ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓒꓵꓽ ꓶ: ꓐꓯˍ ꓟ ꓠꓬ ꓮ ꓫꓵꓽ ꓥ ꓡ꓿ ꓟꓲ ꓠꓯ ꓞꓳ ꓤ ꓕꓲ ꓣꓳ ꓟ ꓬꓲ ꓒꓵꓽ ꓶ ꓠꓬ ꓮ ꓫꓵꓽ ꓥ ꓡ꓿ ꓣꓳꓽ ꓒꓵꓽ ꓶꓽ ꓐꓰ ꓐꓯˍ ꓕꓯ ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ Treasure ꓐꓰ ꓐꓯˍ ꓟ ꓒꓵꓽ ꓶꓽ ꓕꓱ ꓟ ꓔꓯ ꓠꓬ ꓮꓽ ꓟˍ ꓟꓲ ꓠꓲ, ꓫꓵˍ ꓡꓳ꓿ ꓮꓽ ꓟˍ ꓟꓲ ꓟꓶ ꓠꓲ, ꓫꓵˍ ꓡꓳ꓿ ꓮꓽ ꓟˍ ꓟꓲ ꓒꓵꓽ ꓶꓽ ꓕꓱ ꓟ ꓔꓯ ꓚꓲ. ꓛꓬ ꓦꓲꓻ ꓗꓪ ꓚꓲ. ꓛꓬ ꓠꓲ, ꓟ ꓗꓪ ꓮ ꓕꓯ ꓥˍ ꓟꓲ ꓫ ꓔ ꓠꓲ, ꓫꓵˍ ꓡꓳ꓿ ꓮ ꓘꓶ. ꓒꓵꓽˍ ꓟ ꓑꓶ. ꓓꓴ ꓧꓪˍ ꓟꓲ ꓮ ꓘꓶ. ꓧꓪ ꓫ.ˍ ꓟ ꓑꓶ. ꓓꓴ ꓒꓵꓽ ꓶꓽ ꓐꓰ ꓐꓯˍ ꓡꓳ꓿ ꓧꓪ ꓢꓻˍ ꓟ ꓮ ꓡꓲ ꓗꓪˍ ꓟꓲ ꓙꓳˍ ꓟ ꓔꓯ ꓠꓬ ꓒꓵꓽ ꓶꓽ ꓐꓰ ꓟꓽ ꓐꓯ꓿
ꓖꓳ ꓡꓱ ꓠꓬꓲ ꓣꓳ ꓒꓵꓽ ꓶꓽ ꓐꓰ ꓐꓯˍ ꓕꓯ ꓡ ꓞꓳ ꓕꓲ ꓣꓳ ꓕꓲ ꓣꓳ ꓟꓽ ꓫꓱ. ꓡꓯ ꓘꓳ꓿ ꓕꓲ ꓣꓳ ꓠꓲ, ꓫꓵˍ ꓟ ꓔꓯ ꓠꓱ. ꓐꓱ ꓕꓲ ꓣꓳ ꓟꓽ ꓠꓲ, ꓫꓵ꓿ ꓕꓱ ꓡꓱ ꓫꓵꓽ ꓒꓵꓽ ꓶˍ ꓟꓲ ꓙꓳˍ ꓡꓳ꓿ ꓖꓳ ꓡꓱ ꓠꓬꓲ ꓒꓵꓽ ꓶ ꓮ ꓙꓵꓽ ꓔꓯ ꓠꓬꓲꓽ ꓚꓱ, ꓘꓶꓽ ꓠꓬꓲˍ ꓠꓬ꓾ ꓕꓲ ꓚꓱ, ꓟ ꓠꓬ ꓒꓵꓽ ꓶꓽ ꓖꓳ ꓟ ꓗꓪ ꓐꓰ ꓮ ꓫꓵꓽˍ ꓟꓲ ꓬꓰ ꓙꓲˍ ꓟ꓾ ꓖꓳ ꓟ ꓔꓯ ꓠꓬ ꓞꓳ ꓤ ꓮ ꓙꓵꓽ ꓠꓲ, ꓫꓵˍ ꓡꓳ꓿ ꓕꓱ ꓟ ꓠꓬ ꓒꓴ ꓫꓵ ꓕꓱ ꓟ ꓥ ꓡꓳ꓿ ꓒꓴ ꓫꓵ ꓒꓵꓽ ꓶꓽ ꓕꓱ ꓟ ꓔꓯ ꓞꓳ ꓤ ꓮ ꓙꓵꓽ ꓠꓬ ꓮ ꓫꓵꓽ ꓑꓶ. ꓓꓴ ꓠꓲ, ꓫꓵˍ ꓡ꓿ ꓒꓴ ꓫꓵ ꓕꓱ ꓟ ꓗꓪ ꓐꓰ ꓮ ꓫꓵꓽ ꓥˍ ꓟꓲ ꓪꓴꓻ ꓜꓽ ꓠ. ꓡꓳ꓾ ꓪꓴꓻ ꓓꓳꓻ ꓠ. ꓡꓳ꓿ ꓒꓴ ꓫꓵ ꓕꓱ ꓟ ꓗꓪ ꓐꓰ ꓮ ꓫꓵꓽ ꓥ ꓟꓲ ꓑ ꓠ. ꓡꓳ꓿ ꓒꓴ ꓫꓵ ꓕꓱ ꓟ ꓔꓯ ꓙꓵꓽ ꓪ ꓙꓳˍ ꓡꓳ꓿ ꓒꓴ ꓫꓵ ꓕꓱ ꓟ ꓠꓬ ꓣꓳ ꓐꓱ ꓶ ꓗ, ꓛꓲꓽ ꓓꓴ꓾ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓗ, ꓛꓲꓽ ꓓꓴ ꓣꓳ ꓔꓯ ꓮ ꓫꓵꓽˍ ꓟꓲ ꓬꓰ ꓖꓶ ꓐ ꓡˍ ꓟ ꓑꓶ. ꓓꓴ ꓒꓴ ꓫꓵ ꓕꓱ ꓟ ꓔꓯ ꓠꓬ ꓮꓽ ꓟˍ ꓟꓲ ꓠꓲ, ꓫꓵˍ ꓡꓳ꓿ ꓕꓱ ꓟ ꓔꓯ ꓠꓬ ꓞꓳ ꓤ ꓮ ꓟꓬ, ꓠꓲ, ꓫꓵˍ ꓟ ꓒꓵꓽ ꓶꓽ ꓐꓰ ꓕꓱ ꓡꓱ ꓐꓯˍ ꓡꓳ꓿
ꓝꓮꓲ ꓕꓲ ꓟ ꓠꓬ ꓮ ꓫꓵꓽˍ ꓟꓲ ꓑꓺ ꓟꓶ ꓟꓽ ꓓꓻ ꓟ ꓒꓵꓽ ꓶꓽ ꓐꓰ ꓐꓯˍ ꓟ ꓕꓲ ꓟˍ ꓟꓲ ꓙꓳˍ ꓢꓰꓽ ꓡꓳ꓿ ꓖꓳ ꓟ ꓠꓬ ꓒꓴ ꓫꓵ ꓮ ꓡꓲ ꓟꓬ ꓙꓳˍ ꓥ ꓟꓲ ꓑꓺ ꓟꓽ ꓠ꓿ ꓠꓴ ꓮ ꓡꓲ ꓘꓶ. ꓪꓽ ꓠꓬꓲ ꓢꓷ. ꓠꓲ, ꓙꓳˍ ꓥ ꓟꓲ ꓑꓺ ꓟꓽ ꓠ ꓫꓵꓽ ꓒꓵꓽ ꓶ ꓐꓯ ꓢꓲ ꓠꓬꓲ ꓙꓳˍ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓲ, ꓟ ꓠꓬ ꓣꓳ ꓒꓵꓽ ꓶ ꓔꓯ ꓑꓺˍ ꓟ ꓗꓪ ꓡꓰꓽ ꓮ ꓕꓯ ꓥ ꓟꓲ ꓥꓳꓺ ꓓ, ꓡꓳ꓿ ꓣꓳ ꓓꓵꓽ ꓙꓽˍ ꓟ ꓣꓳꓽ ꓬꓰˍ ꓟ ꓮ ꓙꓵꓽ ꓠꓬ ꓣꓳ ꓒꓵꓽ ꓶꓽ ꓟꓶ ꓠ, ꓟ ꓡꓰꓽ ꓢꓯꓼ ꓕꓵꓼˍ ꓡꓳ꓿ ꓣꓳ ꓢꓷ. ꓠꓲ, ꓣꓳ ꓢꓯꓼ ꓪ꓾ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓣꓳ ꓠꓲ, ꓫꓵˍ ꓟ ꓒꓵꓽ ꓶ ꓧꓪ ꓟꓶ ꓠ, ꓟ꓾ ꓮ ꓡꓲ ꓐꓰ ꓟꓶ ꓠ, ꓟ ꓡꓰꓽ ꓕꓲꓽ ꓠꓬꓲ ꓕꓲꓽ ꓠꓬꓲ ꓓꓵꓽ ꓙꓽ ꓢꓲ ꓠꓬꓲ ꓢꓯꓼ ꓕꓵꓼ ꓔꓬ ꓡꓳ꓿
ꓕꓲ ꓚꓱ, ꓥꓳ ꓐꓯ ꓠꓬ ꓒꓵꓽ ꓶꓽ ꓖꓳ ꓟ ꓠꓬ ꓣꓳ ꓠꓲ, ꓟ ꓠꓯꓸꓼ ꓗꓪ ꓟꓳ‐ꓓꓳ ꓧꓪꓽ ꓞꓶꓻˍ ꓡꓰ ꓐꓰ ꓣꓳ ꓔꓯ ꓙꓰ ꓝꓲˍ ꓟ ꓢꓯꓼ ꓕꓲꓽ ꓟ ꓥ ꓡꓳ꓿ ꓣꓳ ꓒꓵꓽ ꓶꓽ ꓕꓱ ꓟ ꓔꓯ ꓟꓶ ꓠ, ꓟ ꓐꓱ ꓶ ꓙꓰˍ ꓟ ꓙ ꓖꓴ ꓗꓪ ꓮ ꓫꓵꓽ ꓔꓳ, ꓜꓳꓽ ꓡˍ ꓥ ꓟꓲ ꓣꓳ ꓘꓳ ꓗꓳ. ꓐ ꓡˍ ꓡꓳ꓿ ꓠꓱ. ꓐꓯ ꓠꓬ ꓮ ꓫꓵꓽˍ ꓟꓲ ꓣꓳ ꓗꓶ ꓔ ꓟ ꓒꓵꓽ ꓶˍ ꓡꓰ ꓐꓰ ꓟꓽ ꓬꓳ. ꓚꓰꓽ꓾ ꓟꓽ ꓒꓵꓽ꓿ ꓖꓳ ꓡꓱ ꓠꓬꓲ ꓣꓳ ꓒꓵꓽ ꓶꓽ ꓖꓳ ꓟ ꓔꓯ ꓟꓶ ꓠ, ꓟ ꓐꓱ ꓶ ꓠꓬ ꓣꓳ ꓬꓲ ꓜꓲꓽ ꓬꓲ ꓑꓰ, ꓢꓯꓼ ꓕꓵꓼˍ ꓡꓳ꓿ ꓖꓳ ꓟ ꓔꓯ ꓣꓳꓽ ꓘꓳ ꓣꓴ ꓟꓶ ꓠ, ꓟ꓾ ꓖꓳ ꓟ ꓔꓯ ꓣꓳ ꓟꓶ ꓡꓰ ꓠ, ꓟ ꓐꓱ ꓶ ꓜꓲ ꓜꓲ ꓟꓴ ꓟꓴ ꓢꓯꓼ ꓕꓵꓼˍ ꓡꓳ꓿ ꓕꓱ ꓟ ꓠꓬ ꓟꓲ ꓠꓯ ꓞꓳ ꓤ ꓬꓲ ꓡꓲꓽ꓾ ꓬꓲ ꓫꓵꓽ ꓕꓲ ꓫꓵꓽ ꓥ ꓡꓳ꓿
ꓖꓳ ꓡꓱ ꓠꓬꓲ ꓞꓳ ꓤ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓫꓱ. ꓗꓷ ꓡꓰˍ ꓟ ꓠꓬ ꓕꓱ ꓟ ꓥꓳ꓿ ꓚꓲ. ꓛꓬ ꓗꓶ ꓔ ꓟ ꓒꓵꓽ ꓶꓽ ꓔꓯ ꓗꓴ. ꓙꓲꓽ ꓙꓳ ꓢꓲ ꓠꓬꓲ ꓡ ꓞꓳ ꓕꓲ ꓣꓳ ꓡꓰ ꓕꓲ ꓣꓳ ꓟꓽ ꓫꓱ. ꓗꓷ ꓡꓰˍ ꓡꓳ꓿ ꓒꓴ ꓫꓵ ꓖꓳ ꓟ ꓕꓲ ꓟˍ ꓡꓰꓽ ꓚꓲ. ꓛꓬ ꓤꓶꓻ ꓒꓵꓽ ꓶꓽ ꓐꓰ ꓚꓬ, ꓢꓲ ꓠꓬꓲ ꓖꓳ ꓟ ꓔꓯ ꓡꓰꓽ ꓧꓪ ꓢꓴ ꓥˍ ꓟꓲ ꓖꓳ ꓟ ꓒꓵꓽ ꓶꓽ ꓬꓲ ꓟꓶˍ ꓥꓳ꓿ ꓝꓮꓲ ꓮ ꓫꓵꓽˍ ꓟꓲ ꓑꓺ ꓟꓽ ꓠ ꓟ ꓒꓵꓽ ꓶꓽ ꓥ ꓟ ꓟꓴꓽ ꓗꓪ ꓡꓯꓼ ꓫꓴ꓾ ꓝꓮꓲ ꓠꓵꓻ ꓠꓲ, ꓣꓱꓽ ꓛꓰꓽ꓾ ꓪꓴ‐ꓢ ꓠꓲ, ꓡꓶꓽ ꓒꓵꓽ ꓛꓳˍ ꓟ꓾ ꓒꓵꓽ ꓶꓽ ꓕꓱ ꓟ ꓔꓯ ꓧꓪ ꓢꓴ ꓥˍ ꓟꓲ ꓕꓱ ꓟ ꓔꓯ ꓟꓶˍ ꓥꓳ꓿ ꓢꓲ ꓒ ꓬꓰ‐ꓢꓴ ꓐꓯ ꓔ ꓡꓳ꓿ ꓧꓪ꓾ ꓖꓳ ꓡꓱ ꓠꓬ ꓧꓪ ꓟꓶˍ ꓥꓳ꓾ ꓐꓰ ꓐꓯ ꓔ ꓡꓳ꓿
ꓖꓳ ꓡꓰ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓮ ꓡꓲ ꓫꓵꓽ ꓒꓵꓽ ꓶꓽ ꓔꓯ ꓧꓪ ꓠ ꓗˍ ꓡ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓡꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓡꓴ‐ꓘ 12ꓽ33‐34 ꓗꓪ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ “ꓠꓴ ꓪ ꓚꓲ. ꓛꓬ ꓐꓱ ꓶ ꓐꓰꓽ ꓡꓰ ꓟꓽ ꓓ ꓟ ꓒꓴ ꓗꓶ ꓕꓴꓽ ꓙꓽ ꓖꓶ ꓔ꓿ ꓟꓴꓽ ꓗꓪ ꓕꓯꓽ ꓢꓲ ꓗꓪ ꓣꓱꓽ ꓖꓴ ꓟꓽ ꓓ ꓠ ꓛꓲ ꓒꓵꓽ ꓶꓽ ꓫ ꓗꓶ ꓔ꓿ ꓖꓳ ꓗꓪ ꓠꓬ ꓞꓳ ꓘꓴꓽˍ ꓟꓲ ꓟꓽ ꓘꓴꓽ ꓡ꓿ ꓧꓪꓽ ꓟꓵ ꓐꓵꓽ ꓡꓴ,ˍ ꓟꓲ ꓟꓽ ꓜꓰꓼ ꓡ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓒꓵꓽ ꓶꓽ ꓮ ꓡꓲ ꓗꓪ ꓓ,, ꓠꓬ ꓠꓴ ꓪ ꓠꓲ, ꓟˍ ꓟꓲ ꓖꓳ ꓗꓪ ꓓ, ꓥꓳ꓾” ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓫꓬꓽ ꓫꓬꓽ ꓡꓰꓽ ꓐꓯ ꓖꓶ ꓔˍ ꓡꓳ꓿
ꓣꓳ ꓧꓪ ꓠ, ꓟ ꓒꓵꓽ ꓶꓽ ꓠꓬ ꓐꓶꓽ ꓓꓲꓻ ꓡꓯ, ꓓꓲꓻ ꓟꓽ ꓜꓽ ꓟ꓾ ꓧꓪꓽ ꓟꓵ ꓐꓵꓽ ꓡꓴ,ˍ ꓟꓲ ꓟꓽ ꓜꓰꓼ ꓟ꓾ ꓞꓳ ꓘꓴꓽˍ ꓟꓲ ꓟꓽ ꓘꓴꓽ ꓟ ꓒꓵꓽ ꓶꓽ ꓧꓪ ꓠ ꓗ, ꓡꓳ꓿ ꓣꓳ ꓧꓪ ꓔ ꓟ ꓒꓴ ꓫꓵ ꓒꓵꓽ ꓶꓽ ꓕꓱ ꓟ ꓠꓬ ꓞꓳ ꓘꓴꓽˍ ꓟꓲ ꓘꓴꓽ ꓙꓰˍ ꓡꓳ꓿ ꓠꓱ. ꓐꓯˍ ꓟꓲ ꓔꓯ, ꓙꓰˍ ꓟ ꓡꓰꓽ ꓟꓽ ꓛꓲ ꓣꓳ ꓫꓵꓻˍ ꓕꓯ ꓣꓳ ꓠꓬ ꓔꓯ, ꓙꓰ ꓟꓽ ꓐ ꓡ꓿ ꓥ ꓡꓳ ꓕꓱ ꓟ ꓠꓬ ꓣꓳ ꓐꓱ ꓶ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓣꓱꓽ ꓞ, ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓲ, ꓟ ꓣꓳ ꓠꓲ, ꓟ ꓕꓲ ꓟ ꓡꓱꓸꓼ ꓖꓳ ꓟ ꓔꓯ ꓡꓰꓽ ꓥꓳꓺ ꓓ, ꓠꓬ ꓣꓳ ꓠꓬ ꓒꓵꓽ ꓶꓽ ꓖꓳ ꓟ ꓟꓶˍ ꓥꓳ꓿
ꓥꓪ ꓒꓵꓽ ꓶꓽ ꓠꓬ ꓮ ꓫꓵꓽ ꓥ ꓡ꓿ ꓒꓴ ꓫꓵ ꓠꓬ ꓐꓬ ꓡꓰ ꓓ, ꓟ ꓑꓶ. ꓓꓴ ꓖꓳ ꓟ ꓕꓲ ꓡꓰ, ꓐꓰ ꓐꓬ ꓡꓰˍ ꓥꓳ꓿ ꓒꓴ ꓫꓵ ꓠꓬ ꓐꓬ ꓡꓰˍ ꓟ ꓬꓲ ꓚꓰꓺ ꓥ ꓟ ꓑꓶ. ꓓꓴ ꓣꓳ ꓞꓳ ꓙꓳˍ ꓟ ꓬꓲ ꓚꓰ, ꓥˍ ꓟꓲ ꓐꓬ ꓡꓰˍ ꓟ ꓪꓴ. ꓔꓴ ꓡˍ ꓥꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓢꓯꓼ ꓖꓶ ꓔ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓲ, ꓟ ꓥꓳꓺ ꓠ, ꓟ꓾ ꓣꓳ ꓠꓲ, ꓟ ꓚꓵ, ꓠ, ꓟ ꓬꓲ ꓔꓶ. ꓠꓬ ꓕꓲ ꓖˍ ꓡꓰꓽ ꓙꓳˍ ꓡꓳ꓿ ꓕꓱ ꓟ ꓠꓬ ꓟꓴꓽ ꓗꓪ ꓡꓯꓼ ꓫꓴ꓾ ꓐꓬ ꓡꓰ ꓟꓽ ꓓꓻ ꓟ ꓪꓴ‐ꓢ ꓣꓱꓽ ꓛꓰꓽ ꓔꓯ ꓮ ꓕꓯ ꓥˍ ꓟꓲ ꓕꓲ ꓠꓬꓲ ꓕꓲ ꓠꓬꓲ ꓧꓪ ꓠ, ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓚꓵ ꓚꓵ ꓒꓵꓽ ꓶꓽ ꓥ ꓟ ꓐꓬ ꓡꓰ ꓟꓽ ꓓꓻ ꓛꓵꓽ ꓡꓰ ꓟꓽ ꓓꓻ ꓟ ꓔꓯ ꓧꓪˍ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓮ ꓕꓯ ꓥ ꓟꓲ ꓙꓵꓻ ꓠꓲ, ꓗꓪ ꓐꓰ ꓪꓴ‐ꓢ ꓔꓯ ꓡꓰꓽ ꓥꓳꓺ ꓓ, ꓢꓲ ꓠꓬꓲ ꓞꓳ ꓘꓴꓽ ꓟꓽ ꓘꓴꓽ ꓐꓶꓽ ꓓꓲꓻ ꓟꓽ ꓜꓰꓼ ꓟ ꓒꓵꓽ ꓶꓽ ꓔꓯ ꓧꓪ ꓠ, ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿
