ꓢꓲꓺ ꓒ ꓡꓰ ꓟ. ꓔ ꓟ ꓪꓽ ꓘꓴ ꓓꓴ (Sunday reflection)
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (17) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓵꓻ ꓠ, ꓟ ꓡꓴ‐ꓘ ꓕꓳ ꓶ ꓠꓬ (11ꓽ1‐13) ꓝꓲ. ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓝꓲ ꓓꓴ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓡꓰ ꓐꓰ ꓪꓽ ꓘꓴ ꓠ, ꓟ ꓓꓰꓽ ꓟ ꓙꓵ, ꓕꓯ ꓢꓲꓺ ꓒ ꓡꓰ ꓟ. ꓔ ꓟ ꓪꓽ ꓘꓴ ꓓꓴ ꓟ. ꓖꓶ ꓟ ꓥ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓴ ꓪ ꓗꓪ ꓟ ꓕꓲ ꓣꓳ ꓠꓬ ꓬꓲ ꓗꓪ ꓛꓳꓽ ꓕꓲ ꓣꓳ ꓔꓯ ꓦꓬꓼ ꓔꓱ ꓫꓵ ꓗꓪ ꓙꓰ ꓢꓲ꓾ ꓗꓪ ꓛꓳꓽꓳ꓾ ꓥꓪ ꓔꓯ ꓑ ꓑ ꓢ ꓑꓬ ꓛꓵꓽ ꓖꓶ ꓡꓯ꓿ ꓮ ꓫꓵꓽ ꓑꓶ. ꓓꓴ ꓐꓯ ꓠꓬ ꓦꓲꓻ ꓗꓪ ꓡ ꓟ ꓪꓰ ꓤ ꓔꓯ ꓖꓶ ꓜ ꓓꓴ ꓟꓽ ꓙꓳ ꓟ ꓪꓴ. ꓠꓬꓲ ꓥ ꓡꓳ꓿
ꓦꓲꓻ ꓢꓲꓺ ꓒ ꓠꓬ ꓬꓲ ꓔꓯ ꓕꓽ ꓘꓶꓽ ꓡꓶ ꓐꓰ ꓐꓯ ꓖꓶ ꓢꓲ ꓠꓬꓲ ꓗꓽ ꓘꓶꓽ ꓚꓵ. ꓗꓷꓳ꓿ ꓬꓲ ꓤ ꓠꓱ ꓤ ꓐꓴ ꓥ ꓟꓲ ꓬꓲ ꓔ ꓔꓬ ꓡꓳ ꓐꓰ ꓖꓶ ꓟꓽ ꓐ ꓡ ꓐꓰ ꓐꓯ ꓖꓶ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓛꓳꓽ ꓒꓯ ꓥ ꓟ ꓪꓴ. ꓠꓬꓲ ꓟꓽ ꓓꓽ ꓟꓽ ꓢ ꓓꓰ ꓠꓬ ꓬꓲ ꓟꓶ ꓗꓪ ꓖꓶ ꓗꓷ ꓟ ꓥ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓓꓰꓽ ꓖꓳ ꓡꓱ ꓠꓬ ꓠꓴ ꓪ ꓔꓯ ꓖꓶ ꓡ ꓥꓳ꓿ ꓧꓪ꓾ ꓖꓳ ꓡꓱ ꓠꓬ ꓠꓴ ꓪ ꓟꓶˍ ꓥꓳ꓿ ꓗ ꓘꓶꓽ ꓲꓼ ꓖꓳ ꓡꓱ ꓠꓬ ꓠꓴ ꓪ ꓔꓯ ꓒꓴ ꓖꓶ ꓡ ꓥꓳ꓿ ꓠꓴ ꓪ ꓗꓪ ꓐꓰ ꓐ, ꓐ ꓕꓲ ꓣꓳ ꓠꓬ ꓬꓲ ꓤ ꓠꓱ ꓡꓰ ꓥꓪ. ꓓꓰꓽ ꓠꓬ ꓠꓲ ꓩꓴ ꓖꓶ ꓢꓴ ꓙꓳˍ ꓡ? ꓮ. ꓭ. ꓙꓴ ꓓꓰꓽ ꓠꓬ ꓟꓲ ꓙꓱꓼ ꓖꓶ ꓢꓴ ꓙꓳˍ ꓡ? ꓖꓳ ꓡꓱ ꓠꓬ ꓠꓴ ꓪ ꓠꓬ ꓥꓶˍ ꓟ ꓡ ꓞꓳ ꓥ ꓟꓲ ꓠꓴ ꓪ ꓤ ꓠꓱ ꓐꓴ ꓔꓯ ꓙꓲˍ ꓟ ꓡꓯ ꓫꓴ ꓖꓶ ꓠ, ꓟ ꓢꓷ. ꓠꓬ ꓟꓴ ꓗꓪ ꓗꓪ ꓟ ꓠꓴ ꓪ ꓐ, ꓐ ꓠꓽ ꓬꓲ ꓔꓯ ꓓꓰꓽ ꓢꓴ ꓔꓯ ꓪꓽ ꓢꓶ. ꓟꓽ ꓞꓲ ꓢꓲ‐ꓫꓬ‐ꓟ‐ꓦ ꓖꓶ ꓡ ꓥꓳꓽ ꓟꓽ ꓥ ꓡ ꓐꓰ ꓐꓯ ꓖꓶ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓐꓯ ꓖꓶ ꓡ ꓟ ꓠꓬ ꓟꓽ ꓠꓽ ꓠꓽ ꓪꓽ ꓘꓴ ꓶꓼ ꓓꓰꓽ ꓠ, ꓟ ꓔꓯ ꓐꓯ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓡꓳ. ꓟꓳ ꓗꓷ ꓟ ꓬꓲ ꓛꓳꓽ ꓕꓲ ꓣꓳ ꓠꓬ ꓑ ꓑ ꓢꓽ ꓗꓴ. ꓓꓰꓽ ꓕꓯ ꓟꓽ ꓠꓽ ꓠꓽ ꓓꓰꓽ ꓢꓲ ꓬꓲ ꓟꓶ ꓕꓯ ꓪ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓣꓳ ꓔꓯ ꓟꓽ ꓠꓽ ꓠꓽ ꓶ ꓓꓰꓽ ꓪꓽ ꓘꓴ ꓠ, ꓟ ꓠꓲ, ꓟ ꓟꓽ ꓐꓬ ꓡꓰ ꓪꓴ‐ꓢ ꓔꓯ ꓓꓰꓽ ꓠ, ꓟ ꓐꓯ ꓖꓶ ꓡ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ ꓟꓳ‐ꓠꓲ‐ꓗꓯ ꓠꓬ ꓬꓲ ꓤ ꓢꓔ. ꓮꓴꓖꓴꓢꓔꓲꓠꓰ ꓝꓴꓲ ꓠꓯ, ꓗꓪ ꓐꓰ ꓓꓵ ꓙ ꓒꓳ, ꓡꓶꓽ ꓡ ꓠ,ꓟ (30) ꓘꓳꓼ ꓠꓲ, ꓟ ꓟꓽ ꓐꓬ ꓡꓰ ꓶ ꓓꓰꓽ ꓗꓷ ꓢꓲ ꓠꓬꓲ ꓗ. ꓠꓯ ꓕꓯ ꓬꓲ ꓤ ꓮꓴꓖꓴꓢꓔꓲꓠꓰ ꓠꓬ ꓔꓲꓺ ꓒ ꓓꓽ ꓕꓲ ꓪ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓟꓲ ꓠꓯ ꓢꓷ. ꓠꓲ, ꓓꓽ ꓢꓴ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿
ꓤ ꓠꓱ ꓤ ꓠꓬ ꓬꓲ ꓐ, ꓐ ꓔꓯ ꓕꓲ ꓫꓵꓽ ꓫꓵꓽ ꓓꓰꓽ ꓔꓯ ꓟꓽ ꓙꓲ ꓫꓵꓽ ꓟꓽ ꓖꓶ ꓟ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐ, ꓐ ꓪꓴ‐ꓢ ꓠꓯ, ꓗꓪ ꓶꓻ ꓓꓰꓽ ꓪꓽ ꓘꓴ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓤ ꓠꓱ ꓤ ꓔꓯ ꓠꓲ, ꓠꓵ ꓟ ꓐ, ꓐ ꓐꓴ ꓠꓬ ꓬꓲ ꓪ ꓤ ꓠꓱ ꓤ ꓔꓯ ꓮ ꓘꓶ. ꓛꓲ ꓙꓲ ꓟ ꓔꓯ ꓖꓶ ꓡ ꓟ ꓡꓰ ꓐꓰ ꓟꓴ ꓗꓪ ꓗꓪ ꓔꓬ ꓟ ꓐ, ꓐ ꓪꓴ‐ꓢ ꓥ ꓟꓲ ꓣꓳ ꓔꓯ ꓮ ꓘꓶ. ꓛꓲ ꓙꓲ ꓟ ꓡꓯ ꓫꓴ ꓮ ꓟꓬ, ꓔꓯ ꓖꓶ ꓠ, ꓟ ꓣꓳ ꓔꓯ ꓶꓻ ꓓꓰꓽ ꓠ, ꓟ ꓐꓯ ꓔ ꓟ ꓥ ꓡꓳ꓿
ꓪꓴ‐ꓢ ꓠꓵꓻ ꓠꓲ, ꓠꓬ ꓮ ꓕꓯ ꓥ ꓟꓲ ꓟꓽ ꓖꓴ ꓡꓰ ꓟ ꓠꓵꓻ ꓠꓲ, ꓥ ꓡꓳ꓿ ꓠꓴ ꓥꓪ ꓠꓬ ꓬꓲ ꓔꓯ ꓶꓻ ꓓꓰꓽ ꓠꓬ ꓣꓳ ꓔꓯ ꓬꓲ ꓡꓰ ꓚꓵ. ꓚꓵ. ꓖꓶ ꓓꓴ ꓐꓰ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓓꓰꓽ ꓖꓳ ꓡꓱ ꓠꓬ ꓠꓴ ꓪ ꓟꓶ ꓓꓴ ꓥꓳ꓿ ꓧꓪ꓾ ꓖꓳ ꓡꓱ ꓠꓬ ꓠꓴ ꓪ ꓟꓶ ꓓꓴ ꓥꓳꓽ ꓐꓰ ꓐꓯ ꓔ ꓡꓳ꓿ ꓠꓴ ꓥꓪ ꓠꓬ ꓠꓬꓲ. ꓠꓬꓲ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓠꓽ ꓠꓽ ꓶꓻ ꓓꓰꓽ ꓓꓴ ꓬꓰ ꓡꓯ꓿ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓖꓶ ꓡ ꓟ ꓣꓱ ꓛꓰ ꓡꓯ ꓫꓴ ꓔꓯ ꓘꓳ, ꓣꓴ ꓟꓶ ꓠ, ꓟ ꓟꓽ ꓠꓽ ꓠꓽ ꓶꓻ ꓓꓰꓽ ꓓꓴ ꓬꓰ ꓡꓯ꓿ ꓠꓲ, ꓟꓽ ꓐꓬ ꓡꓰ ꓶꓻ ꓓꓰ ꓪꓽ ꓘꓴ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
