ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓢꓲ‐ꓟꓴ ꓒꓲ‐ꓕꓱ ꓔꓯ꓾ “ꓢ‐ꓓꓯꓳ꓾ ꓠꓴ ꓥꓪ ꓗ ꓠꓯ. ꓢꓲ ꓗꓪ ꓙꓰ꓾” ꓐꓰ ꓐꓯˍ ꓟ ꓕꓼ ꓘꓶꓽ ꓗꓪ ꓐꓰ ꓣꓳꓽ ꓦꓻ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓟ‐ꓕꓲ 16ꓽ13‐23 ꓗꓪ ꓟ ꓥꓳ꓿ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓓꓳ ꓟꓴ, ꓟ ꓐꓰ ꓒꓲ‐ꓕꓱ ꓔꓯ ꓕꓼˍ ꓟ꓾ ꓕꓱ ꓠꓬꓲꓽ ꓙꓰꓽ ꓟ ꓥꓳ꓿
ꓒꓲ‐ꓕꓱ ꓔꓯ ꓮ ꓡꓲ ꓐꓰ ꓓꓳ ꓟꓴˍ ꓡ ꓐꓯˍ ꓠꓬ꓾ ꓒꓲ‐ꓕꓱꓳ꓾ ꓠꓴ ꓠꓬ ꓥꓪ ꓔꓯ ꓮ ꓡꓲ ꓐꓰ ꓟꓳˍ ꓡ꓾ ꓐꓰ ꓠꓺ ꓠꓬꓲˍ ꓕꓯ ꓒꓲ‐ꓕꓱ ꓠꓬ꓾ ꓠꓴ ꓠꓬ ꓪꓴ‐ꓢ ꓤ ꓔꓲ. ꓥꓪ ꓠꓴꓽ ꓢꓲ ꓒ ꓥꓳ ꓐꓰ ꓒꓳ, ꓖꓶˍ ꓕꓯ ꓢꓲ ꓒ ꓬꓰ‐ꓢꓴ ꓡꓰ꓾ ꓕꓱ ꓟ ꓠꓴ ꓕꓱ ꓡꓱ ꓐꓯˍ ꓟ ꓠꓬ ꓐ, ꓐ ꓡꓰ ꓖꓴ ꓟ. ꓖꓶˍ ꓟ ꓑꓶ. ꓓꓴ ꓥꓳ꓿ ꓞꓳ ꓤ ꓠꓲ, ꓟ ꓗꓪ ꓐꓰ ꓢꓷ.ˍ ꓟ ꓟꓽ ꓥ꓿ ꓕꓱ ꓡꓱ ꓖꓳ ꓑꓳ. ꓥꓪ ꓠꓬ ꓠꓴ ꓔꓯ ꓭ. ꓛꓲ ꓐꓰ ꓘꓴˍ ꓥꓳ꓿ ꓭ. ꓛꓲ ꓕꓱ ꓟ ꓕꓯꓽ ꓢꓲ ꓗꓪ ꓥꓪ ꓘꓴ ꓜꓲꓼ ꓞꓳ ꓫꓬ, ꓔꓶˍ ꓥꓳ꓾ ꓐꓰ ꓐꓯ ꓢꓲ ꓟꓴꓽ ꓗꓪ ꓗꓴꓷꓼ ꓗ ꓘꓶꓽ ꓢꓳꓼ ꓥˍ ꓟꓲ ꓠꓴ ꓔꓯ ꓖꓶˍ ꓥꓳ ꓐꓰ ꓐꓯ ꓖꓶˍ ꓟ ꓥ ꓡꓳ꓿ ꓙꓵꓽ ꓪˍ ꓟꓲ ꓖꓶ ꓔ ꓟ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓖꓳ ꓡꓱ ꓖꓶ ꓗꓷ ꓗ ꓠꓯ. ꓝꓮꓲ ꓟꓽ ꓟꓶ ꓫꓵˍ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟꓳ. ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓞꓳ ꓪꓴꓽ ꓐꓴ꓾ ꓔꓲ ꓒ ꓪꓴ. ꓓꓵ ꓣꓱꓽ ꓢꓴ ꓐꓴ꓾ ꓪꓴꓽ ꓢꓴ ꓟꓴ ꓢꓴ ꓐꓴ ꓡꓰ ꓢꓲ ꓒ ꓬꓰ‐ꓢꓴ ꓔꓯ ꓢꓰꓼ ꓗꓷˍ ꓥꓳ꓿ ꓢꓰꓼ ꓗꓷ ꓗ ꓠꓯ. ꓠꓬ ꓢꓽ ꓠꓬꓲ ꓕꓲꓽ ꓠꓬꓲ ꓗꓪ ꓝꓮꓲ ꓢꓯ. ꓬꓲꓼ ꓡˍ ꓥꓳ꓾ ꓐꓰ ꓐꓯ ꓟ. ꓖꓶˍ ꓡꓳ꓿ ꓖꓳ ꓕꓯ ꓠꓬ ꓒꓲ‐ꓕꓱ ꓡꓰ ꓢꓲ ꓒꓽꓳ ꓠꓴ ꓔꓯ ꓮ ꓡꓲ ꓐꓰ ꓗꓷ ꓡꓰ ꓝꓲ ꓠꓲ, ꓟꓽ ꓫꓵ꓿ ꓠꓴ ꓔꓯ ꓕꓱ ꓡꓱ ꓐꓰ ꓗꓷ ꓡꓰ ꓓꓴ ꓟꓽ ꓥ꓾ ꓐꓰ ꓐꓯ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓕꓼˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓢꓲ‐ꓟꓴ ꓒꓲ‐ꓕꓱ ꓔꓯ ꓔꓲ. ꓒꓳ, ꓢꓲ ꓠꓬꓲ ꓐꓯˍ ꓟ ꓠꓬ꓾ ꓢ‐ꓓꓯꓳ ꓠꓴ ꓥꓪ ꓗ ꓠꓯ. ꓢꓲ ꓗꓪ ꓙꓰ꓾ ꓐꓰ ꓐꓯ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓕꓼˍ ꓟ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓧꓶ. ꓕꓯ ꓠꓬ ꓢꓲ‐ꓟꓴ ꓒꓲ‐ꓕꓱ ꓔꓯ ꓟꓴꓽ ꓗꓪ ꓗꓴꓷꓼ ꓢꓳꓼ ꓖꓶ ꓗꓷˍ ꓗꓪ ꓛꓲ꓾ ꓙꓵꓽ ꓪ ꓮ ꓙꓵꓽ ꓖꓶ ꓗꓷˍ ꓗꓪ ꓛꓲ ꓬꓲ ꓔꓯ ꓓꓳ ꓟꓴ, ꓔ ꓟ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓕꓱ ꓘꓶ ꓛꓲ ꓓꓳ ꓟꓴˍ ꓔ ꓟ ꓒꓲ‐ꓕꓱ ꓔꓯ ꓡꓰ. ꓢꓲ ꓒ ꓬꓰ‐ꓢꓴ ꓠꓬ ꓢ‐ꓓꓯ ꓐꓰ ꓘꓴˍ ꓟ ꓠꓬ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓢꓲ‐ꓟꓴ ꓒꓲ‐ꓕꓱ ꓠꓬ ꓐ, ꓐ ꓪꓴ‐ꓢ ꓠꓲ, ꓡꓶꓽ ꓔꓯ ꓒꓳ, ꓔꓳ, ꓟ ꓑꓶ. ꓓꓴ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓮ ꓡꓲ ꓓ, ꓥ ꓟꓲ ꓬꓲ ꓮ ꓡꓲ ꓫꓵꓻ ꓪˍ ꓥ ꓟꓲ꓾ ꓫ. ꓙꓵ ꓟꓶ ꓙꓵˍ ꓟ ꓮ ꓡꓲ ꓐꓰ ꓔꓳ, ꓜꓳꓽ ꓪˍ ꓥ ꓟꓲ ꓐ, ꓐ ꓠꓲ, ꓡꓶꓽ ꓗꓪ ꓐꓰ ꓗꓳ. ꓙꓰˍ ꓠꓬ ꓠꓱ. ꓐꓯ ꓮꓽ ꓟ ꓐꓯ ꓘꓶꓽ ꓔꓯ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓠ ꓠ,꓿ ꓐ, ꓐ ꓠꓲ, ꓡꓶꓽ ꓗꓪ ꓐꓰ ꓗꓳ. ꓬꓰˍ ꓠꓬ ꓠꓱ. ꓐꓯ ꓠꓬ ꓠꓲꓽ ꓢ‐ꓓꓯ ꓗꓪ ꓐꓰ ꓡˍ ꓟ ꓥꓳ꓾ ꓐꓯˍ ꓟ ꓣꓳ ꓔꓯ ꓢꓲꓽ ꓢꓲꓽ ꓡꓰꓽ ꓐꓯ ꓟꓳ. ꓖꓶ ꓔꓬ ꓟ ꓥ ꓡꓳ꓿
ꓢꓲ‐ꓟꓴ ꓒꓲ‐ꓕꓱ ꓢꓲ ꓒ ꓬꓰ‐ꓢꓴ ꓔꓯ ꓐꓯ ꓖꓶ ꓘꓶꓽ ꓠꓬ ꓮ ꓘꓶ. ꓙꓲꓻˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓠꓬ ꓠꓻ ꓡꓰ ꓝꓲ ꓠꓲ, ꓟꓽ ꓫꓵ꓿ ꓫ. ꓙꓵ ꓟꓶ ꓙꓵˍ ꓟ ꓔꓯ ꓔꓳ, ꓜꓳꓽ ꓝꓲ ꓠꓲ, ꓟꓽ ꓫꓵ꓿ ꓢꓲ ꓒ ꓬꓰ‐ꓢꓴ ꓔꓯ ꓢꓴ ꓡꓰ ꓢꓰꓼˍ ꓟ ꓔꓯ ꓥˍ ꓟꓲ ꓬꓲ ꓟꓽ ꓠꓲ, ꓒꓴ꓿ ꓕꓱ ꓟ ꓑꓶ. ꓓꓴ ꓬꓲ ꓠꓬ ꓞꓳ ꓤ ꓠꓲ, ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓐꓯ ꓖꓶ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ꓾ ꓢ‐ꓓꓯꓳ꓾ ꓐꓰ ꓐꓯ ꓖꓶ ꓗꓷ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳꓽ ꓘꓴ ꓜꓲꓼ ꓞꓳ ꓪꓴ. ꓓꓵ ꓥ ꓟ ꓢꓲ‐ꓟꓴ ꓒꓲ‐ꓕꓱ ꓔꓯ ꓡꓰ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓢ‐ꓓꓯꓳ ꓐꓰ ꓐꓯ ꓖꓶ ꓗꓷ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓐ, ꓐ ꓠꓲ, ꓡꓶꓽ ꓗꓪ ꓐꓰ ꓬꓲ ꓧ, ꓗꓷ ꓟ ꓪꓴ. ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓥˍ ꓟꓲ ꓣꓳ ꓪꓴ‐ꓢ ꓦ ꓡꓱ ꓢꓴ ꓮ ꓟꓬ, ꓠꓬ ꓪꓴ‐ꓢ ꓔꓯ ꓦ ꓡꓱ ꓔꓬ ꓡꓳ ꓐꓰ ꓐꓯ ꓔꓬ ꓥ ꓟꓲ꓾ ꓐ, ꓐ ꓪꓴ‐ꓢ ꓠꓲ, ꓡꓶꓽ ꓗꓪ ꓐꓰ ꓣꓳ ꓗꓳ. ꓬꓰˍ ꓥꓳ ꓐꓯ ꓠꓬ ꓣꓳ ꓤ ꓟꓳ ꓓꓴ ꓥꓳ꓿ ꓣꓳ ꓠꓬ ꓢꓲ‐ꓟꓴ ꓒꓲ‐ꓕꓱˍ ꓡꓰ ꓐꓰ ꓢ‐ꓓꓯ ꓟꓵꓽ ꓗꓪ ꓣꓳ ꓙꓰ ꓔꓬ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓐ, ꓐ ꓪꓴ‐ꓢ ꓠꓲ, ꓡꓶꓽ ꓠꓬ ꓮ ꓡꓲ ꓫꓵꓽ ꓥ ꓡ ꓐꓯˍ ꓟ ꓔꓯ ꓣꓳ ꓢꓷ.ˍ ꓥꓳ ꓐꓯ ꓠꓬ ꓣꓳ ꓛꓳ ꓫꓱꓽ ꓠ, ꓟ ꓥꓳ꓿
ꓕꓱ ꓟ ꓑꓶ. ꓓꓴ ꓣꓳ ꓬꓳ. ꓚꓰꓽˍ ꓟ ꓠꓬ ꓐ, ꓐ ꓪꓴ‐ꓢ ꓠꓬ ꓣꓳ ꓔꓯ ꓮ ꓡꓲ ꓫꓵꓽ ꓞꓳ ꓤ ꓕꓲꓽ ꓣꓳ꓾ ꓮ ꓡꓲ ꓫꓵꓽ ꓪꓴ‐ꓢ ꓤ ꓠꓱ ꓕꓲ ꓣꓳ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓡ ꓐꓯˍ ꓟ ꓔꓯ ꓢꓷ.ˍ ꓥꓳ ꓐꓯˍ ꓠꓬ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓐ, ꓐ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ ꓪꓴ‐ꓢ ꓠꓲ, ꓡꓶꓽ ꓔꓯ ꓛꓳ ꓒꓬꓱꓼ ꓡˍ ꓥꓳ꓿ ꓕꓱ ꓡꓱ ꓟꓽ ꓥ ꓥꓳ ꓐꓯ ꓠꓬ ꓣꓳ ꓔꓯ ꓢ‐ꓓꓯ ꓐꓯ ꓘꓶꓽ ꓗꓪ ꓐꓰ ꓣꓳ ꓔꓯ ꓤ, ꓠꓬꓲ ꓫꓵꓽ ꓠꓬꓲ ꓡˍ ꓥꓳ ꓐꓯˍ ꓠꓬ ꓣꓳ ꓠꓬ ꓢ‐ꓓꓯ ꓡꓰꓽ ꓒꓬꓱꓼ ꓬꓰˍ ꓥꓳ꓿ ꓕꓱ ꓟ ꓑꓶ. ꓓꓴ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓮ ꓕꓯ ꓟꓲ ꓔꓬ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓐꓯ ꓖꓶ ꓡˍ ꓥꓳ꓿ ꓕꓱ ꓟ ꓠꓬ ꓐ, ꓐ ꓠꓲ, ꓡꓶꓽ ꓥ ꓡꓳ꓾ ꓕꓱ ꓟ ꓠꓬ ꓐ, ꓐ ꓠꓲ, ꓡꓶꓽ ꓟꓽ ꓥ ꓐꓯ ꓢꓲ ꓠꓬꓲ ꓮ ꓕꓯ ꓥ ꓟꓲ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓥꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓕꓲꓽ ꓖꓳ ꓓꓱꓽ ꓕꓲ ꓶꓼ ꓟꓬ ꓡꓱꓸꓼ ꓠꓲ, ꓠꓵ ꓢꓲ ꓠꓬꓲ ꓬꓲ ꓔꓯ ꓦ ꓡꓱ ꓓꓴ ꓬꓰ ꓡꓯ꓿
