ꓢꓲꓺ ꓒ ꓬꓰ‐ꓢꓴ ꓡꓰ ꓗ ꓘꓶꓽ ꓦꓴ ꓠꓬ, ꓢꓴ ꓔꓯ ꓥꓳꓽ ꓟ. ꓖꓶ ꓟ (Sunday reflection)
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (19) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓠ, ꓟ ꓢꓲꓽ ꓫꓬ ꓕꓳ ꓶ ꓝꓲ. ꓠꓬꓲ ꓡꓴ‐ꓘ ꓕꓳ ꓶ 12ꓽ 32‐48 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓮ ꓣꓳ ꓜꓴ ꓤꓽꓳ ꓕꓽ ꓙꓳꓺ꓿
ꓮ ꓡꓲꓳ ꓐꓯ ꓠꓬ ꓠꓴ ꓪ ꓐ, ꓐꓽ ꓠꓽ ꓬꓲ ꓗꓴꓷꓼ ꓠꓴ ꓪ ꓔꓯ ꓖꓶ ꓠꓲ, ꓒꓴˍ ꓡꓳ꓿ ꓠꓴ ꓪ ꓙꓳˍ ꓟ ꓪꓴꓽ ꓗꓷ ꓢꓲ ꓞꓳ ꓫ. ꓔꓯ ꓖꓶ꓿ ꓠꓴ ꓪ ꓚꓲ ꓛꓬ ꓐꓱ ꓶ ꓐꓰꓽ ꓡꓰ ꓟꓽ ꓓ ꓟ ꓒꓴ ꓗꓶ ꓕꓴꓽ ꓙꓽ ꓖꓶ ꓔ꓿ ꓟꓴ ꓗꓪ ꓕꓯꓽ ꓢꓲ ꓗꓪ ꓣꓱ ꓖꓴ ꓟꓽ ꓓ ꓠ ꓛꓲ ꓒꓵꓽ ꓶꓽ ꓫ ꓗꓶ ꓔ꓿ ꓖꓳ ꓗꓪꓠꓬ ꓞꓳ ꓘꓴꓽˍ ꓟꓲ ꓟꓽ ꓘꓴˍ ꓡ꓿ ꓧꓪꓽ ꓟꓵ ꓐꓵꓽ ꓡꓴ,ˍ ꓟꓲ ꓟꓽ ꓜꓰꓼ ꓡ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓒꓵꓽ ꓶꓽ ꓮ ꓡꓲ ꓗꓪ ꓓ, ꓠꓬ ꓠꓴ ꓪ ꓠꓲ, ꓟ ꓟꓲ ꓖꓳ ꓗꓪ ꓓ, ꓥꓳˍ ꓐꓯˍ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓟꓲ ꓠꓯ ꓗꓪ ꓙꓳ ꓟ ꓒꓴ ꓫꓵ ꓔꓯ ꓡꓰ ꓣꓳ ꓠꓬ ꓮ ꓘꓶ. ꓛꓲ ꓙ ꓫ. ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓝ ꓮꓲ ꓕꓲ ꓤꓶꓻ ꓗꓪ ꓐꓱ ꓶ ꓒꓴ ꓫꓵ ꓡꓰ ꓪꓴꓽ ꓪ ꓟꓽ ꓓ ꓟ ꓡꓯ ꓫꓴ ꓔꓯ ꓡꓰ ꓣꓳ ꓧꓪ ꓠ, ꓟ ꓣꓳ ꓔꓯ ꓢꓲꓺ ꓒ ꓡꓰ ꓐꓯ ꓔ ꓟ ꓥ ꓡꓳ꓿
ꓞꓳ ꓘꓴ ꓡꓰ ꓘꓴ ꓟꓽ ꓓꓽ ꓟ ꓐꓰ ꓛꓲ ꓟꓽ ꓜꓽ ꓡ ꓟ ꓒꓴ ꓫꓵꓽ ꓔꓯ ꓡꓰ ꓧꓪ ꓠ,ꓟ ꓟꓴ ꓗꓴꓷꓼ ꓡꓯ ꓫꓴꓻ ꓔꓯ ꓡꓰ ꓧꓪ, ꓠ, ꓟ ꓣꓳ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓢꓽ ꓢꓽ ꓔꓬ ꓠ, ꓟ ꓐꓰ ꓗ, ꓛꓲ ꓔꓶ. ꓗꓪ ꓙꓰ ꓟ ꓔꓯ ꓡꓰ ꓬꓲ ꓙꓵ, ꓖꓴ ꓔꓬ ꓢꓲ ꓠꓬꓲ ꓢꓲꓺ ꓒ ꓐꓱ ꓶ ꓬꓲ ꓙꓵ, ꓖꓶ ꓠ, ꓟ ꓟꓲ ꓡꓰ ꓟ ꓔꓯ ꓟ. ꓖꓶ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓺꓒ ꓐꓰ ꓙ ꓡꓯ ꓘꓳ, ꓠ, ꓟ ꓮ ꓫꓵꓽ ꓠꓬ ꓠꓴ ꓥꓪ ꓔꓯ ꓗ ꓔꓬ ꓡ? ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓐꓱ ꓶ ꓚꓵ ꓚꓵ ꓣꓳ ꓤꓶꓻ ꓗꓪ ꓣꓳ ꓚꓵˍ ꓟ ꓚꓱ, ꓔꓯ ꓣꓳ ꓓꓵ ꓙ ꓛꓲ ꓗꓷ ꓡ? ꓓꓵꓽ ꓙ ꓠ, ꓟ ꓐꓯ ꓔ ꓟ ꓥ ꓡꓳ꓿
ꓐ, ꓐ ꓪꓴ‐ꓢ ꓠꓬ ꓬꓲ ꓗꓴꓷꓼ ꓗꓪ ꓓꓵ ꓠ, ꓟ ꓣꓱ ꓛꓰ ꓡꓯ ꓫꓴ ꓣꓳ ꓟꓲ ꓠꓯ ꓡ ꓞꓳ ꓔꓯ ꓖꓶ ꓔ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓡ ꓡ ꓟ ꓔꓯ ꓩꓴ ꓠꓬ ꓔꓬ ꓟ ꓛꓳ ꓒꓽ ꓐꓴ ꓡꓰ ꓐꓰ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓗꓪ ꓬꓯꓼ ꓡ ꓟ ꓔꓯ ꓡꓳ. ꓠꓬꓲ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓡ ꓕꓯ ꓧꓪ, ꓛꓲꓽ ꓐꓰ ꓔꓬ ꓠ, ꓟ ꓔꓯ ꓟ. ꓖꓶ ꓔꓬ ꓟ ꓥ ꓡꓳ꓿ ꓣꓳ ꓔꓯ ꓢꓷ. ꓠꓲ, ꓙꓳ ꓟ ꓚꓳ ꓑ. ꓝꓮꓲ ꓧꓪ. ꓛꓲ ꓐꓰ ꓔꓬ ꓟ ꓚꓳ ꓑ. ꓐꓴ ꓡꓰ ꓐꓰ ꓢꓲꓺ ꓒ ꓡ ꓟ ꓔꓯ ꓡꓳ. ꓠ, ꓟ ꓣꓳ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓟꓲ ꓠꓯ ꓡ ꓞꓳ ꓔꓯ ꓠꓲꓽ ꓠꓬ ꓐ, ꓐ ꓪꓴ‐ꓢ ꓠꓯ, ꓗꓪ ꓪꓽ ꓘꓴ ꓟ ꓔꓯ ꓮ ꓘꓶ. ꓙꓳꓺ ꓟ ꓥ ꓡꓳ꓿ ꓝꓮꓲ ꓟꓲ ꓠꓯ ꓗ, ꓛꓲ ꓓꓴ ꓔꓯ ꓡꓰ ꓧꓪ, ꓠ, ꓟ ꓠꓲꓽ ꓢ‐ꓓꓯ ꓠꓬ ꓠꓲ, ꓒꓴ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓐꓰ ꓠꓴ ꓥꓪ ꓠꓬ ꓐ, ꓐ ꓠꓲ, ꓒꓴ ꓟ ꓚꓱ, ꓗꓪ ꓛꓳꓽ ꓫꓱ ꓢꓴ ꓙꓲ ꓟ ꓙꓲ‐ꓢꓴ ꓢꓲꓺ ꓤ ꓢꓷ. ꓠꓲ, ꓙꓳ ꓚꓳ ꓑ. ꓡꓰ ꓐꓰ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿
ꓣꓳ ꓟꓲ ꓠꓯ ꓡ ꓞꓳ ꓠꓬ ꓣꓳ ꓮ ꓡꓰ ꓕꓲ ꓠꓬꓲ ꓮ ꓡꓰ ꓕꓲ ꓠꓬꓲ ꓦꓬꓼ ꓣꓳ ꓫꓵꓻ ꓦꓬꓼ ꓠꓬꓲ ꓔꓯ ꓣꓳ ꓟꓽ ꓢꓷ.꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓮ ꓕꓯ ꓥ ꓟꓲ ꓢꓲꓺꓒ ꓠꓲ, ꓡꓶꓽ ꓢꓲꓺ ꓒ ꓠꓲ, ꓒꓴ ꓟ ꓚꓱ, ꓗꓪ ꓞꓳ ꓫꓱ, ꓠ, ꓟ ꓢꓯꓼ ꓕꓵ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓮ ꓕꓯ ꓥ ꓟꓲ ꓙꓵ, ꓢꓲ ꓠꓬꓲ ꓬꓲ ꓠꓲ, ꓒꓴ ꓟ ꓚꓱ, ꓗꓪ ꓞꓳ ꓫꓱ, ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿
