓠꓽ ꓣꓳ ꓖꓽ ꓖꓶ ꓟꓽ ꓐ ꓡ꓿ ꓠꓵꓻ ꓠꓲ, ꓟꓽ ꓥ ꓥꓳ ꓐꓯˍ ꓠꓬ ꓣꓳꓽ ꓖꓽ ꓖꓶ ꓟꓽ ꓐ ꓡ꓿ ꓖꓽ ꓖꓶ ꓟꓽ ꓐ ꓡ ꓕꓯ ꓠꓽ ꓣꓳ ꓝꓴꓲ. ꓔꓯ ꓥˍ ꓟꓲ ꓪꓴ‐ꓢ ꓡꓰ ꓟꓽ ꓖꓽ ꓖꓶ ꓟ ꓥꓳ꓿
ꓠꓵꓻ ꓠꓲ, ꓗꓪ ꓐꓰ ꓣꓳ ꓢꓴ ꓔꓯ ꓖꓽ ꓖꓶˍ ꓥꓳ ꓐꓯ ꓠꓬ ꓢꓴ ꓥˍ ꓟꓲ ꓡꓲ, ꓗꓷˍ ꓟ ꓕꓲ ꓡꓰ, ꓣꓳ ꓔꓯ ꓥˍ ꓟꓲ ꓐ, ꓐ ꓪꓴ‐ꓢ ꓡꓰ ꓣꓳ ꓔꓯ ꓡꓲ, ꓗꓷ ꓟꓶ ꓝꓲˍ ꓥꓳ꓿ ꓕꓱ ꓟ ꓠꓬ ꓣꓳ ꓐꓱ ꓶ ꓥˍ ꓟꓲ꓾ ꓢꓴ ꓐꓱ ꓶ ꓥˍ ꓟꓲ꓾ ꓐ, ꓐ ꓪꓴ‐ꓢ ꓐꓱ ꓶ ꓥˍ ꓟꓲ ꓮ ꓙꓵꓽ ꓙꓲꓻ ꓓꓰ ꓡꓰˍ ꓥꓳ꓿ ꓕꓱ ꓟ ꓑꓶ. ꓓꓴ ꓖꓽ ꓖꓶˍ ꓟ ꓠꓽ ꓫ. ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓠꓵꓻ ꓠꓲ, ꓗꓪ ꓐꓰ ꓠꓽ ꓣꓳ ꓖꓽ ꓖꓶ ꓐ ꓡˍ ꓡꓳ꓿ ꓠꓵꓻ ꓠꓲ, ꓟꓽ ꓙꓳ ꓕꓯ ꓠꓽ ꓣꓳ ꓖꓽ ꓖꓶ ꓟꓽ ꓐ ꓡ꓿ ꓖꓳ ꓟ ꓑꓶ. ꓓꓴ ꓠꓵꓻ ꓠꓲ, ꓙꓳ ꓠ, ꓟ ꓠꓽ ꓣꓳ ꓠꓵꓻ ꓠꓲ, ꓢꓲ ꓒ ꓥ ꓟ ꓣꓳ ꓪꓴ‐ꓢ ꓣꓱꓽ ꓛꓰꓽ ꓗꓪ ꓐꓰ ꓪꓴ‐ꓢ ꓠꓵꓻ ꓠꓲ, ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓠꓲ, ꓠꓵˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓠꓲ, ꓠꓵ ꓠ, ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓢꓯꓼ ꓟꓬ ꓖꓶ ꓗꓷˍ ꓗꓪ ꓛꓲ ꓣꓳ ꓔꓯ ꓖꓽ ꓖꓶˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓣꓳ ꓠꓶꓽ ꓛꓳꓽ ꓔꓯ ꓖꓽ ꓖꓶ ꓠ, ꓟ ꓥꓳ꓿ ꓮ ꓙꓵꓽ ꓢꓴ ꓔꓯ ꓫ. ꓟꓳ꓿
