ꓟꓴ ꓗꓪ ꓗꓴꓷꓼ ꓗꓪ ꓮ ꓓꓲꓽ ꓪꓴꓽˍ ꓟ ꓮꓽ ꓟ ꓥ ꓡ꓾ ꓐꓰ ꓛꓳ ꓒꓯ, ꓐꓴ ꓡꓰ ꓬꓰ‐ꓢꓴ ꓔꓯ ꓠ ꓠꓬꓲ ꓡˍ ꓕꓯ ꓬꓰ‐ꓢꓴ ꓠꓬ ꓤ ꓠꓱ ꓤ ꓕꓲ ꓣꓳ ꓔꓯ ꓘꓴ ꓔꓯ, ꓡ ꓢꓲ꓾ ꓮ ꓓꓲꓽ ꓪꓴꓽ ꓢꓴ ꓒꓬꓱꓼ ꓡꓰ ꓠꓲ, ꓫꓵˍ ꓠꓬ ꓕꓱ ꓤ ꓠꓱ ꓤ ꓡꓰ ꓐꓰ ꓙ ꓣꓳ ꓠꓯ, ꓡꓳ꓾ ꓐꓰ ꓒꓳ, ꓖꓶˍ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓤ ꓠꓱ ꓤ ꓐꓯˍ ꓟ ꓠꓬ ꓠꓲ, ꓟ ꓒꓴ ꓢꓴ꓾ ꓢꓴ ꓔꓯ ꓠꓬꓲ ꓟꓽ ꓟꓵ ꓟꓽ ꓬꓰ ꓢꓴ ꓐꓴ ꓥ ꓡꓳ꓿
ꓬꓲ ꓪ ꓐꓴ ꓠꓬ ꓠꓱ. ꓐꓯ ꓢꓴ ꓔꓯ ꓝꓴꓲ. ꓓꓰˍ ꓟ꓾ ꓓꓵꓽ ꓙꓽ ꓥꓳꓽ ꓓꓵꓽ ꓙꓽ ꓛꓬ ꓡꓰˍ ꓟ ꓟꓽ ꓙꓳ꓿ ꓢꓳ ꓣꓴ ꓠꓲ,ˍ ꓟꓲ ꓒ ꓐꓲꓸꓼ ꓙꓳˍ ꓡꓳ꓿
ꓕꓱ ꓡꓱ ꓫꓵꓽ ꓠꓲ, ꓟ ꓠꓬ ꓣꓳ ꓟꓲ ꓠꓯ ꓞꓳ ꓤ ꓐꓴ ꓞꓲꓼ ꓙꓳ ꓡˍ ꓟ ꓡꓰ ꓣꓳ ꓠꓯꓸꓼ ꓗꓪ ꓐꓰ ꓒꓲꓼ ꓡꓰ ꓟꓶꓽ ꓡꓰ ꓔꓬ ꓟ ꓥ ꓡꓳ꓿ ꓞꓲꓼ ꓮ ꓘꓶ. ꓪꓴꓽ ꓡ ꓮ ꓘꓶ. ꓤ ꓠꓱ ꓤ ꓕꓯ ꓙꓳ ꓗꓳ. ꓡˍ ꓟ ꓙ ꓣꓳ ꓠꓲ, ꓠꓬ ꓖꓳ ꓡꓱ ꓒꓲꓼ ꓡꓰ ꓔꓬ ꓟ ꓥ ꓢꓲ ꓠꓬꓲ꓾ ꓪꓴ‐ꓢ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓠ, ꓟ ꓐꓱ ꓶ ꓠꓬ ꓕꓱ ꓟ ꓔꓯ ꓣꓳ ꓝꓮꓲ ꓕꓲ ꓧꓪ, ꓧꓪ ꓠ ꓗ, ꓟ ꓥ ꓡꓳ꓿ ꓢꓯꓼ ꓕꓵꓼ ꓠ ꓗ, ꓟ ꓥ ꓡꓳ꓿
ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓟ ꓗꓪ ꓥˍ ꓟꓲ꓾ ꓕꓱ ꓟ ꓠꓬ ꓮ ꓡꓲ ꓒꓬꓱꓼ ꓡ ꓓ, ꓡ꓾ ꓐꓰ ꓐꓯ ꓢꓲ ꓓꓵꓽ ꓙꓽ ꓟꓶˍ ꓟ ꓟꓽ ꓬꓰ ꓬꓰ ꓣꓳ ꓠꓲ, ꓟ ꓔꓯ ꓒꓴ ꓔ ꓠ ꓗ, ꓡꓳ꓿ ꓚꓲ. ꓛꓲ ꓚꓳꓽ ꓚꓲ. ꓛꓬ ꓢꓳ ꓣꓴ ꓐ ꓡˍ ꓟ꓾ ꓫꓬ, ꓔꓱ, ꓐ ꓡˍ ꓟ꓾ ꓫꓬ, ꓔꓱ, ꓢꓻˍ ꓟ ꓠꓲ, ꓟ ꓥˍ ꓟꓲ ꓙꓳ ꓠ ꓔˍ ꓡꓳ꓿
ꓕꓱ ꓡꓱ ꓥꓳ ꓐꓯ ꓕꓯ ꓠꓽ ꓪꓴ‐ꓢ ꓡꓰ ꓖꓶ ꓠꓲ, ꓒꓴˍ ꓟ ꓮ ꓙꓵꓽ ꓔꓯ ꓣꓳ ꓘꓳ ꓣꓴ ꓐ ꓡˍ ꓥꓳ꓿ ꓢꓲ ꓒ ꓠꓲ, ꓡꓶꓽ ꓛꓳˍ ꓟ ꓞꓳ ꓤ ꓒꓬꓱꓼ ꓡˍ ꓥꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓤ ꓠꓱ ꓤ ꓡꓰ ꓐꓰ ꓗ, ꓟ ꓕꓱ ꓡꓱ ꓫꓵꓽ ꓡ ꓞꓳ ꓔꓯ ꓬꓰ‐ꓢꓴ ꓟꓬꓱ ꓗꓪ ꓐꓰ ꓘꓳ ꓣꓴˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓖꓳ ꓓꓱꓽ ꓔꓯ ꓘꓳ ꓣꓴˍ ꓟ ꓥ ꓡꓳ꓿
ꓝꓮꓲ ꓢꓲꓽ ꓫꓬ ꓕꓳꓽ ꓶ ꓗꓪ꓾ ꓢꓯꓼ ꓐꓽ ꓢꓴ ꓔꓯ ꓫꓱ. ꓤ ꓠ, ꓟ ꓕꓵꓼ ꓪ ꓖꓶ ꓔ ꓡꓳ꓿ ꓢꓯꓼ ꓐꓽ ꓢꓴ ꓐꓯˍ ꓟ ꓠꓬ ꓤ ꓠꓱ ꓤ ꓐꓴˍ ꓡꓰꓽ ꓟꓽ ꓞꓲꓺ ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓐꓰ ꓞꓲ ꓪꓴꓽ ꓡˍ ꓥ ꓟꓲ ꓢꓷ. ꓠꓲ, ꓗꓪ ꓢꓯꓼ ꓐꓽ ꓢꓴ꓾ ꓒꓴ ꓫꓵ ꓢꓯꓼ ꓐꓽ ꓢꓴ꓾ ꓙꓽ ꓜꓲꓼ ꓠꓲ, ꓢꓯꓼ ꓐꓽ ꓢꓴ ꓐꓴ ꓔꓯ ꓐꓯˍ ꓟ ꓥ ꓡꓳ꓿ ꓕꓱ ꓡꓱ ꓫꓵꓽ ꓞꓳ ꓤ ꓐꓴ ꓠꓬ ꓠꓱ. ꓐꓯ ꓢꓴ ꓡꓰ ꓟꓽ ꓥ ꓟ ꓙꓻ ꓖꓴ ꓗꓪ ꓧꓳꓽ ꓙꓰˍ ꓠꓬ ꓙꓽ ꓖꓴ ꓥꓳꓽ ꓡꓰ ꓢꓻˍ ꓟ ꓪꓴ. ꓠꓬꓲ ꓥ ꓡꓳ꓿ ꓝꓮꓲ ꓬꓰ‐ꓢꓴ ꓡꓰ ꓮ ꓣꓳ ꓒꓲꓼ ꓬꓰ ꓟ ꓔꓯꓺ ꓥꓳꓽ ꓔꓯ ꓐꓯ ꓟ. ꓖꓶ ꓔ ꓡꓳ꓿ ꓪꓴ‐ꓢ ꓠꓬ ꓮ ꓣꓳ ꓕꓲ ꓦꓬ ꓟ ꓗꓪ ꓕꓲ ꓟ ꓒꓲꓼ ꓡꓰ ꓟ ꓮ ꓣꓳ ꓡꓳ. ꓒ ꓔꓯ ꓫꓱ.ˍ ꓡꓳ꓿ ꓒꓲꓼ ꓡꓰ ꓟ ꓖꓳ ꓮ ꓣꓳ ꓕꓲꓽ ꓟ ꓔꓯ ꓧꓪ ꓟꓳꓻ ꓡꓰˍ ꓕꓯ ꓗꓴ ꓞꓲꓺ ꓗꓴ ꓟ ꓑꓶ. ꓓꓴ ꓗ, ꓛꓲꓽˍ ꓟ ꓢꓶ. ꓟꓽ ꓞꓲꓺ ꓗ, ꓛꓲꓽˍ ꓡꓳ꓿ ꓖꓳ ꓟˍ ꓡꓰ ꓐꓰ ꓤ ꓠꓱ ꓤ ꓕꓱ ꓟꓬ ꓟ ꓗꓪ ꓕꓲ ꓣꓳ ꓬꓲ ꓢꓯꓼ ꓟꓬ ꓒꓲꓼ ꓬꓰ ꓠ, ꓟ ꓠꓬ꓾ ꓟꓴ ꓗꓪ ꓗꓪ ꓔꓬ ꓟ ꓠꓴ ꓪ ꓐ, ꓐ ꓠꓲ, ꓡꓶꓽ ꓟꓽ ꓥ꓾ ꓐꓰ ꓐꓯ ꓔ ꓡꓳ꓿
