ꓙꓲꓻ ꓫꓬ ꓢꓴ ꓒꓳ‐ꓡꓳ ꓡꓰ ꓾ “ꓥꓪ ꓔꓯ ꓢꓯꓼ ꓧꓳꓽ ꓖꓶ ꓡ ꓢꓴ ꓗꓪ ꓐꓰ ꓮ ꓫꓵꓽˍ ꓟꓲ ꓥꓪ ꓬꓰ ꓐ ꓡˍ ꓡꓳ” ꓐꓰ ꓐꓯ ꓔ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓟ‐ꓕꓲ 14ꓽ22‐36) ꓗꓪ ꓠꓬ꓾ ꓬꓰ‐ꓢꓴ ꓡꓰ ꓒꓲ‐ꓕꓱ ꓬꓲ ꓙꓵꓻ ꓠꓲ, ꓔꓯ ꓫꓵꓽ ꓠꓬꓲˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙꓻ ꓖꓴ ꓫꓱꓽ ꓢꓲ ꓡꓲꓺ ꓗꓪ ꓡ ꓔꓬ ꓟ ꓬꓰ‐ꓢꓴ ꓔꓯ ꓬꓲ ꓝꓲ ꓓꓴ ꓐꓴ ꓙꓽ ꓜꓲꓼ ꓡꓰ ꓢꓷ. ꓡꓰ ꓗ ꓠꓯ.꓾ ꓬꓰ‐ꓢꓴ ꓡꓰ ꓒꓲ‐ꓕꓱ ꓔꓯ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓫꓱꓽ ꓢꓲ ꓬꓲ ꓔꓬ ꓗꓪ ꓡ ꓠ, ꓟ ꓘꓴˍ ꓡꓳ꓿ ꓒꓲ‐ꓕꓱ ꓖꓳ ꓡꓱ ꓬꓰˍ ꓥ ꓟꓲ ꓟꓲꓽ ꓦꓲ ꓓꓽ ꓟ ꓙꓱꓼ ꓡˍ ꓟ ꓔꓯ ꓬꓲ ꓚꓬ, ꓪ ꓡꓰˍ ꓕꓯ ꓒꓲ‐ꓕꓱ ꓠꓬ ꓮꓽ ꓤ ꓮꓽ ꓤ ꓐꓰ ꓬꓲꓻ ꓙꓬ ꓘꓴꓽ ꓗꓪ ꓦꓱꓺ ꓓꓵꓽ ꓡꓰˍ ꓡꓳ꓿ ꓬꓰ‐ꓢꓴ ꓐꓱ ꓶ ꓕꓱ ꓟ ꓠꓬ ꓟꓲꓽ ꓦꓲ ꓙꓱꓼ ꓡˍ ꓟ ꓑꓶ. ꓓꓴ ꓦꓱꓺ ꓓꓵꓽ ꓡꓰˍ ꓟ ꓟꓽ ꓥ ꓥ꓾ ꓙꓵꓻ ꓠꓲ, ꓟꓽ ꓕꓶ ꓞ, ꓟ ꓪꓴ. ꓠꓬꓲ ꓥ ꓡꓳ꓿ ꓒꓲ‐ꓕꓱ ꓥ ꓟꓲ ꓬꓲꓻ ꓙꓬ ꓗꓪ ꓦꓱꓺ ꓓꓵꓽ ꓡꓰ ꓢꓲ ꓟꓽ ꓫꓵꓻ ꓠ, ꓟ ꓬꓰ‐ꓢꓴ ꓔꓯ ꓬꓲ ꓔꓯ ꓚꓬꓴ. ꓙ ꓠ, ꓟ ꓘꓴꓻ ꓓꓰꓽˍ ꓡꓳ꓿ ꓬꓰ‐ꓢꓴ ꓥˍ ꓟꓲ ꓒꓲ‐ꓕꓱ ꓔꓯ ꓖꓳꓻ ꓖꓶ ꓗꓷ ꓢꓲ꓾ ꓬꓲ ꓔꓯ ꓙꓵꓻ ꓠꓲ, ꓢꓯꓼ ꓐꓽˍ ꓟ ꓔꓯ ꓐꓯ ꓖꓶˍ ꓡꓳ꓿
ꓬꓲꓻ ꓙꓬ ꓗꓪ ꓦꓱꓺ ꓓꓵꓽ ꓡꓰˍ ꓟ ꓔꓯ ꓟꓽ ꓙꓳꓺ ꓙꓳꓺ ꓔꓬ ꓐ ꓡ ꓢꓴ ꓮꓽ ꓟ ꓙꓳˍ ꓡ? ꓝꓴꓲ. ꓠꓯꓸꓼ ꓗꓪ ꓦꓱꓺ ꓓꓵꓽ ꓡꓰˍ ꓟ ꓔꓯ ꓟꓽ ꓙꓳꓺ ꓢꓴ ꓮꓽ ꓟ ꓙꓳˍ ꓡ? ꓣꓳ ꓠꓬ ꓣꓳ ꓚꓲ. ꓛꓬ ꓢꓯꓼ ꓪ ꓔꓯˍ ꓡꓰꓽ ꓦ ꓡꓱ ꓔꓬ ꓠꓬ ꓮ ꓫꓵꓽ ꓔꓯ ꓥ ꓟꓲ ꓬꓰ ꓟꓽ ꓐ ꓡ꓾ ꓮ ꓗꓪˍ ꓟꓲ ꓦꓰꓼ ꓞ, ꓟꓽ ꓐ ꓡ ꓟ ꓥ ꓡꓳ꓿ ꓣꓳ ꓔꓯ ꓫꓵꓽ ꓠꓬꓲˍ ꓟ ꓗꓪ ꓣꓳ ꓢꓯꓼ ꓐꓽ ꓡꓰˍ ꓕꓯ ꓠꓽ ꓣꓳ ꓙꓵꓻ ꓠꓲ, ꓠꓬ ꓣꓳ ꓔꓯ ꓮ ꓫꓵꓽˍ ꓟꓲ ꓬꓰ ꓙ ꓟꓽ ꓐ ꓡꓺꓳ꓿ ꓝꓲ ꓓꓴ ꓐꓴ ꓠꓬ ꓬꓰ‐ꓢꓴ ꓔꓯ ꓟꓶ ꓤ ꓢꓷ. ꓗꓷ ꓥ ꓟꓲ꓾ ꓬꓰ‐ꓢꓴ ꓬꓰ ꓐ ꓡˍ ꓟ ꓮ ꓙꓵꓽ ꓔꓯ ꓢꓷ. ꓡꓰ ꓥ ꓟꓲ꓾ ꓬꓲ ꓪ ꓙꓵꓻ ꓠꓲ, ꓠꓬ ꓬꓲ ꓪ ꓢꓯꓼ ꓟꓬ ꓖꓶꓽ ꓐ ꓡˍ ꓗꓪ ꓛꓲ ꓟꓽ ꓪꓴꓽ ꓟ ꓔꓯ ꓟꓳꓻ ꓪ ꓓˍ ꓡꓳ꓿
ꓪꓴ‐ꓢ ꓔꓯ ꓙꓵꓻˍ ꓟ ꓙꓵꓻ ꓠꓲ, ꓠꓬ ꓮ ꓟꓶˍ ꓡꓰ ꓞꓼ ꓞꓼ ꓒꓬꓱꓼ ꓡˍ ꓡꓳ ꓫꓵꓽ ꓠꓽ ꓟꓽ ꓥ꓿ ꓣꓳ ꓠꓯꓸꓼ ꓗꓪ ꓔꓳ, ꓜꓳꓽ ꓡˍ ꓟ ꓗ, ꓛꓲꓽ ꓓꓴ ꓠꓲ, ꓫ. ꓓꓴ ꓕꓲ ꓐꓱ ꓠꓬ ꓣꓳ ꓔꓯ ꓪꓴ‐ꓢ ꓔꓬ ꓗꓪ ꓚꓱ, ꓬꓲꓼ ꓡ ꓝꓲˍ ꓡꓳ꓿ ꓪꓴ‐ꓢ ꓐꓰ ꓪ ꓜꓲ ꓙꓻ ꓡꓯ ꓘꓳ ꓝꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓟ ꓠꓽ ꓐꓲ ꓜꓲꓼˍ ꓟ ꓙꓵꓻ ꓠꓲ, ꓔꓯ ꓬꓲ ꓓꓻ ꓬꓲ ꓖꓶ ꓟꓽ ꓐ ꓡ꓿ ꓙꓵꓻ ꓠꓲ, ꓙꓻ ꓖꓴ ꓠꓬ ꓖꓳ ꓗꓪ ꓡꓰꓽ ꓡꓳ, ꓬꓰˍ ꓟ ꓟꓽ ꓥ꓿ ꓣꓳ ꓠꓬ ꓮꓽ ꓤ ꓮꓽ ꓤ ꓐꓰ ꓔꓶ ꓙꓱꓼ ꓖꓳ ꓟ ꓗꓪ ꓛꓲ ꓬꓰ ꓟ ꓥ ꓡꓳ꓿ ꓪꓴ‐ꓢ ꓐꓰ ꓕꓲ ꓪˍ ꓛꓳ ꓫꓱꓽ ꓢꓲ ꓔꓳ, ꓜꓳꓽ ꓡˍ ꓟ ꓡꓰꓽ ꓣꓳꓽ ꓙꓵꓻ ꓠꓲ, ꓔꓯ ꓪ ꓜꓲ ꓢꓯꓼ ꓙꓳ ꓡ ꓝꓲ ꓢꓲ ꓠꓬꓲ꓾ ꓬꓲ ꓚꓵ ꓘꓶꓽ ꓪ ꓜꓲ ꓠꓯ. ꓡꓰ ꓝꓲˍ ꓟ ꓥ ꓡꓳ꓿
ꓡꓳ, ꓬꓰˍ ꓕꓯ ꓒꓲ‐ꓕꓱ ꓠꓬ ꓬꓰ‐ꓢꓴ ꓔꓯ ꓟꓽ ꓢꓷ. ꓐꓰ ꓢ ꓧꓪ, ꓣꓷꓠ. ꓗꓷ ꓥˍ ꓟꓲ꓾ ꓢꓯ. ꓬꓲꓼ ꓡ ꓗꓷ ꓟ ꓢꓲ ꓒ ꓐꓰ ꓝꓮꓲ ꓕꓲ ꓧꓪ, ꓜꓲ ꓡꓯ ꓘꓳ ꓟꓳꓻ ꓡꓯ ꓘꓳˍ ꓕꓯ ꓬꓲ ꓙꓵꓻ ꓠꓲ, ꓠꓬ ꓝꓮꓲ ꓕꓲ ꓧꓪ, ꓐꓶꓽ ꓔꓴ ꓡꓺꓳ꓿ ꓢꓯ. ꓬꓲꓼ ꓡˍ ꓟ ꓗꓪ ꓙꓵꓻˍ ꓟ ꓙꓵꓻ ꓠꓲ, ꓐꓰ ꓬꓰ‐ꓢꓴ ꓠꓬ ꓟꓲ‐ꓢ‐ꓬ ꓚꓬꓴ. ꓢꓲ ꓒ ꓥ ꓟ ꓔꓯ ꓙꓵꓻˍ ꓟ ꓙꓵꓻ ꓠꓲ, ꓔꓯ ꓟꓳ. ꓖꓶˍ ꓟ ꓢꓲ ꓒ ꓬꓰ‐ꓢꓴ ꓝꓮꓲ ꓢꓯ. ꓬꓲꓼ ꓡˍ ꓟ ꓠꓬ ꓡꓳ, ꓬꓰˍ ꓕꓯ ꓒꓲ‐ꓕꓱ ꓔꓯ ꓬꓰ‐ꓢꓴ ꓐꓱ ꓶ ꓫꓵꓻ ꓙ ꓗꓷˍ ꓗꓪ ꓛꓲ ꓬꓲ ꓠꓲ, ꓡꓶꓽ ꓙꓳ ꓡꓰ ꓝꓲˍ ꓟ ꓥ ꓡꓳ꓿ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓡꓯꓼ ꓐꓳ ꓔꓶ. ꓓꓴ ꓗꓪ ꓕꓯꓼ ꓢꓰꓼ ꓗꓷ ꓠ, ꓟ ꓕꓵꓼ ꓪ ꓟꓶˍ ꓥ ꓟꓲ꓾ ꓬꓲ ꓟ. ꓒ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓒꓵꓽ ꓢꓴ ꓟꓽ ꓥ ꓟ ꓪꓴ. ꓠꓬꓲ ꓪꓴ. ꓔꓲ. ꓪꓴ. ꓑ ꓕꓯꓼ ꓔꓶ. ꓔ ꓟ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓢꓯꓼ ꓟꓬ ꓖꓶ ꓗꓷꓳ꓿
ꓠꓲ, ꓟ ꓫꓵꓺ ꓢꓲ ꓜꓲꓽ ꓘꓴˍ ꓟ ꓠꓬ ꓙꓵꓻ ꓠꓲ, ꓬꓲ ꓡꓯꓼ ꓗ. ꓕꓲꓽ ꓗ. ꓥ ꓡꓳ꓿ ꓪꓴ‐ꓢ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓠ, ꓟ ꓐꓱ ꓶ ꓝꓴꓲ. ꓬꓰˍ ꓟ ꓗꓪ ꓐꓰ ꓠꓲ, ꓞꓼ ꓓꓵꓽ ꓙ ꓒꓳ, ꓬꓲꓼ ꓡ ꓠ ꓗ, ꓡꓳ ꓐꓯˍ ꓥ ꓟꓲ꓾ ꓬꓰ‐ꓢꓴ ꓠꓬ ꓣꓳ ꓔꓯ ꓖꓳ ꓡꓱ ꓬꓰ ꓠ, ꓟ ꓟꓽ ꓓꓻ ꓟꓽ ꓞꓽ ꓕꓵꓼ ꓪ ꓟꓽ ꓖꓶ꓿ ꓪꓴ‐ꓢ ꓠꓬ ꓣꓳ ꓟꓲ ꓠꓯ ꓞꓳ ꓤ ꓠꓲ, ꓟ ꓔꓯ ꓢꓷ.ˍ ꓟ ꓑꓶ. ꓓꓴ ꓥ ꓡꓳ꓿ ꓟꓬꓽ ꓠꓬꓲ ꓬꓳ. ꓚꓰꓽ ꓓꓰ ꓡꓰˍ ꓟ ꓠꓬ ꓣꓳ ꓚꓲ. ꓛꓬ ꓣꓳꓽ ꓒꓵꓽ ꓢꓴ ꓕꓲ ꓣꓳ꓾ ꓟꓶ ꓒꓵꓽ ꓢꓴ ꓕꓲ ꓣꓳ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓔꓬ ꓠ ꓔˍ ꓟ ꓥ ꓡꓳ꓿ ꓣꓳ ꓙꓵꓻ ꓠꓲ, ꓡꓳꓼˍ ꓕꓯ ꓠꓽ꓾ ꓪꓴ‐ꓢ ꓔꓬ ꓗꓪ ꓙꓰ ꓠ, ꓟ ꓙꓻ ꓖꓴ ꓮ ꓡꓲ ꓟꓬ ꓛꓲ ꓶꓽˍ ꓥ ꓟꓲ ꓣꓳ ꓫꓱꓽ ꓙꓰ ꓐ ꓡˍ ꓟ ꓥ ꓡꓳ꓿ ꓣꓳ ꓔꓯ ꓢꓯꓼ ꓧꓳꓽ ꓖꓶ ꓡ ꓢꓴ ꓗꓪ ꓐꓰ ꓮ ꓫꓵꓽˍ ꓟꓲ ꓣꓳ ꓬꓰ ꓐ ꓡˍ ꓡꓳ꓿ ꓮ ꓡꓲ ꓗꓪˍ ꓟꓲ ꓣꓳ ꓙꓰ ꓐ ꓡˍ ꓟ ꓥ ꓡꓳ꓿
